حفلة (( زار ))... بى دستوركم يااولاد ماما ... !!

**طائر النورس** · 18-02-2005, 17:56

احبتى ان هناك بعض الممارسات او العادات التى توارثناها جيل بعد جيل وفى كل حقبة تاريخية يختلف شكل الممارسة طبقاً لاختلاف اوجه التقدم الحضارى والاقتصادى الذى يشهده العالم اجمع .
ان مااريد الحديث عنه اليوم هو عادة ( دق الزار ) والتى تتفشى وتنتشر فى بعض الدول العربية وبالاكثر فى مصر والسودان اى يكون الاعتقاد بها عند الاكثرية من هذين البلدين وعندنا فى السودان اصبحت حفلات ( الزار ) يصرف عليها ببزخ فاحش وتستمر لعدة ايام ... والنسبة الاكبر من الذين يؤمنون ( بالزار ) من النساء وذلك لاعتقادهن انه يخرج منهن الارواح الشريرة التى تتقمص اجسادهن وتصيبهن بالاعياء والفتور وبأنه يفيد في علاج مرض الهستريا ذلك المرض المرتبط بالسلوك الاندفاعي والانفعالات الحادة والهذيان ... وترووى كتب التاريخ ايام الفراعنة ان روحا خبيثة حلت بجسد الاميرة (بختن) وأن محاولات جرت لاخراج الروح الشريرة من جسد الاميرة لكن الروح الشريرة لم تخرج مما جعل (الاله خنسو) أحد آلهة ثالوث طيبة المقدس يذهب إلى جسد الاميرة الاسيرة لطرد الروح الخبيثة منها باستخدام السحر وخرجت الروح الشريرة بعد أن لبى الاله خنسو مطلبها بإقامة حفل صاخب لها وتقديم الهدايا والقرابين بين يديها... و ( للزار ) طقوس غريبة تميل الى الحرمة فى بعض الاحيان كشرب الدم وئشرب المسكرات واكل اللحم النى ، ودائماً الشخصية التى تقيم طقوس حفل الزار ويكون ( شيخ الزار ) او ( شيخة الزار ) ويكون هو او هى القائد للاوركسترا ان صح التعبير ويقوم ( بفتح العلبة ) وتنفيذ اوامر ( السيادة ) بأن يغنى لكل نوع من انواع ( الجن ) على حده وفى عالم ( الزار ) هم كثر منهم على سبيل المثال لا الحصر ( الحبشى ) و ( لولية ) و ( بشير ) و ( شاكر حلال المشاكل ) ... فترتدى المرأة ثياب فى هيئته وبتبدأ بالرقص ( الهستيرى ) او تكون قد ( اتدسترت ) وتبدأ بتنفيذ طلباته ( كما تعتقد ) بأن تشرب الخمرة او الدم او ان تخلع ملابسها وغير ذلك ... طبعاً هى بتفعل كل هذه الاشياء ( عن غير وعى ) الى ان تسقط مغشياً عليها ... عندها يسود الاعتقاد بأنه قد خرج ( الجان ) من جسدها نهائياً ... طبعاً بكون حواليها مجموعة كبيرة من النسوة منهن من ( ينزل ) معها فى حلقة ( الزار ) ... ومنهن من ينتظر دوره فى ( النزول ) ...

احبتى بالرغم من اننا كشباب واعى ومثقف ومتعلم بنعتقد ان دى خرافات وطلاميس واوهام ... الا ان الاطباء النفسيين بعض مرات بيوصوا بها ..!! وتصديق شرطة ( امن المجتمع ) لحفل الزار بكون مرفق معاه تصديق الطبيب المختص لقيام حفل ( الزار ) هذا ..!!

طيب اذا كان حاجة الدكاترة بيوصوا بيها كيف تكون خرافات لا اساس لها من الصحة نهائياً ؟؟
الحاجة التانية لو كان فعلاً ( الزار ) يؤدى الى علاج المريضة التى ( تدقه ) ولو عن طريق الايحاء النفسى هل فى هذه الحالة يكون مقبولاً ومافيه حاجة ؟؟
واللا الموضوع من اساسو ( حرام ) وغلط × غلط وكلام فاضى ؟؟

