هل تنتصر العاطفه ام العقل

nahid · 06-02-2005, 12:14

[size=[font=Arial]5]والله ياجماعه انا عندي حاجه عايزه اقوله ليكم وهي قصه حقيقه حصلت قبال كم يوم كده
لكن قبل ماحكي في حاجه عايزه اسألكم منها انتو اذا في اتنين بحبو بعض هل من المفروض يتحدو بحبهم كل الاعراف والتقاليد المتعارف عليها وبي الحصوص نحنا ناس مسلمين وسودانين بنتمسك بكل اعارفانا وتقاليدنا .
الحكايه ياشباب ودي قصه حقيقيه حصلت انو في بنت وولد حبو بعض شديد اهل البت ماكان عندهم مانع انها تتزوج الزول الحبته ده لكن الغريب في الموضوع انو اهل الولد كانو رافضين البت ومادايرنها بحجه انو ولدهم لسه خريج من الجامعه وماعمل شي في حياته وبقت القصه تحدي للبنت انها ل لازم تتزوج الولد ده بي اي طريقه وغصبا عن عين اهله والولد برضو كان عاوزه شديد وبحبه . المهمه خلاصه الموضوع انو البت اجبرت اخوانها انه يعقدو ليها والا اذا ماعقدو ليه ياحتتزوج الولد ده عرفي او تمشي بي المحكمه وحصل العقد اخوها عقد ليه واهلها واهل الولد ماكان عندهم اي خبر عن الموضوع ده المهم بعد مده طويه حكايه بتاعت سبعه شهور الموضوع اتعرف واهل الولد كان راكبين راسهم ومادايرين نهائي البت دي ولما عرفو بي قصه العقد دي زاد ركوب راسهم المهم اهل البت عشان يسترو بتهم من الفضيحه وكلام الناس عملو ليهم عرس صوري كده واهل الولد نهائي ماجاء واحد منهم لا امه ولا اخوانه ولا ابوه .
القصه دي ياشباب امكن تكون بتتكرر كل يوم في كثير من اسرنا السودانيه لكن السؤال ياخونا عايزه جد رائيكم فيه من غير تحيز لو البت او الولد عملو كده اكيد حيخسرو اهلهم بي الطريقه دي لكن السؤال هل لازم احنا نتحدي كل الاعراف والتقاليد عشان خاطر نكون مع الانسان الاخترناه شريك حياه وبي كده في احتمال كبير نخسر اهالينا ولا ندوس علي قلوبنا عشان نرضي اهلنا ولا رئيكم شنو وريني عشان انا جد الموضوع ده عامل لي هاسج ارجو مشاركتكم [/fon[/size]t]

بنت بحري · 06-02-2005, 13:19

اختي ناهد .. الموضوع دة خطييير..
اكبر غلط الواحد يبدا حياته غلط مهما كان متأكد انه دي سعادته..
ابدا ما بظن انه ممكن تكون حياتهم سعيدة الاتنين ديل ..
احنا بنات ما ممكن نتخلى عن اهالينا ابدا ولا كمان الاولاد حيقدروا..
الواحد لازم يكون عقلاني في تصرفاته .. التسرع في الحاجات دي غير مقبول تماما

..

البلبل المغترب · 06-02-2005, 14:08

اول حاجة كلامك اخت ناهد من ناحية الشرع ما فيهو حاجة غلط لانو ولى امر البنت موجود وهو اخيها حسب كلامك ، ثم ثانيا العريس طالما عاقل ومكلف وبالغ فيكفى ، وقصة انو اهل البنت عاوزين يستروها ؟؟ ليه هى ما عملت شئ غلط عشان يستروها تزوجت على سنة الله ورسوله والاشهار يكفى فيه معرفة الجيران حتى وخلاص فهل عدم حضور اهل العريس ينقص من الزواج فى شئ لا اعتقد ذلك .
قصة التقاليد والاعراف موجودة ويلتزم بها الناس فقط هناك ظروف تضطر الناس احيانا لفعل شئ حتى ينتصرو لحبهم والاهل فى النهاية برضخوا للواقع وبينى وبينك فى اسر بتجنى على اولادها مرات فى مواضيع الزواج بالذات ،ن عرسى فلان وعلى الطلاق تعرسيهو وانت عرس بت عمك وما تعرس دى وووووووووووووووووووو موال . وانتى طبعا شرحتى الظروف التى جعلتهم يعملو كده وربك يسهل

