|
كارثة تسونامي ليست ببعيدة وهي عبرة لمن يعتبر
الأخ طائر النورس
تحدثت في موضوع خطير هو أم وأبو المواضيع كلها وهو الانحلال الخلقي في السودان بالمناسبة هو داء لف كل ارجاء السودان من شرقه لجنوبه لغربة لشماله لوسطه والله المستعان . وهو طبعا امر ما جديد ولكن طفح الكيل وبقي بدل ما نشم الريحة بقينا نشوف الذبيحة عديل وده يدل على نهاية الزمن ونسأل ربنا أن يزوجنا قبل قيام الساعة آمين يارب
بالمناسبة سنة 93 كنا في عمل لما كنا بالسودان وجينا ماشين بالحدائق وكان الساعة 8 مساء راكبين عربيتنا وجينا بالحدائق لقينا الاولاد والبنات خاتين دفاتر الجامعة وهاك يا خلط وكل واحد راقد للبنت فوق رجليها للذين معاي قلت ليهم يا ناس عووووووووك نحنا في باريس ولا شنو ؟ وقلت ليهم بالله بدل ما نمشي لينا لمجهول ما احسن نعيش زي الناس ديل .
مرت السنوات وتعرفت على بنات في كلية التمريض العالي وثقن في تعرفي لما نسأل عن بنت غايبة يقولوا ليك اليوم الدور عليها وعليك أن تفسر الباقي انت لانهن محتاجات لكتب ولملابس ولاكل ولشرب ومتطلبات النبت كثيرة واللبيب بالاشارة يفهم .
اما حديثك عن الجامعات ودورها احب اقول ليك حاجة انظر لاعمار من يدخلون الجامعة الان تلاقيهم شفع اقرب للطفولة منهم للنضج بالتالي الحياة بتكون فيها انبهار جديد والجديد شديد كل يوم بنت جاية لابسه شكل وتسريحة شكل وخلط شكل وشاي في عصير في بوش للفطور في لقاء خارج اسوار الجامعة في لقاء بعد العصر يتطور للقاء بعد المغرب لمبيت مع صاحبتها بحجة الامتحان وعوووووووووووووووووك الحق جنى الحرام مجدوع والداية سقطته منها وابن ياتي البيت وجه يلعن قفاه وأخلاقه زي الزفت في تعامله مع ناس البيت .
وهي طالبة بتدرس في الجامعة او أي معهد او كلية بتجئ داخلة البيت شايله ليهم فاكهة و"نحن راجعين في المغيرب للديار" على قول الاغنية ولا رب الاسرة ولا ربة الدار بسألوها من اين لكي هذا بس يأكلوا ويضحكوا ، بعدين في فراغ دراسي كبير يعني حتى الجامعات ذاتها في اليوم التحصيلي بتاعها مافي زحمة بتاعت دراسة والمنضبط من الاولاد والبنات بيتمني متين المحاضرة تنتهي عشان يطلعوا بره ويمارسوا هواية الجكس اما البقية الباقية دي بتكون حايمة بالكافتريات والحدائق من صباح الرحمن الواحده ما بتسأل أهلها حق المواصلات ولا حق كتب بالتالي الاسرة طالما هي في مأمن من طلبات البنت بتسد دي بطينة ودي بعجينة على قول المثل .
تعرف الامر لازم يكون منفصل تماما حتى لو يقلصوا عدد الجامعات بس لازم كل جنس يكون لحاله وتعرف لو الخطوة دي تمت بنضبط الحال بعض الشي ولا أقول كليا ولكن شئ من لا شئ، من فترة كتب اسحق احمد فضل الله مقال وأظني عملت ليه كوبي في بعض المقالات بخصوص موضوع البنات والاولاد والكثرة وكان من رايه انه الدولة تربط العمل الوظيفي بالزواج وكذلك يجبوا مأذون لكل جامعة ويعقدوا على من بالداخل مع بعض بغض النظر عن هو شنو ولا جنسه شنو حتى نحد من ظاهرة حا تتفشي وهي ظاهرة ابناء الحرام "الزواج العرفي " وطبعا عادي البنت تحمل وتمشي ليها لاي داية او دكتور يعمل ليها اجهاض وكل بثمنه والحال ده بينطبق على المتعلمة وربة المنزل .
يعني أنا بشوف كل أسره وقبيلة يحصورا عدد البنات والاولاد داخل الاسرة ويقوموا بتزويجهم بالفاتحة فقط من غير أي تكلفة سوى المهر فقط حتى نضمن سلامة مجتمع معافى سليم وننقذ ما يمكن انقاذه ، طبعا الغرب نحن بنقول عليه هو الذي يدمرنا ولكن ربنا جعل لينا عقول وكل شخص بيعرف البصلحه من البضره بالتالي ما نعمل الغير شماعة انا بشوف انه الناس تطبق الدين كما امرنا بيه ومافي أي حل خلاف كده مهما كانت المبررات . بالمناسبة كما الاولاد بيعلقوا على البنات كمان البنات بتعلق على الاولاد وبيحكوا لبعض الليالي الحمراء مع الاولاد مما يزيدوا رغبة بنت ممتنعة بعض الشي ولكن تمشي لتثبت للجميع أنها أنثي ومرغوب فيها .
اخي تحدثت عن دور ولي الامر في الموضوع بالمناسبة انا بقول ليك لو ولي الامر اصدر أي امر فيه مساس بالحريات التي تصن آذاننا لها حا يقولوا ليك الحكومة دي عملت وسوت والحكومة دي ما عاوزينها وديل جبهجية بالتالي لازم كل زول يشيل شيلته براه من غير ما نرمي احمالنا على الحكومة او خلافه يعني ايه الذي يجنيه الولد والبنت من لذة تستمر 10 دقائق سوى الدمار الخلقى والاخلاقي . تتحدث عن الخريجين واس البلاء طالع من الجامعات بكل الوانها الطيفية . بالعكس السودان بلد حر ما في كبد ولا يحزنون يعني البنت بتطلع متى ما هي عاوزه وبتدخل متي ما هي عاوزه من غير رقيب أو خلافه يعني ما خده راحتها على الكامل من غير نقيصة .
في النهاية كما قال الاخوان في ردودهم لابد من العودة للجذور والجذور هنا هي التمسك بتعاليم الدين الحنيف من غير ما نمسك العصا من نصها ونقول ده عاوزين وده لا وعشان ننجو لازم نمسك بالجمر الذي هو في حديث الرسول الكريم (ص) " القابض على دينه كالقابض على الجمر" فهل سنستطيع أن نمسك الجمر بين ايدينا ونترك ما نظنه مبهجة الدنيا .
| التوقيع |
|
وأوصي عيوني تحكيلك .. عسى تقدر توفيلك ..
ريدة زول صبح عايش ..
مناهو وحلمو بي إنتي ما غيرك ..
مناهو تقدري وتوعي لنظراتو .. وتصاويرو .. وتعابيرو ..
مناهو تكوني في ليلو .. نجم ساطع يضويلو .. emran_38@hotmai.com |
|
الخرطوم عاصمة (( الدعارة )) 2005 ..!!!
مشاكس100%
