سرقة وجبة سودانية

**معتز زيزي** · 02-03-2006, 13:35

بالأمس دعيت لتناول وجبة الغداء مع بعض من الزملاء الذين يدرسون معي بالدورة التدريبية التي تقام هذه الأيام بمدينة الرياض ... توجهنا إلى مطاعم (بيتزا هوت) ... ولجهلي بأنواع البيتزا طلبت كما طلب زميلي الذي كان يجاورني وكان طلبه متمثلاُ في وجبة (لازانــــــــــــــــــيا) وعندما حضر الغداء كانت المفاجأة أن وجبة ( اللازانيا) كانت عبارة عن (ملاح شرموط) مغطى بطبقتين من الفطائر تحت مسمى وجبة (لازانيا) ... والغريب في الأمر أنني أحب ملاح الشرموط لدرجة جنونية فقط الأختلاف جاء في المسمى والسعر الخرافي لتلك الوجبة والحمد لله أنني كنت مدعو لذلك الغداء ....

،،،،،،،،،،،،،،،،،،،،،،،،،،،،،،،،،،،،،،،،،،،،،،،

شجراوى · 02-03-2006, 13:57

إنشاءالله شبعته ...!!!!

شجراوى ( الاخضر )

**طارق** · 02-03-2006, 14:27

كيف يعنى يازيزي .. ملاح الشرموط الواحد ده ..؟
ولا حاجه تشبه ..!؟ وكلام غريب .. اذا في وجبات
ومسميات غريبه بالمره ..!؟ وانا متأكد اذا سوقنا
لكسرتنا وملحاتنا .. بأسامي (new look ) ...
حاتسوق عالميا .. والسودانيين حايشتروها ... !؟
وزي ما قال واحد بلدياتنا .. الفرق بين القراصه والبيتزا ....شنو ؟؟؟؟

تشكر يا معلم ...

ابو اسراء · 02-03-2006, 14:44

والله صادق يا زيزى
الناس ديل لافين فى دائرة واحدة بس دجاج ولحم
وما بعيد يكون واحد من الخواجات الموجود الايامات دى فى دارفور يكون اداهم الفكرة دى وقبض حقوا
قلت لى سرقوا ملاح الشرموط بتاعانا .طيب دى حنحمى حقوقنا التراثية فيها كيف حسى؟
دمت عزيزنا زيزى

**طائر النورس** · 02-03-2006, 15:10

حبيبنا معتز
اول حاجة بالهناء والشفاء ومطرح مايسرى يمرى
طبعا هناك اسماء كثيرة لبعض المواد البقولية والخضروات بتختلف تسمايتها من بلد لاخر فلاول وهلة بنعتقد من اسم الوجبة دى انها غريبة جداً ولكن بالنظر الى مكوناتها بنجد ان نوعية الطعام المتواجد بها معروفة تماما لدينا بس الاختلاف فى التسميات ...
وبينى وبينك بقى عندنا هنا حتة بتاعة ( حنكشة ) طعامية يعنى كلما تكون فى مطعم راقى وتطلب مأكولات زات مسميات غربية وغريبة فهذا يعنى انك متحضر وزول راقى ....
انا خايف بعد الكلام القلتو دة يقوموا بناتنا وقبل مايخشوا المطبخ الواحدة تقول لناس بيتهم ايه رايكم الليلة اعمل ليكم (لازانــــــــــــــــــيا) ...!!!!!

المسافر · 02-03-2006, 15:13

للأسف عزيزى زيزى هناك الكثير من الاشياء المرتبطة
بالتراث السودانى وهى فى حالة سرقة دائمة مع
اختلاف المسميات .....!!
اغانى......العاب ...... وغير ذلك ...

عزيزى زيزى.......الا تعتقد بأنه فى ظل هذا الواقع
كل اطعمتنا بطعم الورق....!!!

مع محبتى......

