|
اعتقال طائر النورس
وانا بمكتبى حوالى الساعة الواحدة ظهرا رن جوالى الاريكسون القدييييييييييييم و اتانى صوت احد العسكريين وعرفت ذلك من لهجته الصارمة انت البلبل قلت نعم قال لى تعال سريع فى القسم الاوسط عاوزنك فى قضية مهمة جدا جدا وموكلك طائر النورس للترافع عنو ، قلت ليهو طيب انا بتغدى ، قالى لا لا الناس فى المحكمة لانو الاوراق جاء توجيه من فوق انو نحولها لى محكمة خاصة تم تشكيلها فورا.
كنت على جناح السرعة داخلا لمحكمة القسم الاوسط وانا ادخل لا ول مرة واترافع عن شخص ولا اعلم ما هى الوقائع والادلة ولكن يبدو انها كلها فبركة سريعة فبالتالى لازم انا اتفبرك وافبرك عشان نفبركها كلها .
المهم دخلت المحكمة ووجدت طائر النورس فى قفص الاتهام ويداه مكبلة بالكلبش وحارسنو عساكر حوالى 3 ومسلحين ،
المهم دار بينى وبينه الحوار التالى :
طائر النورس فى شنو خير
البلبل : والله انا زاتى ما عارف جاتنى عربية مظللة فيها اريل طويل كده قالو لى اركب وجابونى هنا وعرضونى للضابط ووكيل النيابة واتهمونى بانى بفسد عقول الشباب وبدعو للتحرر وووووووو والراسمالية .
ناديت المتحرى : بالله يا جنابو الاتهام تحت المادة كم :
يا استاذ الاتهام تحت المادة 12/أ من قانون الزوق والانضباط العام ، والادلة ثابته ومدان مدان ولكن انا ممكن اطلعو بس ............ بس شنو يا زول وانا جاى ارقص .
طيب يا طائر النورس الشاكى منو .
طائر النورس : والله واحد قال اسمو مرشد ومعاهو فى الادعاء عن الحق العام رئيس النيابه مولانا داك . وقالو لى انت نشرت حاجات للراى العام فى منتدى اسمو عشاق السودان وصور وافلام ووووووووووو ونحن جبنا الحاجات دى فى سى دى معانا وطبعناها .
اها كان كده ما تشيل هم يا طائر النورس لانو انا كل المواضيع حقتك حافظة عن ظهر قلب اطمئن .
نظرت لمرشد يفق امام المحكمة متحديا ولم اتبين ملامحه شفتو طشاش طشاش وما حبيت انشغل بيهو كثير وسرحت وافقت على صوت الحاجب الجهورى محكمممممممممممممممممممممممممممممممممممة .
قبل الدخول فى اجراءات المحاكمة قدمت طلب بفك الكلباش عن يدى طائر النورس لانه كاتب مجيد والايادى دى هى راس مالو والناس بتنتظر منها كتير المهم نفخت بكثير من الكلام اياهو ووافق القاضى وقال امر : يفك الكلباش فورا .
بدا المتحرى بتلاوه يومية التحرى : انه فى يوم 4/3/2005 الساعه 12 ابلغنا مواطن سودانى غيور اسمو مرشد واشار اليه ، ده الواقف قدام المحكمة الموقرة وقال فى ملخص بلاغه : انو هو انسان ملتزم ومداوم على الانترنت كل يوم وعضو فعال فى منتدى عشاق السودان وكل الناس بتحبوا ، وانو من المعجبين بكتابات طائر النورس المتهم ولكن شاف انو طائر النورس بقصد حاجات خفية من مواضيعو وعاوز يفسد الزوق العام والشباب المسلم العربى ، وقد شهود ومستندات تدين المتهم تحت المادة 12/أ من القانون المذكور سابقا ، وانا من خلال التحريات القمت بيها من دخول على الموقع وطبعا عملت هكرز يا مولانا لانى ماخذ دورة فى الهكرز فى المرخيات وقدرت اضبط طائر النورس قاعد جوه الموقع ويكتب فى المنشورات دى اللى عاوزة تقلب ناظام الحكم .
