|
وشاح حب لصبية اسمها النيل
( وشاح حب لصبية اسمها النيل )
بادلتنى الاحساس يا زول رقيق حساس
صدقنى فرحان بيك وبحجى بيك الناس
اركب مراكب الشوق * عند الاصيل واجيك * وارسم نعاس عينيك
وطلاوة من خديك * ريشات حمام طائر * عصفور صباح باكر كل الصور حلوة
لوحات من الخاطر * وتشهق قوافى الربد وما يصيبة تانى نعـــــــــــــــــــــاس
********
موسم عديلة وزين * وطير المحنة حزين
بترجى فينى سنين اركب جناحو جنين
طيبت من خاطرو انك عليهو امين
فى طرفها المسحور حتلاقى شوقى دفين
نبراته فى صوتى * ولحن الاماسى حزين
جسدين وبينهم روح * زى ذكرى ليها سنين
قلب الطيور مجروح * وقلب الغريب مسكين
يهديكى منى زهور * ينضح وشاحى عطور
وعقد القوافـــــــــــــــــــــــى المــــــــــــــــــــــــــاس
بادلتنى الاحساس رغم المسافه مكان * رغم البعاد حكام ومرارة التحنان
صاحى وبشوف احلام * زولاً عيونو غمام
فيك الشعور فياض ومعانى كل انسان
يوم دمعت الاوتار * عبقر تسيبه الجان
و يبقى الفكر محتار * من وسوسة شيطان
الا الامل موجود * اسبوع بقى المولود * بيصحى فينى حنان
الهمنى بى الكلمات نور فى الظلام نبراس
نبض الرسائل صوت * نبض الموسيقى النوت * وجميلة منك موت
بتقولى لى بدلال * انطقت لى سكوت
غيرت فى النظرة * شعر الحقيقة بيوت
لى الشرف حلوة * رحبتى بيهو هواى
وتقولى من قلبك * قلبك صبح جواى
دايماً غنى الاوتار بيشيلو موج النيل * يسكن مسام عشاق ويرقص الازهار ويرجع الاطيار
يدخل بلا استئذان بس عارف العنوان * عصفورة فى السودان * ابسط وصف انسان
مليانة شوق وحمـــــــــــــــــــــــــــــــــــــــــــــــ اس
الغربة ليلة يطول * وصبح المحنة قليل
جواها عشنا فصول * ووطن الاحبة حليل
خطواتى طول اليوم * توصل مرافئ النيل
وارجع كسير مهزوم * عشقت خيولى صهيل
وخطاها ما برحت * الميس تخاف السيل
صيحت فى الغربة * والدنيا كانت ليل
سمعونى فى السودان * بطعن فى ضل الفيل
ناحت قمارى العش * عقرت تمور الشيل
فاحت حروف الغش * والصدق قال الويل
رجعت خطاى وراى * وعشم الخطاوى الميل
شلت قوافى غناى * وعشم الحكاوى النيل (2)
وكل الزرعتو زمان قطعوهو اكلو الفـــــــــــــــــــــــــــــاس
وكل الكتبتو حنان حرقوهو فى الكـــــــــــــــــــــــــــراس
لكن مع الالفة * طعم الليالى جروف
ممزوجة بى الذكرى * ونسيمها جوه الجوف
اصبحتى لى الزاد * وطعم الشجون معروف
وهزمت بيك الغول * علمنا معنى الخوف
حسيت بانو الشوق * معناهو اصبح شوف
شوفتك بقت افراح * دقت عشانه دفوف
يا .... لقياكى * صبحت قريبه الشوف
فى اللحظة ديك بالجد بتْعتق الاحســـــــــــــاس
يوم اوصل السودان * يوم احضن الاوطان
والقاك بيك الناس * * يا زول رقيق حساس * يا زول لذيذ وناس
نتبادل الاحساس وأزفر مرارة الظلم * واشهق هواك انفـــــــــــــــــــــاس
جدة / 19/2/2005م
|
العرض العادي