واللا انتوا رايكم شنو ؟؟

دمتم احبتى

مشمشه · 20-02-2005, 07:32

الرائع نورس

إنت بتنكت المواضيع دي
وبتعرف الحاجات دي من وين؟؟؟

انا غايتو مابعرف كتير عن الزار
لكن من كلام الناس عنه
بسمع بقولو إنو حرام وكلام فارغ زي ما انت قلت

اقتباس:

طيب اذا كان حاجة الدكاترة بيوصوا بيها كيف تكون خرافات لا اساس لها من الصحة نهائياً ؟؟

إجابه
انا من كلامك ومن السمعته عن الزار
بفتكر إن الدكاتره ديل بياخده النسوان علي قد عقولهم
يعني تجيه مره كويسه ما عندها حاجه
تهيأت بس
إذا قال ليها إنت ميه ميه مافيك حاجه
حتقول ليه كيف وما كيف
انا بحصل لي كده وبجيني كده وكده
وحتقول عليه دكتور بليد
عشان كده الدكتور حياخدها علي قد عقلها ويقول ليها
انتي علاجك زار
هي بقي خلاص حتخت في بالها كلامه وتقتنع إنه
هي لما تعملل الزار حتبقي كويسه
وبعد الزار
تفكيرها بختلف
بتكون متأكده إنها بقت كويسه
لانها عملت القال عليه الدكتور
والعملو او العملتو ليها بيكون اقنعها إنها بقت كويسه
وبالتالي كل الاوهام اللي في بالها بتروح
وبكده بكون الزار هو الداواها
سبحان الله ... الفهم قسم

اخي الغالي
انا إجابتي علي السؤال
نتيجه إستنتاج للإنت كاتبو
زي ما قلت انا مابعرف كثير عن الزار
عشان كده ما حاقدر اجاوب علي السؤالين الباقين
حتكون فلسفه مني ساي

بالمناسبه
دكاتره شنو ديل البكتبو رشته زار

لك التحايا يارائع

**طائر النورس** · 20-02-2005, 14:23

العزيزة مشمشة شكراً على المرور والردود
اولاً عن سؤالك لى الاول فى انى بنكت المواضيع دى من وين فالمواضيع دى بنكون شايفنها فى حياتنا اليومية وكل واحد فينا بكون عنده رأى مختلف او رؤية مختلفة لها وانا بحاول ان اطرح رؤيتى لها من منظور عام حتى نشوف اراء الاخوان والاخوات فيها لكى تعم الفائدة للجميع بمشاركة الكل بارائهم ....
وبالرغم من عدم معرفتك للزار كثيراً الا ان الحديث الطرحتيه كان قيم جداً وتحليلاتك كانت منطقية وسليمة وعدم اجابتك على باقى الاسئلة احترمته فيك جداً لان من قال لا اعرف فقد افتى ..
وانا كذلك اضم صوتى اليك وبأعلى من صوتك اقول

دكاتره شنو ديل البكتبو رشته زار ؟؟!!

باقى الاخوان رايكم شنو ؟

ود لطفى · 22-02-2005, 00:56

والله موضوعك مهم جدا يا نورس يا رائع

تحياتى لك وللاخت مشمشة

انا الموضوع ده بالذات بتاع الزار ده عامل لى قلق من زمان

لانى تربيت فى قرية صغيرة وملئية بتلك اشياء واشياء اخرى

ان هذا الداء الذى يصيب النساء فقط

داء وهمى وطبعا المرة هى البتحددوا

كيف؟؟

يعنى الست البتقول ليك انا عندى زار او عندى دستو رعلى حسب تحليلى انا

دى بتكون انسانة سطحية جدا وجاهلة وناقصة توعية

فحبوباتنا زمان كنت بسالهن من الاشياء دى فمنهن من مدرك انه ده شى دجل ساكت والنسوان عايزات حاجة افرقن بيها وبس

وفى واحدات بشربن كحول كمان لانها دى فرصة وهى بعيدة من بيتها وزوجها تعمل اى حاجة بحجة الجماعة طالبين ويسكى مثلا

وما تنسى يا نورس انهم انواع طبعا حسب الشكل واللون ريح احمر واصفر واخضر ومش عارف ايه

