زواج المغترب ما بين الواقع والخيال

دار جعل · 14-01-2006, 01:04

لأسباب عديدة يقصد الشاب بلاد الغربة، وعندما يقرر الزواج فإنه غالباً سيختار العروس من السودان وطريقة التعارف تنوب فيها الصورة الفوتوغرافية وشريط الفيديو إضافة إلى الهاتف والرسائل البريدية والآلات الإلكترونية مكان اللقاء المباشر ويلعب الخيال دور هام أيضاً في رسم صورة كاملة لشريكة العمر، أما إذا تم اللقاء قبل تحديد موعد الزواج فإنه يتم بمدة زمنية قياسية، تستعد فيها الفتاة لتلحق بزوجها في بلاد الغربة.
ما رأيك بزواج الغربة؟
هل ترى أن زواج المغترب بهذه الطريقة يحقق نجاحاً؟
ما هي السلبيات وما هي الايجابيات؟
أسئلة مطروحة لكل مغترب مقبل على هذه المرحلة الهامة من عمره, ولكل من له رأي في هذا
الموضوع.

دار جعل · 17-01-2006, 00:50

ما زلنا ننتظر مناقشة هذا الامر لاهميته

تولستوي · 17-01-2006, 11:30

أخي الحبيب دار جعل

زوج بهذه الصورة يعتبر فاشل جملة وتفصيلاً، ولن يكون له أي إيجابيات وذلك لما سقت من الكيفية التي تم بها التعارف وما للخيال من دور هام .. والغربة في حد ذاتها تجعل فرصة الزواج بهذه الصورة مواتية لما يعيشه المغترب من أنواع الفراغات، ولكن ليس هذه أعذاراً لتجعلك تتزوج بهذه الطريقة لأنك ستظلم من تتزوجها قبل أن تظلم نفسك؟! فعدم معرفتك لشخصية أحدكما للآخر تجعل من استمرار الزواج هشاً وينهار لأول عاصفة !!

دار جعل · 17-01-2006, 15:10

لك التحية أولاً على المرور والتعليق اخي تلستوي

ولكن ألا ترى معي أن هناك كثير من الزيجات التي تمت بهذه الطريقة ونجحت ولو فرضنا أن هذه شواذ لا تمثل القاعدة العامة في أن الزواج سيفشل, فما هو الحل؟ إن المغترب يعاني الأمرين فلا هو قادر يمشي عشان يختار الانسانة التي تتلائم معه ولا هو قادر يصبر وقطار العمر يسير بدون محطات ليتوقف بها.
لا سيما وان شكل التربية ودخول الثقافات الأخرى قد غير في كثير من المفاهيم لدى البنات وذلك من خلال دخول القنوات الفضائية التي اصبح لا حصر لها.. فاصبح ما كان ممكناً في السابق غير ممكن الآن... يعني الواحد زمان كان يكفيه إنو يقولوا ليه بت فلان يقدر يقيم شكل العلاقة من خلال اسرتها... وده كلو الآن أصبح صعب فما هو الحل؟

**معتز زيزي** · 17-01-2006, 15:21

عزيزي دار جعل

أن القضية المطروحة تعتبر قضية هامة وحساسة .... فأصعب خطوة في الزواج هي (الإختيار) والأختيار يتطلب القرب من المكان والزمان ويتطلب السؤال لان القضية ستدخل في إطار النسب والأنساب ،،، والمغتربين يعانون من هذه المشكلة بصورة مزعجة ... فكيف يمكن للمغترب أن يختار شريكة حياته من خلال إجازته السنوية والتي لا تتجاوز تلك الأيام المعدودات ...؟؟؟ أنه حقاً مشكلة وتحتاج للدراسة .... والقضية أكبر من أن تكون قضية رأي وراي معاكس ....

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،

دار جعل · 17-01-2006, 20:43

شكراً على المرور والتعليق... وكلامك كلو صاح يا معتز والقصد من طرح الموضوع اننا نجد بعض الحلول لهذه المشكلة التي يعاني منها المغترب.... ويا ترى العيب في المغتربين وفي البنات ولا في الزمن الخلى الواحد يترك وطنو عشان ما يوفر العيش الكريم لاهلو ويكون النتيجة في النهاية ضياع سنين من عمره وفي النهاية ما يقى الشي الربريحو.

سودانى · 17-01-2006, 22:13

داااااااااار جعل

لكل شي ايجابياتة وسلبياتة ومن سلبيات الغربة الشغلانة بتاعة الزواج دي في مرة من المرااات في مطار الرياض وااحد سوداني طبعا ما انا ....منتظر زوجتوا (الفوتوا) يعني شافها بالصورة واليوم داك الطيارة ما شا الله مليانة بنات متزوجات جديدات اي واحدة تجي طالعة من الصالة يمد ليها الاقامة بتاعتوا تقري الاسم تلقاهوا ما راجلها تمشي وتجي البعديها وبنفس الطريقة اها صاحبك جات مرتوا ناااااااااااااار موقودة رتينة بس الوحيدة الما مدة ليها الاقامة بتاعتوا صاحبك كبكابة لمن هي عرفتوا وقالت ليهوا انتة فلان قال ليها ايوة صاحبك متليس ما فهم انها زوجتة لانو نفيسة اختو بالغت عديل كدة لكن ما بالغتي يا نفيسة هههههههه اها زي دة زواج يا جعلي .....

