السودانيون والعنصرية - الصفحة 2

الحاج متولى · 30-06-2005, 21:59

اقتباس:

المشاركة الأصلية كتبت بواسطة عمري انا

.

قلت عننا في السودان ، بالمناسبة اذا سمحت ليك الظروف ومشيت الى غرب أو جنوب البلاد حا تلاقي العنصرية دي هم اسيادها فمثلا في غرب البلاد يقولوا ليك لفظ " أولاد البحر " وتعني الشماليين وفي الجنوب يقول ليك " الجلابة " وتعني الشماليين أيضا أو من يختلف معهم عرقيا ، يعني اصلا هم متأصلة فيهم هذه المساءلة وليست حكرا على أبناء الشمال فالنظرة العنصرية متاصلة فيهم من قبل الشماليين .
مع خالص تحياتي

تعجبنى يا ولدى

الاخ عمرى انا
تحياتى بقدر ما تسطره هنا من جمال
اخى العزيز الشعب السودانى كله عنصرى شماله وجنوبه شرقه وغربه
وهذا ان دل لا يدل الا على الجهل (امكن تكون دكتور وتتصرف بنفس التصرف)
اخى العزيز حقيقة اعجنى طريقة طرحك فى البداية ولكن طرحك اصبح ياخذ منحى اخر

اخى العزيز
اشكرك على خديثك واشكر طارح الموضوع
ولدى عودة انشالله اذا فى العمر بقية

عمران عامر · 02-07-2005, 10:23

الأخت مبسوطة تحياتي العطرة

الريس الحاج متولي لك عاطر التحايا

بقية العقد المنضوم لكم السلامات

قلنا ونقولها بأن عشق السودان هو الابداع عينه ، هو الراحة والمتنفّس لما يضمه من كواكب تلمع وتتوهج لتنير الطريق لكثير منا من خلال ما يتم طرحه من مواضيع وهذا لعمري مفقووووووووووود في كل المنتديات ، قبل ما أدخل عشقي الجميل هذا بحاول اتصفح بعض المنتديات عسى الواحد يلقى ليه فكرة أو حاجة تعم من خلالها الفائدة لكن والله العظيم تسوقني خطاي ويداي عبر الماوث لهذا العشق الآخاذ فيكفي إنك تقرأ المواضيع فقط حتى ولم لم تقم بالرد عليها حتى تشعر براحة نفسية .

التحية لكم مرة أخرى على ما تقومون بطرحه من مواضيع هادفة بكل ما تحمل هذه الكلمة من معاني وفي جميع اقسام المنتدى كأن القائمين عليها درسوا هذا الامر فهم يتبارون كل في مجاله وتخصصه في تقديم ما ينفعنا ويثلج صدورنا ويخلينا نتمسك بهذا العشق السوداني ووالله يكفيك فقط الاسم " عشاق السودان " فهي لحالها يطول فيها الشرح بقدر ما تطول الايام العمرية فهم زادهم مباح بابهم مفتوح على مصراعيه لكل داخل ونقولها بأن الداخل مولود والخارج موعود فدارهم وساحتهم مضيافة تسع الجميع .
فداري مناخ لمن قد نزل **** وزادي مباح لمن قد أكل
أقدّم ما عندنا حاضــــرا **** وإن يكن غير خبز وخل
فأّما الكريم فراض بـــه **** وأما اللئيم فما قد أبل

الأخت مبسوطة التحية ليك مرة أخرى وانت تتكرمين وتعطيني هذه العصارة الندية فأنا والله لا استحقها ولكن هي عاداتنا السودانية " نؤثر على نفسنا ولو كان بها خصاصة " وهي والله قمة الحياة ، أشكرك مرة أخرى ولكن كما عودنا هذا العشق بأن الموضوع المطروح هو ملك للجميع صاحبه والمتداخلين عليه . كلماتنا تأتي عبر مواضيعكم الهادفة الكبيرة المعاني .
لكم التحية مرة أخرى
ودمتم

