عندما تزعل بطني

vivid · 17-08-2005, 21:53

غايتو بطني دي فاضحاني فضيحة السيح و الريح قدام خلق الله . . أصلو ما قاعدة تنستر معاي . . تختار أظرط المواقف و تقع فيني فضائح . . هي و الفضيحة بيناتم قرابة . . أخوات بنات عم لزم . . و عاملات مذكرة تفاهم مع بعض . . و ديمة متباريات سوا سوا . . قرادة في أضان كلب . . مع اني أصلو ما قاعد أقصر معاها كلو كلو . . و لا خليتا يوم تشكي من جوع و الا عطش . . صحيتي من النوم أقعد أستف ليها رفوفها و أملئ في براميلها . . لبن الطير دا لو اتوحمت بيهو بدبرو و بجازفو ليها . . عيلا لكن بعد دا كلو غليانة و دغلة . . قاعدة تداغل علي . . و تسوي لي الغتاتة . . قدام خلق الله . . غايتو عليها جنس حركات . . التقول ما حقتي . . وكتين زهجتني . . شلتها خميتا و وديتا العيادة . . قلت اعرف بت اللذين دي قصتا معاي شنو . . يمكن في شيتاً عايش جوة و انا ما خابرو. . دخلوني علي الحكماء و الحكيمات . . من شافوني جابو عدتهم و جوني . . عملوا ليهم دايرة . . و مددوني في سرير علي ضهري . . و رقدوني عيلا بي سروالي . . و قعدوا يعاينو و يلمسوا في بطني . . و من ساعة لي ساعة ينططوا لي في عويناتم . . و يرطونوا . . شيء انقليزي . . و شيء ما خابرو فرنسي و الا ألماني . . مرات يقعوا غلاط في بعض . . الغلاط و كت سخن انقلب نبذ و سبيبة و نعلان والدين . . تاني قامت جابت ليها مد ايدين و عكم و ملاواة . . واحدين يحلفوا بي أبواتن و شيوخ قبايلهم. . في حكيمة وسط الجماعة ديل طلقوها طلاق تلاتة علي صمت خشما . . قدام عيني . . عاد بطني دي حيرتم عديييييل كدا . . غلبم البسوهو فيها . . آخر المطاف أفتوني . . قالوا دي حالة نادرة . . و قبل كدا ما مرت عليهم . . و قالوا لي أوعك تاكل اللحم . . فارق اللحمة دي فراق الطريفي لي جملو . . و تاني ما تاكل لحمة البتة . . عيلا الغريب . . بطني دي كانت من يوما ما بتريد اللحمة . . يومي البغلط فيهو و أديها لحمة . . تعمل لي سهر الجداد . . تخليني اليوم كلو أبزق و اتنخّم . . زي التكرنو ماصرين لي ليمونة جوة . . لكن وكتين سمعت كلام الدكاترة عن اللحمة. . سوت لي شغل الغتاتة . . و قعدت تدلّع و تتفلهم علي . . قدام خلق الله . . و بقت ما ترضي عيلا بالحمة . . من يوم تشم ليها قطعت لحمة تقوم تتمرعف . . و تبقى شبه مرفعين الخلا . . مرعفتا دي ما تسويها لي عيلا قدام الضيوف و البنات الحلوات . . بعد مرات تقرب تجيب ليها جنا . . تتلولو و تتمطمط لي قدام تقول مترين . . و تعمل ليها اصوت مرفعينية مخيفة . . مرات تزغرد زي بنات سلاح الموسيقى . . مرات تجيبو مكاجر و مشاتر . . تقعد تهنق زي الحمار المكادي الشايف القش و ما محصلو . . وكتين أشوفا كدي . . أخمها و أجري بيها المطبخ . . ألملم ليها لحمة الملحات كلو . . بس عشان تسكت مني . . و متجعر . . عيلا اليومين ديل دلعها زاد زيادة . . و بدت تستبز