**طائر النورس** · 06-02-2005, 15:02

الاخت العزيزة mahid
اولاً شكراً ليك لطرحك هذا الموضوع ( الشائك ) والذى يحتمل النقاش فيه لتضافر عدة عوامل ولتداخلات كثيرة وتطرقات الى جوانب مختلفة منه ...
اولاً كل قصة من هذه القصص تختلف عن الاخرى من واقع ( السيناريو ) الحياتى بتاعها واختلاف البيئات واختلاف طبيعة الاشخاص ( ابطال القصة ) ... من ناحية عامة واذا حاولنا ان نخوض ونفند ماذكرتيه اولاً احب ان اقول ليك جملة مفهوم صغير مغلوط لديك وهو الجملة التى ذكرتيها وقلتى ( القصه دي ياشباب امكن تكون بتتكرر كل يوم في كثير من اسرنا السودانيه ) انتهى حديثك ... والله قصص زى دى ومع وجودها لكن مااظن انها بتتكرر لدرجة اكثر من مرة فى اليوم عندنا ..!! فهذا معدل عالى جداً فى مجتمعنا لفعل اشياء كهذه ..
اما من ناحية قصتك فأولاً اى اثنين بحبو بعض حب حقيقى ومرتبطين مع بعض ارتباط قوى ويجابهوا اعتراض من قبل الاهل على حبهم هذا ان يحاولا جاهدين اقناع اهليهيهما بارتباطهما ( اذا كان لديهم كل المتاح من الامكانيات المادية والبشرية والاجتماعية والعملية ) التى تحقق لهم هذا الزواج فكل اهل زوجة لابد لهم ان يطمئنوا على زوج ابنتهم من انه هو الشخص المناسب لابنتهم فهم الذين علموها وربوها الى ان وصلت الى تلك المرحلة فلابد ان يطمئنوا عليها انهم سلموها الى يد امينة تصونها وتحترمها ... فبعد مرات بتكون البنت مندفعة بعواطفها اكثر من ان تحكم عقلها فلذلك بتكون فى جوانب سالبة فى هذا الشخص لا تراها هى ...
اما من ناحية الشاب فلابد ان يضع فى الاعتبار رأى والدية ( اذا كان مقبولاً ومنطقياً ) فى الفتاة ويحاول جاهداً ان يجعلهم يقتنعا بها لان فى النهاية ديل حيكونوا اجداد اولادك وان لهم عليك حق فى طاعة اوامرهما .... ويمكن ان الشاب يركب راسو ويضعهما امام الامر الواقع لكن فى النهاية حيعيش مع الانسانة دى فى تعاسة طوال حياته ... وانا من هنا اناشد اى اسرة فتاة اذا اهل الشاب رافضين لها ان يرفضوا هم كمان لان الزواج ظاهره ارتباط بين اثنين لكن فى حقيقته ارتباط بين اسر ....
المهم ياستى الكلام كتييييير لكن لان المساحة لاتتسع وعشان اخلى فسحة لباقى الاخوان للرد الخص لهذا الموضوع ... ان اى ارتباط بين اثنين اذا كان بدون موافقة الاسر عليه فهو ارتباط محكوم عليه بالفشل منذ بدايته سواء على المستوى القريب او البعيد ...
اما موضوع الزواج العرفى هذا فدة موضوع تااااااااانى كمان وكبيييييييييييير وخطييييييييييير وداير ليه منتدى كامل قائم بزاته للحديث عنه ...
ارجو من جميع الفتيات والشباب ان لا يندفعا بعوطفهما ضاربين بأى شئ عرض الحائط لان فى النهاية ( حتتطربق على راسهم ) ( وحيكونا عنصر منبوذ من الاسرة والمجتمع عامة ) .......... فالرومانسيات ( والحبكانات ) ( والحنان ) ( والاحلام الوردية ) شئ والواقع المعاش شئ ثانى فأتمنى من الجميع ان يكونوا واقعييييين ....

مع حبى

الحاج متولى · 06-02-2005, 23:11

اختى ناهد
الموضوع الذى اثرتيه جد فى غاية الاهمية والخطورة
هذه حالة من حالات كثيرة
وحتى لا يتفرع الموضوع ونضيع بين اغصانه فانى ارى ان اهل الشاب قد ارتكبوا خطاء كبير فى حق ابنهم

nahid · 07-02-2005, 12:44

شكرا اخوتي علي ردكم لي بي النسبه لكلام اخوي نورس والله يانورس انا مرت بي اكتر من حاله بخصوص الموضوع ده وفي حاله بي التحديد بنت زمليتي في الجامعه اصرت شديد علي الولد الحبته اهلها كان رافضين ابوها عقد ليه وطردها من البيت تتخيل حاجه زي دي في نص الليل بي هدومها العليها احتمال الاسر بتضاري علي بناتها وبي اي سبيل لكن الظاهره حقيقي منتشره وخصوص بين طلبه الجامعه انا لكن جد والله انا بحتار في البنت او الولد البتحدي والدينه عشان خاطر بت او خاطر ولد تفتكر انو زول خسر رضي والدينا حيكسب شي اكيد لا حيخسر كتير اول شي رضي الوالد وتاني نهائي ماحيتوفق في حياتي من وجه نظري مفروض تكون الناس اكتر عقلانيه لكن برجع واقول انو الظاهره منتشره وممكن اجيب ليكم احصائيات في جامعات سودانيه زي الاحفاد والنيلين والاهليه انتشرت فيه ظاهره الظواج العرفي او الزواج بي المحكمه يعني زي ماقلت ليكم طرف السوط هبشنا وربنا يحفظنا ويحفظ كل المسلمين اما بي النسبه لا كلام اخوي البلبل المغترب فانا عايزه اقول انو من ناحيه شرع اكيد الزواج صحيح بس المشكله في الشكل الاجتماعي للبت زي ماقالو اهلنا السودانين مافي بت قبايل بتعمل كده ولا رائيكم شنو