حكايتي مع ولداً و جييييييييييييييييييييييييييييييييه

Sit_Elkisra · 03-05-2005, 02:50

الحالة إنو القصة دي انا حكيتا لاكبر كمية من اصحابي لكن برضو ... لايصة لي في راسي ... و برضو حقولها...
قبل ما نخش في القصة .. دي قضية للنقاش ياخوانا .. هي ما مسألة حياة او موت .. لكن كسر للروتين شوية ..
.... عليكم الله ما تعبتوا من المواضيع الجافة .. و الاحتدامات و المشكلات الكل يوم والتاني ..
اخدو صنة هنا
الولد .. يا يمة زييييييينة الاولاد ... سييدهم لي حدهم ... اجي!! ماشاء الله ما تقولو كمان سحارة !!!؟؟؟
.. عاد في زول في سماحتو و في وجاهتو .. ماااااااافي ... مربوع لمممممممن مربوع ... و وجييييييييه بس التقول مسلسل ديني ... اجيييييييي!!
اريتو يا يمة راجلي .. اكان ما راجلي سمح ولدي .. المهم بس ما بعرف

العيون دي خليها ساي .. و الرموش اسكتو عليكم الله ... كمان بالنظارة .. سجمي ما بتتنّي الشوفة ...
شايل سيجارة ..شايل كوريك .. شايل جريدة برضو وجيه ... قالب هوبة برضو وجيه ... في الكتاحة وجيه في نص السوق وجيه .. ما عندو حل زاتو
هو منو؟؟؟؟؟؟؟؟
والله ما عارفة .. المهم بشوفو .. و امكن كل يوم كمان ... لكن كان تنيت الشوفة ما بجيني التهاب في القزحية طوالي ... عيوني ما بتستحمل ..
اها بقرا شنو؟؟؟؟؟
برضو ما عارفة ... المهم هو بقرا .. في سنة كم عمرو كم .. ده كلللللو ما مهم ..
عاد ياخواني هو كده كفاية عليهو ...
اها .. طبعا بالفوران و الهيصة الانا عاملاها ... و كمية المرات الاتطرحت فيها قضية الولد الوجيه هو و اصحابو عرفوني مكسرة ... و صاحبهم التلب هسع دي من التلفزيون ده انا كاسر فيني ضلعة .... الله!!!!!!!! كمان هم رمتاااااااااالة درجة اولى .. معقولة بس
الكلام الكنت مصرة عليهو .. انو ((( والله بمشي بقولليهو .. يا هناي انت جميل والله .. و انا زولة بحب الجمال ... شكرا للثواني الخصصتها لي من عمرك .. مع السلامة ............... بس ما دايرة منو اي شعور متبادل .. بس دايراهو اسمع الكلمتين ديل لانو معترين لي في لساني ده ...)))
طبعا الاجاويد و كده وقفو لي في السكة .. و قالو لي يا بت انت سايكو .. وحات الله ده كان انا القالو لي كده ... امروحك و امرجحك و ادورك و افكك زيييييييي اللستكة .. انت ما طيبة!!!!!!!!!!!!!!؟؟؟؟؟
ماااااااااااااا بعرف بس ... غايتو كان جاني مزاج في يوم منالايام اقول .. بقول
طبعا قبيل قلت ليكم انو سيد الاسم و اصحابو رمتااااااااااالة كبار ... و عضوية دائمة في البنشات .. و علاقة منقطعة مع مقاعد القاعات ... يا زووووووووول حنك الف مع الجكس و شطرنج من الدغش للعشية ....القراية طبعا في القابات ... يعني اقعد اقرا من بداية السنة؟؟؟؟؟؟؟؟؟؟ طبعا انا عملت عنو بحث تحليلي ما تتخلعو فيني كده!!!!!!!!
اها الحصل انو هو نقشني ليك مكسرة .. والعجب اصحابو عامليني ليك برنامج ... و انا لااااااابدة و رايحة روحة ...
طبعا هو واصحابو حتتهم وااااااحدة .. و لا بقوموا .. الجكس يجيهم .. البارد و الاكل يجيهم ..اييييي شي ... كمان الناس مرزقة ياخوانا ما تحسدوهم ..
اها انا ممكن في اليوم امر بي حتتهم دي علي الاقل مرة مرتين .... بالعافية بشيل عيني من وجاهتو ....
طبعا انا اول ما اظهر في السكة الجماعة يصنو ليك .. و اتبعوني بس دايريني اتلفت ... عشان يبرمجو بي ... و ييييييييين انا صحي مكسرة لكن تفتييييييييحة ..
لو هو قاعد يحنك في جكس الا يعلي صوتو وانا جاية نظام الود ظريف و الجكس مبسوطة منو .. ((( سمح بختك)))
يوم انا جاية مكشرة و لاعنة .... مريت قدامهم .. هي انقروا حصل شنو ... مش قعدو يشاغلو
نظام ((( ليه لكن يا فلان انت ... ما للدرجة دي ياخ ..فكها شوية )))
هي هي هي هي هي هي .. ظراااااف لكيييين ...
مرة جيت مارة فيهم ... قبل ما افوت منهم سمح .. قمت اتزكرت اني اجيب حاجة من ما جيت ... يا زوووووووووووووووول ... التبسم و الحركات .. و ده يلكز في ده .. و المديني ضهرو لوح رقبتو يشوف الاكشن الحصل .... و الله حلات و ظرافة اولاد .. هي هي هي هي هي ...
برنااامج ياخوانا الكسير ده ...
لكن المشكلة لو قمت دقست و عاينت ليهو كم مرة .. لاااا ما ببقى الكلام اصلو .... نظرة واااااااحدة بس في اليوم ... و التانية في الحاجة القصوى بس ...عند اللزوم يعني ..
... هسع اكيد حنيتو علي .. دايرين تجيبوا لي من طقاطيق الارض ... يا سلااااااااام عليكم ..
الله يباركم .. والله مافي لزوم .. مافي داعي و الله ...
يا زول ما تقوللي تعبنا راحة و اوكوروروك .... ما في لزوم ...
انا بتصرف .. اصبرو بس .. لما اقرر ...
غايتو لو يوم لقيتو ليكم بت في شكل لستكة حايمة في الشارع دي انا .. لانو حكون مشيت اعترفت باكتشافي للجمال ... و مرجحوني و فكوني زي اللستكة في نبلة...
...
شكرا ليكم شديد ...عشان تميتوا القصة كلها .. و القضية دي ..
و شكر خاااااص لست الكسرة .. اول المؤيدين و المناصرين للفكرة و للجمال ..

