كتـــــــــــاب حلتنــــا.......

Dr.ColD · 10-06-2006, 10:28

سلام كدي يا ناس

عشان ما يحصل لبس و التباس و الموية تملا الشارع !!

لازم الناس تصل لي نتيجية !!

ده ما موضوعنا

نسيت اسلم عليكم زاتي !

سلام مغمس بشطة خضراء مدقوقة بدكوة تحرق جوف الولهان تشرب ليها موية من زير في شارع الاربعين يمكن ترويك !!!!

لحظة......

طبعاً يا أخوان كل زول لو ما كان هو حيكون في زول بيعرفوا قال ليهو قصة ولا هو قال لي الزول داك قصة و لا سمعوا قصة و القصة اخرها ليسها ....

حبوباتنا و خالاتنا وأمهاتنا و مع الأصحاب في ظل الضحى الممدود في نص الميدان عصاري و لا فوق مصطبة الجيران بتكون في ونسات دقاق وقصص خفيفة و غالبيتها بتكون بتتسم بالطابع الخيالي او مستوحاه من بنات الافكار او التراث القديم ناس البعاتي اكل فيلان و لا المرفعيب اتقلب كديس ود الجيران !!
يعني المصداقية بتكون ضعيفة في صحتها 
وفي بعضها بتتسم بالمبالغة في التصوير و تضخيم المشهد و الحدث ودي بتكون عند الشباب غالباً .
تعالوا نفتح كتاب حلتنا الصغير ده ونشوف الحكاوي والقصص و الحاصل شنو وكده !!
انا ابداء ليكم النظرية وان شاء الله تكون مكسب معاكم !!
طبعاً حنحاول موش اكيد يعني الناس تحاول من غير تقيد و اتمنى انو يكون فيها عبر و تكون المساحات مفتوحة 
يلا عشان ما أبراكم كثير
كان يا ما كان !

بتقول قصتنا كان في قرية قريبة من البحر كده بيعيش فيها واحد فلاح مع مرتو طبعا كونو انو فلاح فهو يعتبر تحت خط الفقر بصفرين قرر أخونا الفلاح مع زوجتو الحنونة ان يعملو ليهم كم عملية نصب كده عشان الامور تتصلح و صاحبنا الفلاح ده كان تفتيحا و ماسك مفاتيحها
بس مشكلتو انو أشتر شويه و متسرع شويتين
أها شنو قرر انو يشتري حمار " الله يعزكم " من واحد صاحبو مع دفع قيمة الحمار بالأجل .. قام الفلاح وحشى خشم الحمار بالقروش الحديد ،، وقام يتمشى بالحمار في السوق فبقى الحمار يرجع " يع " ،، وطبعا كان بطلع قروش من خشمو !!

شافهو بعض التجار في السوق فسألوه مالذي يجري لحمارك ؟ .....
فقال بكل هدوء وثقة انهو كما ترون .. انهو يخرج النقود ولكن في السابق كانت كمية النقود اكثر بكثير ولكن بعد ان هرم الحمار قلة كمية النقود !! ...
فقال احد التجار اتبيع الحمار " دقس "
فقال انهو مصدر رزقي وحيكلفك الكثير ..
فقال التاجر سوف ادفع ماتطلب ...
فقال الفلاح ب 1000 دينار ذهب
فوافق التاجر ودفع المبلغ وأخذ الحمار

وذهب الفلاح الى بيته فقال لزوجتو لقد بعت الحمار ...... ولكن المشكلة ان من اشترى الحمار سوف يكتشف الخدعة فما العمل ؟؟

فقرر الفلاح مع زوجتو عمل خدعة جديدة .....
وبالفعل الحمار مات عند التاجر بعد ان اشتراهو بيوم واحد !
فأخبر التاجر اصدقائو بالقصة مع صاحب الحمار فقالوا انهو نصاب ويجب ان ينال جزائو ،،
فذهبوا الى بيت الفلاح فخرجت زوجتو وقالت: الحاصل شنو !؟ " على منقو ؟

