(رابي):اتراجع عن قناعاتي عندما احس انها ستسبب مشكلة

**طائر النورس** · 16-06-2005, 22:54

احبتى الاعزاء
بعد ان استمتعنا وقضينا اوقات جميلة ورائعة مع الاخت ست الكسرة ....
نأتى مرة اخرى وقبل ان ( يبرد ) الكرسى ولايزال ( مولع ) لكى تجلس عليه عضوة متميزة اخرى لها حضور طاغى وشخصية فلاشية وامضة تستنطق صمت اللحظة وتتطوع الكلمات الا وهى الاخت

(( رابى ))

فتفضلوا بالقاء اسئلتكم عليها
ولتتفضل هى بالردود

°~*¤®§(*§ ودمتم احبتى §*)§®¤*~ˆ°

Sit_Elkisra · 17-06-2005, 10:45

سلام ده جاكم,,,

بما إنو مافي زول عزمني بارد ولا أدوني زاتو كوز موية ساقطة .. مشيت براي خدمت روحي و جيت ...

رابي المنقة ,,, مرحبابك في نصنا ... و أنا عينت نفسي محامي مباشر ليك (( من غير أتعاب)) منعاً للحكحكة الأكتر من اللازم ... و لأنك بت حلال ما برضى ليك العملوا فيني ديل ..

أول شي حقوم أسألك أسئلة كده ((فتحة خشم ساااي)) لسة يعني ما جينا لي السخونية زاتو ...

1::: عاوزاك تقولي لي أول جواب خطر في بالك بعد الأسئلة الحسألها ليك دي ؟
---- لو خيّرتي أن تتحولي لي حيوان ؛؛ حتختاري ياتو .. و لماذا؟
---- القلم و الورقة بالنسبة ليك شنو؟
---- لو شفت وميض في نص عتمة .. حتقولي ضوء كشاف ... والا حتسبحي بعيد و تقولي شي تاني؟

2::: عاوزاك تحكي لينا عن رابي الطفلة زماااان!!! كانت طفلة هادئة والا غلباوية .. و لا بكاية أبو دقيق؟؟

3::: أي الرياضات تلعبين؟

...
بس كده كفاك ...

خال اماسى · 18-06-2005, 00:08

رابى او ربى لك التحيةمع انى اعتبر ضيف بس شايف من الكرسى بتاعكم انو فيهو ال1كاء الوقاد فى السر والتناول رابىداير اعرف شنوبتعرفى عن دهليز السلطا لاحظى السلطة من المطبخ وليس كتاب المحجوب؟؟؟

خال اماسى · 18-06-2005, 00:11

اسف ساعيد السؤال قى صياغة اخرى ما مدى معرفتك بالمطبخ السودانى

alrazan · 18-06-2005, 09:34

الف حمد لله على السلامة الاخت ست الكرسى اقصد ست الكسرة
وعليك بقول الحلوة بريدها وخافى بريقها
والحلم الرافد يبقى حقيقة

ويامليون مرحب بالرائعة ست الاسم رابى
نتمنى ان يكون جلوسك بيينا كتلال على ربوة وسط خضرة مزدانة بخطوط العشاق لتكون
جلسة ثمر على ضوء القمر لتحكى لنا رابى ماتمنينا ان نسمعه

رابى( ورى البسمات كتمت دموع وبكيت من غير تحس بى ) هذا ماقاله فنانا ود الامين
ماذا يعنى لك الضحك ومن خلفك ستار يحمل دمعة من الحزن ؟؟

