ياريت لو تشاركوني والله الموضوع جادى

Darkman · 22-10-2005, 22:54

[كثير ما نختلف مع بعض في هذا الموضوع

وهو تربيه البنت والولد

ان تربيه البنت اصعب.. وانا خالفتموني الرأي وقلتوا لا الولد تربيته اصعب..

وفي الاخير نتفق على ان اختلاف الرأي لا يفسد للود قضيه..

الآن...

مارأي الاعضاء هل تربيه البنت اصعب؟؟
هل الولد تربيته تحتاج الى معاونه من الاب والا الام تكفي؟؟
هل العولمه والتطور تدخل في تربيه الابناء؟؟

داير رايكم لانو امي بتغالط فيني

albakaash · 23-10-2005, 02:55

center]عزيزى ولى
موضوعك جميل
علا يا اخوى نحنا عذابة لسه ونأمل اننا نسمع من السبقونا واتزوجوا وعندهم زرية
لكن فى اعتقادى البنات تربيتهم اصعب
ياخى الولد كان امه خلته فى البيت براه بتجى تلقى البيت زايد علا البت قبال ما يخلوها يفكروا فى البحرسها هى خليك من حراسة البيت
الولد يومه كله فى اللعب مع اصحابه والبيت ده ما بجيه الا زول نوم والبت لاصقة فى امها التقول بتجرى منها وهاك يا نقة
الولد عمره ما يجى يقول ليك جيب لى حاجة زى حقة فلان لكن البت ما تشوف ليها مصيبة فى ايد صاحبتها تحلف الا يجيبوا ليها زيها
الولد يشد بنطلون الجينز اسبوع والبت عاوزة فى كل مرقة فستان جديد
الولد جيب ليه عجلة يريحك من حق مواصلات المدرسة وكمان باقى اليوم يجيب بيها طلبات البيت والبت لازم تتفق ليك مع بتاع تكسى او ترحيل
ده غير شئ كريم وشئ احمر شباشب وشئ بدرة وشئ كحل وشى وشويات لكن الولد باختصار طلباته بسيطة
ولى عودة[/color]

عاشقة الصمت · 23-10-2005, 09:30

ولى موضوعك جميل , و ياريت الشباب يشاركو , لو ممكن تحدد اكتر , اصعب من اى ناحيه , من ناحيه التطبيع بمعنى الصاح و الغلط و الطبايع المفروض تكتسبا و لا من ناحية مصاريف و لا انت عايز اى زاويه
ولى عوده ان شاء الله

الأسد · 23-10-2005, 10:57

أنا بعتقد ياماما رحاب انو الموضوع من ناحيه عامة فلك ماشئت من خيارات وبعدين ما فارقه البت أصعب في كل الأحوال (بهظر)
عزيزنا ولي بالجد الموضوع شيق وجدير بالإهتمام ويكفي ما سرده أخونا البكاش ... وبالجد البت طلبات زايده عن اللزوم وبي كده بتزهج أبوها وأمها ومعناته متعباهم في التربية .. حبيبي الولد يومه كله بره الله يديه العافيه .. وحكاية العجلة ده حلوه شديد .. بس أكيد الولد محتاج لأبوه في التربايه أكتر .. البت ما زولة أمها ساي ..
شباب حاولو شاركونا

