الاخوين عابر سبيل ومشمشة
تسلما على المداخلات الجميلة واللطيفة دى ... وهذا ان نم على شئ انما ينم على ان الجميع يجمل افق متفتح وافاق متعددة للحوار والنقاش ... وكلو ينصب فى اضفاء روح التعبير عن ابداء الاراء واستخراج الكوامن الوهاجة منكم ...
اخت مشمشة اذا مارد شخص تانى على الموضوع بعد كدة الرد الجاى حيكون رأيئ فى الموضوع دة ( اسف انى حرقت روحك ) عارف ( الشمار كاتلك ) ... بس اصبرى فى مثل عندنا بقول ( الصابرات روابح ) ... انشاء الله تكونى من الروابح ...
الاخ juba
شكراً لاضافتك التى اخرجت لنا رأى آخر معارض ( للشغلانة ) دى من اساسو ... يعنى رافض الموضوع قلباً وقالباً .... وقالها بكل صرامة وحزم ... يعنى اى نسيبة عندها اعتراض تدق راسها فى الحيطة ... المسألة عند juba الظاهر عليها مسألة مبدأ وقناعات بأشياء معينة لا يمكن ان تتزحزح ... احترم فيك ايمانياتك الراسخة وارائك القوية ...
فى اى زول او زولة تانى عندها رأى فى الموضوع دة واللا اقول رأيئ ... ؟؟ ياللا سريع احبتى ( مشمشة خلااااص ماقادرة تصبر اكتر من كدة )
تاني برجع ليك اخي النورس واقول ليك اني عملت تجربة في البيت جمعت كل النسوانات اللي بتتفوات سنين اغترابهم من السودان في عددها وشغلت ليهم الرابط واتفرجوا طبعا اللي ما كنت متوقعاهو حصل اني حصلت على ستة أراء مختلفة من اربعة بنات الاتنين التانيين متزوجات لكين فيها رابط عجيب:
الاولي حاجة متزوجة والاكبر سنا في المجموعة وليها سنيتن من السودان قالت بري بري يابنات امي ده شنو ده ديل ما عندهم اهل يلموهم والله كان رقيص العروس بقى فوق المسارح كان بقينا فرجة بنات اخر زمن .
التانية متزوجة وليها 12 سنة من السوادن طبعا العيون دمعت والبكاء ما احكي ليكم وبعد شوية تبشر وقالت إلا تمشي تتصل بالسودان وتسأل وتطمن على اخواتها وامها حكت لينا وقالت لما رقصوني ابوي حلف قال ما يدخل راجل إلا العريس والعريس قال لا ترقص بالرحد قدام الناس ابدا ما ممكن طبعا ياعابر سبيل دائما الكلمة الاولي والاخيرة لامها قالت لا بتي ترقص ويتعمل ليها جرتك ما حصل وفعلا عملت رقيص عروس .
الأولي في البنات والاكبر سنا 28 سنة ليها 11سنة من السودان مخطوبة طبعا بدأت بكل صراحة تعمل حركات البنات اللي بيرقصوا وتوصلت لانها حتعمل رقيص عروس "كولكشين " نظام رقصات من كل الاتجاهاتوبالمناسبة عملنا بروفة هههههههههههه
التانية مخطوبة عمرها 23 سنة قالت ولا يمكن انا ما بقدر اعمل ده كله بس بصراحة من غير اللبس البلدي حيكون عرسي اي كلام في اي حتة بس ما عارفة اعمل شنو وانا اساسا ما بعرف ارقص ؟؟؟؟؟
الثالثة طالبة في كليه الطب لم تري السودان على الاطلاق قالت متين اتخطب والله اعمل اربعين رقصة مش حبة كده والفساتين ده اشكال والوان قلنا اها ده الطب ولا بلاش قالت ده ما ليه علاقة بالطب دي فنون جميله تخصص فرعي !!!!!!!