القاضى ساخرا : يا عسكرى الزول ده عاوز يقلب النظام وله يفسد الزوق العام ؟
المتحرى وهو يتكبكب الاتنين يا سعادتك .
القاضى ينظر لى من تحت نظارته الحادة والسميكة ، اتفضل يا استاذ بلبل ممكن تسال المتحرى .
وقفت وشكرت المحكمة وقلت للمتحرى ، انت عملت دورة فى الهكرز وين ؟ قالى فى المرخيات قلت ليهو طيب عرفت شنو فيها ، قالى عرفت كيف تداهم وتتقرصن على الناس فى سوق الناقة . تمام تمام
طيب انت قريت مواضيع المتهم كلها وحللتها ، قالى انا شفت عرسو ترقص واعتبرتو شئ فاضح ومخل بالزوق العام .
قلت ليهو طيب انت البخليك تتفرج على رقصة العروس كلها شنو ؟ وانت مش عارف من العنوان انو رقيص عروس دخلت ليه؟؟؟؟ المتحرى يتلعثم والله والله انا بس قلت اتاكد هل فعلا عروس ورق وله عروس مولد وله بالجد .
طيب انت قريت للمتهم مواضيع تانية كثيرة اثرى بيها الزوق العام وسكب فيها عرق وجهد وابداع .
قالى لا انا زى الكلام بتاع الاهالى والملكية ده ما بنفع معاى نحن ناس درش ساى وانا بكره يا استاذ ثلاثة حاجات فى الدنيا الملكية والزباله .
القاضى غاضبا امنع الكلام يا عسكرى سكت حسك لمن يرقدوك مستشفى .
قلت للقاضى شكرا سعادتك على الفرصة وجلست ، وقبلها التفت لطائر النورس وجدت الهدوء النائم على محياه قد ازداد اكثر واكثر .
قام الشاكى مرشد وحلف اليمين وادلى ببياناته :
مرشد راشد رشاد ، العمر 17 سنة ، ثانية ثانوى ، ساكن الصافية ، مسلم
وبدا فى الحديث وقال ( انا طبعا من محبى النت وكل شئ مفيد للناس فى دنياهم واخرتهم ودايما بركز على المواضيع الدينية المتزمتة لانو فكر القاعدة هو الصح ، ومرات مرات بخش المنتديات اشوف الشعر والادب والقصص وكده المهم اليوم دخلت منتدى عشاق السودان قريت مواضيع طائر النورس كلها ولفت نظرى موضوع رقيص عروس ، انا طبعا قلت يمكن موضوع مفيد، المهم فتحت الوصلة شفت الرقصة كلها ولكن جانى صديقى الرشيد وزعل منى وقالى ليه تتفرج على بنات فى الانترنت وانا قلت ليهو بس عاوز اتاكد من الموضوع كلو عشان من مكانى ده بمشى القسم افتح بلاغ . الرشيد قالى انا حكلم امير الجماعه ونحاكمك تنظيميا لانك حدت عن النهج المرسوم من شخينا الكبير ...
الرشيد صديقى هو الشاهد بتاعى وهسى موجود خارج المحكمة . وانا حقيقة يا مولانا بشوف انو موضوع المتهم ده فيه افساد للناس والشباب بالذات ويجب اعدامو عشان يكون عظة وعبره وعشان نحن بلد نظيفة ما فيها اى حاجة غلط وزى الحاجات البتظهر دى لازم نحن نلحقها من بدرى بدرى عشان نكون دولة الطليعه والمقدمة فى الحركات الاسلامية الحديثة المعاصرة . وتانى مافى كلام ودى اقوالى .
القاضى مرة اخرى بنظارته التى بدات تعكس ضوء الشمس على الحاضرين اتفضل استاذ بلبل ، شكرا مولانا .
