البنات والشيخ الفلانى والودع

سموحة · 13-03-2005, 00:14

[size=4]السلام عليكم ورحمة اللة تعالى وبركاتة
رايكم شنو نتكلم فى موضوع خطير جداً جداً وقد يكون غائب عن بال كمية من الناس خصوصا انتو الاولاد لانو صعب الزمن دا واحدة تخوض فى تفاصيلو مع ولد لكن اصبح ظاهرة خطيرة جدا جدا ودخيلة على مجتمعنا وقد يهدم لى قدام مستقبل كثير من الآسر والعوائل ظاهرة( الشيوخ والبنات والنسوان وقارئات الودع)نبدا بموضوع الشيوخ اولا بقصد الذين يدعون انهم شيوخ وهم فى الاصل مجرد دجالين وفئة ضالة اى هم الذين يتعاملو (بالسفلى) طبعا كلمة سفلى غنية عن التعريف نجد انو مجتمعنا فيهوا كثير من الشيوخ لكن اصابع اليد ما زئى بعض نجد انا هناك من يقوموا على نشر القران والمجمعات التعليمية والصحية والكثير ومنهم الشيخ البرعى رحمة الله علية ذلك العالم الفاضل الذى فقدناة قبل فترة ربنا يجعل الجنة مثوآة ومثوآنا جميعا بكى علية الصغير والكبير.
ندخل فى موضوعنا بدون قيود وال رائكم شنو؟ لو قلتا ليكم فى كمية من البنات والنسوان كل حياتهم متمثلة فى الشيخ الفلانى ودا قالو كويس ودا قالو رهيب يلا نمشى ليهوا انا عندى مشكلة مع راجلى وعندى مشكلة مع نسيبتى واخوآت راجلى صعبين وانا عندى عين وليقت بخرة فى البيت ...............الخ ومن هنا بتبدا مرحلة الشيوخ وطبعا دا موضوع نهايتوا وين ما معروفة فيهم البيطلب قروش وفيهم البيقول ليك انا ترمى لى بياضك بس يعنى اى حاجة وطبعا بعد كدا المرحلة التانية تقابلو وتحكى كل تفاصيل حياتها السرية ونحنا بطبعنا بنتوهم سريع ومن هنا يقول ليك انت عندك كدا ووفلانة دى عملت ليك عمل ...... الخ ونحنا محتاجين الحاجة الفلانية وعايزين كدا ولمن الموضوع دا يتم تجيبى كدا وبطبيعتنا كبشر بنصدق ونخش فى الابتزاز المالى وكمية من المشاكل . رايكم شنو احكى ليكم مواقف حقيقية تصدقوا لو قلتا ليكم ابسط حاجة البنات فى الجامعة بين المحاضرات بيمشوا لى الشيوخ علشان يشوفو مشاكلهم وهم مالهم منهم البتقول ليك الامتحانات قربت يقرا لينا فى القلم ومنهم البتكون ماشة لمواضيع شخصية وما خفى كان اعظم طبعا لو جيبنا للنسوان المتزوجات حدث ولا حرج تفتكروا يا خوانا لو الواحدة وقفت وشحدت ربنا ووقفت مع نهاية كل صلاة ورفعت يدها مش احسن بدل الزول يخش فى سكة صعب الرجوع منها تانى قال تعالى (ادعونى استجب لكم ) (واذا سألك عبادى عنى فانى قريب اجيب دعوة الداعى اذا دعانى) هل دا ضعف فى الايمان ام وسواس شيطانى ام محكاة للغير خلاص الشيخ دا حل لى الزولة دى موضوعا معناها حايحل لى موضوعى دا ضعف فى الايمان اكيد. منو البفهم انو دى امتحانات من ربنا الشئ البيحصل لينا فى حياتنا بغض النظر عن الحاصل شنو ربنا عايز يعرف القريب والبيلجأ ليهوا ساعة الضيق او ساعة الفرح و البعيد منو دى كلها امتحانات للثبات وصلة العبد بين ربة نقول بس (حسبى اللة ونعم الوكيل)
