اكتب نفسي فيك مشدوه
كان تشريفه أو مسكونه
لو مدفونه يا درفونه
في وحل الدروب الصي
تبقى البذرة
تُقابة حصاد بكرية
يامكرية .. مشوار الدخول ممتع
أخرست الوجع توسيدة
واتوسع فلا وغابة ..
ودسيت الأمل عندك
وخوفي عليك ..
يرجف قلبي مني يجيك ..
رسمة حنة
ما بتستنى يوم الزفة
يوم فرحك
غمامات الضهب تاهت
تتغمص غميض النوم
تحتسب الربيع في الصيف
بترجاك الفصول الغايبة زفرة ريح
وسرمد نجمك الخافت
أفرح غبطة
أولج فيك بمعنى جميل
فيني هواك … خلية نحلة
عُسيل من سبيط النخلة
معنى غناك ..
يامجنونة .. أهمس ليك
يامسكونة بي جنك
وعارفنك
تناهيد العبوس وصمة
كما افلت قناديلك ..
وضاعت في تفاصيلك
بدون تكليف .. بلا تزييف
كما فلق الشموس الضاحكة
في صدر السما المرفوع
شهب تسطع .. تصارع الجوع
بواكيرك بتمدد ...
مدار الالتهاب رتب مواعيد الفصول قبلك
اذا رطب مناخك حر
اذا اكتأبت حروف كتبك
تصارع الضد …
اذا ما اتهد …
سال دمك على الدفتر
شان النشوة تهديك الترانيح
وإبتعاث التيه دروب
إذا توصد غناك بالجد
خيار مجدك …
ضفاير رسملة راس الغنا
(وحدك)
والمشاعر تكسبك
أو تلتقيك
فقط عذرا
إذا خذلاني كان ضدك
أغفري للتجاوز فينا خانة ود
يامسكونة بى جنك
ممكنة فيني بادهاش حضور القوم ويتجدد
يامتمكنة ومحبوكة
زي فتل العشاميق
والمحارير الغزل
والجدايل .. سترة اللهب
المعاني ..
وإختصامك إنت والطيف الهزيل
ما تصحي حانات الوصول
ما تدقي اجراس البشائر للسحاب
براق ..
وكفة صفقة عاجباني
ترطني فيني ... أرطني لسه
بى لهجات كلام فاني
حساب جيتك
اشارات العقارب للزمن
زي نسعة الكُليقه
تديك معنى
ضدين ... الضلام في النور
ومامعنى ..
الوقوف مبهور …
ياتلولينَي في مرجيحة البالغين
أفوت وأجي
وأجيك تاني
موسم من فزيز الدوخة واتحفيت
إذا اندسيتي فيني نشيد
أجيك تاني
وأجيك مشدوه
1/8/2005
القاهره
يامسكونة بى جنك ... !!
العرض العادي
