كل شيء قسمة ونصيب

دمعات حزن جدا أليمة · 26-08-2008, 22:13

الحب الجميل سمعت عنه كتير
الحب الجميل قريت عنه كتير
لاقاني ناس كتار عاشوا الحب المستحيل
كانوا بيقولوا إن الحب دا شي مبالغ ورائع شديد
عشعش الفكره في الراس وقلت أعيش زي باقي الناس
خليت قيس هو قدوتي وروميو المعلم في دنيتي
قلت لازم أخلي الحب دا شي كل الناس عنه تتحاكى وتتناقله عبر الأزمان والعصور
صحيح قيس قصته كانت نهايته مأساويه
وروميو حصّل قيس في النهاية وكانت شبه الختام المحزنه
لكن أنا وبعون الرحمن ربي وربك راح أكون مع الحب خالد ولحدي النهاية
والنهاية راح تكون أجمل من البداية.. بل أفضل من مية قصة حب خرافية
بس المشكله مافي الحب وعمر الحب ما كان شيء بنقول عنه قضية
المشكله هي إني كيف ألقى الطرف التاني اللي حيربط إسمي مع إسمها في النهاية؟؟!!!
كيف ألقى إنسانه صادقه ووفية؟!
كيف ألقى إنسانه تضحي من غير أنانية؟!
كيف ألقى إنسانه تحبني أكتر من حبي ليها؟!
كيف ألقى إنسانه في دمها إخلاص ومشاعر حية؟!
قلت أحاول وأنا عارف إنه ممكن ما ألقاها
ممكن ما يكون ليها أثر في دنيتي أو ربنا لسه ما خلقه
ممكن تكون ماتت في الزمن الفات مع الناس الماتوا من زمان
كل شيء جايز وما بعيد أو شبه مستحيله
الحب حرفين لكن تكوي القلوب وتعذبه وتخلي حياتك جحيم
الحب حرفين لكن تحي القلوب وتنعشه وتخلي الحياة أجمل نعمه في الكون
أي الحب سلاح ذو حدين فيه النعيم وفيه العذاب
في ناس تقول كل شي يهون عشان الحب يعيش
وفي ناس تانيه تقول نعيش بإسم الحب عشان تحقق شي من رغبته
إحترت أنا زاتي أعيش دنيتي كيف بالحب ولا بالإسم فقط يا ربي؟؟؟؟
ما أنكر ولا أكذب إني عشت قصة حب فاتت وإنتهت
حب كان صادق وشريف وفي نفس الوقت كان فيه غدر وخيانه
ما تسألوني إلتقينا كيف وشنو هو الحكايه؟؟
كل الموضوع إن في قلبين قالوا نحن حنكمل بعض وحنواصل مع بعض
بس القدر كان كاتب غير الفي المراد وبعيد عما سطرناهو في الورق عشان نبني الحاضر والمستقبل بالفرح
نسيت إن الحبر في كم سطر ممكن يتمحي ويتمسح
كانت النهاية قاسية جدا وأليمة وكل زول قرر يمشي في طريق تاني بعيد جدا عن اللي كان في يوم هو طريق واحد بيجمعنا سوى
ما بقول هي خاينه.. وما بقول أنا خنتها
ما بقول هي باعت.. وما بقول أنا بعتها
ما بقول هي عني إتخلت.. وما بقول أنا عن رغبتي خليتها
ما بقول فيها أي كلمة ظلم باطله.. وما بخليها تعمل زيي وأهم شي راحته مهما قالت فيني أنا برضوا لسه بحبها
الشيء الوحيد اللي دايم بيجول في خاطري إن كل شي قسمه ونصيب وهي ما كانت من قسمتي
ربنا كتب لي كل زول مجرى حياته من قبل ما يتولد
نصيبي كده في اللوح المحفوظ أعيش دنيتي منها محروم
ما ممكن أكون عليها قاسي وأحمله ذنب وأعتب عليها في شي خارج عن إرادته
صدقوني أنا لسه بحبها بس حبي ليها ما زي زمان وهو حب أخوي.. دموي.. ديني.. كونها أخت ليا أنا برضوا بيها سعيد جدا وراضي ويكفيني منها لمن تشتكي وتفضفض ليا ودا براهو كافي إني لسه في قلبها
بعدك ما قلت الدنيا خلاص إنتهت
بعدك ما قلت الدنيا خلاص وقفت
بعدك ما قلت الحياة ما ممكن تستمر أو إنها تنعاش زي زمان وحسه
بعدك ما قلت الدنيا ما ردتها
بعدك ما قلت الدنيا ثوانيها من حياتي أبد ما محسوبه أو غير معدوده
هي الحياة أصلا كده يوم في النعيم وأيام كتير في الجحيم
يا بنيه ربنا يسعدك ويهنيك في دنيتك
يا بنيه ربنا يديك من خيره ويرزقك
وصدقيني يا بنيه نفس القطر الشالك وسافر بكره مصيره يجيب الجايه وراك
والفرحه الكانت معاك ممكن أعيشه تاني بي وراك
العالم دا عمرو ما بينتهي بي نهاية قصة حب مهما كانت
ما دام الروح في الجسد موجود فدا براهو كفايه وقناعه إن الدنيا لسه بخيره
أسمحي لي يا بنيه:: ما بقول بعدك أنا حموت ::
ما بقول بعدك أنا خلاص من دنيتي إنتهيت
وبكون بكذب عليك لو قلت ليك مستحيل أحب بعدك مهما كان
إنت مجرد زهره من زهرات بستان حياتي الكتار
الحب زي الموت لمن يخش القلب مافي زول بيقدر يمنعه أو يردعه
لكن صدقيني لو في يوم لقيت الحب الصادق راح أعيشه وأحب أكتر من زمان
أيوا نعم راح أعيش الحب دام إني نسيت الماضي ونسيتك إنت بالذات ومن حياتي طلعت بخروج نهائي بدون إياب
ما تفتكري إن حبي ليك ممكن يتحول لي شي تاني بقينا نسميه في زماني :: حقد / كره / بغض ::
مهما كان سبب بعادك يكفيني إني عشت أيام من عمري كنت فيه حبيبك
كنت فيه منك.. جدا قريب
كنت فيه منك.. روحين في جسد
كنت فيه منك.. أغلى من نفسك
يكفيني إن في يوم من الأيام نمت في حضنك
ولمن عيوني دمعت كان يدك ليا هو المنديل المسح دمعاتي من خدي
ولمن أترمي بين ذراعيك بحس بأمان الدنيا كلو في صدرك
ولمن أكون زعلان ومضايق نظرات عيونك كانت بتنسيني الهم والغم وكل قسوة زماني الفاتت
الله يرحم أيام زمان ويهون أيامي الجايه ويلطف بقلبي ويرزقني إنسانه أحسن منك.. وأجمل منك.. وأحن منك.. المهم تكون إنسانه ما بتشبهك ولا فيها من صفاتك...وإنت ربنا يسعدك ويديك إبن الحلال اللي يحفظك ويصونك

