السيدة هيستريا و نانسي بت العم عجرم

vivid · 12-01-2005, 10:40

الخالة : يا بتووول ألبسي توبك و أمرقي بي سرعة

قالوا (هنادي) بت ود الشعيب جاتها (هستريا)

الله بسعلني أنا أول مرة سمعت فيها كلمة (هستريا)

كنت مفتكرها (اسم بنت) من بنات البندر

و قلت أكيد أنو (هنادي) جارتنا دي

جابت ليها واحدة من بنات (أم لعاب) بتاعين الخرطوم

في رحلة علمية و استكشافية عن (حي البهلة) الغامض.

اليوم داك التقول (زارقين لي ملحة)

أجقلب ذي حرامي الجداد

و قمت بي سرعة ذي الحمامة الرقاصة

خشيت لي في قميص كاروهات

و بنطلون جينز ماركة (لو راجل تعال لي بي قدام)

لعل و عسى أن يجود علي (رب البيت العتيق)

بي أخذ نظرة خاطفة من صاحبة الحسب و النسب

و العفاف السيدة (هستريا)

قنصت للسيدة (هستريا) صاحبة (هنادي)

بين المطبات الحلزونية التي يشتهر بها زقاقنا العويص

و نحلت ليك جمب عمود الكهرباء الوحيد بالزقاق

و رميت النظر زاوية قائمة

بعد شوية كدا لا أحرا و لا أدري

كان أشوف ليك حنطور (ود الكجم أمو)

و هو يحمل البنت (هنادي) للمستشفى

و من خلفه جيش من فلول و جحافل نساء (حي البهلة)

وهن يولولن و يلطمن في خدودهن

قالن أيه (قالن عندها هستريا)

انشاء الله الهستريا اليلمسوها بالعود

في اللحظة دي عرفت أن كلمة (هستريا) ليست كلمة صديقة

بل هي كلمة عدائية

تدل على حالة نادرة من حالات المرض النفسي

المدمر صحيا و اجتماعيا

إلى هنا الموضوع عادي

بس اللي ماهو عادي

الأسبوع الفائت سمعت لي كلام جرايد

أنو (الهستريا) قد داهمت (فتيات) الخرطوم

بي سبب الفنان المصري (ايهاب توفيق)

لكن الحدث الفريد الذي لم تكتبه الجرائد

أن (الهستريا) لم تكتفي بالـ (فتيات المراهقات)

و لكنها وجدت الجو المهيأ لها

كي تطال حتى (الأولاد النواعم)

و لم تفرق بين (راشد) و (هيام) و (هيثم) و (ندى).

انه الطوافان الأكبر

الذي يضاهي طوفان توسنامي

إنه الزلزال الخفي

الذي هو بمثابة بداية النهاية لأخلاقيات المجتمع السوداني

المحيرني أنو بي سبب فنان (مصري مسمسم و حليوني)

تدافع (الأولاد النواعم و بنات أم لعاب)

و الكل يحمل بيده مبلغ و قدره (400.000)

فقط أربعمائة ألف جنية لا غير عداً و نقداً.

بعد دا الله يستر علي أساتذتنا الفنانين الكبار

أبو (4000) جنيه و (6000) جنيه

تاني و الله إلا ياكلوا عيش عن طريق حفلات الصبحية.

اللهم نجنا من (الهستريا)

و أحفظ بناتنا بي (حي البهلة) من (الهستريا)

اللهم (أشفى) و أرحم (الأولاد النواعم)

و بنات (أم لعاب) حقين الخرطوم من وباء (الهستريا) المهلك

بس أمس سمعت لي طراطيش أخبار

أنو (نانسي عجرم) بدها تزور الشئ الذي يقال له (السودان)

بعد سماعها لحمى (الهسترية السودانية) المبالغ فيها،

و لو الخبر دا طلع صحيح فأنا أقترح الآتي نصه :

أولاً الناحية الأمنية: أن تقوم الدولة بنشر الشرطة العسكرية

و القوات الخاصة و قوات الصاعقة و المحمولة جواً

خارج مسرح العمليات بتاع الحفلة

و أن يكون الحرس الخاص لي (بت العم عجرم)

من الحرس الجمهوري القوي و المنظم.

ثانياً الناحية الصحية : توفير نصف أسطول

من سيارات الإسعاف كاملة التجهيز (لي بنات أم لعاب)

و النصف الآخر (للأولاد النواعم).

مع اسقاط جوي للكلينكس و التوشيز (مناديل الورق)

و أوراق الأوتوجرافات.