**طائر النورس** · 23-10-2005, 13:09

العزيز ولى
تسلم على هذا التساؤل الهام الذى طرحته فى ايهما اصعب فى التربية البنت ام الولد ..!!
انا فى اعتقادى ان الامور متساوية وكل تربية صعبة مهما كانت
فليس من المطلوب ان نزرع بوصلة اخلاقية داخل اولادنا ولكن المطلوب هو ان نغرس بداخلهم صفات يمكن ان تقود الابناء الى الطريق السليم وتحميهم من الانحراف مثل: اللياقة ... العدالة... التضحية بالنفس... التعاطف... الاحترام... الاخلاص... التعاون... الاحساس بالمسؤولية... الامانة... الشرف وكل الصفات الجميلة التى نحب ان نراها فى ابنائنا.
هذه الصفات التي يتعين غرسها في نفوس الاولاد والبنات تختلف طريقة قيام الاب والام في غرسها بالاولاد والبنات لأنه اذا نظرنا الى تركيبة مخ الذكر فإنها تجعله ضعيفا اكثر من ناحية الاخلاقيات. كذلك يتجه الولد لأنماط سلوكية تتصل بالمخاطرة والعنف الجسدي اكثر من البنت.
اذا كان من المتعين مساعدة الاولاد في تهدئة نفوسهم لكي يتعاملوا مع المواقف المختلفة التي تواجههم بحكمة اكثر وعنف اقل فإن العصر الراهن الذي نعيش فيه يزيد من عنف الاولاد عن طريق الافلام والعاب الفيديو والكمبيوتر وما تتضمنه من أفكار غير مستعدين للتعامل معها بالطريقة السليمة.
فوظيفة الاب الرئيسية هي تربية الاولاد خاصة في مرحلة المراهقة.. في حين ان وظيفة الام تتركز في تربية الاولاد في السنوات الاولى، وان الاب له الدور الاساسي في تشكيل شخصية رجل المستقبل، وان تربية الاطفال بوجه عام تجربة روحية يحاول من خلالها الآباء والأمهات ربط الاولاد والبنات بالعالم من حولهم من دون أي إيذاء يقع عليهم او على الآخرين...
وانا فى اعتقادى كما زكرت سالفا ان الامر سيان والتربية صعبة سواء للولد او البنت لان فى النهاية لو قالوا على الولد ( مامربى ) فالشتيمة بترجع للوالدين ولو قالوا على البنت ( مامربية ) برضوا الشتيمة بترجع للوالدين يبقى صعوبة تربية الاثنين فى ميزان واحد ...

**معتز زيزي** · 23-10-2005, 13:52

أخي ولي ...

شكراً على هذا الطرح المفيد ،،،

أن تربية الابناء ليست بالشئ السهل فتربية البنت تختلف عن تربية الولد وتختلف تربيتهم في مراحل عمرهم فهي من اصعب المهام التي تواجه الاب والام .
كثيراً من الناس يكبت الولد في المنزل ولايتركه ينزل للشارع بحجة خوفه على ولده من مخالطة من هم سيئ الخلق مما يولد لدى الولد كبت نفسي وتربية انثوية يتشبه مع مرورالوقت بأخواته ولايعتمد عليه في كبره في اي شي .
أما البنات فطبعاً هن لهن الدلال كله لان بقائها في منزل والدها ايام معدوده وبعدها الله يعين الزوج على دلالها خاصة ان كان زايد عن حده مما يسبب لها مشكلة في حياتها الزوجية وبالتالي الفشل .
فخير الامور هو الوسط تدليل الابناء في مرحلة الصغر مع التحفظ فقط ...

صدفة البحر · 23-10-2005, 17:17

شكرا ولى .. لى مشاركة صغيرة واعد بان ارجع للمواصلة

حسب ديننا الحنيف لا توجد معايير معينة لنقس بها مدى صعوبة تربية كل من الولد والبنت
لكنى اتفق مع النورس بان الجنسين تربيتها سوا .. بغض النظر عن الولد بحرس البيت .. والخ
لانى لا اعتقد ان حراسة البيت تعنى سهولة التربية ..الخ

المهم ان كبر ابنك فخاويه

لى عودة

عمران عامر · 23-10-2005, 22:51

الأحباب الأكارم سلامات

هم طبعا فلذات أكبادنا التي تمشي على الأرض شباب اليوم رجال الغد حماة المستقبل على رأي محامي شاهد ما شافش حاجة ، هم من تحلو بهم الحياة ولهم يكون التعب ، طبعا كلامي ده كلام زول مشتاق لحاجات زي دي بعد أن نقبض السبب، والسبب هنا بمعني أمهم التي تنجبهم يعني لما نلقى البنت ونجكسها وتحبنا يحصل الزواج ونتمنى من رب العالمين الذرية .

