حفلة عرسك بي منو؟؟؟

alsagri · 03-07-2005, 01:26

بسم الله الرحمن الرحيم....أحبتي في الله عشاق السودان كل أعزب منا سيتزوج يوما ما بإذن الله ولكن ماالذي يهمك عندما تحدد موعد الزواج؟؟
العزومة ....الضيوف ....ولا الحفلة؟؟
إذا تلقيت دعوة لحضور زفاف أحد الأهل أو الأصدقاء ما أول شئ ستسأل عنه؟
الحفلة بي منو؟؟
بالله عليكم مافائدة الحفلة في يوم العرس عايز واحد يطلع لي فوائد..ولا أقول ليك فائدة واحدة بس....
من وجهة نظري الحفلة مافي ليها أي داعي وإنت يوم زواجك يوم مبارك فكيف تبدأ حياتك الزوجية بالمعاصي ....أخي اعلم أنه عندما تقيم حفلة في يوم زواجك فأنت مسؤول أمام الله في كل مايحدث في الحفلة من اختلاط ورقيص ...الفتيات يرقصن مع الفتية شئ عاااااااادي مايوم عرس ولاشنو؟
والملابس وماأدراك مالملابس الواحدة لما يكون عرس واحد من أقرباءها بعد شهرين تلقاها محتارة تلبس شنو وتفكر في اللبس والعرس لسة باقي ليهو شهرين!!
وسبحان الله البنات بقو يلبسو لبيس عجيب غريب لو لبستو في يوم غير العرس تلقى أبوها يقول ليها يابت دة شنو اللابساهو دة؟ لكن في العرس كل شئ حلال فماكان حرام قبل الحفلة فهو حلال في الحفلة...اللبس عاري يظهر مواضع مفاتن المرأة بصورة واضحة جدا
حفلات الأعراس طبعا من عاداتنا السودانية وكل أعراسنا فيها حفلة إلا ماندر...ونحن من واجبنا نقضي على كل العادات غير المرغوب فيها.....مالو نعمل حفلة بسيطة كدة لكن تكون للحريم فقط ودة أمر مباح بل مستحب انو تضرب النساء الطار يوم الزفاف ويغنون بأغاني الأعراس المعروفة ولكن المنع يكون في الحفلات المختلطة
وغير انك حتعمل حفلة في حاجة غريبة برضو بتحصل في الأعراس ففي العرس تلقى الرجال يرمقون العروس بنظراتهم.....(ياسلااااااام العروس حلوة)....(دة شنو دة عليك الله دي مرأة يعرسوها؟)...وبعد دة كلو يقوم بتصوير العرس بالفيديو حتى يشاهده كل من هب ودب والكل ينظر الى زوجتك فهل يعجبك ذلك أخي العريس؟
أنا والله بستغرب جدا من رضى الزوج أن يرى الجميع زوجته وهي متزينة...قبل كم يوم لاقيت واحد من العرسان الجدد وبصراحة هو ماقريبي ولابتربطني بيهو علاقة قوية المهم ناداني وقال لي تعال شوف الصور دي ...فإذا هي صور زواجو عادي مالو أشوف الصور لكن تفتكروا قال لي شنو...؟ قال لي: عليك الله رأيك في العروس شنو؟
بالله عليكم دة سؤال يمكن الكثير منكم شايفين انو دة شي عادي لكن انت عرست وانتهيت وتسألني مرتك حلوة ولاشينة؟ طيب لو قلت ليك شينة حتطلقا يعني ولاشنو ؟ وبعدين خلاص دة بقا عرضك ومن العيب أن يطلع الناس على أعراضك اين الغيرة فيكم يارجال؟
وأنت أخي عايز تعمل حفلة يوم عرسك؟
ولاشايف ماليها داعي؟
ولو عايز تعملا أرجو أن تكتب مالدافع لذلك؟
هل الفرحة بالعرس لاتكون إلا بالحفلة؟
وهل هناك من الإيجابيات مايغطي على سلبيات الحفلة؟

أرجو منكم المشاركة والنقاش
جزاكم الله خيرا
مع حبي...!

tikail · 03-07-2005, 02:08

بارك الله فيك

alsagri · 04-07-2005, 01:20

وينكم يالعشاق أرجو منكم المشاركة فالموضوع يحتاج منا الى النقاش الجاد حتى نطلع بنتيجة
مع حبي...!

اسيرة القلم · 04-07-2005, 11:20

الاخ الكريم .. السرجي ..
فعلا موضوعك يحتاج الى وقفة تأمل طويله لما يحصل في البلاد من عادات دخيله ..
وامور بعيده جدا عن شئ اسمه الدين الاسلامي .. والمشكله انو بنتناسى الدين الاسلامي ..
في المناسبات والحفلات ... وكأنه بقيدنا وبشل حركتنا ... من اللى في راسنا وهوانا ..
الحفلات شئ جميل والاحتفال .. بمناسبه جميله كالزواج شئ طبيعى .. لكن المسأله دائما في
الكيفيه التى نحضر فيها الاحتفال ...
دائما لاحظ للبنات .. بحاولن يلبسن اضيق لبس .. واكثره فاتن .. وده ضار اخلاقيا وجسديا ..
على البنات .. اخلاقيا بحيث انه يفسد الجو العام من انظار الشباب اليها .. وما تتبعه النظرات الى
اشياء اخرى .... وجسديا .. صدرت دراسه مؤخرا .. ان اللبس الضيق قد يؤدي الى العقم ...