وتعال شوف التناقض دة

في المملكة 80% من الازواج اذا لم يكن اكثر لم يلتقوا بزوجاتهم او يشوفوهم غير مرة واحدة دي اذا كانت الاسرة متفتحة شوية ما الفرق اذا ديل ما ناس كلهم بتزوجوا بالطريقة دي وزيجاتهم ناجحة نوعا ما
شغلانة تدوش الدماااااااغ

دار جعل · 18-01-2006, 01:07

والله يا سوداني كلامك صاح.... بعدين الواحد لما يقع في موقف زي ده ( موقفه من المرة يكون شنو ) غايتو القضية واسعة ويا ريت نلقى واحد اخصائي يجد لينا الحل.

شكراً على المرور والتعليق على الموضوع

**معتز زيزي** · 18-01-2006, 10:49

المغترب !!!
ذلك الشخص الذى حظى بفرصة ذهبية للسفر والعمل فى احدى البلاد
المفيدة ماديا.
من هو هذا الشخص ؟ لا يهم
ما هى خلفيات واخلاقيات هذا الشخص ؟ لا يهم
ما هى الدرجة العلمية لهذا الشخص؟ لايهم
= فقط هذا الشخص( مغترب) ولديه امكانيات تؤهله للبدء فى اى مشروع
بما فى ذلك الزواج , حسنا ما هى خيارات هذا المغترب لاختيار من اراد الزواج بها .

والسؤال المطروح ما هي فرص الأختيار المتوفرة للمغترب عن طريق ....
( شرائط الأعراس والمناسبات المختلفة ...؟؟ الفتيات الذي يلتقي بهن في إجازته السنوية ...؟؟ بنات أهله وعشيرته .....؟؟؟ أخت رفيق الغربة ....؟؟ أختيار الأهل والاخوات تحديداً ....؟؟ )

فإذا أستطعنا تحديد النسبة المئوية لكل فرصة أختيار من الفرص أعلاه ستحل المشكلة ...!!!

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،،،،،،،،،،،،،،،،،،،،

سودانى · 19-01-2006, 01:57

تجربتي لاستخلاص الفائدة

اقلب القدرة علي فمها تتطلع البنت لامها شغلانة الزواج دي ما دايرة ليها تردد وحسابات كتيرة في اختيار الزوجة الصالحة فمن الاسرة يستطيع الواحد ان يعرف البنت وتفكيرها ومدي احترامها لحياة زوجية قادمة .
فمثلا شخصي فقد اتكعبلتة قبل فترة بسيطة في انسانة انا ما شفتها بعيني لي يوم الليلة والله لا صورة ولا غيروا انا داير شنوا ما داير لي بترينة اعلقها في البيت واحدة تكون مقبولة من ناحية وكفي
طبعا البت دي خطبتها من ابوها فهي من عائلتي وحسبت الامور علي البيت لانو البيت فيهوا راجل صحي صحي واخواتها كلهم ماشا الله عيني باردة من فهم وادراك ومسولية ونظام واهتمام بازواجهم واحترام لرجل البيت ومعرفة ما لهم من حقوق وما عليهم من واجبات فانا سبق ان فتحت موضوع بعد الزواج من يكون الفارس جاتني خلاصة التجربة من اخوة اشكرهم جدا علي ردودهم التي اتفقت فيها معهم واكدو لي اني ماشي صح في اختياري فعمري انا قال لازم تختار الاسرة اولا وفي بنات كايسات للسترة وبعيشوا علي اي وضع وبقوموا ويقعودوا معاك والحمد لله دي نعمة اما ناس البوبار وشوفوني الله يكون ما راضي عليك اذا وقعت في واحدة منهم لانو زي ديل عينهم طائرة ممكن تكون جميلة ومغرية وحنكوشة بتعجب الواحد لكن جمال خارجي سماحة الطين الزائلة الساكة وسخ الدنيا من قروش وجاة وعربات وحركات ولويح غوايش الدهب زي دي خلي بينك وبينه يوووم وضحوة لو جاك باليمين اقلب شمال
انصح المغتربين بالتركيز علي البيت اولا وعلي الام تحديدا وعلي الاخوات الكبار اذا وجدن وبعد داك تجي علي البنت اذا سالت اقرب زول ليهم بوريك دي طالعه ليهم ولا شايتة في اتجاة تاني اذا قال ليك نفس الملامح والشبة اتوكل علي الله وما بتندم يا حبة .
والله من وراء القصد وانا والله اي كلمة قلتها هنا صحيحة ويسالني منها الله ما تتقدسوا يا شباب اسالوا مجرب