أعزائي عشاق السودان
إليكم هذه الأبراج السودانية وهي لأنها سودانية بقت 11 برج
بدل المعروف 12 طبعاً الاختلاف وارد في اي شئ عندنا في السودان
كالعادة لاننا ما بنشبه الناس واذا في زول برجه مالقاه هنا الا يمشي
التجاني الماحي بعد كده ،، وقصدت انزل البوست ده في المنتدي العام
عشان اي زول يدخل ويقرا البرج بتاعه ... وإليكم الأبراج
برج الحمل
بوادر السعادة تحيط بك .. فقد شوهدت زوجتك تتحصل علي انبوبة غاز وتؤجر
رقشة .. تزداد السعادة فقد وصل ضيوف من البلد لزيارتكم .. أنتم محسودون
ف غازكم غاظ حسادكم ..
برج الثور
مفاجأة في إنتظاركم مساء اليوم .. نرشح أن الماسورة ح تكب موية .. ولكن
عليكم بالسهر والإنتظار حتي آذان الفجر ، سعادة غامرة لأن اللصوص لن يتمكنوا
من سرقتكم .. لأنكم صاحين طول الليل في إنتظار المــــــــــاء ...
برج السرطان
أنتم موعودون ببشائر عدة ،، فالكمساري سيعيد لكم الباقي ثم انكم ستجدون
الكبري فاتح ولا توجد كشة مرور وعندما تصلون تطلبون من السائق أن يقف لكم
فيقف في المكان الذي تريدونه تماماً وتتوالي الاخبار السعيدة....
برج الأسد
عندما تعود مع زوجتك من المستشفي بعد معاودة جاركم القديم تجدون مكتوباً
في باب البيت .. حضرنا ولم نجدكم محمود والعائلة ،، بشري وأسرته ،، حليمة وبناتها
عبد الدائم وناس البلد .. فتجد أنك وفرت حداشر قزازة بارد عادة أو ثلاثة حجم عائلي...
مبرووووك
برج العذراء
تتوالي المناسبات السعيدة أول الشهر ... خصومات من المرتب لمقابلة الكشوفات ..
عرس اربعة زملاء وزميلتين ..ولادة زميلة ..طهور أبناء الزملاء .. والعاقبة عندكم في
المسرات ..
أنباء حزينة ... عن وفاة سيد اللبن حقكم وسعيدة في نفس الوقت حيث اتضح انه
يحفظ ديونه ولا يكتبها في أوراق ..
برج الميزان
انتبه ....!!!
للأشياء الصغيرة مثل الجمرة الخبيثة والقربت تكمل ستذهب إلي مكاتب الدفع المقدم
لشراء الكهرباء ولكن ستجد الكهرباء عندهم قاطعة والجنريتر ما لاقين له جاز ....
أغنيتك المفضلة ستكون كم دمعة سالت من خدود الشمعة ...
برج العقرب
غيوم عابرة لأن ولدك طردوه من المدرسة عشان ما دفع المصاريف .. والسعيد
في الامر انه جاء البيت بدري وغسل هدومه وكواها ..
برج القوس
الحياة قرمزية ،، فاليوم ستصرف زوجتك الصندوق إذن سيتم تجديد الملايات
والستاير .. الجميل أن صرفة زوجتك الأخيرة...........
برج الجدي
ثمة ورقة في طريقها إليك فهي إما شيك من أخوك المغترب... أو خطاب
نقلية لمكان ما سمعت به قبل كده ولا في زول سالته منه قال ليك بعرفه
أو خطاب وصولك سن المعاش مبروك ح تتفرغ للأمل........
برج الدلو
كل شئ يدعو إلي التفاؤل ستجد أن الولية بدلت الجلابية السكروتة والبدلة
الوحيدة وبعض الهدوم القديمة بأطقم عدة فاخرة تسر الناظرين .. ح تشرب
الشاي بمزااااااااااااااااج ...
برج الحوت
خبر سار .... سيد الدكان وقف الديون وما كلمك إلا بعد ما شال الحساب..
مبروووك ستوفر الديون وستقلع عنها نهائياً .. أما الشهر سيمضي تحت ظلال
السخينة والبوش وننصح بالعدس فهو مفيد للصحة وبرضو الفاصوليا المفروكة
فانت ايضاً تحتاج للإكثار من البقوليات هذه الفترة .. وهي تجربة مفيدة ورائعة
لتمضي الشهر دون أن تأكل لحمة ... مبروك قد تتحول إلي نبااااااتي ...
منقول بتصرف
أعزائي القراء والباحثون عن الحظ اليوم هذه المساحة للدعابة وما تشيلوا هم
من الحاجات الجاية دي .. بس ابقوا مارقين
أبراج سودانية
العرض العادي
