|
بطــانة الخــــير
بطــانة الخــــير
أنحن أولاد البطانة .. أرضنا بي موية المطر مروية
عاليات تروس بلداتنا .. مسنودة بالكوريق والطورية
خصبة ارضنا وكل مانجود .. عليها تجود علينا بي حنية
ماخذلتنا حاشا عليها .. أرضنا أرض البطانة غنية
لا بنعرف الساقية لا الشادوف ..مطرنا غزير صباح وعشية
نحن بنزرع غذاء السودان .. وبي زراعة الذرة نفوسنا رضية
فوتريتة ومايو وود عكر .. قناديل نجاض ما نية
تبش ,فقوس, سينات وقاقون .. نشبع نملا البطون باكرية
الغنيان فينا متواضع كريم .. والمسكين عملنا ليهو تكية
القدح الكبير بالأكل نملاهو .. ولبن مواشينا صافي مية المية
لقمة عصيدة بي ملاح روب .. فوقا السمن تاكلوها اكلة هنية
نحن نستبشر بي قدوم الضيف .. وبعد حد الكرم نزيدو شوية
ما نحن الكرم وارثنوا .. وأجدادنا القبيل تركوه لينا وصية
خلاوينا فاتحة ليل ونهار .. وشيوخ تدريس العلم مالكية
بطانة السنة والقرآن .. بي عون الإله دوام محمية
منو البكابر ينسى تاريخك .. وسيرتك في العلم أبدية
مداس السودان بدت فيك .. ومنك انطلقت ثورة تعليمية
صقور الجو شجاعة أهلك .. أسود غابات ضرية
أهلي أهل البطانة أنا بيكم افتخر.. ولو أقدر فيكم اكتب كمان الفية
فيكم أكتب كمان الفية
|
العرض العادي
