لا تسمعي لأغانيهم المترعة
العشق لا يعرف الجنون
الحب هو أعلى مراتب الوعي
وعندما تشبع العيون
من كل شي لا تري
(جهرت عيونا كفاك يا نور)
قالت (سكينة) عندما ذهبت لأول مرة لاستخراج صور شمسية لزوم جواز السفر أو الوثيقة لأن المبروك وليد الصرة (حامد) أرسل لها تكلفة الحج
بعد أن تهندمت بمساعدة بنت الجيرات الأليفة (هاجر) ، دلفت للغرفة الصغيرة المظلمة ونظرت لتلك الكشافات التي تشبه أطباق الساتلايت في منزلنا القديم بأرقى أحياء مدينة الظلام .
أجلسها عامل الاستوديو على طرف الكنبة حتى لا تبدو الصورة بأكتاف نازلة
أكمل الاستعدات وما إن سطع نور الفلاش
أغمضت عينيها لفترة طويلة وتحركت فيما يشبه حركة الكفيف
لامست أعمدة وتعثرت بقاعدة الكشافات لحقت بها (هاجر)
كان عامل الاستوديو يهدي من ذلك بلطافة في كلمات رقيقة
يا حاجة لا ....شوية شوية
يا بنتي وحات غلاوتك الجنا دا ختا نورو في عيني وشال بصري
أقعدي شوية وهي تفرك عينها لتسمح ألوان الطيف التي أحالت سواد العين لبياض الفضة في عز النهار
تروح وتجي برموشها حتى عادت الاضاءة كاملة للملعب
تحركت ناحية المستشفى للتطعيم
الصور متين
بعد ساعة
عشان كدا سموه استوديو الساعة
وعلى مقربة محل للعصائر
يمة : بتاكلي في السوق
سجم خشمي بعد العمر دا
عايزاني اتحكر معاك زي .....
بعد نمش البيت نلقى باقي الفطور قاعد مستنينا
طيب أشربي ليك عصير
خلاص برجاك هنا ما بمش أقيف وسط البتدافروا ديل
لا دا محل الجرايد
جلبت لها عصير الجوافة
البنت تخطو بتأني حرصا على ألا يختل مقام أناقتها والكعب العالي لا يصلح إلا في الشوارع المستوية
تخيرت (هاجر) الابتعاد عن الحفر وبقايا مجاري وطعج اللساتك للتربة الطينية
يبدو الثلج يرتج داخل الكاس مع زخارف العنق عند (هاجر) وشوشة المعاصم (مجوهرات مقلدة) من صنع ايفان سان لوران تصدر صوتا مريحا بايقاع تتابعه الحاجة
عدلت (سكينة) من جلستها واشاحت بالوجه قبالة باب الاستديو
ما زال لدى أمهاتنا ثوب الحياء الأنيق لله الحمد
شربت جرعة فجرعة حيث أن قطع الثلج مع كثافة محلول الجوافة لم تجعل مساره سلسا
كلما دنت بشفاهها لتسحب جرعة مل الفم تحول القطع دون ذلك
يا (هاجر) يا بتي أمرقي لي الثلج دا
تناولت (هاجر) القلم وألقت بمكعبات الثلج خارج الكاس
وهزت الكاس ليكون لتوحيد الكثافة بين رواسب القاع وأعلى الكاس حيث أثر الثلج
شربت الحاجة وسلمتها الفارغ وأعادته للرجل مع ابتسامة وشكر وفيما يبدو أنها نالت اعجابه وناولها الباقي ولعدم وجود الفكة غمز لها بقطعة من حلوى مستوردة فكت ورقتها وألهمتها فكيها.
