ربك يهون كل قاسى عليك لو كان مستحيل
لا تبكى ارجوك يا جميل
يا خى الدموع أنا ببكى لو كانوا من طرفا كحيل
وما برضى وحاتك قسم فد دمعه فوق خدك تسيل
لا تبكى ارجوك يا جميل
ما انتى حقك تبتسم تضحك تملى نهار وليل
شان انتى ما شبه الدموع تبكى انتى شن بيسوا ديل
الأمتحان لو قلتا حار م تنسي ربك بيك كفيل
ما انتى ذاتك حار وهم من حرك ادوهُ القليل
ما انت ناجح فى الجمال الناس محبته ليك دليل
الحكمه ناجح من زمان يوم اتولدتا بلا مثيل
لا تبكى ارجوك يا جميل
يو م الجمال جابوه ليك قالولك اعزل منو شيل
أدوك سبيب اسود طوال سود على ليلى الطويل
وفك الرباط بى صفحه سال شوف عينى قرب للكفيل
لا تبكى ارجوك يا جميل
وادوك عيون فيهن رموش راميالى ضلها للمقيل
صيفا وشتا محل ما أقيف والقاهو برضو رمت ضليل
لا تبكى ارجوك يا جميل
ادوك قوام من خيدران لو داعبو الهباب يميل
ومنك عبير شميتو فوقك مسخ على ريحه الفتيل
أما الضمير قرب يروح بالجوع قضاك بقيت نحيل
لا تبكى ارجوك يا جميل
وفوقوا الحزام خط استواء قاسمك شمال وجنوب عديل
وادوك قديم خطوة حمام وحلانه فى التاتاى عطيل
فوق البالط بين الفصول دايرلو صاج وترس عديل
لا تبكى ارجوك يا جميل
انا لانى جاركم لانى اخوك بالصدفه جيت عابر سبيل
من أهلى جيتكم تب سليم كيفن ترضى اصد عليل
طلبى الوحيد بس تبتسم تطرح وشيك متل قبيل
واقع وراك لا تقول ابيت الناس يقولوا عليك بخيل
لا تبكى ارجوك يا جميل
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
حاولتا جهدى أودعك لكن وين القاها كلمات الوداع
أسجن دموع جوه العيون ياريتو لو طرفى استطاع
كلماتى ماممكن تجود بحروفا لى زولا يعيش لحظة ضياع
كيف تجود بحروفا عاد بعد اللى كان فى إيدو ضاع
ياروحى حبيت أودعك هو الزول بوادع روحو كيف
قاسى ووحاتك ما بدور أيام ربيعى اعيشا صيف
والله ابقى زى مويتن تتوه لا قادرة ترسى ولا تقيف
تهاتى لى عينيك دوام شان تحضنا وتبقالا قيف
شايل هموم الفرقة جيت واقف امامك فى خشوع
شفته الوجود قدامى اظلم وانطفت كل الشموع
وبقيت أقول كلمات حزينه بى آهه من داخل الضلوع
لكن قبل ما اقولا ليك ألقاها ضاعت فى الدموع
تقولى من بعد الوداع انساكى لا لا ده مستحيل
ذكراك بشيلا دموع فرح وفى خاطرى كل صباح وليل
وساعة لقانا وامسياتنا وكل افراحنا القبيل
شايل على درب الزمن ذكراها مهما يكون طويل
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
ليك بتمنى السعاده وليك بقول إن شاء الله تسعد
وأرضى بالمقسوم لى من حبيب ببعد
يا زمان بالله اشهد
هاك آخر الرسائل ومانى داير منك الرد
فيها اشواقى وحنانى هديه للخد المورد
لا تقول الزول طرانى ولا تقول الشوق تجدد
اصلو كامن فى ضميرى وفى ضميرى كامن مؤبد
يا زمان بالله اشهد
ديمه بطراك ومستحيل انساك والخبر المؤكد
اني شايل ليلى بى ذكراك منكد
ما فى يو ما ببكي لا من ليلى هود
وكيف تعيش الم العلى الالام تعود
يا زمان بالله اشهد
أصلو ياهو نصيبى اسهر وحضنى من ألامو يسهد
وابنى لى ماضينا فوق واحاتوا معبد
وانت فى عشك سعيد هانى وممجد
ما بهمك طرفى عمره يعيش مهجد
يا زمان بالله اشهد
يبقي عشكم انتو جنه طيروا غنا وروضو فرهد
فيهو تتهنوا وتنالوا سعادة أزيد
يا زمان بالله اشهد
قلبى من فارق حنانك كم تأوه وكم تنهد
من دريبك شال خطاه عساه يبقي سعيد ويخمد
كم كتمت الشوق وكت جواى عربد
واختنق فى قلبى زى الغيم وارعد
يا زمان بالله اشهد
الوداع مجبور عليهو وليهو ردد
الوداع زولى الرزين يا ناير الخد
الوداع يا أغلى زول يا احلى مشهد
الوداع وخلينى لى سهرى البلاحد
الوداع ومناي ليك إن شاء الله تسعد
يا زمان بالله اشهد
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
كلم بنيات الجرف وكل البنيات من طرف
تتبري من بحرا غدر
اتغاب ما راع الولف صاد الاخيتين بغدر
ليك حق يعافيك الحراز واليصطفيك طرفي وعشر
يامتوك الناس العزاز نابع قليبك من حجر
ما بتنفع انت بلا الخريف الصاقعي والريح والمطر
