يابنات رايكم شنو فى الشباب ( البسف الصعوط ) ..؟؟!!

**طائر النورس** · 22-04-2008, 21:37

احبتى الغوالى
كما هو معروف لدينا ان الصعوط او ( التمباك ) هو احد المكيفات التى تشتهر بها بعض الدول العربية ولكن اشهرها على الاطلاق الصعوط السودانى والذى نشتهر به كواحد من المكيفات المستخدمة بكثرة عندنا .
هناك الكثير من المضار والامراض الجسدية التى يسببها ( سف الصعوط ) ولكن كمان هناك بعض الاثار السالبة له اجتماعيا لمتعاطيه والذى غالباً ما لا يستخدمه فى الاماكن العامة الراقية او عندما يكون مع اشخاص مهمين او يطمح الشخص فى قبول احترامهم له من كل النواحى ...!!
اما البنات عندنا فتمسك اى واحدة تسألها تقول ليها رأيك شنو فى الصعوط تقول ليك ( اخيييييييييييييي ) او ( دة قرف ساى ) او ( ياى معقولة فى حد يكب وساخة زى دى جوة خشمو ) ؟؟!! ولكن فى النهاية بنلقاها ( مجكسة ليها واحد بسف ) او ( مخطوبة لواحد بسف ) او ( اتزوجت واحد بسف ) ..!!!
طيب قبل ماترتبطى بالشخص البسف دة كان ( مقرف ) وبعد ماارتبطى بيه بقى ( حلاااااااتو ) ؟؟!!
بالمناسبة انا مابسف وعمرى ماسفيت لكن بعرف بعض الفتيات العندهم راى قاطع فى موضوع الصعوط دة وفى انها مش ممكن تقرب ساااااااى من زول بسف وفى النهاية بلقاها ارتبطت بزول ( بسف ) ..!!!
فى الحتة دى انا بس عندى بعض الاسئلة للبنات عايز اعرف اجابتها منهم ..!!

1/ رأيك شنو فى الشاب البسف الصعوط ؟!
2/ هل ترتبطى بشخص بسف صعوط ؟!
3/ طيب لو كان داسى منك الحتة دة واتفاجئتى بعد الخطوبة او بعد الزواج انه بسف تعملى شنو ؟!

وعندى برضو سؤال للشباب وهو :-
لو كنت بتسف هل بتخجل من هذه العادة ولمن تكون امام من تحب مابتظهرها واللا انت من النوع الشجاع وبتسف قدام اى زول وفى اى مكان والعايزك كدة عايزك والماعايزك فى 60 ..؟؟!!
ودمتم احبتى

ناعس الاجفان · 22-04-2008, 23:34

وعندى برضو سؤال للشباب وهو :-
لو كنت بتسف هل بتخجل من هذه العادة ولمن تكون امام من تحب مابتظهرها واللا انت من النوع الشجاع وبتسف قدام اى زول وفى اى مكان والعايزك كدة عايزك والماعايزك فى 60 ..؟؟!!
ودمتم احبتى

لك التحيه والتقدير / طائر النورس

لقد أبدعت فى هذا الطرح الجميل والمهم فى الموضوع أنو شباب الزمن
دا غير ناس زمان طبعا ناس زمان الرومانسيات والحنحنات البنعيشه فى
اليومين ديل ما كانت عندهم الواحد بالسعوط ولا بال؟؟؟؟ مافى مشكله

لكن ناس نحن والواقعين فى محنه أهم حاجه المظهر امام الطرف الآخر
وعشان كده ماوارد أن تسف أمام المحبوبه لأنك ما ح تقلب الهوبه و
والعايزك كده دى ما تاكل عيش مع العولمه

ولك ودنــــــا

ارهابيه · 23-04-2008, 20:53

اقتباس:

المشاركة الأصلية كتبت بواسطة طائر النورس

احبتى الغوالى

1/ رأيك شنو فى الشاب البسف الصعوط ؟!
2/ هل ترتبطى بشخص بسف صعوط ؟!
3/ طيب لو كان داسى منك الحتة دة واتفاجئتى بعد الخطوبة او بعد الزواج انه بسف تعملى شنو ؟!

والله الولد البسف (الشي ده ) ما بخش راسي ومستحيل اتزوج واحد بسف .. ولو اتفاجات بيهو بعد الزواج
وطلع بسف

حا ارضى بالامر الواقع وحا اخليهو يسيبو وكراعوا فوق رقبتو

الأسد · 24-04-2008, 10:19

ازيكم .. معليش ما مفروض أخش هنا بس انا شايف مشاركتنا مهمه عشان تشوف رأينا كشباب لكل ردود أفعالكم ولا شنو .. (كده يا طائر عايز تلم البنات جنبك وتقعد براك ) ؟؟
يا ارهابية كان بيخلوه كان خلوه من قبل كده وما كان وصل مرحلة ينكشف وتهرشيه .. ( كلام نسوان ساي ) ولا بتهرش ليك ولا حاجه .. في حلول أفضل من كده حاولو ابتكروها ..

ارهابيه · 24-04-2008, 11:13

اقتباس:

المشاركة الأصلية كتبت بواسطة الأسد

يا ارهابية كان بيخلوه كان خلوه من قبل كده وما كان وصل مرحلة ينكشف وتهرشيه .. ( كلام نسوان ساي ) ولا بتهرش ليك ولا حاجه .. في حلول أفضل من كده حاولو ابتكروها ..