اجيكم كمان لى قارئات الودع طبعا فى اللحظة دى اكتب شنو وال اخلى شنو بس حاحاول اكتب ليكم جزء من قليل بسمع بيهوا حاحكى ليكم والله الحاجة دى حصلت لى انا بنفسى من زولة صديقة يعنى لو سمعتها من زول تانى كنتا حاكدب لكن والله لى انا شحصياً عرفتها منها حاحكى ليكم الحصل بس اقروءة للاخر وعايزة رائى كل من حايقرا الموضوع دا ياريت. قبل ايام وانا بشاهد فى التلفزيون التلفون ضرب رديت ليقتها صديقة لى وصوتها مضطرب .كنتا بسمع بالامور دى كتير لكن والله لمن سمعتو منها قررتا انى اتكلم واعرض وجة نظرى واشوف الحاصل علينا شنو احكى ليكم يلا الحصل شنو قالت كانو هى ومجموعة من صحباتها ومنهم واحدة بت عيلة والله ومعروفه عيلتها اللة اعلم انو ناقصها حاجة غير الايمان باللة كانو فى مشوار مع بعض فى اثناء ما هم راجعين قالت ليهم فى مرآه بتاعت ودع نغشاها قالت حكت ليها عنها بت صاحب ابوها انها مراة شاطرة جدا وطبعا الشيطان شاطر خصوصا فى الحاجات دى وافاجآ انو المرآه دى بتتدخل فى علم الغيب قبل اى حاجة نقول استغفر اللة العظيم بتقرا لى الناس كلهم مع بعض اشرح ليكم الفكرة اكتر هذة المرآه تجلس فى عنقريب امامها ترابيزة يجلس كمية من الاشخاص حول هذة الترابيزة المفروض انو اى واحدة تلمس هذة الترابيزة بيدها علشان الدور يجى عليها طبعا الفكرة شنو اللة اعلم سالتها هل فى كمية من الاشخاص اتخيلوا معاى ثلاثة بنات دكاترة وستة متزوجات وخمسة من طلبة الجامعة الغير الما عرفتهم هى احكى ليكم انو الشيطان شاطر كيف تتخيلوا انو هذة الصديقة بتقنع فينى علشان امشى معاها تصدقوا انها قالت لى كلامها كولوا صاح والصراحة من نبرتها حسيت بيها انها مقتنعة بيها جدا جدا طبعا دور المرآة دى بتحكى ليك انو انتى عندك شنو وحايحصل ليك شنو والتتدخل فى علم الغيب طولتا عليكم فى الكتابة لكن مصرة احكى ليكم حاجة بسيطة من كمية من القصص العرفتها جات ام واحدة وحكت ليهم قصة بنتها والام جات بتستنجد علشان بنتها طبعا دا بحكم انو الناس كلها بتكون قاعدة مع بعض وكل الحاجات دى فى العلن. الحصل لبنت هذة المرآة انها قبل فترة جات البنت لقارئة الودع هذة وسالتها من موضوع قالت ليها هل الموضوع دا حايتم شوفتو معاى نوعية الاسئلة ردت قالت ليها فى زول تانى حايتقدم ليك وساكن فى الحتة الفلانية والشئ دا حصل بالفعل البنت ضحكت بنبرة استهزاء قالت ليها (هااااااااااااااا) قارئة الودع قالت ليها طيب لو حصل ليك القولتوا؟ حاتجيبى لى خاتم ريال طبعا على حسب كلامها انو الخاتم دا ما ليها لى الاسياد زئى ما المصرين بيقولو الحاصل انو الزاوج كل مرة بتحدد فى الوقت الفلانى وبيتاخر نسبة لى الظروف طبعا الفهم فى اللحظة دى انها علشان ما جابت الخاتم هدية هو سبب الظروف البتحصل وبتعمل على تأجيل الزواج هل تصدقوا انها جات وشايلاة معاة الخاتم الريال .
