عش المصالح المشتركة

صدفة البحر · 17-10-2005, 12:13

 نورة عريسا قريب
 بالله .. خلاص محمد شدة حيلوا .. ماشاءالله دة زول عجيب
 هوى يا عبيطة محمد دة منو كمان؟
 اجى يا ناسى .. محمد حمادة .. السكرو ذيادة .. البلقاه خالطة من شارع المعونة لشارع القيادة؟؟
 يا بت هوى حمادة دة بتاع حبكنات ساى .. ما عندو غير الفول .. والتحلية بكلام معسول .. بس معقول؟؟
 دة كلام كبير .. ولا انا عقلى صغير ؟؟
 لا صغير ولا كبير .. بس نورة احكمت التفكير؟؟
 اها ومنو العريس؟؟
 زول لقطة .. حواجبوا عااااااااااليا مليانة وجاهة .. اول حاجة بقروشوا ملاها.. والنمرة القديمة دييييييييييييييييك بناها .. ودة غير العربية الهنا سواها .. وليها براها ..
 كدى كدى .. دة الكلام دة الكلام
 خلينى اقول انا لسة بقدم .. دة الشيلة جاباها بالكتلوج .. يا ختى الزيك يودوه التوج..
 هههههههههه والدهب والمهر
 الدهب ما بنفس اللون .. ياختى شى ابيض وشى ملون وشى بدون .. شى زمرد وشى الماظ وبدون مقياس .. كان اقول ليك خمسين وقية اكون ما بت ناس
 دة الكلام .. اها والمهر
 المهر يا يمة شى عجيب .. شيك على بياض وفى سويسرا الرصيد .. وكل ما ترمش يجيب ويجيب ..
 حاشاهو العيب .. اها وحتأجر فستان الزفاف من وين؟؟
 انت قايلاها بت ام حقين .. دى يا بت مصمم ليها فستان مخصوص .. على جسمها بس مقصوص .. بقولوا من كريستسان ديور .. المصممين ليها العطور والبخور ..
 اكيد للمكياج جايبة انتصار جحا ؟؟ هو فى احسن من كدة؟؟
 انت يا بت جنيتى ؟؟ ولا الكلام ما مؤثر فيكى؟؟ دة مؤجر ليها مصصف شعر من البقولوا (هيكى) .. متعلم فى باريس ومتدرب فى هوليوود .. وممكيج الفنانة (بيكى)
 كرررررررررررررر على وتانى شنو؟؟
 تانى شنو ولا شنو ؟؟ دى حترقص بعشرة فساتين .. ومعلماها (قسمة) ما بت فطين .. والرقيص فى هيلتون .. صالة بملايين ..
 فى هيلتون .. اكيد الضيافة بارقى كوكتيل؟؟
 لا والله ديل مخططين يكون بوفيه مفتوح .. فيه الدجاج والمارتديلا والبيتزا والمايونيز والهيل ..
 والبارد معلب؟؟
 اكيد بالحيل ؟؟
 وشهر العسسسسسسسسسل ؟؟
 قالوا عشان ظروف شغل العريس .. حيخلوها شهر فى برلين .. وشهر فى موناكو .. وشهر فى باريس.
 تلقى امها فرحاااااااااااااااااانة؟؟
 العجيبة الام لسه ليها راى .. شايفة بتها من الهاى هاى .. والمفروض ما يهديها عربية هونداى..
 كلاما صحى .. هم ذاتهم العندهم شوية .. ديل الفيلل عندهم بالمية ..
 يا زولة احسن من حمادة القحطان .. الماعندو هدية غير حلاوة اللبان .. والعزومة فسحة لكبرى امدرمان .. والكلام المعسول .. والطرف النعسان ..
 لكن بامانة هو زول فنان .. بس من ناحية قروش تعبان .. وما بعرف غير العزف على الكمان ..
 لكن كان بحبها حب خرافى .. لعشرة سنين .. كدة ببساطة تسيبوا حزين؟؟
 يا بت ببساطة بتاعت شنو .. دة كان حيأكلها عصيدة ويسكنها بيت قصيدة .. وبعدين القاليك بقبل بيهو منو .. اهلها ما برضوا بيهو .. انت بليدة؟؟
 كلامك صح .. هى ذاتا ما كان تقبل .. اصلوا دة ما عندو مستقبل ..
 اها مع السلامة .. نتلاقى فى الحنة
 قولى فى الجنة
 هههههههههههههه

وعلى صعيد اخر ..