وما اطول عليكم ومشكورين على طرح الموضوع

وعافا نساءنا الله من هذا الداء العضال

ود لطفـــــــــــــــــــــى

البلبل المغترب · 24-02-2005, 13:47

اذكر انه فى بلدتنا كان هناك شيخ يقال له التوم ود اللسان كان يدق الزار للنساء وانا المح شئ من معانى الحياة سمحو لى بالدخول فوجدت نساء الحى مثل حنانا بلو بلو كشف حال ورقيص وحركات جنونية وفى واحدة قمة الاناقه تضع سفه كبيرة مثل عم حامد الذى يجلس امام طاحونته القديمة ، رقص بعنف ومزيج من حمحمة الهاشمية وكلام غير مفهوم المهم اختلط الحابل بالنابل والذى حفظته عن ظهر قلب من ذلك الشيخ الذى كان (يدق الدلوكه) دق دن دق ددق دن دق بحركة جعلتنى اضع امامه الف علامة استفهام لانه كان يضعها فى حجره ووسط النساء ويحرك يده اليسرى بليونه وتكسر وكان يغنى بخلاعه : وليد دارفور طلع جبلو * الملك مسرور يروح لاهلو .
جاءت احدى النساء التى تتصف بالطيبة وارغمتنا على الهرب وحقيقة احسست ان هناك جن قد استقر فى داخل اولئك النسوه .
قصصت ذلك لوالدى بكل براءة وهو من اجيل الازهر فاستمع لى وانا مسترسل كمتهم أبله لا يدرى ان الاعتراف سيد الادلة ، لم اشعر الا وكلمتى قد انقطعت نصفين بسوط من الحنه نام على جسدى النحيف فاطلقت عقيرتى بالبكاء وكنت اجيد الجرى فعدوت مثل خليفه عمر ومن يومها كرهت الزار ومن يؤمن به ، بعد ان افهمنى والدى ما به وعليه .
المهم جالت بخاطى هذه الاقصوصة وانا اتمعن فى كلمات عزيزى طائر النورس الذى يحلق كل يوم فى سماء الخرطوم وياتينا بما جد فى الدنيا وما كان ، واقول لك اخى ان الزار محرم شرعا وهذا ثابت بكلام الله عز وجل والحديث وواجتهادات العلماء .
قال تعالى (( ولكن الشياطين كفرو يعلمون الناس السحر) (( انما الخمر والميسر والانصاب والازلام رجس من عمل الشيطان فاجتنبوه ) وفى التفسير انها سهام مكتوب عليها خير وشر اى بمثابة الطلاسم التى يستعملها الفقراء او ناس الزار ،، (( حرمت عليكم الميتة والدم ولحم الخنزير)) فيتضح ان الزار تدخل فيه محرمات ثابته دعك من التاجيديا التى تحدث فيه ، فشرب الخمر ومسالة الكتابة والطلاسم والورق وشرب الدماء كلها محرمة بنص القران . والمعروف ان الجان يجد مرتعه فى البشر فى حالة الكفر لان من يملك الجان لا بد وان يكفر وياتى باوامر من الجان يمليها عليه ، مثل ترك الصلاة ووووووووو ومضرة الناس وعمل السحر وووووووو .
الزار اخوتى هو فعل من افعال الجان لان شيخ الزار يكون له (خدام) من الشياطين يساعدونه فى عمل ذلك فيصرع من يصرع ويغرى من يغرى وحقيقة ان عبدة الشيطان هم تطور حقيقى لمحبى الزار ومصدقيه وان قراتم عنهم سترون انها نفس التفاصيل ونفس الخطاوت التى يقوم بها عبدة الشيطان .
قصة خروج الجان من جسد الانسان هذه حقيقة لان الشيطان يتلبس الادمى ويمسه عن طريق السحر او العين ( من شر النفاثات فى العقد ومن شر حاسد اذا حسد)) وهذه علاجها بالقرءان لان القراءان دواء من كل داء ومعروف طريقة اتسخراج الجان من جسد الانسان بالايات والرقيه الشرعية ، لكن هناك من السحرة من يستطيعا اخراجه بشرط ان يكون مالكا لشيطان اكبر من الذى تلبس الممسوس وانا حضرت جلسات علاج بالقراءان وحقيقة فيها الكثير من الاشياء التى لا يصدقها الكثير بالذات المثقفين ، ولكن ترى الانسان يتغير صوته ولهجته وكل شئ فيه وهذا موضوع اخر .
واقعه الطبيب الذى يوجه النساء الى الزار صدقنى ان هذا لا يستحق شرف المهنة ولا الشهادة التى علقها كبرا على جدار منزله مثلما قال الفيتورى : يجر عباءته كبرا فى الجبانه ويمشى بين الناس ،،،،،،،،،،،،، كيف تدفع انسان ملسم ليكفر او ياتى باعمال كفر وتتحمل وزره حتى وان كان فيها علاجه ، وحقيقة واقعه الجو النفسى الذى تعيشه المراة فى الزار كان بامكان الطبيب ان يعيشها فيه باى اسلوب اخر وهذا من فنه وابداعه والطب ابداع فى النهاية ، وكيف تسمح الدولة وهى تتحدث عن الشريعه بتصريح جلسات زار هل لها مرجعية شرعية فى ذلك ، ولكن من حلل زكاة المغتربين يحلل غيرها ؟؟؟؟؟؟
اخوى طائر النورس سالك نفسك النفسيات دى ليييييييييييييييييييييييه عند النساء بس برضو نحن الرجال بتجينا ليه ما يدقوا لينا زار مش ده برضو سؤال وموضوع تانى وله مرض حامد ده بجى للحريم بس لالالا لانو فى الاول جا لى حامد واتعالج وبعد كده البنيه قالت لى ابوها مرض زى حق حامد ، خلونا ندستر شوية نمرق الجن الحايم فوقنا ده تخيل شكلو لابس ليه عمة وشال وشايل ليهو (كوز ) وقاعد يدق فى الكوز يله يله نشد الحلة ههههههههههههههه .
انا فى رائ القصة بتعتمد على درجة الانفعال وادخال المراة فى الجو النفسى اخلاص بشيخ الزار او شيخة الزار ووووووو بعد كده ممارسة ساديتهم القزرة لانو لو لاحظت وعينك وقعت على حفلات الحنه البسووها للعروسة الايامات دى انا شفت بنات مثقفاااااااااااااااااااااااات وبعرفهم مدسترين فى الناص مع باقى الجكس وبصفقوا وكمان حافظين اغانى البنات ناس هاجر كباشى وكبشور الهنا ده والله سمعتو انا بحلف انو بت وصاحبى يلحف ولد نحلف ونحلف لمن قطعنا الاشارة وغرمونا 300 ريال (الله يخرب بيتك يا كبشور )) فزى ما قلت ليك تلقى الدسترة فى حفلة العروس وجانى واحد مغترب ** ولابس لبس الحرب * من القروش احلب احلب لقيتو ليك عدمان يا بنات قلبى خرررررررررررب وتجر ليك الراء زى صوت الموتر لمن يدور الصباح قبل التسخينه ههههههههه
المهم موضوعك لذيذ وجميل واتمنى انى اكون اوفيت واعذرونى انى شحطت فى شئ فهى من خطرفة زااااااااااااااااااااار الغربه لاننا مدسترين على طوللللللللللللللللللللللللللللل .

