للادلاء بالرأى

عاشقة الصمت · 04-09-2005, 14:51

نفرض مثلاً يعنى يوم جاءتك بنت و قالت ليك بحبك . رد فعلك شنوووووووووووووووووو؟

شجراوى · 04-09-2005, 15:12

بقع فرررررر درب كدا
شجراوى (الاخضر)

**معتز زيزي** · 04-09-2005, 15:31

شوفوا شاكوش (شجراوي) خشوا
الوليد واقع بي وشوا
هضرباتوا ..
تخلي منو الناس يطشوا
ومن عمايلوا دوام بكشوا
والهلاويث مالياهوا دشوا
يلقط اخبارا عجيبة
الجزيرة ومرة mbc بيجيبا
زولنا شاكوشوا المخالف أرضي أرضي
خلا عقلو يجيب ويودي

demon · 04-09-2005, 17:48

اكيد حا اعاين ليها كده من فوق لي تحت

albakaash · 04-09-2005, 17:50

لو كانت شينة ولا بعبرها حتى
وكأنى ما سمعت حاجة
ولو اضطريت ارد بقول ليها
حبتك ام كلعلع انشالله
عاين دى بالله
انا قدرك
اما لو كانت حلوة اكيد ح يغمى على فى الاول
ولما افوق بقول ليها
والله ما عارف اقول ليك شنو
انتى فاجأتينى
انا كنت عاديك زى اختى
وفى الحقيقة انا ما بفكر فى الارتباط هسى
واسيبها وامشى لكن بكرة من الصباح بجى اعسكر فى نفس مكان اللقاء الاول

عمران عامر · 04-09-2005, 19:09

لما نلقاها ونسمع منها هذا الاعتراف الخطير والذي لن يصدر من بنت الا تكون قد بلعت ريقها مليون مرة أو خافت من إنك تتخلي عنها ساعتها نعرف كيف نرد عليها والى ذلك الحين نكون على رصيف الانتظار .

شجراوى · 04-09-2005, 23:22

الجميله رحاب
عدت إليك مرة أخرى وأتمنى أن لا(امسخه عليك) من كثرة الطله .... ولكن أن قالت هى أحبك .. فقد أوفت نفسها ... وحفظت حقها ... قيل فى القديم أن أمنا حواء عندما هبطت هى وأبونا أدم هبط كلاً منهما فى مكان وبدأ البحث عن بعض .....وجدته هى أولاً ... وتمنعت عنه وبعدت ..... ولكنها كانت فى نفس مساره .... يقولون أنها جلست بعيداً .....أنتظرته حتى جاءها هو فرحاً بلقائهاوبكونه هو من وجدها .... وهى كذلك أبدت فرحتها كانها لم تجده هى أولاً ....
(مسكين أبونا أصولو زول شايل المحنه)
ماذا إن غير مساره ورجع عائداً إلى الهند مرة أخرى .....؟؟؟
وماذا أن أحبت الفتاة وكتمت حبها فى إنتظار بوح من تحب ...؟؟؟
قد يكون بعيداً هنا فى الفكره .... ولكنه قريب منها فى كل شئ ....
إن سكتت فقد جنت على نفسها ....
أن باحت فلن تفقد حياءها قط ....
تلك حياتها ولن تعيشها غير مرة واحده ....... ألا تعيشها مع من تحب وكيف تحب ؟؟؟؟
إن قالتها لى عظمتها وأكبرتها ... ولافنيت حياتى وفياً ليها
فقط فلتقلها(كما قال عمرى انا)
شجراوى (الاخضر)

**طائر النورس** · 04-09-2005, 23:48

الاخت العزيزة rihab_free
لقد طرحتى سؤال جميل وبعد ازنك ادلى برأيئ فيه او ارد عليه
اولاً ان مشاعر الانسان هو مشاعر موحدة سواء ان كانت من ناحية الفتاة او الشاب يعنى الاثنين بيمتلكون نفس الاحساس ونفس العاطفة ونفس الشعور تجاه الاخرين وفى كل المشاعر المتبادلة سواء صداقة او اخوة او قرابة او حب وكل انسان له الحق المشروع فى الادلاء بمشاعره لمن يحب لاى عاطفة كانت ... ولكن فى الناحية بتاعة ان تبوح الفتاة للشاب بحبها فالناس شوية ( بتاخد فيها وقفة ) لان نظرة المجتمع للفتاة دى بأنها جريئة ( وعينها بيضاء ) ومابتخجل ورامية نفسها ... !! دى نظرة غالبية المجتمعات الشرقية واللانحنا منهم ... عشان كدة النظرة العامة اثرت بصورة مباشرة على النظرة الخاصة وبقى الواحد بينظر للامر بمنظور المجتمع عامة يعنى بقيس بالعموم حتى وان كان مقتنع بأن البنت دى صادقة فى مشاعرها ومؤدبة جداً لكن بتكون عنده ( حسكنة فى قلبه ) بتنغذه كل مرة .... دة من ناحية من ناحية تانية بحس بأن الزولة دى وحتى لو كان فعلاً بحبها قد حرمته من المبادرة بالتصريح بحبه لها وبالتالى ازاحت قدر كبير من الشخصية البطولية الشرقية التى يحبها الرجل الشرقى ان تكون ملتصقة به بأن يكون هو المبادر فى كل امور العلاقات العاطفية ( بمختلف انواعها ) ...
انا حبيت ان اوضح بس الواقع الحاصل عندنا اما بالنسبة لى انا شخصياً فلو واحدة قالت لى ( بحبك ) بتقبل الموضوع بشكل عاااادى وبحترمها جداً وبحترم مشاعرها هذه وبكبر فيها مصارحتها لى بأحساسها هذا وبعتبر الموضوع احساس انتابها تجاهى وعكستو لى بدون ان انظر الى اى مسببات اخرى لاحساسها هذا او النظر الى سلوكها العاطفى ...

رويدا · 05-09-2005, 00:51

المراءة بطابعها الخجل كل منا يعرف الحاجة دي وهي في فطرتها والبنت البتخالف كدة عند بعض الناس بنظروا ليها نظرة تانية انا في رائي ان البنت ممكن تبادر بالحب اذا كان من تحبة متفهم ومعطي الجنس الناعم حقوا بالكامل يعني ما بنظر للفتاة نظرة دونية هي اذا اتاكدت من ذلك فلها ان تقول له ما تشاء وان تبادر... نصيحة لوجةالله تعالي اما اذا كان من النوع التاني ناس سي السيد وكدة فاحسن ليها تنتظر لمن تجي منو هو بنفسة وبعد داك تبادلة المشاعر .
غايتوا سؤال للرجال لكن انا اتحشرت فيهوا .
رحاب مواضيعك جميلة ورائئعه تستحقيين عليها اشادة كبيرة يا رائعة دمتي لي صديقتي وانست بك حبيبتي في زمن الوحشة تسسسسسسسسسسسسسلمي

عاشقة الصمت · 06-09-2005, 12:03

شجراوى الاخضر شكراً على رايك المتميز , demon لك التحيه لكن واضح انك ح تحتقرى شديد (لى بتسلبا حق التعبير ) , عمرى انا , الغالى طائر النورس لك التحيه و كمت عوداتنا دائماً واقعى , الاخت الحبيبه رويدا دمتى لنا دائماً, البكاش لك التحيه .