(رابي):اتراجع عن قناعاتي عندما احس انها ستسبب مشكلة - الصفحة 2

رابي · 20-06-2005, 12:17

العزيز dyab8
اشكرك كثير على كلماتك الجميلة وربنا يسمع منك ويبردوا علينا
بكون في قمة السعادة لما احس اني قدمت حاجة لي زول وهو فعلا محتاج ليها يعني فكيت لي زول زنقة ربنا ما يوقعك في زنقة قول امييييييييييييييييييين
وبكون في قمة السعادة لما اعمل شغل او حاجة وتعجب من حولي وفي حاجات كثيرة بتخلي الزول في قمة السعادة وبقول ليك زي ما قالت هذه السيدة الجليلة لابنتها
ابنتي
عندما تشعرين بدفء الشمس وترين جمال الكون وتتحركين في محيط
من يحبك فهذه السعاده ..وعندما ترين من تحبين سعيدا وتنعمي بلقائه
فهذه سعادة ايضا ..وكل ما عدا ذلك زائل ..فنحن نطمح لما لا نحصل عليه ولكن عندما يصبح بين ايدينا يأكله الروتين فلا نعود نشعر بوجوده ..فالسعاده حالة نحن نخلقها .
منتدى عشاق السودان اضاف لي الكثير كفاية انو الواحد بتعامل مع عشاق لبلدوا وكمان ناس في قمة الفهم وبعرفوا ابجديات الحوار والنقاش.
اما بالنسبة لسؤالك الثالث المنتدى بيعكس اراء لناس مختلفين عني في الفهم والتجربة وفي جاحات كثيرة يعني لازم الاقي زول رايو ما زي راي او بيختلف معاي في الراي ووجهة النظر وده شيئ ما بخليني اتضايق بالعكس بسعدني جدا لانو بعكس انو الناس بتفكر وبتقول اراءها يعني ما امعة .
الحبيبة الجميلة رويدا
كيف اخبارك ومشتاقين والله واهلا بيك وبحب اشكرك كثير على ثلجك الرسلتيه لي وطبعا برد علي شديد وكمان على طلتك الجميلة يعني الواحدة تحمد الله انو الكرسي ده بخليه يستمتتع بطلة احبابو واصدقائوا من المنتدى وببرد حرتو شوية .
اما بالنسبة لسؤالك هي محاولات او خطرفات بتصدر من الزول في لحظات مختلفة او هي احاسيس تنتاب الزول بس انا انا طوالي بنزلو في الورق وبنقل منو شوية غايتو استحملونا شوية وحالوا اقراولينا نحن في انتظار اراءكم وانتقاداتكم لاني مع النقد البناء

عمران عامر · 20-06-2005, 12:59

سلامات رابي

الكرسي الساخن أو هاجس خطر في بالك وأوجست منه خيفة عندما تم ترشيحك له ؟

عشرة الايام ما بصح ننساها هي مقطع لاغنية عثمان حسين : ماذا يعني لك الفراق ؟

كل طائر مرتحل عبر البحر قاصد الاهل : ماذا تعني لك الغربة خصوصا غربة الزواج أو الحبيب ؟

أصبر على جرحك ولو طال الألم : متى تحس رابي بأنها بالندم ؟

مع خالص تحياتي

رابي · 20-06-2005, 15:39

عمري انا ازيك تمام ان شاء الله تكون بخير
الكان مخوفني من الكرسي الساخن الزرزرة الفيهو دي والاسئلة الكثيرة الزي اسئلتك دي لكن ما مشكلة حبابك عشرة وبي اسئلتك الحارة دي
الفراق بعذبني وخاصة فراق الاحباب .
والبعيد عن اهلو مهما طال غيابوا مصيرو يرجع لي اهلو وصحابو ولما كده
لما يسافر بحس انو في حاجة ناقصة بحس انو جزء مني مفقود علشان كده ما بحب سفرو
بحس بالندم لما يكون ظني في زول ما في محلو بحس اني ظلمتو معاي وبحس بالندم لما اعمل حاجة وما احس بتقيم ليها واحس انو في زول تاني ما تعب فيها زيي وهو الاتقيم بيها فقمة الألم
أن تشعر بضيقاً في صدرك و اطراب ملحوظ في نفسك يشل تفكيرك ويسحبك من عالمك ويشعرك بالأسى الشديد فتحبط وربما تصل إلى مرحلة غير متوقعه من الأكتئاب لأنك لم تمتلك القوة المطلوبه التي يجب أن تتحلى بها لمواجهات الصعاب فتثير شجونك !!