فقالوا لها: نريد راجلك أسي ده ! فقالت الزوجة انهو ذهب الى الحلة المجاوره، وإذا كنتم تريدونه بأمر هام فسأستدعية بالحال فقالوا كيف ؟
قالت لهم:انا عندي كلب شفت و وفي كل احتجت الى راجلي في حاجة ضرورية فإنو يذهب الى زوجي ويخبره فيعودالراجل بسرعة ....
فضحك الرجال وقالوا هذا امر عجيب فأرينا ما انتي صانعة ....
ففكت الزوجة حبل الكلب وفر الكلب هاربا الى جهه غير معلومة وماهي الا دقائق فعاد الزوج مع كلب آخر نفس شكل الكلب السابق فقال لزوجتو
خير يازوجتي العزيزة في شنو !

فقالت :هؤلاء القوم يريدونك بأمر هام ....
فقال التاجر: نعم انا اتيت اليك لكي اشتري هذا الكلب العجيب !!....... " " أححاااا"

فقال لهو الفلاح ان ثمنو غالي جدا فهو بمثابة الموبايل للحالات الطارئة...

فقال التاجر :سأدفع لك ماتريد ،،..
فقال الفلاح: ثمنو 3000 دينار ذهب فوافق التاجر بدون تردد ......." هي هي "

فقالت الزوجة: نحن في ورطة سيكتشف التاجر الخدعة و حيطلع عينا !!

فقال الزوج:لا عليك .....

ذهب التاجر الى البيت وهو سعيد بالكلب فأخبر زوجتو بأمر الكلب
فقالت زوجة التاجر: فلنجربه وبالفعل حلوا وثاقة فهرب الكلب فعلم التاجر انه وقع في عملية نصب كبيرة فغضب غضبا شديدا فذهب هو مع اثنان من اصدقائو الى الفلاح دقوا الباب
ففتحت زوجة الفلاح الباب
فقالوا لها: اين زوجك
فقالت سيعود في الحال
وبعد انتظار نصف ساعة حضر الزوج...

وقال لزوجتو: الا تضيفي الرجال يا مره !!
فقالت الزوجه هؤلاء ضيوفك فقم واعمل الواجب.. انا ما خدماتك !!

فغضب الفلاح وأخرج سكينا من جيبه وطعن زوجتو وأخذت الدماء تسيل من زوجة الفلاح... طبعا هذه خدعه جديدة

فقال الرجال: هل انت مجنون تقتل زوجتك لأنها لم تعد الشاي ؟؟؟
فقال هي كذلك كلما نرفزتني اقتلها !!
فقالوا وهل قتلتها من قبل
قال الفلاح نعم
فضحكوا وقالوا لاشك انك مجنون كيف قتلت زوجتك من قبل !!!
فأخرج من جيبو صفارة وقعد يصفر بيها فقامت الزوجة
وكأنها لم تقتل فتعجب التاجر

وقال له: اريد ان اشتري الصفارة
فقال له الفلاح ب 10000 دينار ذهب فوافق التاجر.

وذهب هو وأصدقائو
فقال له صديقه اريد ان اجرب الصفارة مع مرتي !
أداهو التاجر الصفارة " وصفر "
وبالفعل قتل الراجل زوجتو وقعد يصفر الليل كلو ولكن لا حياة لمن تنادي .. المراه ماتت بصفارة !؟.

وفي الصباح قال التاجر لصديقو ماأخبار الصفارة
فقال الصديق: انها عجيبة وفعالة (الزول بقى مجرم )
فقال الصديق الآخر: انا سوف استعملها اليوم فوافق التاجر
وطبعا المأساه حتكررت
وأخذ التاجر الصفارة وذهب الى زوجتو واختلق معها مشكلة من مافي وقتلها .. وأخذ الصفارة وقعد يصفر و يصفر و يصفر ولكن للأسف الصفير كمل !!