أما بخصوص الموضوع طبعا أنا من وجهة نظري أنه تربية الابن في بداية التكوين هى الصعبة عكس البنت لأن الولد يكون يكون دائما في حالة حركة وليست سكون يعني حائم في الشوارع ومع أصحابه وعند الجيران ووين ووين بالتالي يحتاج لمجهود جبار عشان تتابعه حتى لا ينحرف عن الخط الذي ترسمه له مؤقتا في مرحلة التكوين "تحت شعار فأبواه يهودانه أو يمجسانه " عليه بتكون المراقبة مما يصعب معها أمر التربية بالنسبة للولد يعني لازم تسأله في الرايحة والجاية وتحاسبه على ما يقع فيه من خطأ ووووووووووو وتشوف من يصاحب ومع من يلعب وكيف ماشي بالدراسة يعني بحتاج لمجهود خارق يعني لو طلقوا الحبل على القارب ياهو الغرق وغرقنا معاه .

أما البنت فما بتحتاج لكبير مجهود وذلك لان معظم جلوسها بالبيت مع أمها يعني اذا بعدت ما بتبعد من الحارة أو الفريق بصورة عامة يعني ما بتحتاج لكبير عناء في معظم الأمور عشان كده بتكون تربيتها ساهلة جدا وغير متعبة ويبقى المهم أن نحسن الغرس في نفوسهم حتى يشبوا على الطوق وهم يملأو العين .

طبعا ده بالنسبة للسن الطفولية أي ما قبل سن البلوغ ، ولكن بعد سن البلوغ ينقلب الأمر تماما فهنا تكون تربية البنت هي الصعبة للاعتبارات المعروفة اياها اما الولد فبتكون المراقبة والتربية عليه ما زي الأول خاصة وأنه يكون قد تشرب بالمسؤولية أو قارب أن يكون منها قاب قوسين أو أدني عكس البنت والتي يجب أن تكون مراقبتها في كل حركاتها وسكناتها وذلك لإختلاف الأمر ففي مرحلة الشباب تبقى البنت هي العمود الذي بانكساره يتشتت كل ما بنته الاسرة في سابق الأيام برضه لو تركو ليها الحبل على القارب يا ها الغرقت وغرقتنا معها لذلك أنا بشوف أنه التربية تختلف من مرحلة لأخرى بين الاثنين فكل له سن عمريه محددة يجب مراعاته فيها .

والله رأيكم شنو في كلامي ده ؟؟؟

ودمتم

عاشقة الصمت · 24-10-2005, 09:45

جينا تانى ....
عموما تربية الابناء عمليه صعبه و ماساهله...لكن بتختلف درجه صعوبة كل مرحله ....
نمسك الولد فى الاول ... (الطفوله)الولد دايماً جارى فى الشارع من مكان لى مكان , مما يصعب عملية المتابعه و المراقبه ... (15,14 سنه ) بيبدأ يحس بانه لازم يكون عندو كلمه و كينونه و يفرض كلمته , يعنى لو قلت ليه فلان دا ما تصاحبو , بس فلان دا القلت عليه لا , يمشى يصاحبو ... المرحله دى بتطلب وجود الاب ...
جينا للبنت ... اقول ليكم قوله البنت مريحه فى كل المراحل , لسبب بسيط لانها دايماً مطيعه و مسالمه ...
لكن دا ما دايماً فى البنات البيعذبو اهلهم فى التربيه ...

الأسد · 24-10-2005, 12:57

يا ولي يبدو انو الموضوع مهم للغايه كل الشباب بيقولو يمشو ويجو راجعين .
فعلاً محتاجين للمزيد من الآراء