 الو العريس؟؟
 اهلا اهلا يا زول انت وين؟؟ قاطع اخبار ليك يومين
 كنت بكمل فى صفقات مع المصدر (بنيامين) .. قالوا لى خلاص نويت على اليمين..
 نويت والله.. دى عروسة لقطة وما بتتفوت .. ابوها أمين .. اكبر تاجر استيراد وتصدير
 أمين القابلناهو فى مدريد
 اى يا زول طلع عندو قروش بالكوم .. وعروستى الوريث الوحيد ..
 دة الكلام التمام يا وليد ..
 دة غير النفوذ والسلطة من الرئاسة لـــــــــــمصلحة البريد
 يعنى ضمنا كل عطاءات البناء والتشييد..
 يا زول بس هندسة .. نحن حنضمن البترول والكهرباء والتوليد
 كدة تمام .. اها وحسى شنو الجديد؟؟
 اول حاجة اهديتو بيوتى الفى الثورة .. مقابل شحنة حديد ..
 دة الربح الاكيد .. معليش نسيت اسالك العروسة حلوة ؟؟
 لا والله دى شينة شديد .. بس المستقبل معاها سعيد ..
 الله يتمم نجاح المشروع بخير..
 انشاءالله يا زول لانو كلفنى راس مال كبير..

عمران عامر · 17-10-2005, 13:17

ههههههههههههههههههههههههههههههههه الله يجازي منحك يا بنت يا رائعة طبعا أول ما قريت الشق الأول من التهويمة الجميلة دي حبيت ارد أقول ليك والله نحن ناس كبري امدرمان سااااااااااااااااااااكت وبالكداري كمان ، ويا حلاوة النيل طبعا دي كان حا تكون في قمة التعاسة وكرعيها مغبشة من الكداري والمشي في الحواري وفتيش العقارات للسكنة بالايجارات ، وقلت في قرارة نفسي ياربي صدفة دي وعرسها قرب برضه عريسها " وليد " ولا " محمد " ههههههههههههههههههههههههه .

لكن لما قريت الجزء الثاني عرفت الحكاية وقلت صاحبنا حا يتمها قنوات على قول النكته وشكله حا يشتري ليه معارض سيارات في حال الولاده بقت بنات ، لكن بيني وبينك الزمن ده لا المقرشه لاقيه ولا المفلسه والكل في الهم شرق و ما في حل الا الناس تقعد وتشكل لجان تنفيذية وليست تنظيرية مثلا في الجامعات ما يقبلوا بأن يعطوا الشهادة الا لما تتزوج من الجامعة التي درست بها وشوفي بعد كده هل حا يكون في بنت لم تتزوج والله الما قرن يقرن بالانتساب أو من منازلهم عشان يحصولوا الأمر .

لكن ما قلت لي محمد سوه شنو بعد الشاكوش الحار ده ويا ربي غير دربه بالكبرى ولا لسه مواصل المشوار ؟ طبعا كلامك ده حاصل بالسودان ونحن لينا الله .

صدفة البحر · 17-10-2005, 14:01

ههههههههههه
عمرى انا محمد خلى ساااااااااى ..

وبجدية اكثر
موضوعى دة فيه رسالة مهمة جدا .. وليس العرس.. موضوع زواج المصالح .. هل يدوم .. هل يجد فيه الناس السعادة المنشودة من الزواج؟؟؟

المهم يا عمرى ليس محمد وما حيحل بمحمد ففى زماننا هذا كثير من ال(محمدات) تجاوزوا المحنة بحلول كثيرة منها (الاغتراب) .. لكن الماساة الحقيقة هى نورة .. كم مثل نورة ووليد سنصفق لهم؟؟
هل تدرون وتدركون المستوى الذى نصل اليه بمثل هذه الزيجات
هل تعلمون معنى ان نبنى مشروع اسمه الزواج راس ماله (قروش وورق ما اخلاق وعواطف)؟؟
هل تعلومن كم من الابناء الاليين الذى ستنجبهم مثل هذه الزيجات؟؟