انتهى الأمر فغضب التاجر وذهب الى اصدقائو وأخبرهم بالأمر فقال له الأصدقاء ماتت زوجاتنا !!!

والفلاح نصاب كبير كلما ذهبنا بأمر خرج لنا بأمر آخر
فأخبر التاجر اهل المدينة بالأمر فقرر اهل المدينة الأنتقام من الفلاح فذهبوا الى منزله

فخرج الفلاح ومعة خدعة جديدة...ولكن قبل ان يتكلم الفلاح قاموا بتقييده ووضعوه في شوال وذهبوا به الى البحر لكي يرموه في البحر وعند الظهر قرروا ان يأخذوا قسطا من الراحة في ظلال الاشجار القريبه من البحر ..

فناموا جميعا وسمع الفلاح صوت اغنام قريبة منو فأخذ يصيح: لا أريد ان اتزوج بنت الملك لا أريد ان اتزوج بنت الملك
فدفع الراعي الشمار فاقترب من الشوال وفتحو
فقال للفلاح: مالك
فقال له الفلاح لا اريد ان اتزوج بنت الملك عندي بنت عمي بحبها ولا أرغب بالزواج إلا بها
فقال: هل انت مجنون هذه بنت الملك يا فاره !!
فقال الفلاح:ان كنت انت تريد ذلك ففك قيدي وادخل الكيس وانا سوف احرس اغنامك لحدي ما تجي ..
ففرح الراعي بالأمر وبالفعل دخل الراعي الكيس

وعند العصر ذهب اهل المدينة بالكيس الى البحر وألقوه و عادوا الى المدينة.

في اليوم الثاني وجدوا الفلاح ومعه الكثير من الاغنام (300 رأس من الغنم كده ) فتعجبوا للأمر !!!!!!!

وقالوا له: مالذي حدث ومن اين لك هذه الأغنام؟
فقال لهم: لقد رميتوني في البحر ولكن كنت قريبا من الشاطيء فأعطتني حورية البحر هذه الأغنام !!!
ولكن لو كنتم رميتوني ابعد لكنت حصلت على اغنام اكثر ؟!!

فقال له اهل المدينة:أإذا ذهبنا الى البحر فسنحصل على أغنام وأنعام...زيك
فقال الفلاح: نعم وحاولوا ان تبتعدوا لكي تحصلوا على اغنام اكثر و اكثر ...

وبالفعل ذهب كل اهل المدينة الى البحر وانتحروا انتحار جماعي وهم لايعلمون انهم وقعوا في كيد نصاب محترف ! اما الفلاح المفتح فهاجر الي مدينة أوروبية وعاش بها حياة سعيدة وشال الجنسية !!

اشوف الحاصل و اجيكم تاني..

3ashg hana · 10-06-2006, 12:30

يديك العافية يا حبيبنا حاجة شديدة

اقتباس:

فقال له الفلاح لا اريد ان اتزوج بنت الملك عندي بنت عمي بحبها ولا أرغب بالزواج إلا بها
فقال: هل انت مجنون هذه بنت الملك يا فاره !!

ههههههههههههه دي تحديدا" شديدة

اقتباس:

اشوف الحاصل و اجيكم تاني..

انتة زاتك حاجة ما حصلت يا حبيبنا
كل محبتي

Dr.ColD · 11-06-2006, 18:26

عاشق حبيبنا والله يا حنين ..
وبالجد أشكرك كثيراً لمداخلتك يا حنين وبالجد اتمنى انو تكون عجبتكم القصة دي يا حبيبنا

اخوك ganna be shy وكده يا حنين

يا حنين سمعت بقصة فارس الهيجة (( القبيلة ))
الود الي اسمو النضيف - الكوج ياخي !!

