الإشكال........!

alsagri · 13-06-2005, 02:23

قصيدة من تأليف الخال ياسر(أبو عمار) أدوني رأيكم فيها

الإشكال
كونك انتي تكابري وتمشي وتنسي كلامي
الفيك اتقال
وكونك تهجري دنيا الريدة وتملي حياتك
تيه ودلال
وكونك تخلفي وعدا بيننا وتبقى الكلمة
الحايرة سؤال
برضو بقول لك ماإشكال

الإشكال انك ياقاسية بتنكري حبا كان ظالينا
ياما وكم عاهدنا قلوبنا إنو الحب يتخلد فينا
وكل حلمنا نحقق منية والأفراح تسكن حوالينا
كنا نخاف من الأقدار مرة تجور أوتقسى علينا
وجينا بقينا زي الأغراب لاأفراح لاحب يأوينا

أرجعي مرة وعيدي الذكرى حروف الذكرى بتشهد ليك
عن التحنان والحب والإلفة وزمن الفرحة الموعود بيك
وزولا كم أرواك بحنانو وعشق البسمة البين شفتيك
كم غناك وأهداك كلماتو وشاف الكلمة قليلة عليك
لأنك كنت منابع ريدو وكان هو الغيمة الحانية عليك
كان بيغير لو حتى النسمة هبت وطافت في واديك
وليك بقول بصدق الكلمة ديمة بريدك وماناسيك
وماكان حاسب انو في لحظة تجي الأيام وتبدل فيك
وجيتي معاك غرور الدنيا هدمتي الأمل الباني عليك

نسيتي اللهفة وشوق اللقيا لما الزمن يفرقنا بعيد
كنا نغالب في اشواقنا ونلعن زمنا قاسي عنيد
وانت تعدي مع الأيام حساب مضمون بأصابع الإيد
عشان ماأرجع ليك من تاني ولي أيام الفرحة أعيد
ولما عيوني تصابح عينيك ببقى الزمن القاسي سعيد
ويبقى زمانا الكان متوقف زاهر لونو وعمرو جديد

ولو ضميتي هواي على قلبك كنا حياتنا نعيشا أمان
كنا غرسنا الريدة مشاتل لي أجيالنا زمان وزمان
إلا اخترتي قساوة القرقة وهمس الاهة والحرمان
تصبح ذات لحياتنا الباقية ولي ريدتنا هي العنوان
تهتي مع الأيام ومشيتي وصرت أنا ذكرى انسان
وذكرى الريدة محال انساها حتفضل خالدة مع الأزمان
ومهما جرتي أو يوم خنتي بفرد ليك جوايا مكان
وأسيبك للأيام تتعلمي معنى الريد ووفا الإنسان

sambaman · 13-06-2005, 10:09

alsagri
قصيدة فى قمة الروعة والجمال
تحمل إحساس نبيل
برغم الجراح والانين
فانه يمد لها وردة ...
وكانما يقول لها
ما تنسى لى ترسلى ...
يسعدنى أنك تزكرينى وعنى
دايماً تسالى ..
التحية الى ياسر ( أبو عمار )
واليك أنت حامل المسك

م ع م ح ب ت ى

alsagri · 13-06-2005, 16:02

شكرا على مرورك sambaman وظللت شمعة تضئ سماء المنتدى بذوقك وتعليقك الراقي
أما يكفي توقيعك يحمل صورة الغالي.......لك مني كل الحب والتير

sambaman · 14-06-2005, 10:13

الغالى alsagri
إن الابداع يشدنا
اليه شداً
نجد أنفسنا مسيرين على المضى فى
ركبه ..
وانت جئت الينا فى موكب الابداع ..
فأعزرنا إن مضينا معكم ...
أما القيصر فإنه بين خلايا الروح
والعصب ...
يكفى أن يدندن بكلمة ..
فتحدث الدوزنة الكاملة ..

م ع م ح ب ت ى

دبوره · 17-06-2005, 18:29

العزيز الصقري :
زمن المشاعر عدا فات ايامو راحن وانطون
حتى العتاب ما عاد يفيد كف كف دميعات الحزن

مشكووووووووووووور اخونا الصقري علي هذه الكلمات الرقيقة
والف الف شكر لي كاتب القصيدة
والله قصيدة رائعة بمعنى الكلمة
.
.
شكرا جزيلا لك اخي
(((يديك العافية)))

alsagri · 04-02-2008, 13:38

أشكرك دبورة على المرور ......
ومن هنا اوجه التحية لخالي الشاعر ياسر يوسف واقول ليهو مبرووووووووووووووك الزواج وبيت مال وعيال انشاءالله

دالـــيا · 05-02-2008, 16:46

ومهما جرتي أو يوم خنتي بفرد ليك جوايا مكان
وأسيبك للأيام تتعلمي معنى الريد ووفا الإنسان 0000000000000( يمكن ديل اكتر بيتين شدوني شديد)

واااااااااااااااااااو بجد روعه القصيده

بالجد كل كلمه منها تحمل معنى وتثير جوا الانسان احساس

بيختلف عن الاحساس القبلو

تسلم اخوي

اختك داليا