خلاص يمة نمش نشيل الصور ونمشي الجوازات
يا بتي النهار روح خليها باكر تعالي براك
مواعيد القهوة جات ورأسي يوجعني
كلها عشرة دقائق يمة
وصلا الجوازات وقابلهما وسط زحمة المراجعين (سعيد) فدائي المهام الصعبة وما إن رأى (هاجر) زهرة الحارة حتى أقبل ورحب بهما وحلف بالطلاق أن يجلب لهما الفطور
عليك النبي ...هسه يا ولدي
يا حاجة أنا حلفت خلاص
الليلة يا (هاجر) يوم بخيت وعديل حججوني قبال أصل
نادى على زميله (علي)
يا فردة دخل الجماعة ديل مكتب جنابو
(علي) شاب هميم بذات الخصال تقدم وسلم عليهما
ومدحا له (سعيد) مدحا يعجز عنه المتنبي لسيف الدولة
وسحب كراسي الضيافة لمدخل المكتب والناس تحوم تحمل ملفاتها وهي أشبه بمشجعي فريق نيجيريا النسور الخضر الذين اكتفوا بالفضة وكان المنجم قريبا منهم نعم لأمريكا الجنوبية للتانغو والسامبا
ونحن يكفينا يا عديلة يا بيضاء
والملائكة
عاد (سعيد) بسرعته ورميه للعبارات للتحية لكل من يقابله فهو شخصية من نوع البصمة في تلك المكاتب وهو يحمل لفافات من السندويتشات الساخنة (بفتيك سمك) على طلب (هاجر) ووقف أمامهن
خير يا حاجة سكينة سمعت بيك وأمس والله ناوي أجي عليك وأكلمك تجيبي الجنسية والصور والله ما كان في داعي تتعبي تجي
بس أه صحيح الصور
ذهب لكاتبي العرضحالات وتناول ملف ودباسة وجهز كل ما يلزم وقام بتعبئة الأورنيك واستوفي كل اللازم بس يا يمة الضابط بجي هسه معليش خمسة دقائق وهو يخرج هاتفه النقال من جيب الخلف.....
القهوة كيف
أجي إنت تسلم الولدتك
وحاتك ياهو وقتها
بعد أمش البيت بسوي القلوة أشمها
نادى على عيال البوفية كلهم تحت السمع والطاعة لأنه كم مرة أجزل لهم المساعدة في تذليل كل العقبات
قهوة عليها تكل لأمي دي
بالله عليك ما تكلمنا نقوم بالواجب
عجل سرعة ....
قلنا ليك يا فتحي قهوة مصلحة
فتحي كذلك لا يقل شأناً عن (علي) أحضر القهوة في صينية كريستال شربت الحاجة وفي أثناء مرورها على الفنجان الثاني ظهر جنابو الشاب الذي زاده الميري أناقة وهيبة وسلم عليهما وهو تعود أن يجد من قبيلة (سعيد) كل يوم أزواج ولا يضجر لذلك فهو ابن قرية يعرف كل الواجب.
وهو واقف لتحية الحاجة ولم يقاوم النظر إلى (هاجر) فهي فاتنة ولسان حاله يردد مع الكاشف :
يلفت نظرك
مهما تحاول وتاخذ حذرك
تصبح عاشق غصبا عنك
ناوله سعيد الملف وقع الأورنيك دون المطالعة
خلاص أمش جوة (نجاة) تكمل ليك الباقي ، ومع الفنجان الثالث استلمت الحاجة جواز السفر
وكانت البنية في تلك الأوقات تتفحص الضابط من أسفل الحذاء اللامع والزي العسكري الذي تم غسله وكويه بعناية العساكر الضبط والربط ولم تنسى النظرات فأشبعته فهو شاب أنيق يشد النظر كذلك
وهو كان يسترق النظر متعمدا الكلام مباشرة مع الحاجة ولكن قلبه خفق لهذه البساطة بنت قمحية اللون تملأ جانبيها عافية الصبا الباكر ويزين جبينها خمار بلون بني غامق تفاعل مع اللون القمحي وأسفله ابتسامة تشع في كل المكان
والجماعة يتهامسون مع (سعيد) بالله حلتكم فيها قمر زي دا ما تورينا وإنت بتسو في شنو
يا جماعة دي أكان قمر القاعدين هناك يكونوا شنو اسكتوا إنتو شفتو حاجة
دخل (الرائد حافظ) للمكتب في برطعة تحايا الرتب طق طق أهلا سعادتك أهلا جنابو
وأثناء همه بالجلوس ضغط على جرس المراسلة ليبدا في الروتين الشاي جنابو
الليلة خلينا نبدأ بالمعكوس قهوة مزاجية
(سعيد) خلي الحماعة ديل يدخلوا المكتب بارد شوية المكيف شغال الظاهر من بدري
كويس
وهو يريد أن يكيف مزاجه ليملا العيون من هذه الروعة
وسلم على الحاجة وكانت تدعو له بأن يبارك الله له في عياله وأمهم وابتسم وهي رسالة للبنية ، وقطع عليها سيل الدعوات والله يا حاجة لسه ربنا ما سهل لينا نلقى
بت الحــــــــــــــــــــلال
ومدها بعناية وأنزلت (هاجر) وجهها في حياء أتوماتيكي وكأن دقات قلبها تقول لها أنه يقصدك
فكرت البنت بسرعة كيف ترد لو أنه فاجأها
وين (سعيد) يا جماعة
بالله الجماعة ديل خليهم يقيفوا في الصف شوية ويلزموا الهدوء كلهم إن شاء الله بمضى على أوراقهم وهو يفعل ذلك إكراما ورغبة في التفرغ لمهمة سببها أكبر هجوم عاطفي كاسح داهمه منذ أن تخرج من كلية الشرطة.