تنزف نزيف ما يحوش قيف لا من يقولوا عليك خطر
ما ظن نخيلك هز فوق سيرت عريس نازل البحر
ما طالة موجك ما بيضوق لا يضوق الناس غير كدر
عودنلو قشكن النشف يدغي ورويسات السعف
مكسور خويطره في قحف ترغي وتسف ملح الأسف
عودنلو والسنبر برق جنحاتو بالأشواق سحر
قاصد جريف ود شيخ يخف لي مويته من دون البحر
والليلة زي غيما رعف حين طال علي ريح السفر
يا حليلو زينا ما عرف جوز القمريتين طفر
يا دنيا يانا ربات كتف يا دنيا
رغم الفجائع لا رجف لا قال عوارضي أبت تخف
في بألو كم تاريخ سلف
لوكأن يشيل في الموت زرف دمعات أسى وحرقه أسف
آو بالعلي الحال يعترف كان عن رسول الله وقف
كلم بنيات الجرف وكل المكاليم من طرف
هي الدنيا كلها كم حرف
لمن يطول فيها الأسف هي الدنيا كلها كم حرف
لمن يطول فيها الأسف
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
شان يومى اللموت ماتبكى أمى تقول فقدتا جناى
يومه أنا ذاتى فاقد روحى من يومى الفقدتا وفاى
من يوم القدر والقسمه تاقوا عيونا من تالاى
تاريهم على اتواصوا داير يشمتو فى أعداى
الليله يومه شبابى راح أنا عارفوا من بدري وبكيتو براى
اصلى من ما بكيتو كان كملتو وما خليت شليل بقفاى
كيفن يومه عاد ما ببكى وذيك نارى حارقه حشاى
مفطوم اللبن يا يومه ماقالوا ما بنفعوا اللولاى
نار الناس تموت بالمويه نارى عدمتا انا الطفاى
والخلق الألم من جمره خلى العين بلا وقاى
فى النار حقى مى الحياه أختو لا من ضمه قلتا كفاى
فى الجنه إن بقى اتلاقينا فيها بقضى باقى هواى
كرامه دنى لملمو همى دايركم تدفنوا معاى
وسعوا قبرى قدام صدري داير صبري يبقى حداى
شوقى وشعرى زى ماقالوا شيتى الشلتو من دنياى
الحلو والحنان خليتو للناس البيرثوا وراى
الزول الزمان يا حليلو اندروش صبح غناى
الحايم معاك ده يومه ساكت لا قلب لا راى
حظو مراكبو ابت تنجر فى الموج والعرق جراى
مع ريح الصلاح فرا لا تنى يصد ويرجع جاى
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
زاد انينك ونومك سبح
يا قلب مالك انجرح
كل ما اشوف جمال انشرح
فيهو غيبتا عديل سرح
زاد انينك ونومك سبح
وما بيفيد قولة آه واح
يا قلب مالك انجرح
تتوه مع الغزلان فى مرح
يا قلب ما صاب سهمك مانجح
لا استفدتا ولا انشرح
ويا خسارة الأمل الطرح
يا قلب مالك انجرح
حاسى لا من ليلك اصبح
طيرو غنى وغرد صبح
خفّ ميزانك ما رجح
وامتحن لى نفسك ضبح
يا قلب مالك انجرح
ما كتم حبك اتفضح
بأساويسك اتفضح
شان خفيف كل زول ليك لفح
وصرتا بين ده وداك مشبح
يا قلب مالك انجرح
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
يوم بالسلامه تعود تلقانى يانى أنا
رجياك لا تقلق لو غبتا تسعه سنه
انا لا غيرتنى ظروف لا ريدى صابو عنا
انا لا قلبى شالو سواك لا عنك استغنى
تلقانى منتظراك فوق نارو مستنا
انا والله غير لقياك ماعندى تانى منى
كل ما يجينى الليل انا ببكى واتألم
تلقانى سارحه معاك وانا بلقاك بحلم
مالك قلبى هواك وجارى مجرى الدم
فيك تروح الروح وانا عندى زيك كم
طال الزمن بلحيل وانا قاعده مستناك
برجاك وما بندم وانا عمرى كلو فداك
بس يوم تعود ارجوك لا تسيبنى تانى وراك
يا اقعد انت معاى يا إما سوقنى معاك
سألونى عنك يوم عن غيبتك العزال
قالولى فتا خلاص غبتا وبعادك طال
زول من رحل خلاك لا جيه لا مرسال
وكتين نساك وفات خاتاهو ليه فى البال
قالولى انسى خلاص زى ماهو نساك
سهمك يكون مشغول بى واحده تانى سواك
ابتسمى للأيام تلقى الزمن ضحاك
وخطابك انت صفوف وآلاف بتتمناك
رديت حياتى بقت مقرونة بى إنسان
رابطنا فى الشريان وساقينا ريد وحنان
بيهو بنعيش احباب فى روقه وإطمئنان
ويصبح مصيرنا الموت يو مينزف الشريان
خلينى فى جواك لا يبقى بينا عزول
يوم أطمئن وارتاح واسمع خلاصة القول
لا مال بغيرنى لا إغراء بينا يحول
انا لا بيملى عيني سواك لا تانى بعشق زول
فوت كلام الناس زى ما جاء خلى يفوت
واسمع حديثىعديل لا يجيبوا ليك ملفوت
ما ناسى عهدى معاك جوه الفؤاد منحوت
أنا يوم ارتبط بسواك إن شاءالله قبلو اموت