**Silent Storm** · 20-06-2005, 17:25

السلام عليكم
القادمة الينا بقوة رابي ،،، ترسم روحها بانسيابية وتقنة وتترجم داخلها بحروف شاعرية ،،
اود ان اسجل اعجابي بقلمك وفكرك الرائع،، ولدي القليل من الاسئلة اجابتها لديكي
- متى تتراجعين عن قناعاتك؟
اخبرني ايضا ماذا تعني لكي :-

- رابي
- السياسة
- منتدى عشاق السودان
- البحر
- الورد
- الحلم
أعتز بأنك معنا هنا
ودمتي رائعة

رابي · 21-06-2005, 12:13

العزيزHaMaDa4eVeR
اشكرك جدا على اطرائك الجميل والذي هو بمثابة شهادة اعتز بها
احاول ان اتراجع عن قناعاتي عندما احس انها ستسبب مشكلة لمن حولي وعندما احس ان فيها شيئ خاطئ او وجهة نظر غير صحيحة .
رابي دي متعباني شديد لاني بحبها شديد وماعارفة من أنا وما هي ذاتي؟؟!!! الاجابه ليست كامله لدي وربما ليست صادقه كل الصدق احيانا اسال نفسي هل هذا حالي االذي ارغب به و ذاتي ما هي بالضبط ؟؟ هل اعرف نفسي جيدا ؟؟!!
فجميل ان يكون في الناس من يعرف قدر نفسه والأجمل دائما أن
يكون هناك من يبحث عنها فيناضل ويقاوم حتى يجدها فيتعرف عليها يتعب لبرهة ولكنه سيعيش باقي أيامه كأمير الناس مرتاح البال.
السياسة في تعريفها العام هي رعاية شؤون الأمة داخلياً وخارجياً، وتكون من قبل الدولة والأمة، فالدولة هي التي تباشر هذه الرعاية عملياً، والأمة هي التي تحاسب بها الدولة.
وده طبعا المفروض يكون في السياسة لكن طبعا معظم الشعب السوداني سياسي درجة اولى لكن في راي معظم السياسيين منافقين كبار وهمهم مصالحهم الشخصية فقط وليس رعاية شئون شعبهم.
منتديات عشاق السودان هي بيتي الثاني الذي وجدت فيه نفسي
البحر ملئي بالاسرار والخبايا والغموض كالنفس البشرية متقلب احيانا قمة في الهدوء وبعد لحظات زوبعة من الاعاصير.
الورد جميل جدا عندما يكون متفتح وله رائحة جميلة مريح للنظر وللنفس ملهم بجماله ونعومته
الحلم اجمل دنيا استطيع ان افعل فيها ما يحلو لي دون قيود او ممنوع فكل ما احبه واشتهيه واريده اجده ملك يدي.

alrazan · 22-06-2005, 10:32

الغالية رابى : جيناكم ياحبايب

الانسان هل هو ملكا لقراره ام لظروفه ولماذا ؟؟
مابين الحيرة والدهشة تداخلات وتاملات من اى الابواب يكون الولوج اليها ؟؟
عندما يسود الصمت من كل الجوانب ماذا تفعلين ساعتها ؟؟

كده كفاية لكن بمشى وبجيك تانى بس ( طالبة حراسة مشددة من كل العشاق ) بعد انتهاء الكرسى الساخن

ويبقى الامــــل

رابي · 22-06-2005, 17:00

الرائعة الرزان انتي بس اصبري سااااااااااااي بعدين الا يعملوا ليك حراسة زي العاملنها للسفارة الامريكية.
و اشكرك جدا على المرور
بتخلف الحالات احيانا الزول بقدر يتحكم في حاجاتوا حسب قرارو الصادر منو لكن احيانا الظروف تقتضيه انو يتعامل وفقها. ومن يتوكل على الله فهو حسبه
وبقول ليك
في ظلام الصمـــــت في عمــــــق السكـــــون
في جمـــــال الحــرف في الصبح الحنــــــــون
أو صيــــــاح الريـــــــح أو مــــــر السنـــــون
في عــــــــذاب القــلـــب أو الدمـــع الهتــــون
تــورق الأحزان نشوى ترتوي منها الشجـون