شجراوى · 04-05-2005, 12:37

ست الكسره تعرفى ولا تعرف ما بهم هنا البهم انو انا سامع عنك لى فتره قبل كم يوم خشيت البالتوك سمعت واحده بتقول (انك) إنك ست الكسره واحشاها (واحشه) وقالت عنك كلام ظريف اتمنيت فى لحظة اقرا ليك او اسمعك على الاقل يمكن تكون برا السطحيه العايشه فيها جموع الشعب السودانى بعد 30يونيو على العموم الجمال سمح والسماحه من حقها علينا انو نعترف بيها كان بالسر ولا بالجهر وياما بقينا لساتك بس بنطير مع أتجاه الهواء وخليك تفتيحه !!!!!!!!!!!!!!!!!!!!!!!

**طائر النورس** · 04-05-2005, 20:53

الرائعة فينا دوماً والمشبعة بطعم البرتقال ( ابو صرة ) ... ست الكسرة !!
ان تناولنا ورؤيتنا للجمال تختلف بأختلاف تلوناتنا وسحناتنا واختلاف زوايا الرؤيا فينا ... ولكن يبقى الجمال هلو الجمال الذى لاتخطأه العين والذى يثير فينا احساسات متدفقة بالانجزاب ونفلاتات من الشهقة المخزونة فى دواخلنا والتى تنطلق برؤية لوحة ربانية جمالية سائرة على الارض ...
إن طبيعة الإنسان تنجذب إلى كل ماهو جميل، وقد ورد عن رسول الله (ص) "إن الله جميل يحب الجمال"، وقد شاءت قدرة المبدع البديع الخالق سبحانه وتعالى أن يجعل من الجمال _في شتى صوره _ مناط رضى وسعادة لدى الإنسان، واستساغة الجمال حق مشاع، وربما تختلف مقاييسه من فرد لفرد، ومن عصر لعصر، لكنه اختلاف محدود قد يمس جانباً من الجوانب، أو عنصراً من العناصر التي تشكل القيمة الجمالية، ولم يقف الإحساس بالجمال عند النظرة الشاملة، أو الانطباع المبهم، أو الإيحاء التلقائي السريع
ومن الخطأ أن نعتقد أن للجمال مقاييسه الحسية وحدها، تلك التي تقع عليها العين، أو تسمعها الأذن، أو يشمها الأنف، أو يتذوقها اللسان، أو تتحرك لها لمسات الأطراف العصبية، فالجمال مادة وروح، واحساس وشعور، وعقل ووجدان، فإذا التقى فلاسفة الجمال في بعض الجوانب أو العناصر، فستظل هناك في عالم الجمال مناطق يعجز الفكر الفلسفي عن إدراك كنهها، والوصول إلى أبعادها، فليس العقل وحده هو القوة القادرة على استكناه كل أسرار الوجود وما خفي فيه، ولحكمة يقول الله في كتابه العزيز (...فإنها لا تَعمى الأبصارُ ولكن تَعمى القُلوبُ التي في الصُّدورِ) .
وهناك مذهب شهير في الفن يطلقون عليه مذهب "الجمالية"، ويدخل في نطاقه مذهب "الفن للفن" والجمالية بمعناها الواسع "محبة الجمال"، وترى طائفة كبيرة من أصحاب هذا المذهب أن قيمة الفن توجد في ممارستنا المباشرة له، وليس فيما يقال عن تأثيره في السلوك، والفن _كما يقولون _ يختلف عن الحياة، ولكن الموقف الجمالي يؤكد ذلك الاختلاف إلى حد القول: إن الفن لا علاقة له بالحياة، ولذلك فهو لا يحمل مضمونات أخلاقية، والجمالية تعطي الشكل أهمية كبرى، وتكون قيمة العمل الفني في الشكل دون الموضوع، بينما يرى آخرون من أتباع الجمالية: أن الجمال قيمة لا غنى عنها، تقديرها ضروري للحياة الخيرة ولكن لا يمكن فصلها عن قيمتي الخير والحق، وهي في الواقع تأتي بعدهما.
ومهما تشعبت الاراء واختلفت الاوجه يبقى الجمال هو الجمال وتبقى تلك الرؤيا له التى تسلب العقول وتجعل القلوب تخفق والايادى تنداح فى الكتابات الشعرية والنثرية واصفة اياه بشتى الصور البعيدة والقريبة ...