شجراوى · 02-07-2005, 13:47

العزيز عمرى انا
لى كم يوم كدا متابع الموضوع دا وكنت عاوز أعرف رايكم شنو قبل ما نخش ليكم توش كدا فى ألبدايه سلامات شديده للاخت مبسوطه والساحره وتاله والحاج متولى بس عاوز اقول ليكم حاجه واحده على خفيف كدا كلكم بتتعاملوا على انكم عرب ولو نفس الموضوع دا استلمه اى واحد من واو تاكدوا انو حيتعامل على انو افريقى(بس) ودى مشكلتنا إننا لحدى هسى ما قادرين نقتنع إنو ربنا وهبنا حاجه ما أداها لاى دول عربيه كانت ولا افريقيه وهى انو نحن عندنا جنس براهو وهو الجنس السودانى ودا جنس يوازى الجنس العربى والافريقى والاوروبى و...و... فى الاجناس (العالميه) اما شغلت العنصره داخل السودان فدى حاجه قديمه وقديمه جداً الدناقله كانو فى وقت اسياده السودان عبر دولة المقره(لمن كانوا نوبه صافين) الفور برضو كانوا اسيادو فىالفتره(الديناريه) الفونج ، البجه ، النوير ، الدينكا و...و... يعنى اى واحد كان عندو فتره هو السنير بتاع القعده عشان كدا بتلقى كل واحد شايف نفسوا سيدو ودى مامشكله لو قررنا اننا نتعامل على اننا سودانيين مع حذف ( عرب وافارقه)
ودى الحاجه البتقوله تاله عن لونه.. فى بيت واحد بتلقى كل الالوان ولمن تسال بقولوا ليك البطن بطرانه طيب دا معناته شنو؟ غير إنو إننا برانا جنس صافى ملون ولو عشنا وأقرينا جوانا بالحاجه دى ما بنشيل هم لتريقه العرب علينا وعلى لونا ولا بنحس باننا ماقادرين نتاقلم مع جيرانا فى افريقيا

mubsoota · 02-07-2005, 15:34

الأخ شجراوي شكرا لك عى كلامك الجميل واديت الموضوع تفسير منطقي لقضية العنصرية في ان كل قبيلة شايفة نفسها اسياد والباقين تبع
عموما ما كنا عايزينك تستنى كتير لغايت ما ترد واحنا بكيفنا الزول البخش توشك ويقول رأيه طالما بقوله بكل صراحة وصدق وما قصرت والله يديك العافية

عمران عامر · 02-07-2005, 19:04

كمان أنا أعقب على حديثك بعد ما حادية ركب الموضوع ردت عليك، أولا لك الشكر وأنت كل يوم تتابع خربشاتنا دي وتطول بالك علينا من دون مداخلة ، الموضوع أصلا لو تابعته من البداية فالأخت مبسوطة كانت بتدعو أن نتناسي هذه العنصرية ويمكن مشت أبعد من ذلك وحصلتها مرحلة التزاوج حتى تذوب هذه العنصرية نهائيا ولعمري أنها طرحت أمر عظيم .

لم نناقش الموضوع على أنه نحن عرب أو افارقة بالعكس ناقشنا الموضوع من منطق اعتقاد يتساوى فيه الشمال والجنوب والغرب بأن كل جنس غير معترف بالطرف الآخر في حدود قبيلته ودللنا وقلنا بأنك اذا ذهبت الى الشرق أو الغرب أو الجنوب فبتكون النظرة كما هي بالشمال ، لكن الأخت مبسوطة تناست كل هذه الاطراف وحملت ناس الشمال المسؤولية وعندها حق لانها دللت بأن السواد الأعظم منهم مسلمين وكان من المفترض أن يكون تعاملهم غير هذا و هي في هذا الكلام أبدعت وأجادت .

نعتز بسودانيتنا وندافع عنها حتى الموت ولا نرضى لها الدنيا بديلا ، ولا تعمل لنا الألوان عقدة أو خلافه فليس باللون يقاس الانسان " فأنت بالروح لا بالجسم انسان " والحمد لله نمتلك روح حبانا بها المولى عز وجل لم تكن الا في السلف الصالح من صحبة الرسول الابرار لذلك اللون لا يعني لنا شيئا .

حاجة اخيرة اخي اذا نظرت في جميع الدول العربية لن تجد لون صافي وإنما خليط من الالوان في معظم الدول التي تتندر بلوننا .
مع خالص التحيات

شجراوى · 02-07-2005, 23:55

عمران عامر · 03-07-2005, 12:17

سلامات
أخي الكريم أصلا الموضوع بتاع اللون ده نحن كسودانيين ما عندنا فيه مشكلة لانه ده حالنا وواقع معاش عندنا يعني في البيت الواحد تلاقى مختلف الالوان يبقى بالنسبة لنا كسودانيين لا يعني لنا الامر كبير مشكلة .

