اخلاص التي لم تخلص

قشاش الدموع · 23-01-2006, 01:42

في مدينة الصحافه بالخرطوم كان الملتقى ،، التقا بها ، فتاة في ربيعها الثامن عشر فيها من الصفات مايتمناه كل شاب ،، تبادلا التعارف ، اعجب بها كثيرا دار بينهما حوار ودي ، عرفته بافراد عائلتها الذين كانوا في تلك المناسبه التي جمهتهم ،، شائت الاقدار ان يكون ابن عمها صديقه الحميم ،، ولانه انسان يفهم في التقاليد والاصول ويعلم تمام العلم بالمقوله المشهوره عندنا البتقول ( البت لي ولد عمها ) صارح ابن عمها بإعجابه الشديد لبنت عمه وساله اذا كان يريد ان يرطبط بها فاجابه بالنفي فساله عن بقيه ابنا ء عمومها فاجابه ايضا بالنفي ، تنهد فرحا بعد سماعه الاخبار التي تقول ان جميع ابناء عمها متطلعون وكل واحد منهم يمني نفسه بالارطباط من واحده اقل ما تكون وحيدة امها ، وابيها يملك من الثروه والمال ما لا تاكله النار ، وبذلك علم تماما ان الطريق مفتوح امامه ،، وطد علاقته بها التقا بها مرارا في بيتهم بعدما صارح والدتها ووالدها الذي رحب بالفكره مبدئيا وكيف لا يرحب بهذه الفكره ولديه خمس بنات وهي سادستهم ويحلم دوما بان يراهم في بيوتهم مع ازواجهم
اصبحت تلك العلاقه مضرب الامثال في المجتمعات لما اشتهر عنها ،، البعض قال عنهم عنتر وعبله 2000 والبعض كان ينادي صاحبنا بمجنون (( اخلاص )) وغيرها من التعاليق .
لكن كل تلك التعاليق لم تكن تاثر فيهم بل العكس .
مرت ثلاث سنوات على هذه العلاقه ،، كان صاحبنا يعمل مدرس بسيط في احدى المدارس الحكوميه راتبه لا يكفي لشراء بدلة العرس او لايجارفستان الزفاف ،، عمل بجهد حتى اصبح يعطي الدروس الخصوصيه وفي العطلات يدرس في المعاهد الخاصة لكي يجمع من المال مايكفي ليجمعه بفتاة احلامه
مرت سنه اخرى لتصبح اربهة سنوات عمر تلك الخطوبه اذا امكن ان نسميها لما اتسمت به من علاقه وطيدة حتى بين الاهل ،، كان يخرج في الصباح الباكر للمدرسه ثم بعد الظهر في المعاهد وفي الليل يعود للمنزل منهكا ليجد مجموعه من التلاميذ ينتظرونه لكي يعطيهم الدروس الخصوصيه و،، وبهذا الروتين القاتل انقطع عن محبوبته لفترة ليست بالقصيره .
وفي يوم من الايام وبعد ان احس بانه جمع من المال مايكفي ، جمع الاهل في بيتهم المتواضع الوالده ، والوالد ،والخالات , والعمات واخبرهم بنيته دخول القفص الذهبي ،،فرحت الوالده كثيرا والخالات وهلل الوالد وكبر وانطلقت الزغاريد معلنة قرب اليوم الموعود .
جاء اليوم الموعود حضرن الخالات والعمات ولبست الام اجمل ما عندها من ثوب ولبس الوالد العمامه والجلابيه الجديده التي احضرها له صاحبنا خصيصا لذلك اليوم وضع على كتفه الشال بكل وقار متأهبين جميعا للذهاب لبيت العروس ، خرج صاحبنا ليستأجر لهم الحافله التي سوف تقلهم الى منزل العروس ،،، وفي تلك اللحظات يرن جرس الهاتف
ترفع الام السماعه ، كان صوت صديقه الحميم ابن عم (( اخلاص ))
:: كيف الحال ياخاله انشالله كويسين ..؟ وين (( محمد )) ..؟
الله يسلمك يا ولدي والله(( محمد)) مرق الشارع عشان يجيب لينا عربيه نمشي بيها...... وانت ما جيت مالك يخسي عليك دا ما صاحبك ماتجي تقيف معاه في يوم زي دا ..،
(( انشالله والله ياخاله بجيكم لكن بس قبل ماتتحركوا لما يجي (( محمد )) خليه يتصل بي ضروري
اجابته الام : حاضر يا ولدي
حضر صاحبنا بعد ان احضر معه اجمل حافله في الشارع
فتخبره الام بصديقه انه اتصل ويريده ان يتصل عليه ،، فيسرع صاحبنا للتلفون ويتصل على صديقه
:: الو وينك انت ياخ مالك ماجيت ..؟ اتحرك تعال بسرعه الجماعه كلهم منتظرين عشان نمشي
يرد صديقه : اسمع يا محمد مافي داعي تمشو ..!!
محمد باستغراب شديد :: مافي داعي نمشي .؟ كيف الكلام دا في شنو ..؟ الحاصل شنو ..؟
يرد صديقه : انا قلت ليك مافي داعي تمشو ا ولا تتحركوا من مكانكم وبطلوا المشوار دا وتعال لي البيت في كلام داير اقولو ليك ..!!
محمد بإنزعاج شديد : ياخي في شنو ..؟ الحاصل شنو كلمني ..؟؟؟؟؟
وبعد الحاح واصرار شديد من محمد جاء الرد قاسيا من صديقه ،
(( ياخي الليله عرس اخلاص على ود جيرانم كان مغترب في ال.........................))