ولنا عوده ...

اسلام علي · 04-07-2005, 13:52

نشكرك الأخ السرجي علي طرح هذا الموضوع الذي يستحق المشاركه
اولاً الحفلات في حد ذاتا ما فيها حاجه لأنها تعبًر عن فرحه
لكن الأسلوب الذي تقام بها الحفلات هو مربط الفرس
ويمكن اقامتها بدون اي محرمات او اي اشياء غير اخلاقيه منافيه للشرع
وانا افضل ان تكون قاصره علي النساء فقط وان تكون غير مصحوبه بمكبرات الصوت حتي لا يخرج صوتها فتقع
في الحرام
وجزاك الله خيرا
وآسف علي التأخير

alsagri · 05-07-2005, 00:27

جزاكم الله خيرا على المشاركة أختي أسيرة القلم وأخي الرائع اسلام علي....أود ان انبهكم تنبيه بسيط انو أنا الصقري وليس السرجي....
أرى أن كلاكما موافق على إقامة الحفلة ولكن للنساء فقط مخافة الفتنة وحتى لم يعترض على كلامي أحد مع أني متأكد أن 99% مننا يقومون بالإعداد لحفلات الزواج من النوع المختلط والسافر والقليل جدا منا لايعد لها ذلك الإعداد والغريبة أني أعرف الكثير من الشباب الذي كان يعارض فكرة الزواج بأن يكون فيه حفلة ولكن عندما حانت نقطة الصفر واقترب زواجهم يتراجعون عن رأيهم إما مجاملة للأهل أو خوفا من كلام الناس...
أتمنى من الجميع المشاركة
مع حبي....!

عاشقة الصمت · 05-07-2005, 16:04

كلامك صاح ميه الميه . مافى داعى للحفله المختلطه نهائى انا بفضل تكون للحريم فقط
لانو الاختلاط ماصاح . حتى لو عملو الدعوه عشاء و فى النادى ممكن يجيبو فرقة انشاد دينى بتكون افضل .

>المشوكش< · 17-07-2007, 09:54

الصقري حبيبي قلبي منور .......
الموضوع جدا مهم وانا شايف حكاية الحفلات المختلطه دي كلام فاضي
وبوافق الباقين انها تكون حفلات نسائيه بس لكن العاده بقت طاغيه والزول لو ماسواء حفله بقا كانو ماعرس زاتو......

بس ممكن نفكر ونجتهد ونلقى طريقه ...... بالتوفيق

الصريح · 18-07-2007, 17:47

والله يا السرجي..

انا ان شاء الله ما عايز العرس يكون مختلط....

لأن لو مخلط انا الحأكون شايل الذنب بتاعهم وعايز يكون في فاص بين

الرجال والنساء...!!

jOojOo · 18-07-2007, 19:27

الموضوع رائـــع...
لكن .. عندى خط رجعة...
تخـــــــــــــــريمة...!!!
انتو بتغشوا على روحكم ولاشنو.....بالضبط..!!!
ياجماعة كل هذه التراتيل ما على نفسكم الواحد يكون واقعى شوية ....!!
لو هى أصلا بتقاس بالاختلاط و الممارسات الشايفنها دى ....
حياتنا دى كلها غلط Xغلط.....
النقاش مايكون تقليدى (يمين يمين - شمال شمال)
كلنا عارفين عواقب كل تلك الممارسات والطيشان والنتائج المترتبة عليهو ....وكل يوم ظاهرة تقليعة جديدة...
مشكلتنا عارفين وين الصاح وبنعمل فى الغلط ....
مشكلتنا شايفين الغلط وبنستكتر عليهو...
مشكلتنا بنكون مع الصاح وقت الصاح ومع الغلط وقت الغلط
مشكلتنا نحن ماعارفين روحنا دايرين شنووو...!!!
بس واحد يقنعنى ماحصل قبل كدة مامشى حفلة زواج فى حياتو...؟؟؟وين كان مفهو الأختلاط بتاعوا دة؟؟؟
ولا ابوهو ولاامو ماعملوا حفلة فى عرسهم؟؟
ليه انت الليلة بتقرا فى جامعة مختلطة.؟؟؟ ماتشوف اى جامعة تانية ما مختلطة...
ليه انت أصلا بتعاين لبنات الناس ...شايفها لابسة كيف ولا كيف؟؟؟؟دة فى حد ذاتو غلط..
ياجماعة الواحد يكون واقعى شوية والنقاش مايكون تقليدى ....اى واحد فينا فى النهاية عارف روحو بسوى فى شنووو...!!!!
ودة مامقياس لكى تقيس بيهو الأسر سواء كانت محافظة ولا لأ..الله سبحانه وتعالى بين لنا الحلال من الحرام وبعد دة اى واحد ذنبو على رقبتو...
ولى عودة...
مع احترامى للجمــــــــيع..!!

لكم كل الود والاحترام ...