من قصايد قهوة النشاط
too Late

آه..على قلبي الرهيف
على املا حملتوا دهور
قطعت بحور
سواد الليل على ليلين
صبرت كتير وراجي النور
ياقطعة البلور
وياست بنات الحور
عليك اسم الله يا حلما على مابجور
شفتك يوم عجبتيني
وقلت اقول انا البرلوم
بدور اخطب لامعقول
وبديت
احدث زول وادس من زول
لكن
صحيح الدنيا مابتصفا وتدوم للزول
وآه.. يالينه ياشتلة فريع البان
وياحلما بنيتو عليك
وعشت زمان أفكر فيك
لمن بان
بقيت فى الحيره والآهات
يادرة بنات شمبات
وياطفلى الرضيع المات
واتحسرت واتبهدلت ماخليت
ودمع العين نزل وقت
قال لى
Too Late
ضيعني الدكتور عشا البايتات
وعاد خطبوك لى زولا طويل وعريض
لابس ليهو نظارات
حافظ الكيمياء في راسوا
حاكي اشنابوا نصوا رباط
وعاد شغال وحالتوا كويسه باني البيت
ورضيتي بيهو طوالي ماقلتي
Too Late
بعد الحصل قالت لى مولانا
ادعو لينا معاااااك
اجيب ابريقي واتوضاء
وافرش الفروه واتمسك
وادعوا ليك بالدعوات
زمااان ماكنت بدعو ليك
وبفكر فيك
لكن الليلة بدعو عليك
بركة البغدادي ود جابر
وكيتن فيك يافلانه ابوك لايرضي لايخاطر
كل ماتجيبي سيرة الخطبة فى خشمك
اعاين ليك
احمر فيك يجرك
من طرف توبك
وطرفوا طويل واصل العرقوب
وامك برا تصرخ حي ووووب
سجمنا الليلة يابو فلان
لا لا ماك براك زعلان
ويقول ليها كان عرضتي على طلقانه
ويجرك على الديوان
وتصرخي جاااك بلا خجله تقول شيطان
ولمن يسمعوا الجيران
يدقوا الباب ويطنش تقول طرشان
ينطوا الحوش يكسروا الباب
يدخلواعليك
وابوك يقول حلفت يمين
البصلني قريب هدي السكين
يزحوا بعيد يختوا الخمسة في الاتنين
وتسمع جيت وتسمع جااك
وتسمع جاي يابا كفاك
عليك الله
وتسمع وحي وتسمع وي
وتسمع رو وتسمع كو
وامك برا تنبح هو
دميعاتك يصبن جو
وقتين ينقطع صوتك وتفتري تب
يمسكك كب ويخنقك خنقة بت الكلب