مش السفر دا ....خلينا

bintalbadia · 30-06-2008, 22:05

أنا غايتو خليتو السفر..
والطايرة قط ما بركبا
أنا كنت خايفة اصل دمشق..
والرجعة تبقى مكركبة
تاري الحكاية معممة...
والموت يتاوق للأبى
قالو المطر زلق الكراع
بعدو الbody ولع حريق
يا أخوانا ناس امريكا ديل
مطرهم يخلي الزول غريق
وللا الهنود الاصلو ما
يوما وقف عنهم بريق
ما سمعنا بطيارة حرقت
او زلقت ببلل الطريق
خلينا من الاولى ديك
مسطرة
ليها زمنا ايييييك بعيد

التانية

كان دار تصل لبورتسودان
طارت وحاتكم...وصلت الجو العنان
شوية بس جات راجعة لبلد الامان
او قولو لمطار الامان
اريتو بس يكون امان
اها...مالكم كمان
حبة خلل دارين نصلحو..
ياربي هو قبيل ما اتفحص؟؟
وللا الحكاية في المكان

التالتة

شايلالا ناسا من ملكال
شايلة ليها ناسا حنان
لكن اظنهم كانو تقال
ما كلموهم يضعفو
والطايرة ما بتحمل اوزان
كانت نهايتها انو حرقت ..وللا وقعت؟؟
وهو شنو الفرق
ما كلو في الاخر قتال
وأرواح تروح بلا تمن
والناس تموت
من غير محاكمة او سؤال

الليلة دي

أصبحت برة البيت
وبدون قصد عاينت لي في شاشة
مالا الدخاخين مالية السما
والناس جموع محتاسة
الطايرة اييك جات واقعة
العمود دق في راسا
والله احنا احترنا
وارواحنا دايرا خلاصا
السفر دا خلينا
وكان بيتنا جنب الساحة
علينا الفاتحة يا ساسة

ربنا يتغمد كل المتوفين برحمته
ويلهم اهلهم وذويهم الصبر والسلوان

ابوملاذ · 30-06-2008, 23:21

بنت البادية ..

روعة .. الإحساس بمعانات البلد وناس البلد يجعل الكلمات تنساب كما نسمات الصباح الندية .. لا فض فاك .

الفنان · 30-06-2008, 23:24

القصة ما قصة مطر
لا الناس بقت حلفت تطير
لا تعبو من سفر القطر
حتى القطر بقى مو نشيط
والسكة زاتها بقت خطر
قالو النسافر بالزلط
حتى الزلط بقى موتو حار
كم شال وكم يتم أسر
قالو لنا دا اليوم ما بفوت
ما أي زول لازم يموت
ولازم نسلم للقدر
لا قلنا .. لا بنقدر نقول
ياهو القدر ..
لكن كمان
حتى القدر أسبابو
ما بتعمي البصر
يادوبنا دار نقعد نشوف
وين السبب ..
وقعدنا واتحيرنا
إهمال ؟ لا ما مكن
ولا استهتار ..
ولا كفراً ضرب
طيب تكون دي الكهربا
تيار وغار فينا وسرب
ولا العمايل الشينة كترت
ولما في الناس ديل غضب
وزاد السؤال كبر انكتب
واتحير الكل زاد عجب
يا خوانا ما تقولولنا
كان عارفين سبب
كانت زمان في إجابة جاهزة
وما بتدور اصلاً تعب
ما نحن إمكاناتنا ما ..
قربنا نعملها في علب
لكن كمان بترولنا جا
واسعارو جات فوق الطلب
وفي جيوب كتار اتنفخن
خلينا بنيان الحطب
وركبنا أحسن مركبات
والما ركب زاح بالركب
طيب نقول العلة وين
وروني تب راسي انشطب

bintalbadia · 02-07-2008, 22:02

الاخ ابوملاذ اشكر لك كريم مرورك

مشرفنا المتألق
اخلي ليك البوست دا ولا شنو

القصة ما قصت مطر!!
والناس أبت سفر القطر..
حتى الزلط سابق القدر
الموت دا هيييين
ما قلنا سيبوهو السفر
*****
قالوا المدرج ما مؤهل
والحكومة مفلسة...
ياود بدر من الفلس
ما قلتو احسن خصخصة
*****
قالوا القطار سفرا بعيد
والليل بهيم..
والسكة زمنا من صيانة
طالما عرفنا السبب
حقو كمان يبطل العجب!!!
*****
أما الزلط...
خلينا ساي منو الحرق
قلوب امات على جنياتا
خلينا منو الكم قطف
زهرات مفرهدة يا حلاتا
خلينا من سبب الشقى
الهمل اسر
خطف عديل ابواتا...

الفنان · 06-07-2008, 12:43

دكتورتنا بنت البادية

معليش كان زودت الجرعة شوية

وما تبعت كلام الدكتور المكتوب في الروشتة

أنا قصدي أطيب بسراع

ما قايل الدوا لمان يكتر

يمكن يمرض

ويمكن يكتل

ويمكن يقلب بلوة كبيرة

معليش انا قصدي اجي واتعالج

خلاص بمشي حسب الروشتة

وباخد الجرعة كمان بالملي

وفي ميعاده

وبعد كم يوم برجع

اشوف الحمى ابت ما تنزل

ولا خلاص انطفت العلة