كلام نسوان ساي ؟؟؟ انت بتشكك في قدراتي في الهرش ولا شنو !!!
طيب بدل ما نحن نبتكر اساليب نقنع بيها الرجال يخلو البتاع ده ما هم يبتكروا طريقه من حسي يخلوهو
بدل ما يقرفونا يتعبونا ويتعبوا روحهم معانا ... لكن انت عارف للضمان حقو الزول يبتكر ليهو طريقه ويختها امكن يحتاج ليها لي قدام ( لا قدر الله ) ....

البرق · 24-04-2008, 22:33

حبيبنا .....

مسالخير عليك

تخرميه:

لما كنتا طالب ف الجامعه كان ف شلتنا في اتنين ولد وبت ...وكان في بيناتم علاقة حب وطيده جدا" جدا" .......

وكان صاحبنا بسف التمباك بس تحت تحت وكان داسي الحكايه دي من حببتو....وانا طبعا" كنتا وما زلتا بسفو نهارا" جهارا"

...........

وبعد سبعه سنوات اتزوجوا وهم الليله عندهم بت وولد....

صاحبي في الشهور الاوائل من الزواج كان بسف بالدس.....

وفي يوم من الايام مرتو فاتت للجيران ولمن رجعت البيت لقت صاحبنا خاتي السفه دقاااااااااااار

قالت ليهو:
اوووووووووووووووب علييي انتا بتسف يا حسام

قال لها :

بسف وبطلق كمان

قالت ليهو سف ساي الرجال كلهم بسفو

وبعد الحادثه دي بي سنوات حسام اقلع عن التمباك...

وف يوم من الايام قال لي:

عارف....انا الحاجه الوحيده الندمان عليها ان خليت التمباك...

وهو بفتكر انو اقلاعو دا تضحيه كبيره قدما هو لي زوجتو....

تخرميه اخرى:

الروايه اعلاه حقيقيه 100%

عروس الرمال · 26-04-2008, 10:15

طائر النورس مرحبا بعودتك من جديد وبمواضيعــك الرائعة والواقعية

ظاهــرة قبيحــة جدا ومقرفة شديد ودا كوم والكوم التانى شنو يا طائر تلقى الولد قاشر والشكه والحال والشعر مسرح وبلمع والعطر ما يديك الدرب وبعد دا شنو تلقى مده ايديو للكمسارى وشال منه كيس الصعوط " دا حاله اسمها بدون تعليق "

البسف صعوط ما زى البسجر سجائر امكن يكون ناس شخصايتهم ممتاز بس ناقصهم يخلو الصعوط

ما اظن وافق على زول بسف وانا عارفة

اما اذا اتفاجأته ما عارفة بالجد حاتصرف كيف بس ما اظن اقدر اخفى قرفى استيائى من الموضوع

ام زوبة · 26-04-2008, 14:27

اقتباس:

المشاركة الأصلية كتبت بواسطة طائر النورس

1/ رأيك شنو فى الشاب البسف الصعوط ؟!
2/ هل ترتبطى بشخص بسف صعوط ؟!
3/ طيب لو كان داسى منك الحتة دة واتفاجئتى بعد الخطوبة او بعد الزواج انه بسف تعملى شنو ؟!

بدايةً اخي النورس الموضوع ده يعتبر مشكلة كبيرة جداً والله ،
طبعا ً ابوزوبة ابوالكيف في العماري ، لكن اعمل شنو ؟ ده قدري، وكنت عارفة قبل الزواج
انه مدمن علي البتاع ده ، بس قلت يازولة ده ما مقياس للشخصية ...
وحقيقة ما كنت بقرف شديد لانه اخواني في البيت ماشاءالله من الخمسة طلع واحد بس
ماعنده دخل بالمكيفات دي لكن الباقين يدوك العجب ،،عشان كده ماكان في
مشكلة اني ارتبط بواحد بستعمل الصنف ده،، المهم بالنسبة لحتة انه لو كان
داسي مني الصعود ده ، كنت بزعل شوية لكن ما بعملها موضوع وقومة وقعدة ..
لكن برضو رغم الحاصل علي ابوزوبة ما بغير شئ من مشاعري واحترامي له ،، لكن بحاول
دايما علي قدر ما اقدر اقنعه او اتكلم معاه واجيب له الناحية الصحية والمضار والسرطانات (حمانا الله)
ومرة برضو الناحية الاجتماعية ومرة اقول له رمضان ده ممكن يكون فرصة للاقلاع ولكن ...
كله بدووووووووووووووون فايدة ،
ومرات برميه قصداً وبقول له رميته لكن لقيت برضو مااااااااافي فايدة
اصله الواحد لما ما يكون عنده نية وعزيمة اقوي من النية
مااااااااااا بخليه لو انطبقت السماء مع الارض ،، وفي ناس كتير بعدما يقلعوا عنه بتلقاهم تاااااااااني
رجعوا له من جديد وكأن شيئاً لم يكن ...
وعشان كده ياارهابية الحتة دي بالذات مابنفع معاها الارهاب

وحتخسري
وفي النهاية قدر أخف من قدر كويس انها ما كانت ادمان علي شئ تاني حرام

ام زوبة · 26-04-2008, 14:37

اقتباس:

المشاركة الأصلية كتبت بواسطة الأسد

ازيكم .. معليش ما مفروض أخش هنا بس انا شايف مشاركتنا مهمه

لييييييييييييه ياالاسد مامفروض تخش هنا ؟؟؟؟؟؟!!!!!!!!!

انت متييييييييين خليته ؟؟؟

عليك الله وريني عملت شنو عشان تخليه ؟؟؟

وريني عشان اعمله لابوزوبة ، ومن ناحية مشاركتك مهمة ، فهي فعلاً مهمة

(قالوا أسال مجرب.......)