شوفوا نحنا وصلنا وين. (كذب المنجمون ولو صدقوا) دى حكاية بسيطة طبعا بالنسبة لى الشئ الحاصل بس دى حكتها لى صديقتى وكانت حاضرة الموقف قبل ايام يلا اتخيلوا معاى الوضع الانحنا فيهوا كيف؟
الغريب انو بحكى لى امى قالت لى دا بيقى عادى جدا المشكلة انهم بيقوا يدخلو البيوت بالنهار فى اثناء غياب الرجال من البيت وطبعا نحنا يا مؤمن يا مصدق بس برضو فى ناس واعين لى الحتة دى انا بكرر انا بقصد الناس النفوسهم ضعيفة
هل تفتكروا هذة النوعية من الشيوخ وقارئات الودع بيعرفوا اللة سبحانة ؟ اتصوروا انو تانى اخواتنا وصحباتنا وبناتنا يكون دا طريقهم حانمشى لى وين وحايحصل فينا شنو وزئى الظاهرة دى حنعالجا كيف ومدى تاثيرها لى قدام شنو تفتكروا التخلى عن العادة دى بسهولة ممكن وهل حياتهم حاتكون طبيعية اتخيل انك تكون بتفكر ترتبط ليك بواحدة طريقها كولوا يكون مع الشيوخ وسكة الودع وحصل والله واحد اختلف مع خطيبتوا قالت ما بتقدر تسيب الشيخ بتاعها دى مشكلة ناهيك عن المشاكل التانية وين دور الشرطة مع الناس ديل وين دور بسط الآمن الشامل الموجود فى كل منظقة وال خايفين على روحهم؟
بعتزر ليكم مرة تانية طولتا فى الموضوع لكن انا الصراحة شايفة انو موضوع محور نقاش ومهم جدا وبيستاهل تكون فيهوا وقفة انا حاليا بحكى عن نماذج بس لكن لو اتعمقنا لى جوة حانلقى بلاوى بكرر انا بتكلم عن الفئة البتتعامل باساليب الدجل والشعوذة بعد ما قررتا انهئ الكتابة رجعتا واتزكرتا موقف حصل امام الملايين من الناس وفى التلفزيون السودانى فى حلقة لى للشيخ عبد الحى يوسف عندما اتصلت بة امرآة اكيد فى كمية من الناس حاضرين الحلقة دى لكن نحكى للناس الموقف المرآة الاتصلت هاتفيا عملت عمل لى امرآة تانية والدجال او الشيخ قال ليها لازم تتدفنيهوا جوة فم امرآة ميتة وقامت بالفعل بدس السحر فى فم امرآة متوفاة سافرت الى العمرة او الحج ما متاكدة الصراحة لكن ما شافت الكعبة دا عقاب ربانى فى الدنيا ناهيك عن الآخرة بعدين وانتو عارفين انو نور الكعبة قبل ما تشوفوا العين بيكون فى القلب. شوفتوا انو الموضوع دا موجود بكثرة لكن منو البيناقشوا ومنو البحاربو وشوفتوا نحنا ماشين لى وين ؟
اتمنى انكم تناقشوا الموضوع دا ما تهملوة لانو بيستاهل اننا نحمى مجتمعنا لكم منى جزيل الشكر

