الاشراف : الانتخاب

وليد حسين · 02-03-2006, 04:32

العشاق الرائعون ...سلام قدر شوق للقاء فى مساحات الزمن الفسيحة .. وحبابكم الف وكل زول ربنا يسهل ليهو الطريق الساير فيهو ... المهم فى الامر انه الليله انا جاى باقتراح ما عارف ممكن نكون فيهو مختلفين لكن اساسا نحنا بنحاول نكون ديموقراطيين وننشر فكر جديد بيننا للوصول للخيار الافضل ....المهم الموضوع هو الاشراف ولى سؤال مهم هل الاشراف تشريف ام تكليف ؟؟؟؟ اذا كان تشريف فلابد انه يكون بالانتخاب او التصويت من اغلب الاعضاء ثم يصبح المشرف مشرفا ....اما اذا كان تكليف فمعناهو انحنا عندنا حاكم ديكتاتورى بيصدر الامر ويمليه على الجميع بدون ان يستشير ... انا ماقاصد اى مشرف هنا بس داير اوصل شى بسيط انه لازم يكون عندنا عمل واضح وبتصويت الاعضاء ... وكل ده عشان نوصل بعشاق السودان كمنتدى الى درجة المنافسة العالمية والرجاء انه المشرفين مايفهمونى غلط بس الامور لمن تكون فى العلن بنكون مرتاحين ... ثم تانيا هل الناس الجايانا من بره ممكن تحكمنا(تشرف علينا يعنى بكون عندها الحق فى انتقاء المواضيع وتنزيلها وحذفها بدون درايه بها وخصوصا لو بالدارجى بتاعنا لانه خاص جدا) وهى ما فاهمه حاجاتنا الصغيره او كالغزو الفكرى ونشر اى فكر جديد اجتماعى غريب عنا كان او غيره الرجاء انه يكون المشرف سودانى الهوية والفكر وليس غريبا عنا عشان نتواصل بكيفية معقوله لاننا بنفهم بعضنا البعض وممكن تكون هنالك روابط ممتده ... والرجاء انه كلامى يكون ما لمس اى واحد فى العشاق بدون فرز لكنه اقتراح قابل للمناقشة والباب مفتوح للجميع ..... ودمتم

شجراوى · 02-03-2006, 14:37

رفيقى وليد حسين عندما يكون التشريف لانحتاج ساعتها ( لانتخاب ) أو تصويت فتلك الاشياء تمنح فقط للذى نقرر أن ( نكلفه ) بالقيام ببعض الاشياء التى نحتاجها ....

إذاً يكون الاختلاف بائن وتكون الديكتاتوريه هى الصورة ألصحيحه ( للتشريف ) وذلك بوضع النياشين على الصدور وإطلاق الالقاب ( المشير ) و( المهيب ) و( سيدى ) و( وهلمجر ) ....

أما مقترحاتك الاخرى فهى قابلة للنقاش من الجميع ولى مقال ( أخر ) باذن الله ... إذ أن الخبرة وحسن القيادة صفة لا تميز جنس عن أخر ولك ودى

شجراوى ( الاخضر )

**طارق** · 02-03-2006, 16:56

اخى وليد حسين ...

لكل اداره بأي مؤسسه او موقع .. نظرتها في ادارة وانتقاء
افضل موظفين حتى تدار المؤسسه بأفضل حال .. وتتطبق
كل الاستراتيجيات والاهداف التى قامت عليها تلك المؤسسات
.. وفي مجالنا هنا .. المنتديات .

فالحمد لله تم تطبيق كل الديموقراطيات التى تنتمى الى عالم
الانسان الحر وللايمان بمبدأ .. اذا كنت تعشق الحريه فلايمكنك
ان تعيش بدونها .. لذلك اتيحت في بدايات هذا المنتدى ..
العمل مبدأ ترشيح العضو لنفسه .. ولمن يتحمل المسؤوليه
الملقاة على عاتقه .

ومن ثم تم تطبيق .. الانتخاب في ترشيح الاعضاء لاكثر
الاعضاء نشاطا او من ترشحهم الاداره .. ويحق للاعضاء
انتخابهم نسبه لمعايير كثيره . وحاليا نطبق مبدأ .. الاختيار ..
نسبه لمعايير الفكر والكتابه واسلوب العضو ومن ثم مراسلته ..
لمشاورته .