اوكي اوكي انا اقول ليك الزول ده مالو وكده

فارس الحلة

المشهد الاول ::

النضيف فارس الحله الذي لا تشق له جلابية يمتطي جحشه وينطلق إلى الترعة ليسقى جحشه ... فيشاهد مجموعة بنات يردن على الماء ..
فيقول : شنو الزحمة دي ، التقول فرن !!...
ثم يرى بينهن سلمى فيدق موبايل النضيف وقلبه يغني ..
آآآه الأهيف ابى ما يلين ...

ويغادر الترعة وسط ضحكات البنات الله يجازيهن ...

المشهد الثاني ::

سلمى تشكي حبها لصحابتها الريد و الكسير
السرة التي ترد عليها اسكتي يا سجم والله غير ود عمك فضل ما ليك زول ..
فترد سلمى عليها : متينك يا عفنه ما تحطمي مشاعري !!!

المشهد الثالث ::

فضل يشرب الجبنة مع ابو سلمى شيخ القبيلة ..
ويطلب يد بنت عمه سلمى !!
فيوافق الشيخ ويخبر سلمى بالخبر فتغضب سلمى وتقول : يا بابا فضل ده شماسي وبيشرب بنقو وما عندو شهادة كيف آعرسو .؟!
فيرد ابوها .. قفلي خشمك ده ,
مالك إلا ... ولد عمك و هو أولى من الغريب يغطي قدحو بش شنو بغطى بيبسي !؟
وبعدين النضيف هو فارس القبيلة والكل بريدو
صح هو ما بكتب مواضيع كويسة في المنتديات لكن شنو الود شفت عديل كده !

المشهد الرابع::

النضيف يقابل سلمى في السوق الشعبي ومكان الخلط حق القبيلة الترعة ويتبادل معها هدايا الحب .. أهداها حله جديدة وهي أهدته كيس تمباك..
النضيف يقول لسلمى : ليه يا عمري ما عاملة بلوك لي ود عمك فضل !!
فترد سلمى عليه : ما بقدر ..
وتوريهو سلمى بالخطوبة بتاعت فضل ليها ... فيحزن النضيف و تقفل معاهو وتدمع عيناه ( دخل فيها تراب(

المشهد الخامس ::

الشيخ ابو سلمى ورجال الحله متلمين في بيت الشيخ يتفرجوا في برنامج من سيربح المليون

يأتي خليفة راعي الحلة يصرخ : البهايم يا حاج اتسرقوا يا حاج ياحاج الحق
و يفز شيخ الحله و الرجال ويصرخ الشيخ ابو سلمى ويقول :-

من سيرد البهائم ويربح بنتي سلمى وله ثلاث وسائل مساعدة=
يشيل بندقتي وحصاني - او يحذف عصا - او يتصل على خليفة ؟؟؟

ويقف فضل ويقول " انا لها يا عمي ...
وينطلق فضل على حصان الشيخ ليلحق بالغزاه ليرد البهائم

المشهد السادس ::

الغزاة يمسكون فضل ويدقوه ده الرجله ويشيلوا حصانو وبندقيته
ويخلونه يدقها كدراوية للحله ..طلع ما عندو موضوع !!!

وهنا يقفز النضيف ويقول : مافي زول حيرجع البهائم غيري
ويرد عليه شيخ القبيلة : بالله اتلهي و اسكت قال ارجع قال !

وينطلق النضيف ويلحق بالغزاه ويكفتهم كلهم براهو ( شفت )

رجع البهائم كلها ما عدا كم تيس ماتوا في الطريق من حمى الجداد

المشهد السابع ::

يصل النضيف مع البهائم للحله.. وهو سعيد بفوزه بسلمى .. (بالهدف الذهبي)

وتتم الخطوبه والشبكة ( ابراجها فل ) وعمت الفرحه الحله ويتم تحديد الزواج في العطلة الصيفيه في منتزه أمبدة العائلي
..
ويشتري النضيف كم حصان بالتقسيط ويبيعن كاش عشان يوفر متطلبات العرس والجهاز وكدة .

