روائع جمعتها جول الشاعر: احمد فؤاد نجم

African_son · 08-06-2008, 10:26

روائع جمعتها جول الشاعر: احمد فؤاد نجم الشاعر الذي عندما ينطق يصمت الجميع احتراماً وتقديراً له حيثما كان

الأوله بلــــدى
والتانيه بلــــــدى
والتالته بلــــــــــدى
*******
الأوله بلدى بسلطن جوا موالى
والتانيه بلدى بقول الكلمه بالعالى
والتالته بلدى يا كنزى وعزوتى ومالى
الأوله بلدى
بسلطن جو موالى ودا الموصوف
والتانيه بلدى
بقول الكلمه بالعالى وع المكشوف
والتالته بلدى
ياكنزى وعزوتى ومالى وملو الشوف
ودا الموصوف دوا العيان
والتانيه بلدى باقول الكلمه بالعالى
وع المكشوف وفى المليان
والتالته بلدى يا كنزى وعزوتى ومالى
وملو الشوف أوانك آن
تحدى الحد يا بلدى
ما بين الحق و البهتان
ورايتك تعلا يابلدى
دليل عن صحة البنيان
ودا الموصوف
والأوله بلــــــدى
والتانيه بلــــــدى
والتالته بلــــــدى

اسكنـــــدريــــة
************

يا اسكندريه
بحرك عجايب
ياريت ينوبنى م الحب نايب
تحدفنى موجه
على صدر موجه
والبحر هايج
والصيد مطايب
أغسل هدومى
وأنشر همومى
على شمسه طالعه
وأنا فيها دايب

******

كأنى فلاح فى جيش عرابى
مات ع الطوابى
وراح فى بحرك
كأنى نسمه فوق الروابى
م البحر جايه
تغرق فى سحرك
كأنى كلمه من عقل بيرم
كأنى غنوه من قلب سيد
كأنى جوا المظاهره طالب
هتف باسمك
ومات معيد
كأنى صوت النديم
فى ليلك
بيصحى ناسك
يشدوا حيلك
كأنى طوبه من بيت فى حاره
كأنى دمعه فى عيون سهارى
كأنى نجمه فوق الفناره
تهدى الحيارى
والبدر غايب

********
يا اسكندريه
يامصرويه
على سن باسم
على ضحكه هاله
البحر
شباك ومشربيه
وانتى الأميره
ع الدنيا طاله

*******

يااسكندريه عاشق
وبدوى
ارتاح فى حضنك
والود ودى
يكون كلامى
عربون غرامى
وبالمحبه
ناخد وندى

يااسكندريه فيكى الغلابه
ع الرزق يسعوا ولايناموش
صبح صباحهم
رجع مساهم
وذاد شقاهم
وما ارتاحوش
يا عينى ع اللى الزمان تعبهم
وضاع تعبهم
وما التقوش
نزل شبكهم
فى بحر طامى
طلع شبكهم
على فاشوش
وفيكى بين البشر
ديابه
وفيكى فوق البشر
وحوش
وفيكى ناس مغرمين صبابه
لو خان زمانهم
ما بيخونوش
وفيكى خمرى
سلمت أمرى
ما أقدرش اشوفه
وما أغنيلوش

********

سمك يا ابنى يا اسكندرانى
فى العشق واحد
مالكش تانى
سمك ياابنى يا اسكندرانى
فى الحسن ساحر ومعجبانى

*********
سمك ياابنى
والعشق غيه
تبدأ بنظره
تبقى ملاغيه
وكل عاشق وله بهيه
وكل شاعر وله أغانى
وأنا اللى عشق الصبايا كارى
أعشق وأغنى ماقدرش ادارى
وأى نظره بتجيب قرارى
وايشحال عيونك
يا الأسمرانى
يـــــــا مصــــــــــر

فلاحينيك هما هما
فلاحين رمسيس وخوفو
جيش
لا عيش
ولا زمزمية
في الهجيرة تبل جوفه
المرض للموت يجره
و هو ماشي
يجر خوفه
اعمى
سالك سكه عتمه
خطوته على قد شوفه