ثالثاً لتفادي حالات المراهقة المتأخرة التي تجتاح الخرطوم :

أقترح منع الجوالات أبوكاميرا من الد*** للمسرح

على الأقل

خوفاً على ناس المناطق التانية خارج العاصمة حا لا يتأثروا

ببلاوي المحمول

و لله في خلقه شؤون

فيفيديات
تم النشر في 12/01/2005

عاشق المراة · 12-01-2005, 11:37

هههههههههههههههههههههههههههههههههههههههههه

سلم اخوي vivid علي الموضوع

الجميل و الفكاهي

البلبل المغترب · 15-01-2005, 13:52

تسلم اخى على الموضوع الراقى والعميق جدا جدا ، وانا بدورى اطلعت على الموضوع بالانترنت ورايت الصور وتخيلت انها لبنات لبنانيات او مصريات ولكن من الموضوع عرفت انهن من السودان . ماشاء الله وتبارك الله على الرقى والتحضر .
اخوتى السودان باعتراف الدولة كم وتسعين بالمائة من مواطنيه يعيشون تحت خط الفقر ، طيب بالله عليكم كيف سمحت ظروفهم بدفع 400 الف دولار اى ما يقارب 200 دولار ، رغم انه اكثر من تذكرة حفل للسيدة فيروز فهو فى منظورى يمثل قمة الاستفزاز الشديد والمفاجئ للشعب السودانى ، وطبعا الاستفزاز المفاجئ فى القانون يغير صفة جريمة القتل العمد الى جريمة قتل شبه عمد او قل جناية القتل شبه العمد فما بالك بهذا ( هذا ليس تحريض لرمى الفنانين امثال توفيق بالبيض والطماطم لانه ربما يؤدى لاصابة الهستيريين بجروح .
اخوتى الموضوع باختصار لا الوم فيه الشباب او الهستيريين او او لكن اين الدولة ولم سمحت بهذا ؟ ولماذا حرمت اصالة نصرى من قبل من الغناء ؟ ولم حاربت الفن وحجمته فى التسعينات ؟ نشأ جيل لا يدرى شئ عن فنانيه وفنه لا يدرى عن الكاشف وعثمان حسين وابو الامين ووردى نشا جيل كارها لما هو سودانى واحب الفن العربى المستورد نعم حاول التعويض عن ما هو مفقود فى داخله ، ولا غرو ان يسمع لكاظم وغيره من الفنانيين المبدعيين وحتى ايهاب توفيق ولكن ليس على حساب فنه الداخلى وفنانيه .
صدقونى ايهاب توفيق وغيره سيجد من يحبهم او يشاهدهم من باب البوبار او التغيير ولكن حمى الهستيريا التى اصابت الشباب ما سببها ، هل هو الحب للفنان ، هل هو من باب البكاء على ال400 الف التى احسوا بها فى نهاية الحفل ، ام بكاء من الدائن هههههه ، ام من ماذا . انا قلنا حالة مراهقة لم لا تصيبهم عند غناء كابلى زيدان او حتى فرفور ومحمود مثلا لماذا ، الوضع غريب والسودان كل يوم جديد فى جديد .
لكن اختم بان الدولة هى من سمحت له بالد*** واقامة الحفل ، هى من ضيقت الخناق على الفن وشتى ضروب الابداع فى السودان ما بالك ان تكون لجنة اجازة النصوص من شيوخ جامعة القران الكريم ، نعم كانت كذلك فى وقت قريب اليس هذه عقبات .
ما بالك ان تصادر الشرائط وان يمنع الفنان من الغناء فى الجامعات .
اخوتى انظرو للموضوع من عدة نواحى ثم اعجرجو على الهتسروليكا او الهستيريين . ولنا عودة

Sit_Elkisra · 05-02-2005, 13:23

السلام عليكم,,,

فيفيد الشفت ... أثبت شفتنتك ... و اسمح لي في هذه المساحة اني اعبر عن ابداعك في تشكيل الواقع في قوالب ماسية جميلة ...

لك الشكر ...

رغم إني قاعدة في سوداني ده ,, لكن دايما الهيستيريات الزي دي بتفوتني ... لكن يا فيفيد ولّى زمن الإندهاش .. و أصبحت الهيستيريا المسكينة صفة تتبع السحاسيح الدايرين يعيشوا احرار ((يا قولهم)) ...

انا زولة بحب الفن .. بكل انواعو ... السوداني و الجن كلكي زاتو ... لكن ان تكون الهيستيريا القادمة من بلاد الكونسيرتات الصباحية ... و البارات الشبابية و الانحلال الاخلاقي البكون سمة لصيقة بشباب المجتمع الغربي .... ان تكون كده !!!! ...

فالحي الله و الدايم الله ... و امانة يالخرطوم مافيكي هيستيريا ....!!!

... دمت يالشفت ...

nahid · 16-02-2005, 15:23

ياخي انت يافيفيد زوله مبالغه عديل كده عليك الله كتر من موضايعك الزي ده عشان ناس الهستريا والهابي في ودي اختصار HAPPY valantien يفهمو احنا نااااااااااااااس سودانين لا دي طباعنا ولا دينا بيسمح بي كده ياريت كل الناس زيك كان البلد حاله انصلح وربنا يديك العافيه قول امين

عروس الرمال · 24-09-2007, 17:21

امانة ما عشنا وعرفنا يعنى شنو هستيريا الحمدلله عروس الرمال محروسة وما فيها جنس الهستيريا بتاعتكم دى
السرد جميل وشكراً
تحياتى

monytop · 24-09-2007, 19:53

سلامـــــــــــــات
انا شخصيا مامعترضه على حتت انو فنانين عرب او حتى اجانب يجوا السودان بالعكس لانو الفن لغة الشعوب وعلى الاقل يعرفوا السودان دا شنو .لكين انا بعترض على الهستريا دى مالايقه بينا نهائى صراحه.
مالوا لو الناس سمعت ورددت وهم قاعدين حلوين هادين الخلع دى ماليها لازمه ابد