فيني . . بقت ما بترضى بي حاجة أقل من ضلعة . . من تشوف ليها شبح ضلعة تسوي فيني العجب . . ترفس زي الشافع المنعتو أمو من الرضاعة. . مرات تسوي دافوري . . مرات تنطلق فوقا نارية و تقعد تقرص و تنخس فيني . . التقول فيها زول ساكن بي شفعوا جوة . . بقيت قدر البشتغلها أمشي اشتري ليها لحمة و اسوي ليها ضلعة . . كل يوم ضلعة كل يوم ضلعة . . وكتين لقيت الحكاية مكلفة كدي . . قلت اخير أصاقر بيها الأعراس . . ما في طريقة اسكتها بيها عيلا الضلعات المجانية . . بقيت قدر ما أسمع لي بي عرس . . اتشنط و اتزبط و اخمها قدامي و أمشي . . العرس لو بعرفو و الا ما بعرفو بمشيلو . . أمشي كمان أقعد جوة خيمة . . و أخلف كراع فوق كراع . . زي أجعص جعيص . . و عاد بطني تسوي في البدع . . ناطة لي قدام و تتحرقص و تتفرقص . . و تتشابا لي صواني الغدا . . تصفق و تصفر فرحااااانة . . زي بتوع السينما . . ساعتي اللجي أقعد لي في صينية . . تجرني و ترزعني و تكتفني في كرسيني . . تقول لي الصينية دي ضلعتا نتشة و سغيرونية ما بتخارج معاي . . احسن تنتظر الصينية الجاية . . تجي الصينينة الجاية . . اجي أقوم تحكلني من عراقيبي و تجيبني متكايس في كرسيني تاني . . تقول الصينية دي فيها راجل عجوز . . ما بترضى أقعد في صينية فهاي راجل معشكب . . الرجال المعشكبين ديل أكالين و بلاعين . . و خشومهم زي مسجلات العربيات . . قاعدين بس للبلع . . ما قاعدين يمدقوا . . بصقعوا الجرة بس وكتين يرجعوا لي بيوتهم . . طيب انتي داير شنو يا السوسة . . حيرتيني معاك . . تقول لي دايراك تقعد في صينية الناس المهمين . . الناس البياكلوا بي أصبعين و يشنقوا أصبعين و الأصبع السغيروني راسمين فوقو حنة . . ديل ما بعرفوا ياكلوا . . بقيت قدر ما امشيلي لي عرس انجعص عشانها وسط الجماعة المهمين . . خاسة الجايين من الخرتوم . . بقت تتكيف مني كيف شديد . . و كمان بعد ما ناكل الضلعة تقول لي اشيل العضم معاك لي البيت . . و أعملو لي بزازة . . بقيت قدر ما تجي تعمل لي حركاتها ديك أجر ليها عضم الضلعة من التلاجة و أديها تمصة . . هسي ليها زمن قاعدة مؤدبة زي العروس ليلة الدخلة.
لكن اليومين ديل ظهرت لي بلوة جديدة . . عويناتي السغيرونية . . قدر ما يشوفن ليهن بت ماشة في الشارع يقعدن يرفني . . يكونن عملن ليهن مذكرة تفاهم مع بعض؟.

شجراوى · 17-08-2005, 22:20

vivid يازول ياسمحه إنت.... (وين ليك مده مابِنت ياحبيبى وين إنت) .... شفت كيف جابت ليها غنا عديل لكن بطنك ما عذاااااااااب عدييييييل وفصيحه جنس فصاحه .... غايتو إن جيت فى عرسنا بتاع (رويدا) بفضحك والم فيك خلق الله .... والضلعه فى صينتك والله إلا تشمها شم ....
ملحوظة :
بالجد فنان فى اى حاجه حتى فى (العضه)...
ملحوظه تانى:
شغلة الرفريف دى ورينا ليها كيفنها يمكن نلاقى حلها عندك ..
ملحوظة أخيره :
ماتغيب تانى كدا ....
شجراوى (الاخضر)