عاينت لمرشد مسافة كده وابتسمت ابتسامة فيفيدية وحسيت انو عصب شوية وقتل ليهو يا راشد انت حلفت اليمين صح ،
قالى لا غلط ، هنا انتهره القاضى يا زول رد على قدر السؤال انت مستهبل وله شنو ، هذه اللحظة التى احبها اضطرب وهنا قررت الاسراع حتى يكون فى مرحلة نفسية مهيئة لقول الصدق .
انت بتعرف طائر النورس المتهم ؟ رد على لا ولا شفتو الا اليوم
انت عمرك 17 سنه ، اى صح
طيب البوديك النت كتير شنو ؟
والله بس بفرق وبحاول اعرف حاجات جديدة .
انت دخلت الموقع موضوع البلاغ لحالك ولة فى زول عمل ليك دعوة ؟
واحد عملى دعوة وانا ناقشتو وهو زعل منى وقالى انا ندمان انى اديتك عنوان الموقع .
ليه قال ليك كده ؟
لانو انا قلت ليهو فى مواضيع كتيرة ما عاجبانى ولازم يشيلوها لانها حرام .
طيب انت خشيت على موضوع رقيص عروس صح ؟
اى قلت اشوف هل فعلا عروس حقيقة ولة خدعة .
طيب بعد خشيت على الموضوع لقيته شنو ؟
لقيته عروس بترقص
براها وله معاها زول ؟
معاها بنات .
كم بنت ؟
3 بنات
لابسين شنو ؟
واحدة بمبى وواحدة قرمصيص وواحدة كحلى .
سودانيات ؟
اى ظاهر انهم سودانيات
رقصو كتير ؟
يعنى ما كملو الرقصة كلها
طيب ليه ما قفلتو بعد عرفت انو رقيص عروس ؟؟؟؟؟؟؟؟؟؟
انا انا انا عاوز موية يا مولانا
القاضى ممنوع الشرب فى المحكمة جاوب يا زول خلصنا ورانا شغل تانى
والله الحقيقة يعنى انا قلت دى اول مرة اشوف رقيص عروس فى حياتى وقلت بس افرق شوية .
انت عارف انو رقيص العروس ده من التراث السودانى ، وفى مهرجانات السودان بشارك فيها بالفقرات دى
اى عارف كده .
شكرا مولاى وانا اقدم طلب نيابه عن المتهم بشطب البلاغ لعدم كفاية الادلة وعدم وجود اساس للدعوى ، كما لدى مستندات اقدمها للمحكمة ان طلبت التعرف على سجل المتهم العامى وكتباباته واثراءة للساحة الفنية . وطلب اخر بفتح بلاغ ارهاب للشاكى لانه من مؤيدى التشدد ويبدو انه عضو فى حركة ارهابية ..
اخذ القاضى الاوراق وقلبها وقرا كل مواضيع طائر النورس وتركنا فى الانتظار لمده ثلاث ساعات وبعدها اصلح نظارته وقال لطائر النورس انت برئ من الاتهام الموجه اليك وليك الحق ترفع دعوى اساءة سمعه وتطلب تعويض من الشاكى وكمان انت كاتب كبير وانا قريت ليك كتير . وبخصوص طلب المحامى نقرر ان يفتح بلاغ حق عام بتهمة الارهاب فى حق الشاكى مرشد راشد رشاد
محكممممممممممممممممممممة رفعت الجلسة .
خرجنا انا وطائر النورس ووجدنا حاج متولى وعابر سبيل وست الكسرة وحافية القدمين وفيفيد ومجموعة فى انتظارنا خارج قاعه المحكمة ، وحلف طائر النورس طلاق قال لازم نمش سوق الناقة نتغدى لانو البلبل ده شكلو ميت من الجوع والعطش ، وبعد كده نمش لى دار المنتدى نقعد نتونس ونناقش القصة دى .
وانطلقنا نحو سوق الناقة وكانت وراءنا سيرة عربات تحمل علم السودان وتهتف ::
طائر النورس رجع يا ليله * زى الهلال الظهر يا ليله
قلت لست الكسرة ابشرى فقالت ايوووووووووووووووووووووى يو يويو يو .
| التوقيع |
|
|
|
مشاركة: اعتقال طائر النورس
العرض العادي