ولكن لما أشرنا ليه اشرنا له على أن الآخرين من غير السودانيين أو عرب الخليج ودولة لبنان على وجه الخصوص هم من يزكي نيران هذه المساءلة أما هنا بالسعودية مثلا لان معظم النسوان هنا ما بيطلعن لبره واذا طلعن ما بيتعدن حدود لبنان بالتالي تعودوا أنهم يروا سحنات معينة من الناس والكلام ده ذاته كان زمان خالص أما الان فخلاص المساءلة ما عاد ليها نظرة من هذه الناحية الا من الناحية التسويقية فقط لانهم ايضا عاوزين يلفتوا نظر نساءهم لبضاعتهم حتى يروجون لها في المبيعات .

بالتالي لم أفهمك غلط ورديت عليك ومنذ البداية كان ردي عن الآخرين وليس عن السودانيين ، صدقني لم نفقد هويتنا ولكن ساستنا هم من سعوا لهذا الفقد والذي تأتي من ورائه المصالح فكل مسئول طلع بره السودان عمل فرقة ما بين أنباء الوطن الواحد وهم نفسهم صدقوا ما رجوا له .

مع خالص تحياتي لك مرة أخرى

شجراوى · 03-07-2005, 12:45

عمران عامر · 03-07-2005, 13:29

كلامك صاح العنصرة أساسها اللون ، ولكن اذا سلمنا بهذا الكلام وجعلناه واقع معاش يبقى كل الدول العربية العربية خليط ما بين العرب والزنوج لان كل الدول العربية فيها اللونين .

فعلا أخذ الفكرة عنا والامر ده تحديدا جاء بعد حرب الخليج اذا لم تخني الذاكرة وكان لموقف السودان من الحرب ما جعل المصريين يغتنموا هذه الفرصة وقد أحسنوا استغلالها ولكن في نهاية المطاف برضه بينقلب السحر على الساحر ، الأخذ بهذه الأراء أخى وراءه مآرب في السوداني لا توجد بحرية كبيرة ولكن عند باقي الاجناس العربية بتتلقي بسهولة ويسر لانه اصلا دي صنعتهم وقد أصبحت احتراف لهم يدخلون من خلالها لمبتغياتهم .

أما نحن من ؟ فنحن عرب ممزوجة بدم الزنوج الحارة دي من ناحية شعرية ولكن من ناحية ثانية حتى صحابة رسول الله وفي عهده كان بيوجد اللونيين يعني ما خلقت لنا نحن فقط ، بعدين في حاجة مهمة ما تنساها عملية التداخلات العرقية ليها أثر يعني مثلا نحن بالسودان يجاورنا 8 دول معظمها أفريقي صرف خلاف شمال افريقيا دي حاجة الحاجة الثانية برضه عامل المناخ والطقس ليه كبير الاثر ونحن ناس نقع جغرافيا على خط الاستواء ، أنظر الان لمعظم مناطق السعودية المختلفة فهل هم على هيئة واحدة ؟ أبدا فالجنوب غير الشمال وغير الغرب وغير الشرق .

نحن كسودانيين نختلف عن جميع باقي الدول بالمناسبة لخلقة ربانية بحته فمثلا التراحم والتوادد الذي تجده عندنا كسودانيين ما ممكن تلاقيه في بقية الاجناس التانية وده فقط يمكن أن يكفي على ان ندلل على هويتنا أضف الى ذلك صفة الامانة والتي باتت مؤخرا في تضعضع وتدهور وده نتيجة للظلم الذي حاق بنا .

اما سؤلك بأن اتولى هذا الأمر فانا اشكرك عليه جدا فكلم لكم القدرة على ادارة الدفة ووالله انتم احسن مني في كل ذلك ، وخاصة صاحبة الطرح فيكفي أنها من تكرمت بنشر هذا المقال ، وأكيد في جعبتها الكثير عشان كده أنا بقول نشوف تعليقاتها على كلامنا هذا وتدينا الخلاصة ، فهي ذات أفق كبير .

مع خالص شكري لك