فباب المنتدى مفتوح لكل من يريد ان يترشح .. ويأنس في
نفسه القياده الحكيمه .. والنظره بعيده المنتدى لوحى القلم والصبر .

اخى وليد .. النت اصبح عالم واسع .. والعالم اصبح قريه صغيره ..
وتتلاقح فيها الثقافات والافكار وتمتزج فيه العقول لتنتج ثمرات جيده ..
لتجارب فكريه رائده بالمنتدى , والمنتدى السودانى هذا ليس حكرا
على بنى السودان فقط وانما هو بوابه لكل من يتحدث العربيه
من اهل العرب والمسلمين ومن نجده مؤهلا من العرب للانضمام
الى قياده المنتدى , نضمه الينا حتى يعرف السودانيين وثقافتهم .

نريد ان يتعرف غيرنا على ثقافتنا وان يفهموا من هم السودانيين ,
وكيف يفكرون وما هي ثقافتهم , واجد ان المنتديات والمنابر الثقافيه
لهى البوابات لتلاقح الثقافات والتعرف على الغير .
واتمنى ان تعرف اخى وليد .. ان المشرف لا يتحكم بحسب
مزاجيته في حقوق الغير .. وانما هناك لوائح وقوانين تحكمه
من اجل مصلحه الجميع .

اشكرك ..

**Silent Storm** · 04-03-2006, 13:09

اقتباس:

ثم تانيا هل الناس الجايانا من بره ممكن تحكمنا(تشرف علينا يعنى بكون عندها الحق فى انتقاء المواضيع وتنزيلها وحذفها بدون درايه بها وخصوصا لو بالدارجى بتاعنا لانه خاص جدا)

اهلا بك اخي وليد اضافة الى

الاشراف ليس كما قلت بل ان لكل مشرف مهام محدودة جدا لا يستطع ان يتعداها ، فمثلا ( مشرف المنتدى الادبي ) لا يستطيع ان يتحكم في مواضيع المنتدى الرياضي وهكذا ...
بالنسبة للحذف / النقل / التحكم بالمواضيع توجد قوانين خاصة تحكم عمل المشرف

اقتباس:

الرجاء انه يكون المشرف سودانى الهوية والفكر وليس غريبا عنا عشان نتواصل بكيفية معقوله لاننا بنفهم بعضنا البعض وممكن تكون هنالك روابط ممتده ... والرجاء انه كلامى يكون ما لمس اى واحد فى العشاق بدون فرز لكنه اقتراح قابل للمناقشة والباب مفتوح للجميع

المشرف يا عزيزي صلاحياته التقنية محدودة جدا والمراقب اكثر صلاحية على المنتدى والمشرف العام له الصلاحية الكاملة ( اتحدث انا من الناحية التقنية والالية لعمل المشرف )
الادارة دائما تسعي للأفضل وتنتقي المشرفين بتاني وحذر والحمد لله لم نختار اي عضو صاحب فكر غريب ،
نعم هنالك أكثر من مشرف لايملكون الهوية السودانية ، مثل A7meedy ( بحريني ) و الاخت ( قلب حنون ) مصرية
وهم يمتلكون عقول منيرة والاثنين تم اختيارهم من قبل إدارة المنتدى ..
اعتقد الان ان الية الاشراف اتضحت لك
ولك التحية

جيفارا · 05-03-2006, 08:57

يا شجراوى ويا عابر ويا حماده سلامات يا جميلين.. بالعوده لموضوع وليد حسين انا ما عارف هل انتو فهمتو الزول ده ولا فى شنو يعنى واضح انو وليد ما بيتكلم عن تشريف او تكليف او مستوى التقنيه المتاحه الا على المستوى الحرفى وليد بيتكلم عن الخلفيه الثقافيه لمسأله المشرف يعنى مثلا اذا اثيرت واحده من القضايا التراثيه السودانيه فى احدى المنتديات ممكن الشباب ديل يكونوا قاعدين ساااااااااااااااااااى مع فائق احترامى بالنسبه لاشرافهم وبالمناسبه اذا كانت دى المقاييس فهى مقاييس ضعيفه ضعف واضعيها لانو من المهم يا جماعه الخلفيه الثقافيه للمشرف تكون سودانيه لانو اساسا قدره الاشراف بتجى من قدره الاستيعاب والتفاعل من العايز يتعرف عل ثقافتنا حبابو الف والله العظيم لكن فكره المدرب الاجنبى دى بتاعت سماسره .. اتمنى انو يكون كلامى واضح وصريح وقابل للنقاش لانى ما اقتنعت بى ردودكم بصراحه مرخيه شويه
التحيه وليد حسين