سعيد سعيد
جنابو إنت عارف الناس ديل عايزين تنظيم
الحاجة ربما عن عمد تشاغلت بتقليب جواز سفرها وتنظر لصورتها المختومة بإعجاب حيث أن الوليد الشال نظرها ما قصر
دنا سعيد من جنابو وهمس له في الموضوع مباشرة العساكر هكذا ،
البنت مع نظراتها للأرض تتابع بسقف العيون وتحاول أن تسترق السمع لتعرف الخبر الأكيد
خلاص يا (سعيد) زي ما قلت ليك بكرة الخميس أنا بكرة ببدل الوردية
أو كي أو كي سعادتك
سعيد يقترب من سكينة وهاجر
عندكم حاجة في السوق
يا ولدي كتر خيرك والله يديك العافية وتلقوها بيضاء مكان ما تقبلوا
ونهضت وهي تعدل من ثوبها الأبيض الناصع المرصع بنقاط أنصع بياضا
والبنت خلفها تحاول أن تزف نظرة وداع أخيرة فيها صمت الكلام لسعادتو
سعادتو يرفع القبعة والابتسامة لها من خلف ظهر (سكينة)
وبرغم الفرح فإن الحياء حال بينها من أن تسأله
بماذا همس لـ(سعيد) ولكن قلبها أجابها في دقاته التي تتدافر لتخرج في آهة حرى
خرج (الرائد حافظ) خلفهم وأدخل يده في جيبه ومن ثم دسها في جيب سعيد ليدفع للحاجة وبنتها أجرة الحافلة وياخي اشتري ليهم خضار ولا أي حاجة ضيوفنا نكرمهم.
وعاد لمكتبه سعيدا فرحا
ونظر للساعة ولوحة التقويم على الجدران المهداة من شركة شيكان للتأمين.
و(سعيد) تقدم في السير ليترك مسافة لينقل الخبر السعيد للأنسة (هاجر) ابتسمت وغطت ابتسامتها حيث أنه عيب في الشارع أن تفردها عريضة وتحدثت من تحت الطرحة ما عندي أي مانع ولو عايزة تعرفي أهلو هسه بوصلك ليهم بدون ما هو يعرف دي أسرة ملائكة شفتي ملائكة يعني شنو
ما هو باين يا (سعيد)
وأبلغت أهلها بالرواية وأنها لا تمانع ولكن
رأيكم هو الأول والأخير
اتصل سعيد من جواله (عاشقة) على جنابو
كلو تمام
وعاد (سعيد) بعد نهاية العمل ولم يذهب لمنزله مباشرة يريد أن يرن بهاتف أخر لجنابو عن الوضع في الساحة
الحاجة سكينة كانت منذ وصولها تتحدث عن أن الحجة دي مبروكة من أولها الحمد لله كل حاجة كانت بسرعة وسعيد يا يمة ود النسوان لي حدهم أريتو ولدك بعد دا يا (هاجر) وهي تمزح بضحكة ذات لون مربك
وكمان (حافظ) أريتو ولدك
إنتي يا حاجة ما تخرمي شنو الحكاية
كدي بعد تمشي وتدعي لينا في الحج للعرس أول بعد داك الوليدات الله كريم
هوي يا هاجر بتي الليلة العريس شفتيهو براك الليلة تحمدي سيدك
واستغربت (هاجر) كيف عرفت
اللبيب الإشارة يفهم
وتناولت الأسرة بالترحيب كل المسائل وزارهم في أمسية ذلك الخميس الرائع (الرائد حافظ) و(الرقيب أول) سعيد والحاجة سكينة كانت زينة الجلسة وتمت الخطوبة
وعم الفريق فرح الأناقة ابتهاجا مع هاجر
ونادت عليها الحاجة والله يا بتي القسمة ساقتك معاي الله كريم عليك كنت عايزة أسوق معاي ولد بنتي عصام إلا فات الكورس الليلة.
العرض العادي