ســـــــــلام للأرض

سلام يا أرضنـا
يا غيطان الفلاحين
يا ورشة الصنايعي
يا بحور الصيادين
يا مدرسة يا جامعه
سلام و الدنيا سامعه
يا دشمه يا خنادق
يا مدفع يا بنادق
واقفين و العزم صادق
تردوا المعتدين
ع الحق و السلام
سلام سلام سلام
سلام بأدين قويه
خشنين و عرقانين
يناموا المغربيه
و يقوموا مبدرين
يخضروا الجناين
و يطيروا الحمام
و يعمروا المداين
و يضيعوا في الزحام
سلام يحمي الحياة
و صناع الحياة
و يزيد الأنتباه
في الناس الطيبين
للحق و السلام
سلام سلام سلام
***
سلام يا ارضنا
يا جنات الزتون
يا اغلى عندنا
من حبات العيون
سلام نحميه بروحنا
و نصونه في القلوب
و نداوي بيه جروحنا
إحنا
و كل الشعوب
سلام يطرح اماني
و يزوق الأغاني
و يروق الأناني
و يسقي العطشانين
للعدل و السلام
سلام سلام سلام
***
بيـــــــان هــــــــــــام

هنا شقلبان
محطه اذاعه حلاوه زمان
من القاهره و من كردفان
و سائر بلاد العرب و اليابان
و من فنزويلا و ايضا ايران
و من اي دار او بلد مستباحه بفعل السياحه مع الأمريكان
***
هنا شقلبان
محطه اذاعه حلاوه زمان
نقدم اليكم بكل اللغات
مراسح و سيما و جميع الفنون
صحافه و منابر و تلفزيونات
و خطب في جوامع و جبنه و زتون
و نقزح و نركب جميع الموجات
و نبحث و نفهم في كل الشئون
و دايما نلعلع في كل الحالات
و لا حد سامع و لا يحزنون
و تسمع ما تسمع دا ما يهمناش
لأن احنا اصلا بناكل بلاش
فخليك في نفسك و ما تخليناش
نسلط عليك القلم و اللسان
***
هنا شقلبان
محطه اذاعه حلاوه زمان
يسر الأذاعه و ما يسركوش
بهذي المناسبه
و ما بندعيكوش
نقدم اليكم
و لا تقرفوش
شحاته المعسل
بدون الرتوش
شبندر سماسره بلاد العمار
معمر جراسن للعب القمار
و خارب مزارع و تاجر خضار
و عقبال املتك امير الجيوش
ما تقدرش تنكر تقول ما اعرفوش
ما تقدرش ايضا تقول ما اسمعوش
شحاته المعسل حبيب القلوب
يزيل البقع و الهموم و الكروب
يأنفس يأفين
يبلبع حبوب
و يفضل يهلفط و لا تفهموش
و تفهم ما تفهم دا ما يهمناش
لأن انت فاهم
و عامل طناش
ح تنكر و تحلف
ح اقولك بلاش
ح تتعب دماغنا و تتعب كمان
***
هنا شقلبان
محطه اذاعه حلاوه زمان
لأن المخبي ظهر و استبان
و كل المسائل بدت للعيان
و طلعت حكاوي و نزلت كمان
عن التهربيه و عن كيت و كان
و عن محسوبيه
و عن العبان
ظهر في المدينه كأنه الطوفان
وغرق مراكب وسوح غيطان
و بعض المراكب ح تغرق كمان
و ازمه مساكن و ازمه امان
و عالم بياكل في عالم جعان
و ريحه مؤامره في جو المكان
محطط خيانه مع الأمريكان
لدبح العشيرة و حرق الجيران
و فيه ناس بترغي
و لازم بيان
كما ابلغونا جميع الودان
لهذا و تلكم كمان
نقدم اليكم
عروسه و حصان
شحاته المعسل
و هذا البيان
***
هنا شقلبان
محطه اذاعه حلاوه زمان
بسم الله
سلام عليكم و سلمون و موز
و اما المسائل فهنجف و لوز
فيا اخوتي و يا اخوات
اليكم بياني كما هو آت
***
جميع المسائل تمام التمام
و كل الكلام ده مجرد كلام
فصبرا جميلا و لا تقلقوش
و شغل الضغاين انا ما اقبلوش
ما فيش اي حاجه
على الطلاق و العتاق بالتلاته ما في اي حاجه
و قدر كمان ان في اي حاجه
ما فيش اي حاجه
ما لوش اي لازم الجدل و اللجاجه و عيب ان عيل يسوق السماجه
و يعمل لي باللو و يعمل ديباجه
انا بطبعي ضضد السماسره الكبار
بحكم المنافسه و حكم الجوار
لكن مش في طبعي اني اعمل فضيحه لواحد زميلي هبش كام صفيحه
***