دلع السودان · 26-08-2008, 22:58

جميل ..

جميل في عشقك وصفاً ..

جميل في وفائك تعبيراً ..

جميل في تصفح ذكرياتك نقلاً ..

لاتوقف بحثك .. فستجد قطعاً من تستحق ذاك الجمال أحتوائاً .. ولكن حاول دائماً تفهم ماتستطيع تفهمه ..

تأمل .. وأطل النظر .. ولاتتكتفي بالنظر إلى صفحات البحر مادمت تملك القدرة على الغوص إلى الأعماق ..

عندما تصل إلى قمة النشوة وعمق العشق .. أدرك عظم ماتمتلك .. وحافظ عليه مااستطعت ..

لاتجعل تمرد دواخلك يعميك عن جمال تفاصيلك ..

وأخيراً .. لاتقسو على من تحب .. لاتقسو على من تحب .. فهو أسوء شعور يمكن أن يغمر إنسان ..

لإني لاأدري هل بالإمكان وجود أعذار أو معنى للسماح على القسوة ؟؟

لا أعتقد بأنه ذنب يغتفر .. أو جرح يلتئم ..

و تقبل خالص تحياتي ..

دمعات حزن جدا أليمة · 26-08-2008, 23:16

دلع السودان هذا كلامي نقل كل تفاصيل حياتي في الماضي وها أنا ما زلت أرى النور بوضوح

وها أنا ما زلت أبحث عن الحب الصادق في الوجود

وها أنا ما زلت أكتب حروفي الحزينه ولكنها ليست نهاية لحياتي فكما عشت اياما اليمه توجد هناك ايام مليئه بالفرح والسعاده

أتمنى أن المقصد يكون قد وصل

ولك من أعماقي كل احترام وتقدير

دلع السودان · 26-08-2008, 23:56

وأتمنى أن أستطيع الوقوف مجدداً ..

وأن أثق في الأمل مجدداً ...

وأن أسترد جمال الدواخل مجدداً ..

وأرجو إن لايطول إنتظاري على باب مدينة الزمن ..

فله سأترك المهمة ... وبالصبر سأسقى ورورد حياتي ...

وتقبل خالص تحياتي ..

وأهديك سيدي الفاضل ..

دمعات حزن جدا أليمة · 27-08-2008, 00:23

دلع السودان

لا أرجوك .. لا تعطي زمام حياتك للزمن فإنه حتما بك سيغدر
ولكن اطلبي من الخالق وحده بأن تعيشي حياة سعيده
وأتمنى لك ذلك من الأعماق وان طال صبرك ونفذ فاكيد هو مفتاح للفرج

دمت بكل ود يا عزيزتي