منـو القــال ليـــك ( قصيدتي الجديدة )
منـو القـال ليـك إنـو الشعب لمن واجه العدوان
أكـان قـاصـد يـدافع عن حكم
سموه يوم جابـوه بـالإنقــاذ ؟
منـو الغـشاك يـوم قـال ليـك
إنـو نصـرنــا كـان يـوم داك
بفضـل جنــودك الأفـذاذ ؟
منـو الصـور لك الأحـداث في أم درمـان
مع الأيـام كمـان بتحسب ليـك عـز و إنجــاز؟
يخـلي النـاس تصـوت ليك ..تعيدك لي للقصـر سـلطـان
تبايعك وتبقى إنت الساس وإنت الراس والعنوان
منو القال ليك إنـو الشعب من يوم داك
بيحلف بيك ..ويحلم بيك .. يهاتي بيك
يأمل فيك .. تعيدلو كرامة الإنسان ؟
منـو المن اصلو هنـدس ليك ..وحلل ليك
وفي كل لحظة يخـدع فيك
وإنت غشيم بتسمع ليهو ..تخضع ليهو
ذي ما تكـون مخـدر تب
وذي شايلك حمار النـوم ومـا دريان
ولاك عارف في كم مليون
صيامن ديمه .. ما شرطاً يهل رمضان
لكين الفقر غلاب ..بخلي الزول شقي وجيعان
وما بيقدر يقرب تب .. من سوقاً ذي غول .. نهم سعران
وكيفن بس يواجه الغـول هو زولاً صار ضعيف نحلان
تشوفو تقول شبح زولاً صبح كملان
وكيف يا زول .. تصدق زول .. يقول لك قول
ويعيد القول
في ناس عشقت رجال الثورة .. ريحة الثورة .. إسم الثورة
رسم الثورة .. حكم الثورة .. جيش الثورة
ديمه كمان .. تحب الثورة .. تفدي الثورة بالأرواح
وحبهـا جــاري في الشريــان
هي يـا.. مغشوش ويا مخـدوع ويا مربوش
يمين بالله بحلف ليك حليفة حق
واكرر أغلظ الأيمان
الحـا يكـون وكـل الكــان
حصل .. شان ما بنرضى للسودان
في يوم يتذل او يتهـان
وما فيش اصلو فـد إنسان بيبذل روحو دون عنوان
وما بننزف عشان خاطرك قطيرة دم
وإنت ونحنا ما بنتلم
وما حارنو فيك عشم
وابداً ما بنقولا نعـم
وأنا واخواني ديمة عليك وليد العم
وكان جاء دخيل بندحرو ليك
ونطردو ليك ما شان إنت تتنعم
لكين بس .. فداء السودان
الجمعة 27 / 6 /2008م
| التوقيع |
|
|
التعديل الأخير تم بواسطة : ابوملاذ بتاريخ 30-06-2008 الساعة 23:15.
السبب: خطأ مطبعي
|
العرض العادي
