سيد بشبش
عامل حاج ونضيف وبيرقش
أمرو بيمشي وكفو بيطرش
وعينو الحارة في يوم ما بترمش
عند المكتب رسمي بيغضب
وجوة البيت يرفس ويضرب
وسط أصحابه بيرقص ويلعب
راجل نكتة وصاحب مقلب
وآخر الليل يقابض يهبش
وسيد بشبش راجل دين وراجل دولة
صاحب سطوة وصاحب وخطوة وصاحب صولة
وبيني وبينكم
سيد بشبش واعي وفاهم .. فاهم .. فاهم
وعارف إنه الواحد .. برضو .. ويعني .. ولازم
وبالمفتوح كدا يعني ده كلام سر مافيش واحد يمشي يسمع
سيد بشبش راجل دغري
لكن بالليل هجيجو يولع
زي ما تقول بيحب المنقة والحاجات النايس ولظلظ
وقبل ما ندخل ديب آند ديب
لازم نعرف صورة بشبش
أسمر .. أصلع
وشو بيلمع
بادية عليه علامة النعمة
عالي ومكرش
وعرجة خفيفة في حادث حركة
شكل سيادتو عموماً مدهش
وسيد بشبش يحمل سبحة تسبح وحدها دون تسبيح
أتوماتيك .. حكمة ربك وقسمة صحيح
سيد بشبش راجل اورقنت
ريتش اند تلجنت
إسموث آند إليقانت
وفي عصرية وكانت جمعة
سيد بشبش .. حكحك دقنو وهذب شنبو
ووشو بينضح نضرة ولمعة
خت عبايتو، وطق عصايتو
وخبت الباب وراهو برزعة
خلى البيت يتراجف كله
حاجة نفيسة بناتها تلاتة
وبالأولاد بيكملوا سبعة
في المرسيدس أخد القعدة
كدوسو البني تهبهب نارو
مد صباعو .. وهز دماغو
يعني سيادتو بيحي في جارو
وعاد البينز تقول يا ليل
وسط الشارع يلوي غبارو
وأثناء ما سايق وماش في السكة
كان بيدندن.. يعني بيمدح
دشكة .. دشكة .. أووو دشكا
دشكة .. دشكة .. أووو دشكا
نحن ما صعاليك .. أووو ديشكا
نتاوق بالشبابيك أووو ديشكا
دشكة .. دشكة .. أووو دشكا
وأثناء ما سايق يغني ويمدح
عينو الزايغة بتجمع وتطرح
وهناك على زاوية لمح المنقة
سيد بشبش تمساح لو يلمح
قلبو ينطط جوة ضلوعو
يطق الروب يسكلب ويردح
ولفه ودور حول المنقة
ودور ولفه
رسم الزاوية وكشف المسرح
وبسمة أنيقة صناعة بره
بسمة ثعلب حكمة وخبرة
ما نتفاهم يا خلق الله
وعاد خلق الله ما فهامة وناس واعيين
عارفين الحال والأمر الواقع
إشارة خفيفة وغمزة عين
كان الرد الفرح بشبش
وخلى سيادتو يهدي يمين
وجات المنقة تشيل تتمخطر
مساء الخير .. آنسة مرمر
إسمك روعة
اسمك وسكر
أما سيادتو: سيد بشبش
رائع مدهش
إسمك منعش
موسيقي ومطرب
بس خازوق الناس تتمقلب وتقول لسيادتك.. شبشب
يا بت يا نكتة صنفك متعب
وهناك في شارع كم مش عارف
والبيت الناصية أشجار وزخارف
عربات تتلامع لمبات ورفارف
كانت هيصة وربة تولول
ناس بتصفق
وناس بتزغرت
وناس بتهلل
وناس بتنادي شيلي وختي
وناس بتغازل أموت يا إنتي
وناس منبسطة غاسلة وكاوية
وناس ركاني بتعزف زاوية
وناس بتغني حني يا تتي
وسيد بشبش أمير الموقف وبطل الساعة
كان مشغول.. مع ناس مرمر بيصلي جماعة
لمن تم صلاتو وسلم
قام يسلم بالأحضان
قال مشتاق وكاتلو الشوق في الحبان
وزي ما قلنا قبيل عم بشبش راجل بهجة وجد فنان
جدع العمة هناك وعصايتو ولحق جزمتو بالقفطان
وهاك يا دانس
ودارت حلقة عجاج وغبار
وناس بتسوي الردحي الجد
وناس في الردحي رقيصها هظار
وناس إنبسطت فوق للحد
وناس بتدق كاروشة وظار
وناس بتقول يا رفاعي مدد
ناس إنبطحت
ناس إنمبرشت
ناس إندرشت
ناس إنكمشت شان تتمد
وفجأة في لحظة حصلت كبسة
وزي ما تقول البيت إنهد
الجو إتلغم
فار واتسمم
وصل الكومر شكله يخوف
نزل إمباشى معاهو الأورطى
عملوا السد وجاط الموقف
وسيد بشبش ضرب اللخمة
ربط الساعة مكان الجزمة
لبس الجزمة محل العمة
لفة العمة محل الساعة
جذب قفطانو ورمى الشماعة
فكر ينط من فوق للحيطة
تلب تووف جوة البلاعة
وجوة الكومر الناس بالبوليس شحنوها
البتباكى والبتعزر وبالبتشفع
والضحكات باهته وبتشجع
وناس تتجرس
وناس تتونس
وناس بتحنس شان يعفوها
وفي نص الكومر سيد بشبش كان متمحن
ماسك سبحتو
مرة يسبح
ومرة يقحقح
ومرة يسب
مشغول بالاود وحاجة نفيسة
وناس المكتب وكيف القصة هناك بحكوها
وكل ما مرمر تبسم ليهو
يسب للمنقة ويوم زرعوها
العرض العادي