كذب المنجمون ولو صدقوا

سموحة[/size]

ود لطفى · 13-03-2005, 01:15

عمران عامر · 13-03-2005, 01:26

سلامات الاخت سموحة

أنا ما بكذب كلامك ده وفعلا ده الحاصل بالسودان وفي ظل الكثرة بتاعت البنات وعدم الزواج وصعوبة الحياة بالتالي البنت بتذهب للحاجات الزي دي وبالمناسبة الحاجات دي حقيقة ملموسة " كذب المنجمون ولو صدقوا" ولان العين معترف بيها والعين هنا كما حدث لرسولنا الكريم ما القصد منها سوى هذا السحر وربنا في محكم تنزيله قال " ويفرقون بين المرء وزوجه " طبعا الاشياء دي كلها مسطرة ما في شك لكن الكلام الحكيتي عنه هو واقع معاش شئنا أم أبينا . بس ياريت الناس ترجع زي ما قلت أنت للدين ولكتاب الله وسنة نبيه الكريم وأنه الواحدة لازم تتوكل وتحسن الظن بالله وده أهم حاجة في التوكل أنك تظني بالله خيرا .

بالمناسبة النساء سواء متزوجات أم باحثات عن الزواج بيمشن للناس ديل والله يحفظنا منهم وفي منطقتنا انا عايش حياة ناس منكوين من المساءلة دي وربنا يستر . وبالمناسبة المتعلم والأمي في الحاجات دي سواء يعني ما في فرق بين التعليم والجهل والكل يسعي لما يظن فيه خلاصه عندي صاحبي بالمناسبة جاء داخل بيته وكان مشتري ليه خاتم ذهب لخطيبته وعندما دخل لقى ليه مرأة بترمي في الودع وسلم عليهم عادي قامت ندهت عليه وقالت ليه ماشي تودي الخاتم ده لخطيبتك قال ليها ما عندي خاتم قالت ليه والله عندك وماشي تودي ليها وبالمناسبة هو كان فعلا مشتري ليه خاتم وكمان انت حا تسافر بره السودان وترجع تتزوج وصديقي ده والله العظيم كان في السودان مرتاح جدا وفعلا إغترب وهو حاليا معي بالرياض هنا وقالت ليه ايضا ستشتري ليك عربية بالمناسبة الثلاثة اشياء ديل حصلوا منهم اثنين وفاضلة العربية من فترة قال لي عاوز الم اعمل لي دفار قلت ليه عاوز تحقق كلام الوداعية ولا شنو ، يعني الحاجات دي حقيقة ملموسة ما فيها شك بالمناسبة . وان شاء الله نعرس قبال ما يقبضونا بالوداعية ولا الشيخ الفلاتي ، بس نسال ربنا انه يعطينا اليقين ويثبت قلوبنا يارب

المهاجر · 13-03-2005, 12:17

مشمشه · 14-03-2005, 20:06

الاخت سموحه .....
تشكري علي طرح هذا الموضوع المهم

الحقيقه انا يا شباب انا ماكنت إن الحال وصل بمجتمعنا للمرحله دي
والمشكله انو ما بس قاصر علي الطبقه الاميه

انا بواق الاخوان في الراي وبفتكر إن السبب هو البعد عن الله وصراته المستقيم
بش ياشباب تتكرو شو ممكن يكون الحل لمشكله دي؟؟؟؟

**طائر النورس** · 15-03-2005, 15:13

الاخت سموحة
شكراً لك لطرحك هذا الموضوع الهام والذى اصبح يأخذ انماطاً عديدة واشكال مختلفة وصور متعددة كلها تصب فى ماعون الدجل والشعوذة .... وهناك انواع مختلفة من الدجالين الذين وجدوا ضالتهم فى عقول بعض الفتيات والنساء من الجاهلات والمتعلمات فاصبح لافرق بينهما بالعكس اصبح مرتادى الشيوخ من الطبقة المتعلمة !!! ..
فأصبح كل حديث فتيات الجامعات عن ان شيخ ظهر فى المنطقة الفلانية قالوا خطييييييييير ( بجيب العريس لحدى البيت ) .... وواحدة تقول ليك الشيخ الفلانى قالوا جاب لفلانة موبايلها الاتسرق منها .... وواحدة تقول ليك الشيخ الفلتكانى قالوا بنزل ليك قروش انتى تديه مليون جنيه يعملها ليك عشرة مليون ... وهناك نوع اخر بفك العمل ( وبنفخ الكشحة ) ... ( وبفرتق المربوطة ) ... وواحد تانى ممكن ( يجيب ليك الجنا الكايساه ) وواحد اخر ممكن يعمل ليك حجاب بتاع سلاح يعنى ( يفضو فيك جيم 3 مايعمل ليك حاجة ) ... و و و و و و و و و و .... وكثير الكثير من الاشياء التى اصبحت تدار فى فلك الشيوخ وكأن الشيوخ اصبحوا هم من يتحكم بمصائرنا وبالقضاء والقدر ... وسمعت مؤخراً ( بهجرة عكسية ) يعنى الشيوخ والدجالين بقوا يجوا للبنات فى جوة جامعاتهن !!!! ويحلو ليهم مشاكلهم ... وفى احدى الجامعات لو شفتوا منظر البنات وهم منتظرين قدوم ( الشيخ ) كأنهم منتظرين فرج من السماء !!! ( المنظر دة انا شفتو بعينى ) ....
وهناك الكثير من الافكار الخربة والايمانيات الضعيفة الاصبحت سائدة وسط البنات والنسوان ولا استثنى ( الرجال ) هنا لكن بنسبة ضئيلة جداً ...
ان كل مازكرتيه صحيح وحادث فعلاً وانا عندى شواهد وشاهدت مواقف لو زكرتها هنا ( ستشيب كل اعضاء المنتدى ) لدرجة الحنكة والفهلوة المستخدمة من قبل الشيوخ لايهام من تلجأ اليهم انهم صادقين فكأنهم ( حواة مهرة او خفيفى حركة جداً ) واشياء خداع كثييييرة يستخدمونها تجعل كل من يراها يصدق ان هذا الذى امامه ليس بشراً عادياً ....
هؤلاء الذين يجرون وراء كسب عيشهم على الخداع ووهم الاخرين ، من يريد ان يتأكد من دجلهم وشعوذتهم يراسلنى وانا على استعداد لاثبات ذلك له بالدلائل .