فاصل غنائي

سوو يا سوو حبيبي
حبسووو

حبيبي عاوز لمبه ,, من فين آجيب له لمبه

الواد بياع اللمبه حبسوني
وحبسووووهـ

.........

دووهـ يا دوووهـ حبيبي
جلدوووهـ

(((((((((( عدنـــا )))))))))

المشهد الثامن ::
قبل الزواج بكم شهر بدأت تمرض سلمى مرضا شديدا وبعد ان عجز دكاترة الحلة في علاجها ياخذها ابوها إلى المدينة ( تورط المخرج )
ويعرضها على اكبر الاطباء..

وبعد فحوصات شاملة يقرر الطبيب ان سلمى تحمل صفات وهرمونات ذكورية!!
ولابد من عملية لتغيير جنسها من أمرأة إلى رجل ..(اتسيك النضيف )

وتتم العملية وتصبح (سلمى) <=== سرور

المشهد التاسع ::

فرح ابو سلمى لانه يريد ولد يرث حكم القبيلة بعده ...(قال وراثة قال )
وفرحت سلمى التي اصبحت سرور لانها كانت معجبه بصديقتها أمل ورسلت ليها ايميل وبشرتا...!

وقعدت تسجد شكراً لله..

وعادوا للحلة بعد ان تبدل حال سلمى إلى سرور وقصت باقي الظفائر بعد ما كانت بتسوي لشعرا زيت خروع..

المشهد العاشر::

يصل الخبر إلى النضيف الذي كان قد جهز بيت الزوجية (خيمة)
فيسقط مغشيا عليه (مسكين.. مالهو دور ثاني )
فيشمموه كلونيا وبصل ولكن دون جدوى فقد مات عواد ...

وعلم سرور (سلمى ) بموت النضيف فحزن حزنا شديدا جعله يتزوج من أمل !

النهايــــــــــــــــه

3ashg hana · 11-06-2006, 19:56

هههههههههههههههههه الله يجازيك ياخي قطعت مصاريني ياخي عديل كدة

اقتباس:

الغزاة يمسكون فضل ويدقوه ده الرجله ويشيلوا حصانو وبندقيته
ويخلونه يدقها كدراوية للحله ..طلع ما عندو موضوع !!!

دي مبالغة يا حبة والرجلة عندك

اقتباس:

وبعد فحوصات شاملة يقرر الطبيب ان سلمى تحمل صفات وهرمونات ذكورية!!
ولابد من عملية لتغيير جنسها من أمرأة إلى رجل ..(اتسيك النضيف )

والله دة يشرب ما يرواء

اقتباس:

يصل الخبر إلى النضيف الذي كان قد جهز بيت الزوجية (خيمة)
فيسقط مغشيا عليه (مسكين.. مالهو دور ثاني )
فيشمموه كلونيا وبصل ولكن دون جدوى فقد مات عواد ...

والله ياخي الله يرحمو حظو زي وشو ههههه
الله يديك العافية يا حبيبنا
بالجد حاجة شديدة ياخي كتر من الزي دة ياخي
تحياتي

عمران عامر · 12-06-2006, 11:44

الراوي الرائع المدهش دكتورنا سلامات

أما قصة الحبوبات والناس القدام ديل أقصد الكبار ديل أكيد ليها موقع مهم من الاعراب الحياتي وهي سلسلة تتوارث جيل عن آخر كما العادات الضارة التي ورثناها وأصبحت رغم ضررها مكملة ومتممة للشئ يعني زي ( المزه ) مع صحن الشية وهي من الجمر على طول ومن فوق ليها البصل الأبيض زي ما في سوق الناقة مع العلم بأني لم أشاهده حتى والآن بعدت بيننا الشقة و آآآآآآآآآآآآآآآآآخ يا الأهيف وانت يا الابيض ضميرك .