عاشقة السودان · 02-03-2006, 15:14

السلام عليكم بس كنت عايزة اسال سؤال شنو هو ملاح الشرموط دا انا ماقاعدة اعرفا اكلات سودانية كتيرة

**هشام عوض** · 02-03-2006, 15:26

والله يا زيزي بتعمل جنس شبك في الناس .. نحنا ذنبنا شنو لو ناس " ضواحي " السعودية دي يجو الرياض وبعد داك تجيهم " صدمة " في أنواع " العضات " الراقية ...؟؟؟
اللازنيا دي يا حبيب وجبة إيطالية مشهورة زي ما قالو لينا ..مكوناتها مكرونه ولحمة مفرومة مطبوخة بي صلصة وبشمل .. بس المكرونة بتاعتها بتتفرد وتتخللها الطبخة بتاعت اللحمة ..يعني في شكل طبقات .. والطعم اللي بيجيك زي ملاح الشرموط ده سببه اللحمة والصلصة ..لكن ما في حاجه لايوقه ..لأنو مافيها لا ويكة ناشفة ولا بامية مفروكة .. ويمكن كل الأكل اللازانيا بيستطعم الطعم الاقرب لي طبيخنا لأنو صلصتو مسبوكة زي طبيخ أي ملاح سوداني ..
ملحوظة : أقل وجبة كاملة سعراً في بزاهت هي اللازانيا .. وفقط بي 21 ريال والريال الفردي ده حق البيبسي ..ولو مغالطني نمش الليلة ..ولو زادت هلله واحده أنا ح أدفع حق معازيمك كمان ..هههههه..اوعا تطلع بينا الكفر يازيزي ..عشان ما تتزحلق ... ههههههههههههه

**معتز زيزي** · 02-03-2006, 16:31

اقتباس:

إنشاءالله شبعته ...!!!!

شجراوي حبيبي ... شبعت لأنني وأنا بأكل متاكد أن ما أتذوقه (ملاح شرموط) وليس (لازانيا)
-تخريمة- العشاء اليوم على حسابي (لازانيا) بمنزل (فنجان جبنة)...

اقتباس:

وانا متأكد اذا سوقنا
لكسرتنا وملحاتنا .. بأسامي (new look ) ...
حاتسوق عالميا .. والسودانيين حايشتروها ... !؟

عابر سبيل
وأن كثرت المسميات فالطعم واحد...

اقتباس:

الناس ديل لافين فى دائرة واحدة بس دجاج ولحم

عزيزي أبو أسراء
بالنسبة للدجاج ظهرت أنفلونزا الطيور ...
بالنسبة للحوم ظهرت أمراض الوادي المتصدع...
يعني بعد دا سيتوجه الجميع للخضروات ويا بخت الخضرجيه

اقتباس:

الاختلاف فى التسميات ...
وبينى وبينك بقى عندنا هنا حتة بتاعة ( حنكشة ) طعامية يعنى كلما تكون فى مطعم راقى وتطلب مأكولات زات مسميات غربية وغريبة فهذا يعنى انك متحضر وزول راقى ....

أخي طائر النورس
أنا قدمت لمدينة الرياض وشاهدت بعض الأسر السودانية تستجلب وجباتها من المطاعم ولمن أقول أسرة يعني مرأة ومطبخ وبيت و...الخ ومن هنا نستطيع أن نطلق كلمة (حنكشة) بكل ما تحمله هذه الكلمة من معنى ولكن ياترى ما السبب...؟؟؟ هل أصبح طعام المطعم أشهى من طعام البيت ..؟؟؟ الموضوع كبير حقاً ويحتاج لفرد مساحة له ...

اقتباس:

عزيزى زيزى.......الا تعتقد بأنه فى ظل هذا الواقع
كل اطعمتنا بطعم الورق....!!!

الرائع فينا (معتز المسافر) .... ليك وحشة كبيرة والله ...
سالني أحد أصدقائي ذات مره لماذا تأكل ...؟؟
فقلت له أكل لأعيش ... فسالته نفس السؤال وجاء رده ..
أكل (لأسف) ....
لذا لا أتفق معك بأن كل أطعمتنا بطعم الورق ...

اقتباس:

شنو هو ملاح الشرموط دا انا ماقاعدة اعرفا اكلات سودانية كتيرة

عاشقة السودان
سؤالك سيتم تحويله إلى أخونا (هشام عوض) فقد تساليني لماذا هشام ...؟؟ قأقول لكي هو خبير في هذه الأكلات السودانية وخصوصاً فهو هذه الأيام (عزابي) نسبة لسفر أولاده لقضاء الأجازة بالسودان يعني (زول مطبخ) ...

اقتباس:

لكن ما في حاجه لايوقه ..لأنو مافيها لا ويكة ناشفة ولا بامية مفروكة ..

منو القال ليك .... والدليل على ذلك أنني الوحيد الذي قام بإلتهام وجبته كاملة لأنني كنت أستخدم كلتا يداي ... وبقية الشباب لم يستطيعوا فعل شي وهم يستعملون الملعقة والشوكة ...

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،،،،،،،