التمباك

African_son · 16-07-2008, 10:11

التمباك : هو تبغ داكن اللون كريه الرائحة ، مخمر و مطحون يوضع بين الشفا و اللثة ، يسمى كذلك بالسعوط ، العماري أو السفة

إرتفاع نسبة الإصابة بسرطان الفم في السودان هو راجع إلى إستخدام التمباك.
(دراسة لكلية طب الأسنان بالخرطوم ، نشرت في سنة 1995 في المطبوعة
( العلمية الدولية للسرطان

يحتوي التمباك على 28 مادة مسرطنة ، أكثرها ضراراً هي نيترسامينات التبغ ، التي تشكل أثناء تحضير و تخمير التمباك (إذا ما أحتوت أي من اللحوم أو المأكولات جزء مما يحتويه التمباك من النيتروسامينات فهي تمنع فوراً و بإعتبارها مسرطنة).

من المواد المسرطنة الأخرى في التمباك:

البينزوبيرين ، الكورتونلديهيد ، الفورمالديهيد (عنصر مستخدم في تحنيط الموتى) ، الأسيتلديهيد (مادة مهيجة) ، هيدرازين (مادة كيميائية سامة) ، الزرنيخ (مادة سامة) ، النيكل ، الكادميوم (عنصر يدخل في صناعة بطاريات السيارات) ، البولونيوم (عنصر مشع ذرياً) .

يحتوي التمباك على النيكوتين و هو مادة تؤدي إلى الإدمان و إضطرابات في القلب و ضغط الدم و الأوعية الدموية ، النيكوتين الذي يمتصه الجسم من التمباك هو أكثر بمرتين إلى ثلاثة من الممتص عند تدخين سيجارة ، كما يبقى النيكوتين في الدم لفترات أطول.

يسبب التمباك العديد من أنواع السرطانات و منها سرطان الفم و الحلق و البلعوم ، وتنتشر هذه السرطانات بإستمرار إلى الأعضاء المجاورة ما لم تتم معالجتها سواء كيميائياً أو بالإشعاع أو جراحياً (إزالة الأورام و الأنسجة المحيطة ،ويؤدي ذلك في أغلب الأحيان إلى تشوهات).

فضلاً عن إصابة مستخدميه بالسرطان فإن التمباك يسبب:

· أنواع عديدة من البقع الحمراء و البيضاء و التقرحات الحميدة في بطانة الفم ، و التي تحمل خطر التحول إلى خبيثة.

· إنحسار اللثة عن الأسنان.

· إصفرار الأسنان.

· بخر الفم.

· أمراض اللثة المؤدية إلى تخلخل الأسنان.

· مشاكل إجتماعية بسبب تقزز من حولك من هذه العادة.

التمباك لا يعتبر أقل خطراً من السجائر و يشاركها في تعريض مستخدمه إلى أمراض السرطان و أمراض القلب.

يدمن الكثيرين التمباك و هم يحالون إستخدامه للتخلص من إدمانهم على السجائر.

وكان ما فاطر ما تخاطر
ماهو رأي البنات فى الشباب السفيفين؟ وراي الأولاد في البنات البسفو ؟
وهل مقولة الشباب ( لا حياة بدون تمباك) صحيحة؟
ما تعني لك هذه الرسالة ( شوف البت ديك بتسف) ؟
وما رأي البنت في البنات البسفو ؟
تحياتى

فاطمه · 16-07-2008, 10:56

اعوز بالله ربنا يهدي الشباب هو جد حاجه مقرفه وما جميله وضرره مضمون ماتودو روحكم للتهلكه ياشباب بسبب ضعف امام التمباك انا شايفه انه دا مرض والواحد لازم يبقي قوي قدام شهواته
شكرا افريقي ياولدنا

فاطمه · 16-07-2008, 10:57

اعوذ بالله

African_son · 16-07-2008, 11:24

والله يا فطومية امين الله يهدينا كلنا ونبطل اي حاجة كعبة
اسع يا فطوم لو جاك عريس بيسف رايك شنو ؟

عبدالعظيم م · 16-07-2008, 12:05

ماهو رأي البنات فى الشباب السفيفين؟ وراي الأولاد في البنات البسفو ؟
مزاحات ...زي ما بقولوا.....هم ناس مستضعفين في الأرض ..غالبا
الحمد لله لسه ما جربنا المرض دا ويارب ما نجرب
وهل مقولة الشباب ( لا حياة بدون تمباك) صحيحة؟
عند المدمنين صحيحه ميه في الميه
ما تعني لك هذه الرسالة ( شوف البت ديك بتسف) ؟
تعني لي أن أتوقع منها كل حاجه
أفريكانو
حاول الجلوس أمام دكاكين الجريف وتعرف الإجابه الصحيحه
والله موضوع غايه في الأهميه
عندنا البسفو هنا
ناااااااااااااااااااااااااااااس شفووووت على ما يظنون
الله يهدي

abdon · 16-07-2008, 13:34

طبعا كل زول في السودان عارف انو التمباك مضر وضرر اكثر من نفعه وماظن انو فيه نفع والقالبيه العظمي اتعلموا التمباك وسفوه وهم في اشد الحوجه للتخلص من هذه العاده فارجوا ان نساعدهم في التخلص من هذا المرض اللعين................ بنات بسفوا دي حاجه عجيبه اول مره اسمع بكلام زي دا