عن سفيان بن زياد قال :
قلتُ لامرأةٍ من عذرة و رأيتُ بها هوى غالباً حتى خفت عليها الموت مابال العشق يقتـلكم معاشر عذرة من بين أحبَّاء العرب ؟
قالت : فينا جمالٌ وتعـفُّـف فالجمال يحملنا على العفاف والعفاف يورثـنا رِقَّة القلوب والعشق يفنى آجالنا ..!!

وربنا يخلى لينا الحلوين ( والسمح سمح كان زرعوه فتريتة بقوم قمح ) ..!!
والفتان جمالو سحر افكارى ماااااالو ..؟؟!!

ودمتى ياست الكسرة ياجميلة التواجد فينا

°~*¤®§(*§ ودمتم احبتى §*)§®¤*~ˆ°

Sit_Elkisra · 04-05-2005, 21:57

مساكم جميل النوايا ...

شجراوي ,,,
العتب على النظر ....
اهلا حبابك ,,, في ناس كتار بنتمني بعد ما نلاقيهم في مسرى الحياة ان يظل التواصل و اللقا ... لكن يبدو ان الظروف اقوى .. و تجعلك تنحصر و تنحسر فيمن حولك.. سلم لي عليه او عليها ... و قولليها خالتك ست الكسرة بترسل ليك تحايا بسخونة 55 درجة سينتقريت من ارض السودان ... اشد شي الزول يكون لستكة .. بس حاول انك تخفف تسارع اللستكة عشان ما تقوم تطق ليك حيطة و الا تعوّق زول ... ابقى عشرة .

طائر النورس ,,,
ياخوانا طائر النورس ده انا متسلبطة انو اخوي الكبير ... ما حشكرو ليكم لانو غني عن كده.. بس مافي منو كتير في زمن الجمال مدنث و ملطخ بمفاهيم قذرة ...
..وعما يخص مفهوم الجمال ... ده موضوع كبير و لو انفتحت فيكم الا تجيبوا السكاتة تسكتوني بيها ...
الجمال ((لجماله)) عندو كم رؤية و كم مفهوم و كم نظرية ... ابدع فيها جميع الفلاسفة و علماء الاسلام و غير الاسلام .. و سبقهم الفلاسفة اليونانيين في فك شيفرته الغامضة
الجمال احساس كان او حالة يختلف من زول لي زول ... لانو في قصتي مع الولد الوجيه واحدين من اصحابي قالوا لي ((( هسع عليييييييك الله ده وجيه!!!؟؟)))) و الله وجيه!!
من زمان و حتى الان الناس بتحاول تخلق الجمال ... و ابتدعوا و اقتبسوا من الطبيعة و المخلوقات حبة جمال حتى يصلوا للجمال الالهي المطلق ... و لا زالت المحاولات البشرية لي يومنا ده
في الابداع .. سبحان الله ..
في فيلسوف يوناني اعترف بانو الانسان البحاول يخلق لوحة جميلة اياً كانت ماهيتها هو متلبس بفيض الهي .. و الببدع فيهو مقتبس من الجمال ...
كيف ولا اذا كانت الاشكال و الصور و الرؤى كلها إلهية مصدرها الخالق سبحانه و تعالى ... و اي شي بنسوي فيهو محاكاة في محاكاة... سبحان الله
كل المحاولات على كل الاصعدة محاكاة للقدرة الالهية المتعالية للجمال ...
....
شكرا للإضافة يا طائر النورس ياخوي ... و كن جميل تشوف الوجود شيتاً جميل ...
ده ما معناه تبخيس للحالات غير ذلك في بعض الاحيان.. لانو ده تنزيه انحن ما قدرو ..و الله يقدرنا

