الشتل المفرهد وفى الجروف زاربنو
قارينلو الشيوخ من العيون حاونو
دلولو العدد فقرا المسيد كاربنو
وده الخلانا نتشلهت ونضهب منو

شبيهه الفي النال الصباح أماتو جن ختنو
قالو مشرف الدوله ،حال الشباب كيفنو
المليون ميل عموم واقفين سوا وراجنو
سال الله الكريم إدنيلنا ونقرب منو

الشتل المفرهــد وفي الجروف زارعنو
زاهي وفرعـــــــوا لادن أندادو مابداننو
زهرات الرياض ماخده الرحيق من دنو
السبب المخلي عيوني الغميد يجفنو
ودالأريل الحـــــــالي وصغير في سنو

فلو الصــافنات البي اللجـــــام عانفنو
ضامـــــر خصــرو أردافــو التقال قادنو
برق القبلي يشلع من وضاحــه سنو
ده الخلي العمده والفنان عليهو يغنو

البارح بعد ناس الفريق ماصنو
جانى السارى جاب مدح النبى الحابنو
طريت مولد النبى النحسب زمان راجنو
وواااكتلتنا أتارى انحن غافلييين منو

****
سقته عليهو سيدنا المافى أفضل منو
وقفته وحالى حال الغايب الحارسنو
ريقى الناشف المدحات خلاص بلنو
ودمعى العاصى نوبات الذكر دلنو

****

ياسيدى الرسول ظنا عليك ظاننو
شفاعتك تلحق الخايفنو والعاصنو
أمر الله وفرايضو نحن قاصريين منو
لكن عندنا (الباس ويرد) نقول حابنو

****

صحابتو البالنفس دين الكريم ناصرنو
الصديق وعمر المن ظهر بارنو
عثمان الملائكه الفوق بتستحى منو
والكرار بعرفوهو الكفر هايبنو

****

شوف رد حمزه عن عمرو للسألنو
قال أكبر رسولكم والأسن انا منو
عاين حال خبيب يوم الكفر صالبنو
ماتشوكك شويكه لو بيفرجو عنو

****

صفاتك ومعجزاتك نذكر العارفنو
الضب والبعير السيدو خايف منو
ورجَع عين قتاده وألمو زايل منو
وشاة جابر تكفى الجيش ويفضل منو

****

الصلاه والسلام جابه العماد حيث انو
راجيبه الشفاعه والله يقبل منو
بى عدد المطور عدد الطيور الغنو
يقابل ربو بالليو لاعليو لامنو