خلو لى مساحة محجوزة لانى راجعة تانى

ويبقى الامـــــــــل

رابي · 18-06-2005, 13:59

الاخ العزيز طائر النورس
معذرة على التأخير في الردود وفي الجلوس على كرسيكم الساخن ده لاني لقيت درجة السخونة فيهو عالية جدا وقلت يبرد شوية وبعد داك اقعد فيهو فلكم العتبى حتى ترضون.
وبشكرك جدا على الكلمات الرائعات القلتها في حقي وان شاء اكون عند حسن ظن الجميع بي.
اها بسم الله نقعد وامرنا لله
والله يجازي الكان السبب
ــــــــــــــــــــــــــــــ
الغالية ست الكسرة
يا هلا بيك وان شاء الله حالك زين وانت بقيتي كويسة من الزرزرة الكنتي فيها والبتكون عملت ليك وجع كتوف من كترة العواسة .
انتي يا اختي ست بيت وما بتحتاجي لي عزومة في بيتك مالك ما كنتي بتخشي براك وتشربي من الزير و كنت بتسوطي ليك شربات كان ليمون ولا كركدي ولا حلو مر كان لقيتي في سكر ما لك الجاك شنو .
وده شنو ده البتسوي فيهو ده كلو فتحت خشم طيب في سد المال ح تجيبي لي شنو ؟؟!!!!!!
لكن ما في مشكلة امرنا لله نرد على اسئلتك (الحالة دي قالت دايرة تبقى لي محامية يا ربي ما بقت المحامي حقي كان ح تسال من شنو؟ ) يا جماعة الكلام البين قوسين ده حقي براي بتكلم مع نفسي.
ح اختار الأسد لأنو ملك الغابة وانا ملكة في بيتي وعايزة أكون ملكة على المنتدى اها قلتي شنو عندك راي ؟
الورقة والقلم .....
عندما اجد نفسي وحدي وانا وسط الاف البشر عندما لا اسمع أي صوت حولي الا حفيف الاشجار برغم كثرة الافواه بجانبي عندما احس اني اريد ان اخاطب نفسي واناقشها لا اقف امام المراة لكني امسك بالقلم والورقة
واناقش نفسي كتابة وعندما ..وعندما..... يا اه يا ست الكسرة الورق العندي لو بتكلم كان عمل لي مشكلة كبييرة .
لو شفت وميض في نص عتمة ح اقول الدنيا لسة بخير واشيل توبي واجري على محل الومضة والنور داك.
والله امي قالت لي اريت لو الشفع كلهم زيك قالو ما بكبي الا اكون جعانة او عيانة لكن ما انفتحت فيهم جوتة ومشاكل بعد كبرت قلت ليهم كنت مخزنة الحاجات دي وانا صغيرة.
بحب السباحة وبمارسها طوالي وكمان المشي واهو ماشين .....
ــــــــــــــــــــــــــــــــــــــــــــــــ
خال اماسي اهلا بيك البيتك بيتك
علاقتي بالمطبخ السوداني مية المية اها عايز اعمل ليك شنو انت تطلب بس
ــــــــــــــــــــــــــــــــــــــــ
الرزان مرحب بيك
انتي بس قاعدة لي وليع النيران اسي في داعي تتذكري الكرسي ده لكن ما مشكلة هي برضو فكرة كويسة الناس تتعرف على بعض اكثر وما قصرتي ..
يقول د. ريتشارد ملكاستر وهو أحد مؤسسي علم التربية في انجلترا: الضحك هو الطبيب الحقيقي لحالات الجنون الساكت (الماليخوليا) والبضحكني كثير الحمد لله بضحك لما اشوف لعب الاطفال وضحكهم وبضحك علشان ما اصيب بحالة جنون...طبعا في حاجات كثيرة بتضحك لكن طبعا بكون عندها سبب لانو الضحك بدون سبب قلة......على قول اهلنا ..
ومكانك محجوز لكن من غير زرزرة اتفقنا

**طائر النورس** · 18-06-2005, 22:44

غاليتنا رابى

قال احد الحكماء : ( أقدام متعبة وضمير مستريح خير من ضمير متعب وأقدام مستريحه ) ..!!

متى تحس رابى ان ضميرها يؤنبها ؟؟!!

°~*¤®§(*§ ودمتم احبتى §*)§®¤*~ˆ°

رابي · 19-06-2005, 11:22

العزيز طائر النورس
بحس ان ضميري بأنبني جدا لما اغلط في حق زول او افهم كلام زول غلط الحاجة دي بتعذبني عديل.
وبرضو بحس بتانيب الضمير لما ادي الزول اكبر من قدروا واحس انو ما كان بستاهل الاحترام والتقدير الاديتو ليهو

dyab8 · 20-06-2005, 01:17

الرائعه رابي
لك نكهه خاصه في ردودك وانت جالسة علي الكرسي انشاء الله يكون بارد عليك
- وبسالك متي تكون رابي في قمه سعادتها .
-ماذا اضاف لك منتدي عشاق السودان
-حصل اتضايقت من عضو بالمنتدي

رويدا · 20-06-2005, 10:54