حاجة امنة اتصبري .. عارف الوجع في الجوف شديد
عارفك كمان ما بتقدري
جاهلك شكى وجاهلك بكى ..وفي بيتك المرق إتكى
والشي البحير وما بحير ..ما بية يا حاجة الزكاة
صبح الصباح لو ليك مراد يا حاجة ما تطلع شمس
والليلة عندك زي أمس
لسة الرويدي من الصباح من مدة ما جاب ليك خبر
كان جوف زي جوف العيال من مدة داير ليه حجر
والله علي الزمن الحجر الما بي بالصبر يتكري
وسرحتي في هموم العيال كيفن يعملو مع الدروس
وسرحتي في حق الفطور وباقي الامور البي القروش
واحد زمن داير ردا واحد خلاص قلمو إتكسر
زي التقول أكلو الصبر ..
ومشيتي لي برج الحمام برجك صفيحتين ما بزيد
كان تلقي ليك جوزا جديد إمكن بعد طلع الصباح يغشاك زولا يشتري
هبشتي جاي فتشتي جاي كان تلقي سكر بس محال
باقي الرطيل الفي الكرت يا حاجة سفوهوا العيال
يا حليل زمان وسنين زمان يا حاجة لو تذكري
عندي صبيان حرين إلا بالعيب متوشمين
دنقري سرقو ..150 الله ويا سين دنقري سرقو 150
الرهيد يوم جفا لينا وجوز الوزين فارق ربوع ام زينة
شجرا ضليل ميت بزرا بيابا الطينه
دلال العيال مات والحالة صعبة علينا
دنقري سرقو 150
وسمعتي صوت جاك من بعيد.. وبعد قليل بابك ضرب
شالك تعب .. ختاك تعب
يا حاجة ناس الموية جوك .. أصلو الشهر روح جري
وبعد صراع وصراع طويل ..يا حاجة بينك والمحال
ما لقيتي في داك النهار .. شيتا يجو ياكلو العيال
حبة عدس ما بسوي شي وينو البصل وينو اللحم
وحبة عجين ما بسوي شي وينو الدقيق وينو الفحم
من جاي لي جاي فتشتي جاي
هبشتي جاي لازمك كتير تتقدري
يا حاجة امنة اتصبري