Sit_Elkisra · 04-05-2005, 23:16

آااااا الوجيه هوووووووي ,,,,,,,,
,,,,,,,,,,,,,,, كيف لا أعشق جمالك !!!!...

البلبل المغترب · 07-05-2005, 17:40

ست الكسرة بعد التحية وانت تعودين من دهشة المواضيع الفلسفية والجمالية والاندهاشية ، بس يا اخت بلادى ما وضحتى الفرق بين الوسامة والجمال حتى بعد كدى تخشى فى الموضوع عشان نحن نقوم نفهم القصة بى اطرافها المتشعبة زى الراكوبة الماها مصلحة كويس فى الخريف ، وكمان ما وريتينا اللستكة دى صفراء البربطو بيها القروش وله السوداء بتاعت النبل الكنا بننتش بيها الطير زمان عشان نقيف نشيل معاك الفاتحة ، فقط فى النهاية يبقى الواقع والسرد الذى فى داخلك اكبر من كل معنى نتوقع ظهوره بين السطور وحقيقة نعانى فى اكتشاف الصور المختفية خلف الاطار ودمتى .

Sit_Elkisra · 08-05-2005, 14:32

البلبل المغترب ,,,,
حبابك بين أخوانك و حبانك يا جنى الفريق هنووووك ...

عارف ,, زمان الفنانين التشكيليين كانوا في معارضهم بيختوا اللوحة و بجانبها عنوان اللوحة .. و لما لقوا انو الحركة دي بتحسر خيال المتلقي في قالب واحد .. و تجعلوا ما يتمتع بخلق اسباب خاصة او عامة ... قريبة او بعيدة باللوحة .. اكتفوا بوضع كتالوج (كتيب) فيهو اللوحة و تفاصيلها .. لمن اراد التعرف على السبب .. رغم انو اللوحات بتاعت التشكيليين ممكن تكون تجسد عمر ... او حقبة من التاريخ .. و ده الفن زاااااااااااااتو ..

في محاولة بسيطة و كسر للروتين كانت القصة الواقعية جدا ... و الخنفشارية و بعيدة عن التصديق جدا جدا ..
و اي زول الداير يتكلم عن الجمال حبابو و الداير يتكلم عن قريبو الوجيه والا قريبتو السمحة برضو ما مشكلة ... انحن بنتكلم عن علم كبييييييير و اسمو الجمال ..
و الباب مفتوح للجميع ..
في ركن بتاع الاستشارات و اريد حلا و المشاكل النفسية .. بس لسة تحت التشييد .. ههههههه

seed_alcarro · 09-05-2005, 18:20

زليخة الخنفشارية
ما بالك تتنططين ها هنا وهناك .. تتأرجحين على حافة البوح .. هل ذلك الجميل من الأوس أم الخزرج ؟ فإن كان أوسيا فهذا أمر غير محمود وإن كان خزرجيا فهو أمر غير حميد ...

تلقفي الحل ..
عليك بمتابعة الوجوه التالية :
توم كروز مرتين كل 12 ساعة

ليوناردو ديكابريو 12 مرة كل ساعتين

براد بت مرة عند اللزوم

تابعي العلاج لمدة اسبوع وبعد داك أرجعي الجامعة صدقيني حتقولي ليهو (تصبح ككندارة) ..

وتحياتي

Sit_Elkisra · 11-05-2005, 22:20

السلام عليكم ,,,

صديقي سيد الكارلو(هات)..
والله اكان العلاجات و البراهم و المسوحات الاديتني ليها دي نفعت معاي ... عاد يا يابا تتبااااااارك ..
غايتو بشيل معاي مجلات يا قولك .. و كل ما اشوف الوليد الوجيه ده اقرا ليهو الاخلاص و المعوذتين ...
شكرا على المرور ..
بعدين الكدندارات عارفييييييييين روحهم .. والا كيف!!