يامشرف برنامج الرياضه فكناااااااااااااااااااااااا

شجراوى · 11-08-2005, 20:44

سلامات شديده لكل رياضىّ السودان وعشاق المستديره
فى موضوع محرقنى عديل من زمااااااان وعاوز( ألخه) معاكم بدل (اللخ) الحاصل فى الميادين وبالذات فى (التلفزيون) دا ...
الموضوع بكل بساطه وهو البرامج الرياضيه فى التلفزيون السودانى بتعتمد على أى مقياس فى أختيار المذيعيين والمشرفيين؟؟؟... عفواً (المشرف) .... لان هو واحد وبجهز نفسه من يوم السبت عشان يملانا كلام يوم الجمعه ... شغله ممله بالجد.... زمان كنا نجرى جرى عشان نحضر عالم الرياضه ومن ما جانا أخونا الشغله بقت (بالماينص) لحدى ما بقينا ننوم وقت البرنامج عشان مايجبنا ضغط وسكرى من سماجه الموضوعات المطروحة وحتى طريقة الطرح ... والمشاحنات و التكريمات الماعندها معنى يكرم هو يوم .... واليوم التانى يكرم الكرمه ... زولنا يمشى مهرجان يكون اول واحد فى الكاميرا .. زول عيان يكون هو فى الواجهه ... واخيراً التلفزيون إتشاكل مع الاتحاد عشان الاتحاد شفر الدورى الممتاز زولك أخد موقف وقال النتيجه بتاعت الدورى الممتاز ذاته ما بقولوها ليكم .!!! واحد مسكين من الناس المغلوب على أمرها فى البلد الفيها حتى الكروه بقت واسطات... ساله يوم وعلى الهواء لو سمحت الكوره بتاعت الهلال والمريخ منقوله تعرفوا قال ليه شنو ؟؟ قال ليه : يا خ نحن فى شنو وإنت فى شنو ....تخيل ..... والله كان نفسى يورينا هو فى شنو عشان الواحد يرتاح شويه وقلبه يبرد ... ياخ بطلوا لعب العيال دا .... ولو الشغله غلبتكم خلوها للناس العندهم المقدره فى سياق المناقشات والتقديم الحلو والممتع .... وبعدين عندى ملحوظة بسيطه الدورى فى العالم كله مشفر والعالم كله بذيع النتيجه ... وما قالوا (المُشفِره) يذيعه ... ياكمال حامد فكنا خلينا نشم نفسنَا فى الحاجه الوحيده الفاضله لينا ...
(فكوا دربنا وجعتوا قلبنا)....
الحل شنو نبطل بالجد الكوره دى ولا شنو ؟؟؟؟
ولــــــكم المجـــــــــــد
شجراوى (الاخضر) كما يحبها معتز المسافر

**AyMaN** · 13-08-2005, 08:08

عزيزي الغالي شجراوي الأخضر
انا معاك في كلامك .. برنامج الرياضة بقى ماعندو اي معني ،، الزول اليومين دي ما في يدو غير انو يكتف يدينو و يتفرج .. . و الكورة في السودان طالع نازل .. يوم تلقاها بقت كويسة و لعبوا زي الناس و سنتين العكس .. ما في فريق ما صقعنا .. و هدي السنة الاخيرة دي شوف الناس بقت تشيل كؤوس و ميداليات و منتخبنا بياخد شواكيش .. لا كاس عالم و لا بطولة افريقيا
مع الكورة الفي السودان البتسد النفس دي ما مفروض يكون في برنامج عالم الرياضة من أصلو
و العشرة دقايق بتاعت الاخبار دي كتيرة على الرياضة .. لانو من الاول الرياضة تعبانة ، معناها مستحيل برنامجها ينجح و لو بأدنى المقاييس ..
انا من زمان بطلت اتابع عالم الرياضة .. لاني ما حا اطلع منو بي معلومة ان شاء الله كان ما مفيدة . . . و على قولك مافي داعي للسكري
و حكاية انو الدوري اتشفر و التلفزيون اتشاكل مع الاتحاد .. وحتى النتيجة ما حا عرضوها ده لعب عيال X لعب عيااال

