لو كان بحبك .... جد ( قصية)

الطاهر التاي · 05-06-2008, 19:07

لو كان بحبك جد .......... وحبو ليكي نظيف
ما قال كلام تافه ...... وكمان حقبر وسخيف
وقال السري أحسن .. حلال ... ودمو خفيف
وقال السري أحسن .. وكمان حلال يا لطيف
ومعاهو سرتي .. وضعتي .. وفتِي حد القيف

لو كان بحبك جد ...... وعارف قدرك العالي
كان مشى لأبوكي .......... يا السمحه طوالي
وما كان غدر بيكي ..... بكلامو اللذيذ الحالي
وكان سوى العديل........ صان شرفك الغالي

لو كان بحبك جـد وعارف يعني أيـه الحـب
كان مشى للعم والخال .... وكان مشى للأب
وكان سدَ مالك ........... خلى الأهل تطرب
وما كان زواجا سري .. شين أكيد... وكعب

لوكان بحبك جد ........... وكان أخو إخوان
ما كان غدر بـيكي ولي كل العهود قـد خان
وما ساقك في طريق الضيعة ... والأحزان
وخلى .... عمرك كلو ........ بالأسى مليان

لو كان بحبك جد ..... يا إنـتـي يا المقهوره
وبي معسول كلامو.... جمَل كتير الصوره
خلى أهلك وناسك كومبارس بدون شوره
وشاتك يمين وشمال ..... زي التقول كوره

لو كان بحبك جد ..... ما قال قوله منكوره
قال اهلك وناسك .... ما عندهم..... شوره
والزواج السري ..... ليكي..... بدل البوره
وغلطة العرفي ..... ياانتي .... ما مغفوره

لو كان بحبك جد ..... ما قال كلامو الفوق
ما بدد سعادتك ......... وختى فيكي الطوق
وبديتي عمرك فاجره ضياع كمان وعقوق
ولو صبرتي شـويه ... كان الزواج ملحوق

لو كان بحبك جد ........ يا انتي ما غشاكي
ولي درب الاسى والهم ..... والله ما وداكي
كان صان شرفك ...... وكان كتير عزَاكي
وكان توج كلامو بزواج صحيح أرضاكي

لو كان بحبك جد ... وكان صحيح ود ناس
ما مشَاكي دربا .......... ما ليهو أي أساس
وما سوى السوى كلو بدون ضمير حساس
وبدون شرف وخلاق .... بقى أخسً الناس

لو كان بحبك جد ......... والله ما غشاكي
وفي درب الضياع والغم ياانتي ما ودَاكي
خلاكي بين نارين .... وبرضو ما كفاكي
نار البهدلة .... ونار ........ القليب الباكي

لو كان بحبك جد ...... ياانتي ليه غشاكي
وفي درب الـضاع والهم يااني ليه وداكي
خلاكي ... بين نارين .... والندامه معاكي
شربـتي من الخـزى ومافي زول بطراكي

لو كان بحبك جد ........ ما غواكي وكذب
وبي اسم الغرام .... مـشيتي دربـا صتعـب
كان صان شرفك ...... قدرك ..... وتأدب
والحبيب الصادق .... ما بـسوي والله كعب

لو كان بحبك ....... يا بنيه ....... والله بجد
كان مشي ... لي أهلك ..... طلبك يد من يد
وكان عزَاكي .... بي كلامو الجميل .. الجد
ما جـرحك ... في شرفك خلى البيوت تـنهد

لو كان بحبك جد ........... والله ما أغواكي
وفي دربا كلو شوك ....... بعيد بعيد وداكي
وبي دمعا هميل وكتير..... يا انتي ما بكاكي
قام .. هجَ وهرب ... وللضياع ..... خلاكي

لو كان .. بحبك جد .... والله ..... ما خلاكي
ولو حب حقيقي .... حقيقي والله ما أغواكي
قام هج .. وهرب .. وعارو.... في ... جواكي
عافتك النفوس ..... وعافت كمان .... مرآكي

لو كان بحبك ... جد ... ما ضيع شبابك .. كلو
بقيتي حايمه معاهو .. زي التقول ....... ضلو
وعارك بقى معروف ... منو البنات ....... ولّو
ضوقي مر العار ..... وشوفي كيف .......ذلو[/size]

الفنان · 08-06-2008, 11:47

شكرا لك أخي الطاهر
تثير كلماتك قضية هامة وجديرة بالإنتباه ، خاصة من الأسرة وهي قضية الزواج السري أو العرفي أياً كان المسمى ، فهو شيء مخالف لما سار عليه الشرع والعرف الإجتماعي ..
بارك الله في قلمك
ونسأل الله أن يحفظ بناتنا من زلات الزمان وانتهاز ضفعاء النفوس

African_son · 08-06-2008, 14:49

والله استاااااااااااااذ عديل ليك والله احلى تحية ده كان وين الكلام يا فردة

تحيــــــــــــــــــــــــاتي

اشجان البـــ الحديقة ـــت · 12-06-2008, 11:07

كلمات ولا اروع
صح لسانك
ربنا يحفظ بناتنا
لك الشكر على هذه المشاركة
فلا حرمنا الله من مشاركاتك
سلمت ودمت بخير

Kinga · 12-06-2008, 14:46

قصة حقيقي من واقع ايامنا الحالي وفراغ (خواء ) الشباب الحالي وسعيهم وراء ملزات الحياة ووداع العفة والطهر والدين باسم الحب وأي حب ... حب الملزات ... ولكن اليس كل منا مسئول عن ما يحدث في مجتمعنا لماذا لا نصلح من انفسنا واين هم اهل العلم والرأى لنشر تعاليم الفضيلة و العفاف واين دور البيت والاسرة من ما يحدث كلنا مسئول ....
لك الف تحية وانت تلمس مكان وجع من الاوجاع