الرابعة طالبة شهادة ثانوية ما زارت السودان ابدا بس بتتكلم سوداني كويس "نظام ستار اكاديمي "ههههههههه قالت هو لازم كل العروسات يرقصوا طيب ما يجيبوا رقاصة والسلام عموما ما اعتقد اني حأعمل حاجة زي دي بس اعملوا لي صبحية وما مشت تدرس لغاية ما انتهى العرض .
في النهاية الكل عاوزين يعملوا بالعادات والتقاليد السودانية ومعجبين بها بالرغم من ان بعضهم ما شرب ابدا من موية النيل ولا مشى على تراب السودان ولو سألتنى رأيي حأ قول ليك احنا السودان في دمنا مهما بعدنا بنبقى قراب والدليل ان الجميع في النهاية سالت دموع الشوق بمجرد ما شاف عادات بلد الاصالة
منـــــــــــــــــــــــــــــــــار
الاخت منار
والله بجد استمتعت كثيراً وتضاربت الافكار فى رأسى كثيراً وانا اقرأ هذا الاستطلاع الجميل واللطيف والذى اتى من شرائح مختلفة من اخواتنا وامهاتنا واختلاف اعمارهن وتوجههم الاكاديمى ....
طبعاً المسألة بقت عادة مترسخة فى عقول بناتنا يعنى اى واحدة بتحلم بالعرس بيتمن هذا الحلم وبكون جزء كبير منه عن كيفية الشكل الحترقص بيه ... يعنى ( رقيص العروس ) اصبح بالنسبة لمراسم الزواج السودانى كالكريمة التى تجمل ( التورتة ) .... اصبح هو نكهة الزواج والبهار الذى يطفى عليه الطعم الحقيقى للعرس عامة ...
بجد كانت سعادتى غامرة اكثر عندما ذكرتى ان البعض منهن زرف دموع الحنين الى ارض الوطن .... صدقينى احسست بموضوعى هذا كأنى نقلت لكن السودان بكل عاداته وتقاليده ... ووبالرغم من حديثهم كان به اختلاف اراء وتباين وجهات نظر الا انه كان اضافة واثراء للموضوع لنا وكأنهن مشاركات معنا فى المنتدى ... كانت هناك بصمات حوارية مختلفة وبصورة حية وصادقة كنتى اكثر من رائعة فى نقلها وتصويرها لنا بشكل ( دراماتيكى ) ( كوميدى ) بديع وخليتينا كأننا قاعدين وسطكن وبنتبادل فى الحوار الشيق اللطيف ....
الرائعة منار .... بلغى تحياتى الى جميع الاخوات والامهات اللائى كن فى هذا ( التجمع ) الجميل .... ربنا يحقق احلامهن جميعاً ويبلغهن مقاصدهن وان ينول كل واحدة لسة ماعرست مقصدها وان يتمم لها ( رقيص العروس ) .. بالصورة الجميلة التى تتمناها ... وبكل لكل الامهات انو الشفتوه دة هو الشكل الجديد لرقيص العروس ( نظام اقلى البن وحتى الشراء ) ... يمكن يكون عندكن فيه تحفظ واستغراب لكن يبقى الباب مفتوح ويبقى النقاش دائر حول اختلاف وجهات النظر وتباين الاراء ....
اتمنى ان يكون الرابط الذى يربطكن بالسودان اكبر بكثييييير من الرابط الورتكم ليه منار ....
اهل الكرامة طبعا عذرا الاسم جمع ما عارفة اناديك كيف
بس الظاهر اني ما قدرت اوصل ليك الصورة اللي انا بقصدها عموما الاخ العزيز النورس اختصر السكة مشكورا وقال انه نقل السودان إلينا بكل عادته وتقاليده وحتى لو كانت الصورة على حد تعبيرك هز وسط احنا شفنا فيها اكتر مما بدت عليه ، اما بالنسبة للتقليد البنات من ناحية عاوزين يقلدوا عاوزين بس ما عاوزين يقلدوا ستار اكاديمي لانهم في وسط كله ستار اكاديمي بل لما سخنت في عروقهم الدماء السوادنية الاصيلة وانا ذكرت مسبقا انها ما مسألة عادات مسألة دم سوداني رغم المسافات تقلدوا من اصالة بلد الاصالة وحسب فهمي البسيط في اللغة كلمة تقاليد جاية من التقليد وكمان ربنا يحضرني عرسك بس لو ما كان فيهو جرتك وبخ حليب احسن تعملوا في لندن ولكم منا الوفاء اهل الوفاء
منار
الأخوة الرائعين جدا روعة ملتقي النيلين في مقرنه وتلاحمه متجها صوب الشمال روعة النخيل الباسقات وروعة القرير وارض العز والحنان لكم خالص التحايا والاشواق .
