|
**الرجل والمراة بلغة الضاد**
الزمن دوار والزمن ميل
لكن يا اخوانى ذى ده ما شفتو قبل ده الدنيا بقت قلبة والنسوان ديل تعبوا ليك الرجال تعب ما عادى الراجل كان (كحة ) المرة دايرة (تكح)..
غايتو الحريم بقو كريم ومحن كتيييييرة..............
زمان نسوانا كانو ست الناس وبت النبى وفاطمة وزينب واسى ما شاء الله اسامى يعجز اللسان عن نطقها شى ملاذ وشى ريهام وشى سهام ...والبقية تاتى
زمان قالو المرة لو فاس ما تكسر الراس لكن اسى ما شاء الله بقت عندها رصيد فى (التنك)وبنزين فى(البنك).واتحولت من ولية لى والى ومتعالى ومعتمدة وسفيرة ووزيرة ..وبقت هى الامرة والناهية وصوتة ذى ما بقولو الحبوبات يجيب الطاااشى...
كلو عشان المرة تحصل الراجل لى شنو وعشان شنو يا بنياتى ماعارفة (لكن العارف يورينى)
وفى قصة المرة مع الراجل دى اهل الضاد بقولو ...........
الراجل اذا رد باجابة صحيحة يسمى (مصيب).والمرة اذا ردت باجابة صحيحة تسمى(مصيبة)والناس بتخاف من المصائب واهل الضرائب والكشات والرقشات...
والراجل اذا جرى يسمى(جارى)على وزن جارى الطلب ...والمرة اذا جرت بقولو (جارية)وطبعاً معروف مقام الجارية ولكل مقام مقال...
واذا تبع الراجل مذهب الامام الحنفى يقولون هذا (حنفى) والمرة اذا تبعت مذهب الامام الحنفى يقولون هذه(حنفية)والحنفية معروفة لكن فى ناس كتاار نسوها لانها قاطعة...
ويقال للرجل (حى)والمرة (حية)والضايق عضة الدابى ..........(دون تعليق)
ويسقط الراجل من مكان عالى فيسمى(ساقط)او واقع والمرة يقال لها (ساقطة)واقعة((وقع ليكم ولا نعيدو ليكم))
والراجل بقولو ليه (ماشى)والمرة بقولو ليها (ماشية)..والعتب مرفوع
والراجل اذا كان ذكى او ماكر بقولو ليه(داهى) والمرة اذا كانت ذكيةاو ماكرة بقولو ليها (داهية).وهنا ما يفهم من صياغ الجمل................
واخيرا يا اصدقائى
دى دعوة للمزاح لا اكثروالعتب مرفوع يا بنات
وانتو يا الرجال ما تفرحو دوركم جاااااااااااااى
ــــــــــــــــــــــــــــــــــــــــــــــــــ ــــــــــــــــــــــــــــــــ
ودمتم بخير
ــــــــــــــــــــــــــــــــــــــــــت
| التوقيع |
|
|
التعديل الأخير تم بواسطة : حافية القدمين بتاريخ 14-06-2005 الساعة 17:37.
|
العرض العادي
