الرسالة الاولى
الاخت (....) كيف الاحوال اسعدنا انضمامك لمنتدانا العامر.
ونتمنى ان تسعدى معنا
(وش مبتسم ابتسامة بلهاء)
رد الرسالة الاولى
انا سعيدة بى رسالتك دى وهى ح تخلنى اكون عندى ثقة فى نفسى واواصل معاكم
شكراً عزيزى
(وش متحير فى كلمة عزيزى دى)
الرسالة التانية
العزيزة......... شنو ما شايفك امبارح فى المنتدى قلقتا عليك .. وحقيقى فقدتك
إن شاء الله انتى بى خير
(وش به نظرة ترمى لى بعييييييييد)
رد الرسالة التانية
والله عقدتنى عددديل كده .. معقول انا مهمة عندى للدرجة دى فعلاً انا امبارح ما دخلتا المنتدى لظرف
وما متخيلة انو فى زول ح يشعر انى ما جيت
انا يدوب لى اقل من اسبوع فى المنتدى
تانى شكراً ليك وما تنقطع عليك الله
الرسالة التالتة:
شكراً والله انتى مهمة عندى جداً
وانستى وحدتى
وملكتى قلبى
احس ان حروفك مرهفة
واحاسيسك متدفقة
مترسلى لى الايميل بتاعك ونتلاقى (فى الرمل الدقاقا) قصدى الماسنجر.
(وش مادى كورة)
رد الرسالة التالتة
نتلاقى مالوا انا ذاااتى داير اتونس معاااك برااانا
ده ايميلى (-----------------------)
فعلاً مسك الايميل وبداء طوالى ونسة
ساعة تطورت لى ساعتين
والكلام دخل الحوش وبقى ما قدر يستغنى عنها .. ويحلم بيها
ويهضرب كمان
وفى اخر ماسنجر
قالت ليهو خلاس ...
بكرة الساعة 7مساء ح انتظرك فى الماسنجر
صاحبك الساعة 6 قشر وتريح وطالع من البيت لقى ابوهو داخل
سلم عليهو وقال ليهو
يا ولد انتا وين ليك مده : ما شايفك وبقيت تجى متأخر
والله يا حاج المذاكرة والجامعة والدرش كتر علينا نحنا على ابواب تخرج
ربنا يوفقك يا ولدى .. الحمد لله انى لقيتك .. اخوك ده اتصل ليهو كم يوم وقال ح يجى الليلة الساعة 9 مساء من امريكا وانا كلمتا صاحبو كمال وقال ح يمشى ليهو المطار يا ريت لو تمشى حسى لى كمال وتمشى تستقبل اخوك فى المطار
حااااضر يا حاج
ومشى صاحبنا
ووصلوا المطار وهو زعلان جداً عشان فوت لقاء الماسنجر وخائف الزولة دى تكون منتظراهو ولو اتاخر ح تزعل منو !!!!!!!!!!!!!!!!!!!!!!!!!!!!!! (وش مادى بوزو)
عموماً وصل الاخ الاكبر وتم اجراء اللازم فى المطار وخرج هو وصاحبو واخوهم الصغير (بتاع الماسنجر).
ركب كمال ليقود العربية وركب فى المقعد القدام الاخ الاكبر وصاحبنا ركب ورا
وبدأت الونسة بين كمال وصاحبو (الاخ الاكبر) عن امريكا والغربة
فقال الاخ الاكبر والله لو ما الانترنت ده كان جنينا عددديل كده الواحد بيخش مواقع سودانية ويفرفش مع الشباب
وسكت حبة وقال لى صاحبو كمال
تعرف انا لى شهرين خشيت لى موقع سودانى اسمو(----) ودخلتا بى اسم بت ومجنن لى واحد جن شديد
والله العوير ده حسى يكون منتظر قلتا ليهو الليلة الساعة 7 تلقاهو مشرور حسى ..
اتخيلو صاحبنا الورا

شكرا علي رايك انا والله بحب اكتب وانقل المواضيع الذي دي لانها رهييييييييييييبة والله وزي ماقلتي بتحصل.
انا عندي بنت خالتي عايشة معانا هنا في لندن حصلت ليها وطلع الولد بيقراء معنا في الكلية وكان الكلام ده قبل شهور اول سنة لينا في الكلية لوشوفتوها منظرها كيف هي تحكي لي وانا اضحك قالت لي انشاء الله ياسحر تحصل ليك
لو شوفتو المكاوة البعملها ليها
عقد البنت بقت مابتقعد في النت.......!!!!!!!!!!!!
الخوف على الكاشف اخوتكم ( انا)!!!!!!!!!!
وسوري لو طولتا عليكم