من شعر الشايقيه

عبدالعظيم م · 27-06-2008, 14:22

--------------------------------------------------------------------------------

انا المعجب
انا المشتاق اشوف عينيك
كل صباح واتعذب
واسمع من شفاهك ديل
الذ نغم برأى أطرب
وتلوح لى فى صفاء عينيك
بحور من ريد........ أدور اشرب
ومرة اتوه ... اقيف مشدوه
اقول يا عبدو أتادب
زمانك فات ..........
والريد فى قليبك مات
ليه فوق جمرو تتقلب
واشيل من عمرى
عشرة سنين
اقول يمكن يكون انسب
وأدلى دلوى مع الخطاب
مع العشاق يجوز اكسب
وأعاين لى عيونك يمكن القى سعادة
القى غضب
واشيل فوق راسى هم الدنيا
فوق افكارى يترسب
قلبى رهيف
ما خاض زى حروبك ديل ولا جرب
وفجأة يعود صوابى الغاب
أشوف انا نفسى جنبك زى وليد يلعب
بيجرى وراء سراب ورهاب
بعيييد...................لليلة ما قرب
وهل معقول ؟
يكون فى وصول ؟
متين يا رب
ما تصارحيه ........ خافى عليهو
قولى ليهو لا يتعب
انا المعجب
انا الولهان ولى سنين
بعانى من الصعاب اصعب
وقالوا على كبرت خلاص
ولسع ماقدرت خطب
انا المعجب
انا المشتاق ..........
انا الطوالى بترقب
انا التائه
وعيونى بلاك ما شافت
يمين كوكب
شوية ريده
ليه يا صيده
ما دا انا المتيم تب
--------------------------------------------------------------------------------

شايقية · 27-06-2008, 17:12

وانــت معــاي
أمــل جــواي بيتجـــسد
وقلبــي يطيــــر يتفـــرهـــد
ومــلامح ريــــدة تتحــــدد
وصـــدى الأشـــواق يــتردد
وانــت معــاي
حنيـــني معــاي
وهمســـك زي طــرب غنــاي ..
وكــل مــا أحســـك أسكــت ســاي..
وارجــى مشــاعــري تتمــايــل معــاك دوبــاي ..
واقــول يا اللــه خليهـــو ديمــة معــــاي ..

حـــروف احســاســا رائــــع ... اطربنـــا دايمـــا بيهـــا ..يديــــك العـــافيــة

عبدالعظيم م · 28-06-2008, 01:42

شايقيه
شكرا على التشجيع المستمر والجميل
ومليوووووووون
تحيه عسكريه

African_son · 28-06-2008, 09:33

عبــــــــــــــــ دائماً اجدك اكثر امتيازاً من قبل ــــــــــــــــده

كنت اريد ان اقول شكراً ولكن لن تكفيك حقاً

لذـ ا ألف ألف ألف شكراً

تحيــــــــاتي ارجو منك المزيد من الاشعار

الفنان · 28-06-2008, 09:53

جميل جداً ورائع أخي عبد العظيم
ولا أدري لماذا أسميت قصيدتك العاشقة (من شعر الشايقية)
أم أنك أردت بها نقطة إنطلاقة لبوست مليء بشعر الشوايقة الجميل
الذي لا يستطيع منا من يتجاوزه في قراءة الفن السوداني ..
ولو قلبنا صفحات الشعر السوداني لوجدناه جله من أرض الشايقية
مليء بالإحساس مليء بالإيقاعات مليء بالرومانسية مليء بالحب
كل الحب للأرض للأم للأهل للوطن للحبيبة ..
الأخت شايقية أكيد ما بتقصر معاك .. لكن ندعو الجميع أن لا يطلعو
منها للشوايقة فلنا معهم باع .. ..
لعل قصيدتك تذكرني ..
صحيح يا عبدو خوي قولك حقيقة
وكتير الطفشها الجلا من فريقها

،،،

ولا يسعني يا عبدو خوي إلا أن أحاكيك ببعض الحروف
أكيد يا عبدو خوي معذور
كتير زي قلبك اتعذب
خدارو الفي جروف النيل
ولهجو المن زلالو اعذب
وراضع من حنانو حنان
ومن طيبة النفوس اطيب
وماخد من نخيلو قوام
يميل نشوان يرمي رطب
ومن وزينو رقصة ريد
أكيد معذور حلو وبتحب

عبدالعظيم م · 28-06-2008, 10:55

أفريكانو
الله يديك العافيه
والله ماعارف أشكرك كيف؟؟
والله انت نعم الأخ ويكفي الشوايقه فخر إنك منهم

عبدالعظيم م · 28-06-2008, 10:59

الفنان
ماذا أقوووووووووووووووووووووول ؟؟؟
فلا أرى شعرا يكفيك
ولا نثرا يجزيك
ولا شيء أعبر به عن سعادتي بوجودك دائما
معنا
ولكني أترك
لقلبي أن يدعو لك عسى أن يستجاب له
&&&&&&&&&
رايك شنو لو نعملها بوست ؟؟؟

الفنان · 28-06-2008, 18:33

نعملها ومالو
بس جيب الشوايقة كلهم
بي طنابيرهم وخلي الحفلة تدور
وليك علي أسخن ليك الدارة

عبدالعظيم م · 28-06-2008, 20:26

كلمات الاستاذ/ محمد سعيد دفع الله
مليت من الغربه آعلى .. يا ولدى يا ايدى اليمين
داير الرجوع بس كيف يكون ... وتفكيرى فيهو انا من متين
كل ما اقول اصبر شوى باكر تكون الحاله زين
القى الظروف ياها الظروف .. بس زايده سؤ بحلف يمين
وآخد لى لفته على الزمان ... القاها مرت كم سنين
لمتيـــــــــن بتتفك القيــــــــود ... القاسى قلبها ما بيلـــــين
**********
جيت فاكر انى اكون سعيد ... بى مال بيجرى على اليدين
لكنــو مقسوم يــا لعــــزاز .... رزقا يكون دائمــا ضـــنين
والشئ العجيب مما وصل ولليلى فوق اكتافى دين
حســرة وهموم متواليات .... والدمعه يوت هالابه عـيــن
نيران مولعى فى القلب مسكين فقد لضرا الامين
كان عيشو هاديه قبل يجى ... و فى بيتو كان قوتو اليقين
والليله فى الاهوال دوام يصرخ ومو لاقى البعين
وينــك بعــدتى على ّ ليه ... وانا ليكــى كاتلنــى الحــنيــن
يا السمحه سموكى القرير والناس تجيك من وين ووين
وانا قـمــت منك شــن اقول .... غير ده المسطر فى الجبين
يا درة الوطن العزيز يا النادره يا لماليك وزين
عشمى ومناى ارجع واجيك ....... انا غير هواك متل السجين
داير اكون بين الاهل محضون وحاضن اعز طين
داير حياتى مع الصحاب ..... واللقمه ما بين العوين
***********
يا لوبه شمر للضراع والليلى جيت اوصيك دحين
كونك تقصر ما اظن وانا عارفو طبعك يا الخزين
يات من معلم درسك شاكرك علم وخلقا يزين
ما عليك خوف ما دام معاك زولا مسمى الزين وزين
انت البتعرف للاصول كاسب رضاء الوالدين
من قمت درفونا صغير ما كت يوم نيا عجين
دائما مواظب و مجتهد فى الجانبين دنيا ودين
ورافع السماوات غير عمد داعيهو ينصر وليك يعين