Sit_Elkisra · 23-06-2005, 11:33

الرائـــــــــــــعة رابـــــــــــي

قعدة الكرسي عندك لكن
رجعت ليك تاني و شايفة الناس رايقة و مافي زول بيحتاج نرفع عليه قضية ... والا رايك شنو يا موكلتي؟

رجعت شايلة قفة أسئلة من سوق الخضار ... سجمي يا رابي البصل غلى تااااااااني .. اطبخ بي شنو هسع !!!؟؟

------
عزيزتي ..
1::: متى تشعرين بأنك تودين الإنفصال عن تفاصيلك البشرية ؟ أعني رغباتك الملحّة .. قنوطك و تضجّرك من الحياة... متى ؟

2::: إذا وقفت رابي في طريقها و رمقت إمتداده إلى نهايته .. هل سيكون سؤالك ((إلى ما أنا أتّجه؟ )) (( الطريق طويييييييييل! )) (( لحدي هنا كفاية)) .. أم ماذا؟

3::: رابي و الدراسة... أريد منك أن تعرفينا عن مجالك ؟ و هل أنت من حددتيه أم أهلك؟ و هل راضية عن نفسك؟ هل أنت متمكنة في مجالك؟

------
كر علي يا بت أمي ,,, حتى التلج الجابته ليك رويدا ساح ... خلاس معليش .. تكبري تنسي...

...
لسسسسسة -ياقول سرحان عبد البصير ((دنا حهريك الليلة دي))...
...
لو أي زول غلط فيك ناغميني سمح!؟

عمران عامر · 23-06-2005, 12:01

كيفك وكيف الايام معاك

آها اخذت لي لفة كده قلت أعاين اشوف الحاصل شنو وأجئ راجع من تاني ليك وأقول ليك :

1- في ظل الحاصل الان وأعني كثرة البنات وعدم اقبال الشباب على الزواج وتعلل البنات بالدارسة ويمكن ما فوقها عليه وفي ظل هذه الاوضاع لو قالوا ليك اتخذي ثلاثة قرارات ماذا تكون هذه القرارات ؟ مع التوضيح لكل قرار.

2- وبما إنك من جنس البنات اتخذي لينا برضه ثلاث قرارات بشأن الزواج .

وحا أعود ليك من تاني

رابي · 23-06-2005, 14:18

الغالية ست الكسرة
انت في البصل ولا كيلو اللحمة البقى بي 16 الف الحالة قلت لما اجيب الخضار باقي القروش اشتري لي بيها شوية كهرباء لكن لقيت الكهرباء بتقت مشعللة وقلت احسن اجيب لي جاز وارجع لي الفانوس يا بت امي مع الحالة الصعبة وحمدت الله بي تلج رويدا لكن اعمل شنو زي ما قلت ساح من شدة سخونة الكرسي القاعدة فيهو ده وتعالي النسالك يا بت امي ده شنو البتسوي فيهو كلو ما تمشي تجيني بقفة اسئلة اها نجاوب على اسئلتك
اود الإنفصال عن تفاصيلي البشرية عندما اشعر بانها ستسلبني رابي وستسلبني شخصي وتجعلني اصبح شخصية ثانية وتلون عيناي باللون الاسود ولا تدع لي الفرصة بان ارى حتى لو شوية بياض في حياتي عندها فقط انفصل وبقوة عن كل تفاصيلي البشرية وانتزع نفسي منها انتزاع.
بقول لسة الطريق طويل وملئ بالتناقضات السعادة والشقاء الحزن والفرح والفراق واللقاء ولازم اجهز نفسي للرحلة لانها طويلة وبتحتاج لنفس طوييييييييييييييييييل وبعد داك اجهز شنطي وعتادي وامشي واتكل على الله ومن توكل على الله فهو حسبه.
انا درست بكلية الاداب قسم اللغة الانجليزية جامعة ام درمان الاهلية ولسة متخرجة جديد لنج شهاداتي حارة ومسخنة زي صاجك دي طبعا كانت قدامي كمية من الخيارات لكني اخترت الاداب قسم اللغة الانجليزية لاني بحب اللغة الانجليزية وانا راضية تماما عن اختياري ده وانا حاسة باني يعني ما متمكنة خالص ومحتاجة لشوية تعب وممارسة لكن طبعا طالما الرغبة موجودة فده بسهل عي شديد.
سمح يا اختي بكورك ليك لكن عليك النبي وطي صوت الرادي شوية عشان تسميعني اليوم داك ناغمتك لمن فترت ما سمعتيني.