Sit_Elkisra · 25-02-2005, 01:00

السلام عليكم ,,,

ثقافة الزار لي يومنا ده منتشرة خالص ,,, فالسودان بلد مليان بالعرقيات و المعتقدين و الوثنيين و كل شيء ...
حتى في بعض الكرنفالات و الإحتفائيات المقرونة بالثقافة السودانية بنجد تجسيد للحاجات دي في مادة بإختلاف العرض
لكن لأسف بصلني شمار ساي ,,, لحدي هسع ما اتشوبرت في جنس ده ...!
ما غريبة الإعتقاد في الجن و السحر و الدساتير يا قولهم ... بس الغريب لجوء المثقفات و رؤوس أعلام المجتمع السودانيات في مثل هذه الأمور ,,, و تسليمهم انو النجاح جاي عشان اعمامكم ناس بسم الله راضين عنها ..!!!!!

حتى الموضة بتاعت العلماء الفلكيين في تحديد وقائع السنة و التنبوء بالمستقبل ... ناس بسم الله عندهم يد في الفيلم ده !!!
... اليوم سمعت قصة عن إمرأة قانونية ما بتمسك قضية الا تمشي لي شيخ فلان عشان يديها الطلاسم اياها ,,, رغم انها ما محتاجة منها غير عصرة مخ بس و تجيب القضية زي الترتيب

عجبني سردك للموضوع .. لك الشكر ... و خطرفة البلبل المغترب ,, الله يديكم العافية