دلع السودان · 16-07-2008, 13:36

أولاً شكرا..شكراً.. وكمان ألف شكر .. أخونا ( African_son ) على أختيارك للموضوع ده ..
أنا من أشد الناس اللي بتكره الظاهرة الفضيعة والمقرفة - مع إحترامي لمبتلين بالمرض ده - بس بجد ناهيك عن الأضرار الصحية المثبتة ببحوث وتقارير على إنو من أحد الأسباب المباشرة للسرطان - عافانا واياكم الله - هو ظاهرة بالنسبة لي من أكتر الحاجات اللي بتعصبني وبتظهر عندي نرفزة لا إرادية اتجاه الناس اللي ربنا ابتلاهم بالمرض ده ..
فأنا من الناس اللي مابتتحمل ريحة السجاير .. وكل اللي بسمع كلامي ده بتوقع إني بعاني من مشكلة حساسية .. أو ضيق تنفس .. أو مرض صدري .. بس أنا الحمد لله مابشكي من شي الأمراض السابقة .. بس ماعارفة لي مابقدر اتحمل ريحة السجاير .. أو حتى مابطيق أشوف إنسان في إيدو سجارة ..
لكن عندي الأسوء هي المرض التاني اللي بتكلم عليه .. ومابحب حتى إني انطق اسمو حتى بالغلط ..
فلو طلبو مني أتمنى أمنية واحدة في الدنيا وتحقق ليا .. فا ح تكون أنو الظاهرة دي تختفي من السودان على وجه الخصوص .. ومن العالم عموماً ..
وعن سؤالك للأخت فطومة .. إنها لوبتقبل عريس عندو الإبتلاء ده أو لأ ؟؟
تصدق إني رفضت واحد اتقدم ليا مافيهو أي عيب ظاهر إلا إنو بس بـ.............
فكان ده السبب الوحيد اللي خلاني ارفض بالرغم من إنو شخصيتو من الشخصيات اللي بتجذبني ..
بس أنا بشوف فيها ضُرتي ..
ولما اقترح إنو يخليهو .. أنا رفضت .. عشان أنا شايفة أنو لما خلاها قناعةً بأنو ماعايز أستمر في الخطأ .. فأنا ح كون مهددة بإنو ارجع ليها في أي وقت وما ح كون قادرة استمر معاهو مجاملة .. فما ح أعيش حياة كلها خوف من الكابوس ده ..
وياريت تلقوا طريقة تعدمو فيها الظاهرة دي من العالم ..

African_son · 16-07-2008, 15:12

يا عبده دكاكين الجريف خليناها بقينا نمشي الديم
عبدون الناس بتقول تسف عشان تنسا السجاير لكن والله السفة اصعب من السجاير واسال مجرب
دلع السودان في حيث انك رفضتي عريس بسبب ال.... فكيف حتتكيفي بالوضع في السودان في الشارع في المواصلات في اي حته وانتي ماشة معناها الا تمشي وانتي مغمضة

دلع السودان · 16-07-2008, 15:23

اقتباس:

المشاركة الأصلية كتبت بواسطة African_son

يا عبده دكاكين الجريف خليناها بقينا نمشي الديم
عبدون الناس بتقول تسف عشان تنسا السجاير لكن والله السفة اصعب من السجاير واسال مجرب
دلع السودان في حيث انك رفضتي عريس بسبب ال.... فكيف حتتكيفي بالوضع في السودان في الشارع في المواصلات في اي حته وانتي ماشة معناها الا تمشي وانتي مغمضة

ما المشكلة اللي للأسف بعاني منها .. أني ماعشت في السودان ..
ارتباطي بالسودان مقتصر على الزيارات .. وما كنت بركز خالص على الناس في الجانب ده .. أو بمعنى أصح مامن اهتماماتي ..
ومامتخيلة لما استقر في السودان كيف ح يكون تعاملي مع الناس دي ..
خايفة أخسر ناس وأدمر حاجات يمكن ح تكون حلوة لو قبلتها زي ماهي ..
وربنا يهدينا جميعاً ..
ولغاية لما اشرفكم ياريت تشوفي لي حل في المشكلة دي ..