القصة حلوة ولكن زي ما جبلنا في التفتيت والتفتيش نحورها كقصة يستفاد منها في حدود القناعة لأن الشاهد في الأمر الأن اصبح حالنا كحال هؤلاء التجار كل ما نشوف زراعة عليها أخذنا كسرة وننشط في هدمها لكي تصير لنا دونا عن الأخ أو الصديق مما يوردنا موارد ما كان خاتمة لهؤلاء الجشعين وللاسف الآن الزمان أصبح يعج بهم فقط مما جعل الدنيئة تتفشي وحب النفس والذات وطعن الآخرين من الخلف .

وكمان المساءلة أصبحت في الرزق تعتمد على الفهلوة والخفة وإنك تكون مقنع للناس فيما تروج له ولضعف النفوس تجد الكل يهرول نحوك وهو يمد يده لكي تصل قبل الآخرين وتفوز بما تمده أنت من بضاعة بخسة ولو تروى الجميع لعرف مصدر الخبر ولكن الكل يمني نفسه بالغنى في زمن الوحل هذا .

حتى الراعي المسكين ده وهذا يفسر لك بأن الجري ليس وقفا فقط على ذوي الكروش والقروش وإنما يتساوى فيه حتى المعدم والذي يمنى نفسه بتغيير في حياته وطريقة معيشته ناسيا أو متغافلا عن الأرزاق مقسمة من صاحب الخزائن من أول النشأة والخليقة لكن نسوى شنو للهلع والذي خلقنا به .

عموما نقول الطمع ودر ما جمع والآن كل المعالجات تتم في قالب درامي حتى لا يمل الناس من الوعظ والتذكير ولكن يكون كجانب ترويحي لهم عن طريق الدراما ولكن أتمنى أن يصل الفهم لمستوى الفكاهة وأن لا نشاهد أو نسمع أو نقرأ ونضحك ونخرج من المولد بدون ذكرى وموعظة ، طبعا كل يقرأ على حسب ما يريد ويفسر كيفما يشاء وكل على ليلاه وأنا على ليلاي أبكي .

ودمت يا راقي

عمران عامر · 12-06-2006, 11:46

يا خو ي الدكتور ـــ زمن الفوارس غار والنضيف ده بي جحشه ده ما بيأكل عيش مع ناس اللكز والشبح وليلي بنت علوى والتي شاخت وسوناتا والصني ووووووووووووووو مسميات عما قليل ستعجز اللغة العربية أن توفر لها مدلولات وأحرف حتى تفيها .

شكله كده النضيف ده بعيييييييييييييييييد عن الحضر لانه لسه البنات بترد الموية أيا كان موقعها (البحر أو العد ) عشان كده صدقني لو كان راكب ( نوبيرا ) كان أمات البنات يلدن عليهو ويسمو خليه يعرس بناتهن لكن ما مشكلة كل ناس وليهم عاداتهم والطبيعة جبل ونحمد الله على ذلك لاننا لم ولن نتملك المسميات العجيبة ولكن الجحش أقرب مع إنه سعره أصبح خرافي في زمن الاستثمار الأهوج هذا والذي طال كل شئ حتى البيت المسكون أصبح يقسم غرفة ونص للائجار والأخرى فيها كل الأسرة كان عاوز تنقلب ساكت إلا تطلع بره وتجئ راجع .

يعني قلت لي سلمى مكسره في النضيف ده الكلام و(عقبال ما نلقى لينا سلمى ونكون ليها نضاف) ، تعرف عينة السره دي البنت الحاقدة تكون عاوز ليك بنت طالبة وهي زميلتها تقوم تحرضها عليك وتقول ليها انت عويره الجامعة والتخرج وليس الروب وعمل الروج وتصور هذا هو المهم ولكن فيما كان التخرج ولما كان لبس الروب ده ما مهم المهم حفلة وتلبس البرنيطة المقعره في رأسها وتكون معاها صاحباتها وناس البيت مأجرين حافلة ود الجيران أو جكس الأخت الصغيرة وكده .

