(ناس المنتدى زمان الواحد كان عندو حبة حاجات كدا وعملنا نايمين قلنا نشوف رايكم)
وقف الكلام
وقف الكلام وكتين مشيتى
وسكتك صدت خطاى
.....................
كله مسكون بالسكون
المجامر إنطفت ... والبخور
ألطيور صابه الوجوم ..
ألعيون سابه الفرح..
وكتين محطاتك خلت من جيتك ...
وإنشغل عليك قلب الغنا ...
وفتر
لا قدرت امسك شوقى ليك ...
ولا المسافات قاربت ...
وحرت أكتب فى الهواء..
وأرسل مع النجم الهوى
يسرح سحاب ..
ينزل رذاذ ...
وبدعاشه ترقصى
خايف
خايف عجاج الدنيا يطمس معالمى معاك
وإنحرق عشم السنين وداع ...
مكتوب على ألوجع الكان ...
شوق وإشتعال ..
لا بنتهى لا منو فك أو إرتحال
وألموج غريق ...
والضفه مابيه ألاقتراب
ويبقى ألامل فى لحظة ألياس الصحى .....
طوق للنجاة
وإنت.. وكتين ألارض تصبح يباس .....
مطر ...
غيماتك هطول ....
كضابه أرضاً ما بتقابلك بضحك ..
سكتت حداك كل الخليقة مبجله ..
مابنسمع صوت فى الوجود ..
غير وشوشه ...
وهمس ألنجوم .....
ياريتنى لو أقدر نجومك أحصله..
أو حتى أسبح فى فضاك..
كان ألزمن بدل عناده وإنصلح...
كانت مزامير الفرح دوت غنا ..
وألطيور تعمل ليها زفه وبيت عرس ..
وتملأ المكان ريحة البخور ...
وتلقينى جنبك ..
مابين مداخلك منسجم ..
مابين تلاقيك وألصباح ..
تلقينى فى عصب الاحاسيس ...
المودره مهرجانك ..
فى هديل صوت القمارى ألجايه منك وماشه ليك ..
آآآهـ .... لما ترجعى يابشائر ..
ولسه حائر ..
بين ملامح سكتك وسكتى
خطوتك ..... خطوتى
ضحكتك .... ضحكتى
و ...... و........
( اها رايكم شنو كنت بنفع )