ودمتم

البلبل المغترب · 15-03-2005, 15:17

الاخت سموحة : الكثير اصبح يعتقد فى هذه الاشياء وللاسف هى حقائق وتصيب (لو كان هناك شئ سابق للقدر لسبقته العين)
والعين سحر ينفذ عن طريقها الشيطان ويمس الانسان والسحر بجميع انواعه يضر قال تعالى (من شر النفاثات فى العقد) .

الناس اصبحت تعتقد فى السحر وهو كفر فى الحقيقة وهذه لا جدال فيها ولكن لكى تحقق منه اشياء دنيوية مثل الزواج وتربيط الزوج هل تعلمى ان هناك نساء يذهب للشيوخ او الفقرا كما يسمونهم لمضرة زوجها ولكى يصبح خاتم فى اصبعها .

للاسف انها حقائق والمؤسف اكثر انها تضر بالفعل وتؤثر فى الانسان وهناك الكثير من الشواهد على ذلك (يفرقون بين المرء وزوجه )

(ولكن الشياطين كفرو يعلمون الناس السحر ) ،، ولكن هل تعلمين ان من يتعامل مع لاشيطان يفرض عليه الشيطان شروط كثيرة حتى يصل لحد الكفر ثم يستجب لطلباته فى اغواء الناس وتضليلهم ..
حتى اصبحت انواع السحر لها مسميات مثل الكشحة والجرى جرى وووووووووو هلم جرا ،
لكن يبقى السؤال هل مسائل الزواج وووووووووو وكل الاشياء المكتوبة فى الازل يغيرها سحر ؟؟ واين الحديث (واعلم ان الامة لو اجتمعت على ان يضروك بشئ لن يضروك الا بشئ قد كتبه الله لك )) ولكن فى اعتقادى ان الموضوع اعمق من ذلك بكثير ونحتاج لاهل الراى والمعرفة والتفسير حتى نتقى كل هذه الاشياء واعرف الشر لاتقيه لا لاخوض فيه ... والمؤسف ان الكثير من المتعلمين يتعاملون بذلك والكثير منهم ينكر وجود ذلك ولا يعره اهتماما حتى يقع فى احد المطبات ولا يعرف طريق الخلاص .
لى عودة

سموحة · 17-03-2005, 01:38

شكرا ليكم كلكم على المشاركات المختلفة بس للاسف مافى علاج لى الحتة ايلا تقوى اللة والايمان باللة وبالاقدار بس حاجة بسيطة تفتكروا لو الشيوخ ديل كانو بنفعوا الناس مش كان نفعوا روحهم اول؟ اى زول بيسلك السكة دى ياريت بس يسال روحو السؤال دا وحايلقى الاجابة اكيد