اولا ارجو ان تقلبوني بينكم وواحد منكم لان الموقع اتاني هدية من احد الاعزاء فله ولكم التحية والسلام .
اما موضوعك رقيص العروس هي عادة زي ما قلت في الاول انها موروثة وما كل موروث بيتبع يعني تخيل العروس واقفه بفستانها وكل العيون حواليها انا ما بعرف زوجها بستحمل المساءلة دي كيف يعني بمجرد ما انتهي الرقصة وذهبوا شهر العسل يبقوا حديث الناس في مجالسهم وأنسهم لفترة حتى يأتي عريس من بعده وتبقي المقارنة بين الاثنين قائمة بالله ما شفت زوجته كيف ؟ ولابسه شنو ؟ والظاهر شنو ؟ المخفي شنو ؟ .
من حق العريس ان يفرح بعروسته ومن حقها ان تفرح بمن فازت به دون الاخريات لكن تظل الخصوصية قائمة يعني فيها شنو لو رقصوا هو الاثنين مع بعض في خاصتهم أي هي وهو فقط، وما تنسي انه كل سر جاوز الاثنين ضاع يعني بعض الاخوان والاخوات قالوا يمكن يكون في رقص لكن يكون في خصوصية او مثلا تحضره بنات صرف من غير رجال طبعا حتى لو حضرته العروس لحالها برضه بيتسرب لكن كون انها ترقص امام الجميع فده غلط والفرحة بالقلب وليس بالمظهر والحمد لله هي عاده نفسها اصبحت مخنوقة من الانسحار وبتنتهي طال الزمن او قصر ولكم خالص الاشواق
الأخوة الرائعين جدا روعة ملتقي النيلين في مقرنه وتلاحمه متجها صوب الشمال روعة النخيل الباسقات وروعة القرير وارض العز والحنان لكم خالص التحايا والاشواق .
اولا ارجو ان تقلبوني بينكم وواحد منكم لان الموقع اتاني هدية من احد الاعزاء فله ولكم التحية والسلام .
اما موضوعك رقيص العروس هي عادة زي ما قلت في الاول انها موروثة وما كل موروث بيتبع يعني تخيل العروس واقفه بفستانها وكل العيون حواليها انا ما بعرف زوجها بستحمل المساءلة دي كيف يعني بمجرد ما انتهي الرقصة وذهبوا شهر العسل يبقوا حديث الناس في مجالسهم وأنسهم لفترة حتى يأتي عريس من بعده وتبقي المقارنة بين الاثنين قائمة بالله ما شفت زوجته كيف ؟ ولابسه شنو ؟ والظاهر شنو ؟ المخفي شنو ؟ .
من حق العريس ان يفرح بعروسته ومن حقها ان تفرح بمن فازت به دون الاخريات لكن تظل الخصوصية قائمة يعني فيها شنو لو رقصوا هو الاثنين مع بعض في خاصتهم أي هي وهو فقط، وما تنسي انه كل سر جاوز الاثنين ضاع يعني بعض الاخوان والاخوات قالوا يمكن يكون في رقص لكن يكون في خصوصية او مثلا تحضره بنات صرف من غير رجال طبعا حتى لو حضرته العروس لحالها برضه بيتسرب لكن كون انها ترقص امام الجميع فده غلط والفرحة بالقلب وليس بالمظهر والحمد لله هي عاده نفسها اصبحت مخنوقة من الانسحار وبتنتهي طال الزمن او قصر ولكم خالص الاشواق