اخوتي في المنتدى عذرا اذا كنت قد اطلت عليكم ولكن قولوا لي بصراحه
1/ هل اخلصت اخلاص ..؟؟؟
2/هل الفقر عيب ....؟؟
3/ هل من حق كل فتاة ان تتطلع الى الاعلى حتى ولو كان ذلك على حساب مشاعر الاخرين ..؟؟

دار جعل · 23-01-2006, 13:28

أحييك أولاً على هذا الابداع في سرد الحكاية وكنت اتمنى لو كانت في منتدى الاخبار والقضايا الساخنة عشان الناس تبدي رأئيها في مثل نهاية هذه العلاقات.
بعدين الحكاية ما اظن وقفت عند اخبار ابن عمها له بالخبر... فلازم تكمل باقي الحكاية وما مشكلة لو طولت شوية... المهم القصة هامة وبتهم ناس كتيرين يمكن يكون مرو بنفس التجربة وفي رائي الشخصي ان هذه الفتاة لا تصلح له باي حال من الاحوال فخير له أن ينساها

.

دموع الشمس · 23-01-2006, 18:22

فجأة سمعت من الناس
قالوا الشبكه جابـــــوها
وقالوا النور غمر بيتكـــم
وحتى الســاحه ضواهـا
اتاريك ماكـــــي زي ايام
زمان يا السمحــه كنتيها
محيتي جميع معاني الريد
صلاتي معاك قطعتيهـــــا
بقيتي ولا بتردي علــــي
ولا النظـــــرات تبادليـــها
ولا حبة حــــــــنان منــك
تفيض في عروقي ترويها
تقول ما كنا يوم احبـــاب
ولا اتقــــــابلنا في جيها
حليلي انا البقيت مكتول
بين الانـــــــــــــه والاهـــا
شــايل ريدتي في صدري
جنــازه مصيره مســواها
ماتـــــت قـــبل ايامـــــــه
وقبل ما تتم امـــــــانيها
براي انا البشـــيل الليل
فاتحه عــــليها وارثــيها
حليل ايــام زمــن كنت
بشــيد امــاني وابنيها
وزمن كانت سعادتي امل
ولحظــة حـــب برؤياها
زمن كانت حكايه معاي
في كل مناسبه احكيها
حليل ايــام زمـــن كانت
قصــــــيده اضم قوافيها
خلاص يا السمحه نتوادع
رســـــــاله اخيره اقريها ..

الأسد · 23-01-2006, 20:57

مبالغه في سرد القصة ومحتواها من اربعه سنين في سطور .. جميل صديقنا الجديد قشاش الدموع
القصة معبرة جداً وياما كترت أنواع مثل هذه القصص
صبراً أيها الأستاذ الموقر فلم يقل الله الطيبات للطيبين والخبيثات للخبيثين إلا ليجعل له مل تناسبه من النساء فإخلاص ليست له
وصدقوني مثل إخلاص من الصعب أن تدوم سعادتها فهناك مثل بالإنجليزية يقول
easy com easy go
أي أن ما يأتي بالسهل يضيع بالسهل ولا نتمنى لإخلاص ذلك ولكن هذا حال الواقع
لكن إخلاص بالجد اتلومت

قشاش الدموع · 24-01-2006, 03:37

احبتي دار جعل ،، دموع الشمس ،، الاسد اشكركم على المرور والإشاده ،، وانا مازلت تلميذا اتعلم منكم فنون الكتابه فلا تبخلوا علينا بارائكم ...

ولكم خالص التحايا

دار جعل · 24-01-2006, 13:36

تذكرت أن هذه القصة قد تلائمها كلمات زيدان إبراهيم

في الليلة ديك لا هان علي أرضى وأسامحك
ولا هان على اعتب عليك
شلت الجراح والابتسامة
وكل حرمان اليتامى
جيت اهنيك واصافحك
جيت أقول مبروك عليك
في الليلة ديك
والناس تشارك فرحتك
حسيت باني غريب
وغريبة انتي في دنيتي
حسيت معان الفرقة حسيت
بالوجود ماخد ظلام من حنتك

جمانة · 25-01-2006, 13:57

قصة جميلة و الاجمل طريقة السرد ...

بالرغم من بعض المآخذ يعني معقولة قصة حب خرافية ..زي ما بتقولو
و ما يسمع حتي بي الخطوبة .......؟؟؟و فجاة يسمع بالعرس و كمان صدفة ؟؟؟!!!!!!!..
يعني انقطع منها فترة قدر شنو الزول ده ؟؟؟؟؟؟؟؟

وفي وجه تاني .... ممكن الواحدة تكون منتظراهو اربعة سنين..و بعد ده
يجي و يعرس بت عمو و لا يقول ليها " جيت لقيت الوالدة خطبت لي "" و حاجات
كتيرة لا تخفي علي الكثيرين..

يلا نناقش الموضوع من الطرفين عشان ما تظلمو اخلاص براها
ولا شنو؟؟...