والله عاد ما كان شماسي وبيشرب بنقو خلاص كملت الناقصة وشدي حيلك وما ليك إلا هيفاء بدلا من السره شايف السره لما تقدم ليها فضل جرّت ناعم وما شحنتها تعرف ليه لانه ا:كيد عينها على النضيف ولكن سلمى واقفا ليها في حلقها وما مديها طريقة .

تمام مكان الخلط هنا وشااااااااااااااااااااارع النيل وحدائق كم أبريل تعرف في مرة من المرات وانا بالسودان قبل ما نضرب متاهات الغربة اللعينة دي ماشين لينا في مهمة عمل وكان الناس خالطه ومجكسه وشوفي عيني الراكبه العربية الولد راقد للبنت في كرعيها أنا صرخت بأعلي صوتي يا ناس يا عالم ما تخلونا نعيش زي الناس ديل هو أنحنا عندنا أجنحة ولا ما من نفس طينتهم وهكذا كان حالنا بالسودان بكاء شديد ، المهم الآن تعددت أماكن الجلسات ذات الاضاءات الخافته والتي لن ترى أصبعك اذا مددته والموسيقي الحالمة ويجيك بتاع الكاشير لما تجي طالع يقول ليك 200.000 ألف لييييييييييييييه أنا أصلو طلبت شنو وقعدت وين غايتو استنزاف شديد عشان كده أخير لينا جحش النضيف والترعة أو البحر محل الورود يعني كلها قبضة برسيم لأبو الاجحاش وكده .

بعدين يا فرده طالما المساءلة فيها ( بلوك ومنتدى ومشاركات كثيرة أو قليلة ومميز وذهبي وفعال ونضيف أقصد نشيط ) وبعد أن انقلب سلمي لـ سرور بعدين تعال هنا هم ما خدين حرف السين ده مقاولة بعد تغير الحال كان من المفترض كان التسمية تكون ( الله جابو ) عشان التحويلة الكبيرة هذه يعني كان لسه كان لازال سلمى والنضيف ما عرسها ولا فضل كان البورة تبقى بورتا شينة وعرس ما في وشباب الزمن متسكع وملتهى في فعاليات كأس العالم بمناسبة كأس العالم ده حقو حكومتنا تعمل ليها مسابقات ككأس العالم ويكون خاصة بالزواج فقط والله كلنا نشترك .

طيب نعود ليك تاني لقصة المسميات البلوك والعولمة طالما في حاجة زي دي وعشان النضيف المسكين ده مات كان من قبل أن يموت وينفعل للدرجة الغريبة دي والتي فاق فيها مجنون ليلى وعنتر وجميل بثينة تعدى كل هؤلاء وأصبح شهيد الغرام كان يتزوجوا أمل دي عرفي لانها أكيد طالبة جامعية وحتى يكون في ملح وملاح لسباق العلاقة ما بين سلمسرور والنضيف وبكده كان يكون في عدل في المساءلة خاصة وأن العرفي بقى أسهل من إنك تدخل ايدك في جيبك والله شنو رأيك في ختامي هذا

ودمت أخى

Dr.ColD · 17-06-2006, 20:34

عمري أنا !!

شنو يا راجل ألا نكورك يعني ولا شنو ؟ّ!؟
يا زول راجينك على الطلاق راجكم كلكم !

ولا ما حجوكم و كان كا حجوكم نشوف بعد كده الحاصل شنو

ولا شنو ّ؟

hazim · 17-06-2006, 21:56

اقتباس:

الشيخ ابو سلمى ورجال الحله متلمين في بيت الشيخ يتفرجوا في برنامج من سيربح المليون

هههههههههههه