يـا يابا لو ماه الظروف
عصرتني زي باقي الخلوق
خلتني اجري من الشروق
لامن تغيب شمس الله تب
واشوفو بي عيني الهلال
وبرضو المرتب ما بيحوق
يسقينا كوز موية زلال
شان اهدأ في الواطه واروق
واحسب زمن نلت الحقوق
واقومبو بواجبي كمان وافـوق
قبل الرويح تصل الحلوق
****************
يـا ابويـا هـاك قولي الصريـح
هاك ليهو بالعربي الفصيـح
الدنيا ما يـاهـا الزمـان
وناسا ما الناس الحنـان
ونعيما ما هو نعيم جنان
وامانا ما ياهو الأمان
الكان عزيز الليلة هـان
والمطمئن خسـر الرهان
****************
الحال صعيب بالحيل ومر
واحوالي صبحت ما بتسر
الفار شرد خلى الجحـر
ما البيت عدم سوس التمر
واصبحت كل ما يوم يمر
اعود واحسب في الشهر
لكين شهرنا صبح دهـر
اليلة يوماً طعمو مـر
وباكر بجينا طعم امر
وبقيتا غالبني الصبر
****************
يا ابوي بفصل ليك كتير
لو ترضى تقبلو لي عـذر
ما الدنيا ماها متل قبل
يوم كنت تدينا الشلن
شان نمشي بيهو المدرسة
كنا التلاته وما براي
كافينا تب شلن الفطور
وناخد معاو داندرمة
فول حاجات بنخلطو بالتمور
يايابا شلنك ما قليل
وما كنت ابدا زول بخيل
لكين زمنكم كان جميل
والكل رضيان بالقليل
ماسكين طريق واحد عديل
سالكين هدى الرب الجليل
بركاتو تتنزل تكيل
ورحماتو كان طلاً مطير
****************
يا ابويا يا رمز الكفاح
يا ابويا برجوك السماح
برجوك بالقول الصراح
كل ما ينادينا المنادي
أن هيا .. هيا على الفلاح
تدعوا الإله ..
يبدلنا بعد العسر يسر
ما انت اصلك زول صلاح
ما بتقرب اللقمة الحرام
وحريص على الرزق المبـاح
تقبل وقت رزقك يجيك
لو كسرة بي كمشة ملاح
****************
يا ابويا لو ماها الظروف
ما كت بسيبك قيد شبر
وكت يا ابوي
بفرد جناح
من رحمة يكسيك
زي وشاح
وكت يا ابوي
بشتل دواخلك إنشراح
وكت يا ابوي
بوليك كل حبي المتاح
وكت يا ابوي
بنداح عليك عطفي اندياح
وما كت بفوتك قيد شبر
ومن تاني برجوك يا ابوي
لو مره بس قصرت فيك
ارجوك تفتش لي عذر
وتذيدني في عفوك ورضاك
ما بي رضاك حالي دايما بنعدل
انا داير اكون
شقيش تقبل اكون معاك
وما ابقى عاق وقليل اصل