**Silent Storm** · 05-03-2006, 14:50

عزيزي وما علاقة الاشراف بالثقافة !!!
مثلا الاخ احمدي ( مشرف منتدى الهكرز ) وليس بالضرورة ان يكن ملم بالرياضة او السياسة او حتى الثقافة والتراث السوداني ، ..... الخ
واجبات ومهام المشرف المسندة اليه في منتداهـ فقط ، أي من المستحيل إثارت قضية متعلقة بالتراث السوداني في منتدى الهكرز ،، بالنسبة لمشاركات المشرف خارج منتداهـ فهي لا تمثل وجهة نظر الادارة انما وجهة نظره الشخصية كـعضو وليس كمشرف ،

اقتباس:

(تشرف علينا يعنى بكون عندها الحق فى انتقاء المواضيع وتنزيلها وحذفها بدون درايه بها وخصوصا لو بالدارجى بتاعنا لانه خاص جدا)

تحدثت سابقا من النواحي التقنية لكي اوضح للاخ وليد صعوبة التحكم في مواضيع الغير في بقية الاقسام
اكرر الاشراف تكليف وليس تشريف
وكل كتابات المشرفين / المراقبين تعبر عن وجهة نظرهم الشخصية وليس وجهة نظر الادارة او الموقع ككل

جمانة · 05-03-2006, 15:12

اخواني الافاضل ...التحية لكم جميعا ...

انا ايضا لم اقتنع بردودكم علي الاخ وليد ...ربما لانني فهمته من
جهة اخري مثل الاخ جيفارا

و القصد من كلام الاخ جيفارا ( علي ما اعتقد و ان اخطأت فليصوبني)
عزيزي المشرف العام هو ... :

هل تصلح الاجناس الاخري الغير سودانية ان يكون مشرف مثلا لمنتدي الاخبار و القضايا؟؟.. و التكليف هنا يقتضي بحزف و تثبيت و الغاء ...الخ
اذا لم يكن ملم بما يحدث في السودان اي (ثقافة سودانية).....و التفهم التام لوضعنا..
علي اي اساس سيقوم بالحزف ..او الدمج او غيرها من المهام....؟؟؟؟

و الله من وراء القصد
سأعود

**طارق** · 05-03-2006, 15:27

السلام عليكم ورحمة الله وبركاته :

فهمت قصد وليد وجيفارا وتساؤل جمانه .. ولم يكن غائبا عنا
ولكن تداخل السؤال عن ما هو الاشراف وما حدود المشرف .
مع منهج سياسه المنتدى !؟

قد تتدخلنا القضيه في متاهات الهويه .. التى قد تشكل عقبه
في وجه الوحده او الانفصال .. لذلك حتى لا نسيس الموضوع ..
نتجه الى الثقافه .

اولا للتوضيح : كل مشرف مسؤول عن قسمه .. ولا يستطيع ان
يبدل او يحول كلمه في قسم غير قسمه .. ومشرفتنا الفاضله
لاتملك حق التغير او التبديل في قسم القضايا والاخبار الساخنه ..
وانما الكنترول للقسم عند اخونا شجراوي ..
والمراقبين .. بعموم ان المراقب يملك حق التصرف في جميع
الاقسام .. بحسب ما تحتويه قوانين عمل المنتديات ..

ثانيا هل الثقافه تمنع التداخل وتنزوي بالصنف السودانى ..
عن التداخل اللغوي والثقافى العربي ؟

فهمت من الجميع .. ان هناك ثقافه سودانيه ولغويات سودانيه
وهم سودانى قد لا يستطيع فهمه غير السودانى .. وبالتالى قد
لا يحق لغير السودانى ان يشارك فيه .. او يتجه بوجهة نظره في
هموم سودانيه .. قد لا يملك عنها خلفيه تاريخيه او ثقافيه تؤهله
الى الدخول في معترك مناقشه هموم السودانيين !؟
وبالتالى لا يحق له السياده على من هم سودانيون .. وهو غير ذلك .