و كل اللي جاي مش قد اللي رايح
فيا ايها الشعب صهين تفلعص
مساء التنفس مساء الروايح
***
اخويا الأمير بزرميط الأيراني
بعت لي السنه دي عزمني و دعاني
انا قبلت طبعا و روحت العزومه
و كانت وليمه ما تحصلش تاني
دا ايه المحمر و ايه المكمر و ايه الصواني
انا دماغي تعبت و لفت صراحه
من الفخفخه و الهنا الأصفهاني
هناك يعني مثلا
اذا شربت طافيه تمز بكوارع
و بسطرمه ضاني
ما شفتش هناك ناس بتحقد عليهم
و لا ناس بتشتم فلان الفلاني
لأنه اشترى عزبتين من شطارته و حكمة ادارته
و طلع مباني
و بعد الوليمه استلمنا الهدايا
مفضض و مدهب
و قز و قيشاني
و طبعا اخويا الأمير قاللي حاجه هاقولهالكو طبعا اذا الوقت ناسب
ح يطلع لي عيل بدون اي حاجه و يعمل لي فلحس و يقعد يحاسب
دا حقد اشتراكي انا ما اقبلوش و لو دا ابني انا ما اعتقوش
***
كلام عن سماسره و كلام عن دعاره
حاجات مش صحيحه جمل مستعاره
و عايزين يخلوا البلد اردخانه
و عايزني اسيب البلد من زمان
و انا مش ح اسلم و اسيب الأمان ولا بالبوليس و النيابه كمان
فيا ايها الشعب كمل جميلك و صبرا
و اذ لم حتيجي المصاري و تاكل و تشرب كما يآتيلك
و تغرق في بحر العبيد و الجواري
و ترسم حياتك حسب ما يرائيلك و تملا الحواري فساقي و قصاري
تسبح بحمدك و تشكر جميلك و فضل الزباله و طفح المجاري
ختاما سلاما و احر كلاما
ضرورا يسود الهدوء و الوئاما
فماذا و الا ح طربقها والله و اهرب فلوسي و اسافر قواما
سلام عليكم
و سلمون و موز
بصفتي رئيسا
و ابــا
و جـوز
*****
مــــــــوال السمــــــــــــك

يا بحر قـــول للسمك
طـول ما الشبك فوقك
لا العشق كارك
ولا بحر الشطوط شوقك
انزل قرار النجــــــا
و اغطس ولا تقبش
موج العلالي خطر يا سمك
في النوه
و مغبش
داري على شمعتك
و تحب ما تحبش
الصبح نور يا سمك اعشق على ذوقك

*******************

ح نغنـــــــــــــى

ح نغنــي و دايمـــا
ح نغنـــــــــي
و نبشر بالخير و نمني
و نلف الدنيا الدواره
على صوت النغمة الهداره
و معانا المشرط و البلسم
في الكلمة الصاحية النواره
هو احنا كده
و حنبقى كده
ماشيين
عارفين
مع مين على مين
دايما واضحين
مش بين دا و دا
هو احنا كده
و حنبقى كده
***
الشارع بيتنا و غنوتنا
و الشارع اعظمها مغني
من لحن لحن الشارع كلمتنا
على لحن الشارع
بنغنـــــــي
و ان جعنا شبعنا
بتتقضى
ما نبعش الكلمة بميت فضه
و الصوت الشايل غنوتنا
بتراب الشارع متحني
هو احنا كده
و حنبقى كده
ماشيين عارفين
مع مين على مين
دايما واضحين
مش بين دا ودا
*********
خاص بمكتبة African_son الشعرية المتواضعة

اشجان البـــ الحديقة ـــت · 09-06-2008, 00:11

مختارات رائعة لذاك الشاعر الكبير

سلمت اناملك على ما خطت

لك الشكر الجزيل على المجهود

African_son · 09-06-2008, 20:56

تسلمي على مرورك اشجان