[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
ليك من غير تقولى سلام
بقولك اهلاً حباب أنا بعشقك
وأفضل استناك قدر زمنى الرجيتك
فيهو لو قدرى استجاب أنا بعشقك
كل عمرى نزرتو لقميرى المطول ومنى غاب
انتى مهما يطول عذابك ليك آخر يا عذاب
مهما السنين سرقتنى ايام الشباب
مهما ارى الأفراح من تالاك ضباب
مهما يقولوا الناس على جنا ومصاب
أنا بعشقك من غير حساب
بعشقك وما شفتا إنسان أدمن الريد منو تاب
أنا بعشقك وما شفتا مجنون غير طبيبو يمسو طاب
إلا خايف عمرى يكمل ولسه فى صبري العقاب
وكت بمد ايامى لولا انو لكل اجل كتاب .. انا بعشقك
بعشقك ولى مافى غير عشقك مآب
كل شعرى ونثري كلوا وكلى فى واديك صاب
مانى خايف فى نهاية دربى ظنى يقولو خاب
وانى ليك برضى راجع يبقى ظنى خاب وجاب
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
همساتنا وعناقنا الحانى يا ريت لو تذكر يا الناسينا
لما من جداول ريدنا كنا بنرتوى ونسكر
يا الناسينا حبك فى ربيع دنيانا شال نور
ضل السيسبان والمنقة لافينا وشاح اخضر
فرع البرتكان مدلى فوقوا كناروا يتبختر
الكون كلو باسم لينا غناء استبشر
لكن جار زمنا الليلة خلى صفانا يتعكر
بطراك وكتين الساقى تسوق فجراوى تتحس
نواحا يزيد قليبى بكا أصبروا ما بتصبر
بطراك والقميرا معاى تشاركتى الهموم تسهر
نعسان يا محبوبى ضوها فى وشيك نور
بطراك وكتين الطمبور نغيمتو فى قلبى تتحكر
ترن جواى تبكينى تقولى بلاهو مابتقدر
بطراك يوم قمحنا سنابلوا لونن ينقلب اصفر
ابكى على الديون الفوقى والغير فى الحصاد فكر
بطراك وكتين الشخلوب صبيتو تخافلو يتأخر
تضمو عليها بتحنان قليب الأم كمان واكتر
بطراك كل ما أشوف لى عريس فرح
بى صحابوا قام بشر ... يا الناسينا
أتمنيت اعيش لحظات محال يا روحى تتفسر
يا الناسينا حبك فى ربيع دنيانا شال نور
وتسقى الذكريات شان يخضر لى يكبر ... يا الناسينا
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
لما نبكى من المواجع قلنا نرتاح فى بكانا
قولى كيف نرتاح ونحن نبكى من شدة هوانا
الليلة رحلة الأشواق بعيدة والشواطئ بعيد مكانه
حتى فى بر الأمانى السنين هدت قوانا
كنا نحلم بمداين فيها نرتاح من شقانا
قولى كيف نرتاح ونحن نبكي من شدة هوانا
القدر طاوع قلوبنا وخلى بحر الريد حدانا
ونحن ماصدقنا قمنا نشرب فوق روانا
دى المشاعر فينا فاضت غرقت فرحة صبانا
ما النعم مرات بتشقى والله بالريد إبتلانا
مرة طلت دارنا غيمة ونحن ياما الريد غشانا
شايلة فى الخاطر محنة جات تعيش الريد معانا
جات تصب فى الريدة ريدة لو قليل يبرد جوانا
كيف يا غيمة نرتاح ونحن غلبنا فى هوانا
ما غريبة على البريدو يلقوا فى الريده المهانة
ياما كتير أحبه غرقوا فى بحور الذل عشانا
فى الحقيقة الريدة مره ضقنا مرها فى غنانا
ماهو قيس بكى من هواهو مانحن برضوا الريد أذانا
يا زمن لو تصفى نصفى فى البوادى يعم صفانا
والعيون تصبح مرافئ فيها نرتاح من عنانا
رحلة الهم بينا طالت ملت التسيار خطانا
نعمل آيه ما نحن غلبنا فى هوانا
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=3 line=0 align=center use=ex num="0,black"]
عاشق عيونك كم سنه معليش خلاص غلطان أنا
مشيت على دربك سنين افرش دريبك بالمنى
سرحت فى واديك زمن ناس الهموم ناس الضنى
كتبت فيك احلى الكلام نظمتا فيك اجمل غنا
خليت يمين كل البلاد واخترتا دنياك احضنا
معليش خلاص غلطان أنا وكل الحصل بتحملو
انا لى زمن متمنى يوم آخر المطاف بس اوصلو
ويقولو لى مبروك عليك ونبدأ الفرح من أولو
نضحك كتير جنب الصحاب فى يوم سعيد ما اجملو
معليش خلاص غلطان أنا غلطان عشان بغلط كتير
غلطان عشان قايلك هنا إمكن معاى تبدى المسير
غلطان عشان من النسيم لو مس لى جسمك اغير
غلطان عشان من دون جراح فى دنيتك داير اطير
ماكان زمان بتقولى لى غيرك محال اعشق حبيب
مهما قست كل الظروف أنا ليك ما ممكن اسيب
آيه الجديد فى حبنا آيه الحصل آيه الغريب
لو ما الزمان غير هواك ولقيتى لى جرحك طبيب
قولى زى ما الناس تقول انو الزواج قسمه ونصيب
معليش خلاص غلطان أنا ومن قلبى ليك كل المنى
تتهنى بى فرح العمر ويذدان قليبك بالمنى
ياهو القدر وانا راضى حتى لو انكتب لى الضنى
تتهنى انت مع النصيب وانا ليك بنظم فى الغنا
اصلوا الحصل ما منك انتى بس صحيح غلطان أنا
