ضي عينيك ... ( قصيدة )

الطاهر التاي · 17-06-2008, 18:15

ضي عينيك
-----------
ضي عينيك وشط النيل
وهمساً زي ندى الموال
صباحه جميل
ونمة تضوي وجع الليل
وآهة تحاكي صوت الناي
وحيرة تشق جراب الراي
ونغما صوتو واهي عليل
وزولا
في مضارب الشوق
بفتش لي عيونك ديل
وفي قمرا حداهو دليل
وفي زولا سمح بلحيل
بيشرب من مياه النيل
ومن توتيل
ومن عطر الخريف الجاي
ومن ليحان فكينا دواي
ومن بحر القصيد شاشاي
شال موال حروفه غنا
مسك دربا بدايته غناي
وشال شوقا نهايته هواي
ضي عينيك
وهمسا في الفؤاد تذكار
ووجعا حار
وحزنا في العيون مكتوب
وزولا في الجمر مكروب
بكابد لوعة الأقدار
وبشرب من مراره مرار
وحبك رفقة المشوار
ودربك خطوة بمشيها
وانثر ليل عذابي نهار
ضي عينيك
واسافر لي ديار عينيك
واركب موجة الأقدار
واجيك شايل هواي شمعة
وامسح ظلمة الدمعة
واهزم حلكة الأفكار
والبس نار هواكي شعار
واركض في زماني براي
تكوني الومضة في جواي
واملا يملا عمري الجاي
ونبدأ روعة المشوار
ونكتب أعذب الأشعار
وننسى لوعة الفرقة
وتهجد لوعة الأسفار
وننشد في ديارنا ديار
وضيا من صباح عينيك
بعد الفرقة يبقى منار

عبدالعظيم م · 17-06-2008, 20:25

يا الله
والله أقرأ واصفق ليك
غايه في الجمال والروعه
وقمه في الذوق
تسلم يدك
أخوي
الطاهر التاي

الفنان · 18-06-2008, 11:45

ضي عينيك وشط النيل
وهمساً زي ندى الموال

ضي عينيك أمل دفاق
بيسكب في القلوب شلال
وضحكة طفلة فرحانة
بتغزل للوعود الفال
ورعشة بتسري في الوجدان
سعد ضواي وراحة بال

************

أخي الطاهر كما عودتنا .. بهذا النغم الساحر
زدنا منه ولا تحرمنا ..
عطر هذه الساحة .. يسلم قلمك الرطب

African_son · 18-06-2008, 12:41

الطاهــــــر تسلم يا رائــــع

تحيـــــــاتي

عمرو عبده · 18-06-2008, 13:00

سلمت اخى
فالعيون المضيئة هى اخطر إلهام

الطاهر التاي · 19-06-2008, 11:44

عبد العظيم
الفنان
ابن افريقيا
عمرو

أشكركم على المرور والتعليقات الرائعة
عن القصيدة .
و أرجو أن دائما بمحبتكم .

كل الحب ..... كل الود