المسافر · 13-08-2005, 22:43

لا أعـــتـــقـــــد رفـيــــقــــى شـجـــراوى ( الأخـضـــــــر ) بـأنــه تـبـقـّــــى لـنــا شــىء سـوى أنــاس رائـــــــــعـــون يـتمـتـّعــــــون بـالـخـضـرة والايــــراق عـلـى مـدار الـعـام .. الـتحـيّــة لـك عـزيـزى ....
الـقـطـاع الـريـاضـــى لــم يـكــــــن بـمـنـأى عـــــن عـبــث الـسـلـطــــة .... وصـار الـسـودان فــى هـذا الـعـهـد الـظـــــــلامــى مـتـزيـــّــلا قـائـمــــة الـدول فـى كـافــة الـمـنـاشــط الـريـاضـيــــــــة ....
عـزيـزى darkman لـك الـتحـيّــة .. لــن تـرجــــــع لـمـتـابـعـة كـــــل الـبـرامـــج الـريـاضـيــة الا فـى حـــــــــال رجـوع الاوضـــــــاع لـطـبـيـعـتـهـا ..! وعـنـدهـــا صـدقـنـى سـتـتـابـــــــع الـفـتـرة الـريـاضـيــة وبـشـغـــــــــف شــديـــــــــد ..
مـــعــــــــتـز

شجراوى · 13-08-2005, 23:07

سمي · 30-08-2005, 20:08

شجراوي ( الاخضر )
المتمتع بالذوق والفن في كتاباتة
لكم نجد ان اللغط والعك الكروي في الميادين وكذلك في الاذاعة والتلفزيون الذي اصبح حكر علي شخصيات محددة لماذا؟
الله اعلم
لان من يقول( بت المك عزبه تقع رقبه ) ولا رايك شنو
انا معاك قلبا وقالبا فيما تقول ولكن من يوصل هذا الحوار الجاد اليهم حتي يتم التعديل في الاشياء السائدة علي المجتمع السوداني المغلوب علي امره
انت ام انا
لا بل لابد لنا ان نقف جميعا ونتصدي لمثل هذا الاشياء المؤسفة
ولك المجد شجراوي الاخضر

amenooz · 02-09-2005, 22:41

انا من زمان داير اتكلم عن الموضوع ده بعد ما اهانا نحن المغتربين عندما استضاف
(شداد) مدير الكره السودانيه ..سألو كمال :لى المنتخب لمن يطلع لدول الخليج او
يتغلب.. السودانيين يزعلو..فردا قال: لان المغتربيين بيحسو((( بالدونيه)))..تصورو
الليله فى البرنامج قال:وصلتنا انتقادات كتيره لكن ما حنديها الاهميه... لانها كلام فارغ
ده موزيع...لاحول ولا قوه الا بالله.........

وليد حسين · 03-09-2005, 11:28

ها ناس هو بقت بس على الكوره خلوها ساى ...متسابق يقع قبل الصفاره واحد يجيهو شد وفى الاخر محترفين يمثلو السودان ...وجعه بس وجعه

شجراوى · 17-09-2005, 23:14

الجميلين حد الالق سمى amenooz ورفيقى وليد ماعدت أطيق الحديث عن مهازل كمال حامد ولكنى عدت مرة أخرى عندما وجدته مصراً على ان يبرئ نفسه من أنه لا يسرق كروت شحن موباتل والتى اصبح تنزع ماء وجه كل المساكين الذين يهرولون الى موبايلاتهم لكتابه الرقم حتى يوفرون على أنفسهم مبلغ من المال لاشياء اخرى وهذه الاشياء كانت هى الاولّى منذ الاول..... ولكن بوطنى متناقضات كثيره تحير العقل وليس هذا مكانها .... على العموم أثبت لنا الشيخ كمال حامد بعدم رغبته فى سرقت الكرت وقد صدقناه لانه ترك الدولارات وجاء للجنيهات كما قال لاجل الرياضى السودانى ....
سنلتزم الصبر عليك (كمال حامد) وعلى وطن يصر أن يحكمه (الولاء) ....
شجراوى (الاخضر)