يوم مع شرطة امتداد ناصر @
كان يوما واحدا ولكن ذكراه لم تفارق خاطري ابدا
كنا ثلاثة شباب راكبين موتر (اكس ميه) طالعين من احتفال في المدرسه
ابدعنا في قسم المسرح والتمثيل وتم اعطاءنا شهادات تقديريه
المهم
خرجنا بعد ذلك في شوارع الخرطوم (صياعه) ونحن الثلاثه على موتر واحد (مخالفه)
لم نترك مدرسه في العمارات أو الرياض أو اركويت لم نمر بها نغازل إن كانت للبنات ونشاكل إن كانت للأولاد
في أثناء ذلك مرت علينا فتاة جميله جدا ولكن كان لبسها فاضح وبسرعه قررنا التقصي من أمرها (متابعه) ركبت ركشه ونحن خلفها بالموتر لاحظ لنا سائق الركشه وكان كبيرا في العمر حاول تجنبنا والفلتان من ولكن هيهات (معلمين)
خافت البنت كثيرا طلبت من السائق ايقاف الركشه ثم نزلت نزلنا خلفها وامسكنا سائق الركشه كنت أحمل بطاقة تأمين صحي أبرزتها وارجعتها بسرعه ثم قلت له : معاك الأمن الإجتماعي
طبعا الزوول بدا يتكبكب ويلعن في البنت وفي لبسها ..المهم خوفناهو من معاملة الفتيات ثم اطلقنا صراحه وهو يحيي في الأمن وفينا كاد الرجل أن يسلم على رأسي ولكني لم اسمح له ..... رجعنا في متابعتنا للفتاه ..حتى المنشيه وهي من ركشه إلى تكسي إلى أمجاد..كملنا قروشا ...وكان هنالك حمله على المواتر والركشات في المنشيه ..فجاءه طبوا علينا ناس الحمله وسألونا : راكبين ثلاثه في موتر ليه ؟ قلنا وفي تحدي مزااااااااااااج ......زعل الضابط وقال :جيبوا أوراق الموتر :
قلنا ماعندنا
طيب وين اللوحات ؟؟ قلنا مافي
استدعى شرطيان وسحبونا إلى الضل كالجراد حتى انتهاء الحمله
انتهت الحمله واردنا التوجه إلى قسم امتداد ناصر للتحقيق ..كان عدد الركشات كبيرا ..والشرطه قليلة العدد ..قدمنا المساعده لهم بقيادة الركشات ..كنت اقود واحده فيها ورجل شرطه المهم خربت الركشه وبطلت ....نظرت إلى السائق واتهمته بفصل سلك للتشغيل ...انكب عليه الشرطي ضربا وشتما وانا أضحك
وصلنا القسم ...وعملنا ناس مؤدبين اتوضينا صلينا..والحاجه الحلوه طلبنا أكل من مطعم الضباط ..جلسنا نضحك وناكل ونشاغل في البنات داخل القسم
ونحن حاسين بالورطه الكبيره ..حاولنا الخروج بعدة طرق ولكننا لم نستطع
طلعنا شهادات التقدير عشان يعرفوا اننا كويسين اتشرطن فوق راسنا
سمعت شرطي يتحدث عن زواج ابنة الرائد عرفت أن اسمه عادل وبتو اسمها سوزان ..خطرت لي فكره شيطانيه
مسكت ورقه وقلم وكتبت أجمل شعر عن سوزان وعن أبوها
دخلنا على الرائد ..وبدون مقدمات دخلتا فيهو بالأحضان
وينك ياعم عادل ....مشتاقين ..اخبارك واخبار سوزان ..ومبروك ليها..وبنجي العرس أكيد
وقلت ليهو الشعر وعجبوا شديد
استغرب الراجل : وقال لي : انتا بتعرفني من وين ؟ وسوزان كمان ؟؟
قلتا ليهو معقوله ..........وبديت في الكضب ورمي الدراب
انبسط الراجل مني طلب لينا شاي وعزمنا على العرس ..وطلعنا
رجعت ليهو تاني قلت ليه : عندي بت عمي هنا ياريت تطلع ليه الركشه بتاعتها
طلع ليها الركشه وهي ولا بت عمي ولا حاجه ..اتفقتا معاها اطلع ركشتها مقابل مية الف حنيه
وعلا قبضنا الميه وطلعنا مبسوطين .....
والحلوه مشينا العرس وكلمناهو بالحاصل واعتذرنا
وضحك شديد
وقال لينا : والله تستحقوا تكونوا ناس مباحث
وشغلنا ماهو في الحمله .
وطبعا الله لا يوريك الجرايم اللي سويناها ونحن في الحمله
كنا عاملين ملازمين بس
ندخل أي مكان ونضرب ايزول ونركب الموتر بدون لوحات ولا اوراق
وفوق دا كلو ادونا قروش حلوووووه
لكن للأسف انتهت الحمله سريع
..الله علي تللك الأيام.......
كانت ايام طيش بس أحلى أيام
مقالب ...مهارات ..ابداعات ..وكل حاجه
ليت الزمن يرجع
ونرجع مع الأصحاب تاني ولا نشيل للدنيا هم
أحبابي قصدت من هذا الموقف تخليد أولئك النفر في ذاكرتي وهم خالدون
اتمنى منكم ان تمتعونا بي مواقف حصلت ليكم
ولكم خالص الود والتقدير عشاق !!!!
| التوقيع |
ولو بيدي ما يشوفك بشر
ولو بحفظ اقرا ليك يس ونون
ولو فكرتي في حبي يوم
وريني كيف حــــبك يكون |
 |
التعديل الأخير تم بواسطة : عبدالعظيم م بتاريخ 20-07-2008 الساعة 07:33.
|
