|
قالوا علينا مغتربين..
قالوا علينا مغتربين..
شوف فهم الناس الغلابة .. القالوا علينا مغتربين
شامين فينا العطــــــــور ..شايفين اللبس طقم طقمين
مساكين ياأهلنا الغبش .. انتو بي مظهرنا مغشوشين
تعالوا اقعدوا حدانا .. وكونوا معانا بس سامعين
انحنا صحيح والله مغتربين
الليل والنهار شايلنوا شغالين
لكن المرتب بس الف والفين
ناكل منو
ونشرب منو
نجامل منوا
نرسل منو
واتصالنا عليكم يا الاهل .. في كل شهر يومبن
المطاعم والملاحم
والمغاسل والمشاكل
والعربية ديك خليها ساي في كل يوم تدور بنزين
الجوازات والاقامة
والضرايب لي السفارة
والزكاة يشولوها منك ..عشان يدوها محتاجين
والسفر ميعادو قرب ..واهلنا لي جيتنا منتظرين
متين بنقطع لي التذاكر
متين بنركب في البواخر
متين بنوصل للبلد ..متين نصلكم ياأهلنا ياطيبين
تعال ياولد جيب القروش
الريالات والدراهم
والكباسيل والمراهم
وكل ماخطر بالبال ..وكل مانشوف نقول دايرين
دا لي بويا ودا لي امي
دا لي خويا ودا لي أختي
دا لي عباس دا لي محمد .. ودا اكبر من مقاس يسين
أحمد بدور شالين وعراقي
والجلاليب والطواقي
والملايات التقيلة عشان جيرانا ديلك للخشوم فاتحين
دايرين يضوقو قروشك . . يا تسمعلك كلاماً شين
تدق سدرك تتفنجر تقضي الناس ..
كان بالكاش وكان بالدين
أم العيال دايرة الدهب
والراكوبة بتدور الحطب
والبيوت خربانة تب
دايرة الرملة ودايرة الجير
ودايرة البوهية من سادولين
عبدالله داير الشيك عشان مايلحق العمرة
وعشوشة بتدور تمامة الخمرة والضفرة
وناس البيت من الويكة .. بدوروا يغبوا بس يوميـــــن
دايرين الكبدة والشية.. دايرين لحمة الضان السمين
عمي قال الكارو دايرة حصان
وخالي داير الكاش عشان مايفتح الدكان
وجدي قال طاحونة بس .. والله غيرها اصلو مادايريـــــــــــن
تدور من صباح الله ..تدقق لي عيوش الناس تمرقو طحين
الاهل ديل والمعارف
والنسابة الفي القضارف
والجداول والمصارف
دا كلو فوق راسك انت ..
يامغترب ضيعت من عمرك سنين
عايش غريب هموم وغموم ..
تجي السودان توزع ساي شمال ويمين
مرضت كتير وجع مصران ..معاهو عمى وطرش اضنين
ضغط سكر فشل كلوي ..توحوح ساي وكل الليل تشيلو أنين
ارفع معاي يديك لي الله .. نقرا الفاتحة ونقول آميييييييييييين
تتصلح بلدنا الخير يعم
أفقر زول يخش السوق .. يكون في جيبو مليونين
يكون في جيبو مليونين
يكون في جيبو مليونين
التعديل الأخير تم بواسطة : ود البدري بتاريخ 01-06-2008 الساعة 00:20.
|
العرض العادي