فهل ياترى هل هذه النظره صحيحه ؟ ام ان تاريخ ونزاعات الهويه
والمدلولات الثقافيه الناتجه في السودان اعطت انطباعا لوليد حسين
وجيفارا .. وقد يكون غيرهم .. ان المنتدى للسودانيين فقط لاغير ..
كالجنسيه السودانيه .

فهل سنعرف بهذا الوطن وهمومه ومشاكله وحلوله ونعرفه للغير ..
ام ان ما بداخل البيت .. لاهل البيت فقط ..!؟

نظرتى :

العالم اصبح قريه صغيره .. والتراث السودانى .. لن ينازعنا فيه احد ..
وهمنا السودانى لن يتغير بأن يصلح الله حال بلادنا .. وحال مواطننا
ولنا الشرف ان يطلع على تراثنا وهمومنا غير السودانيين .. ويشاركوننا
برأيهم ويدلون لنا بمواقفهم .. حتى يفهمونا ونفهمهم .. واذا اختلفنا
معهم في الرأي .. لا يفسد للترحيب بهم والبقاء معنا .. قضيه ..

شكرا ..

**هشام عوض** · 05-03-2006, 15:43

في البداية ..وجهة نظري بتقول انو الإشراف في منتدى عشاق السودان بصفة خاصة والمنتديات أو الادارات والجمعيات الثقافية بصفة عامة .. تكليف وتشريف .. أو تشريف وتكليف ... ونسبة الأتنين بتزيد زيادة طردية مع حجم وموقع الادارة أو المنتدى أو الجمعية وقربها من الناس وملامستها لحياتهم ورغباتهم وطموحاتهم وأهدافهم .. ويوم ما تلقى نفسك محمل بعبء أو فخر الاشراف على منتدى زي عشاق السودان " وحتى لو كان ده حصل في غفلة من الزمن " بيتوجب عليك إنك تسعى لإثبات ذاتك ..وتنمية قدراتك ..ومواهبك .وامكاناتك ..عشان تلاحق ناس ممكن تكون امكاناتهم افضل منك ..لكن تجاوزتهم قناعة الاختيار لسبب ما عند الجهات المسئولة عن الاختيار ...وفي الصراع من أجل التطوير و تنمية القدرات تتنامى أسباب الفخر بالتشريف ..
أما عن تولي جنسيات أخرى في المنتدى مهمة الاشراف على المنتدى .. لا أرى ما يعيب ....
بل هي من دواعي الفخر لنا في البداية أن نجد من استفزته كتاباتنا ..وأفكارنا .. فولج دارنا وأسهم بما يملك .. وجادت قريحته .. حتى وجدت قبولاً واستحساناً من ادارة المنتدى وأعضائه أهلته
" ليتشرف " بالمشاركة في الاشراف على قسم من أقسام المنتدى ... تمشياً مع القاعدة التي تقول " ليس للثقافة وطن " .. كما أنه ليس بالضرورة أن يكون المشرف ملماً بكل خبايا الحياة السودانية ومفرداتها وثقافتها .. وإن كان ذلك مقياساً .. فهل كان كل من كان أو لازال
" وزيراً للثقافة " هو أكثرنا ثقافة أو إلماماً بكنوز الثقافة السودانية الكبيرة والعظيمة ؟؟؟
والموضوع ده ما جديد على الحركة الثقافية في السودان أو مصر على وجه الخصوص ..لأنو في يوم من الأيام ..كان الأساتذة تاج السر الحسن و الفيتوري والمرحوم جيلي عبد الرحمن ..وثلاثتهم قامات شوامخ من قمم الثقافة السودانية والشعر الثوري الملهم .. كانو ركائز أساسية في الصحافة المصرية ..ومشرفين على صفاحات ثقافية .. ومنتديات أدبية .. في وجود عمالقة من المثقفين المصريين غير غائبين عن أعين المسئولين من تلك المنتديات والصحف ..
ختاماً أحبائي أقول : الاشراف لا يتطلب الكماااااااااااااال ..ولكنه يوجب السعي لتحقيقه ..