هى اقيفن
نورا فيكن
نورا
نقاحة الجروف
نورا
حلابة اللبينى
للصغيرينو الضيوف
نورا
ساعة الحر يولع
تنقلب نسمه وتطوف
تدى للجيعان
لقيمه
وتدى للعطشان
جغيمه
والمخلى الحال مصنقر
فى تقاة الليل تندقر
تدى لى باكر بسيمه
تكسى للماشين عرايا
وفوقا
ينقطع هديمه
ماعرفتن
نورا انتن
قولن انتن
شن عرفتن
نورا
بت الواطه
اخيتى

نورا
اخت كل الغلابه
نورا
حاحاية الشقاوه
نورا
هداية الضهابه
الاراضى الياما ادت
نورا
بقت من ترابه
وماشى فى الاعماق سحابه
مشتهنها
والله جابه الله جابه
للجنوب طبلا يهدهد ليل مشاعر
ناس تعابه
وللشمال طنبور يسكت
دمعة الميتين
كابه
ماعرفتن نورا انتن
شن عرفتن
نورا
عايز تقرا
قالت
فوقا حيطهة الدنيا مالت
ختت الكراس
وشالت
منجلا
صالت بو جالت
لامن انجرت بو
شالت للتراب وكالت
فةق ايده كالت


مره فى الدونكا لدغت
جاء الفقير بالليل حواها
ويوم ملاها الهم قطايع
جاء البصير بالنار
كواها
ونورا
ماقدرت تمانع
تقنع الناس المعاها
مره شافت فى رؤاها
طيره تاكل فى جناها
حيطه تتمغى وتفلع
فى قفا الزول البناها