الموضوع خطير ؟؟ عندما يتبدل قل رسولنا الكريم .. ويختلف راى المسلمين عن راى الدين .. ونصبح ننسى كل يوم .. تزوجوا فقراء يغنيكم الله ..
الموضوع اصعب من ان نفكر فيه بطريقة منطقية ؟؟ لانه يستفز العواطف والمشاعر الانسانية؟؟

ويصبح اخطر لما الرجال فى مجتمعنا باتوا يفكرون بهذه الطريقة الراس مالية ..(والله دى زولة قرشة .. ودى متعلمة ووظيفتها كويسة الزول بضمن دخل شهرى تمام) والخ

ارجو المعزرة فى اطالتى .. لكن استفزاز الزمن المادى هذا مشاعرنا الانسانية لا يحتمل السكات عليه؟؟
ولا رايكم شنو؟؟

صدفاية؟

جمانة · 17-10-2005, 16:37

هههههههههههههههههههههههههههههههههههه

والله بقيتي مجنونة
يا صدفتي
...
بتجيبي الحاجات دي من وين ...الله يجازيك ...

بس لي ضيق الوقت ..لي عودة يا عسل

الأسد · 17-10-2005, 17:10

بارجع تاني لازم أعلق

المسافر · 17-10-2005, 17:16

كـنـــــــت دائمـــــا أقــــــــول انـى ابـحـــــث عـن امـــرأة بـطـعـم ..
الـسـكــــــر ونـكـهــــة حـقــــــول الـشــــــــــاى .. تـتجــــول فـى
وجـــــــــــدى ..وتـشـاركـنــــى الـخـبــز ..
لـــم تـقــــــــل الـرائـعــــــــة صـدفـــــة الا الـحـقـائــــق الـمـاثـلـة
فـى الـمـجـتمـــــع الـسـودانـــى ...وتـذكــــرت أحـــــد رفـاقـــــى
الـرائـعـيـن وهـو يـجـسـّـدذلـك فـى شـكــــــل مـزحــة ... فقال لى
ان فـــــــــــلان مـعـــه رأسـمـــــــــال كـبـيـــــــر جـدا ولـن يـدعـــه
والـــــــده بـالـزواج الا مـن قـريبـته .. وقـلـت لمـاذا قــــال حـتى لا
تـخـــرج ثـروات الـعـائلـة لاحـد غـــــريــب .... فـقـلـت لــه وعـنـك انت
قــــــــــــــال لـى ..لـن يـدعـنـــــى والـدى فـقـلـت لـمـــاذا ..قـال..
نـحــــــن اهــــــــــل قـيــم ... ولا نـريــــــد ان تـخــــرج الـقـيــــــــــم
لاحـد غـــــريـــــب ..........!
شـكــــــــرا صـدفــــــة.......

صدفة البحر · 18-10-2005, 12:21

اخى المسافر..

هل ترى نوعية القيم ؟؟ هل تعجب معى ؟؟
للاسف هذا الزمان حول كل ما هو جميل الى حسابات وارقام
حتى القيم؟؟

الاسد انتظر مشاركتك بشدة..

جمانتى.. كما عهدتك اول المتسابقين لمعرفة ما هو جيد .. اتمنى لو ان ارى مشاركتك قريبا

اختكم
صدفاية

الأسد · 18-10-2005, 13:48

كل ما أدخل موضوع بكون عارف إني في المنتدى واللون السابق كان بديني إحساس إني في حديقة زهورها ما تسطره أياديكم المبدعة .. والآن يخالني إحساس أني أسافر في صحراء قاحلة اصطصعب السفر عليها لكنني أكون دايماً مرتوياً بأناملك الرائعة .. أما عندما تتحدث
صدفتنا
الجميلة أسافر بخيالي معها أبحر بسفينتها عالم آخر من الإبداع ... أما عن الموضوع بالجد مفروض كان يطرح للنقاش من بدري .. وأهو سبقتينا وجيتينا بيه .. عزيزتي صدفه أسنظل هكذا ؟ عادات وتقاليد .. تقاليد وعادات تتحكم فينا .. نحن لا نرفضها لكن نتسائل لماذا؟ نذهب ونجيء إليها متعذرين بها وإلى متى ؟ مشكلة تنتظر الحل ؟ فهل من مغير ؟ ... ويستمر ..

صدفة البحر · 18-10-2005, 14:08

عزرا الاسد

هذا الموضوع بالذات ليس له علاقة لا بعادات ولا بتقاليد

صح؟